NPP News

-Colombo, November 03, 2023-

“නීල හරිත ආර්ථිකය කෙසේ වෙතත් ජනතාවට සහ කර්මාන්තවලට නිල් වෙන්න විදුලි බිල වැඩිකර තිබෙනවා…” ජාතික ජන බලවේගයේ ජාතික විධායක සභික – පාර්ලිමේන්තු මන්ත්‍රී විජිත හේරත්

ජනතාවගේ ආදායම වැඩි නොවී, ජීවන වියදම එන්න එන්නම වැඩිවෙමින් තිබෙද්දී ආණ්ඩුව තවත් බර පටවනවා. මුදල් ඇමතිවරයා විදිහට රනිල් වික්‍රමසිංහ 2023ට අදාළ අය වැය ඉදිරිපත් කරද්දී “පරිසර හිතකාමී නීල හරිත ආර්ථියක්” මේ අවුරුද්දේ ගොඩනඟන බව කීවා. මේ අවුරුද්දේ ඩිජිටල් ආර්ථිකයක් හදන බවත් කීවා. අන්තිමට තුන් වතාවක් විදුලි බිල වැඩිකර 400%කින් විදුලි සැර වැද්දුවා. මේක ජනතාවට දරා ගන්න බැහැ. අලුතින් බිල වැඩි කළේ රුපියල් බිලියන 30ක් අලුතින් සොයා ගන්නා ලෙස ජාත්‍යන්තර මූල්‍ය අරමුදල නියෝග කළ නිසයි. ඒකක 30ට අඩුවෙන් විදුලිය පාවිච්චි කරන පවුල් ලක්ෂ 18ක් පමණ ඉන්නවා. ඒ අයට විතරක් නොවෙයි සියලු ගෘහ විදුලි පරිභෝගිකයන්ට, ව්‍යාපාරවලට, කර්මාන්තවලට මේ වැඩිකිරීමෙන් පහර වදිනවා. අග්නිදිග ආසියාවේ සිංගප්පූරුව සහ පිලිපීනය හැරුණු විට වැඩිම විදුලි බිල තිබෙන්නේ ලංකාවේ. අග්නිදිග ආසියාවේ ව්‍යාපාර මත වැඩිම විදුලි බිල තිබෙන්නේ ලංකාවේ. නීල හරිත ආර්ථිකය කෙසේ වෙතත් ජනතාවට සහ කර්මාන්තවලට නිල් වෙන්න විදුලි බිල වැඩිකර තිබෙනවා. ලබන වසරට අය වැය ඉදිරිපත් කිරීමටත් පෙර ජනවාරි පළමුවැනිදා සිට වැට් බද්ද 18% දක්වා වැඩි කළා. රනිල් වික්‍රමසිංහ එනකොට තිබුණු 8% වැට් බද්ද 15% දක්වා වැඩිකර බදු එකතු කරන පරාසයත් වැඩි කළා. ජනවාරි පළමුවැනිදා සිට 18% දක්වා වැට් බද්ද වැඩිකර අය කරන පරාසය තවදුරටත් වැඩි කරනවා. මේ නිසා භාණ්ඩ හා සේවාවල මිල තව දෙතුන් ගුණයකින් වැඩිවෙනවා. එහෙම තිබියදී ආණ්ඩුව තෙල් මිලත් වැඩි කළා. නමුත් තරඟකාරීව ඉන්ධන බෙදන්න සිනොපෙක්, සහ ඇමෙරිකන් සමාගම් ආවාම තරගය ඇතුළේ තෙල් මිල අඩුවෙන බව කීවා. දැන් තිබෙන්නේ ඉස්සෙල්ලාම මිල වැඩිකරන්නේ කවුද කියන තරගයක්. විදුලි බිල, තෙල් මිල, වැට් බද්ද, නැවත නැවතත් වැඩිකරමින් ජනතාව මත බර පටවනවා. අයවැයෙන් අලුත් බදු හඳුන්වා දෙන්නත් ආණ්ඩුව සූදානම් වෙනවා. පාරම්පරිකව ලැබෙන උරුමය මත වූ දේපොළවලටත් බදු ගහන්න සූදානම් වෙනවා. අවුරුදු 18 සම්පූර්ණ කළ සියලුම පුරවැසියන් මත බදු ගහන්නත් ලැහැස්ති වෙනවා. රනිල් වික්‍රමසිංහ ජනාධිපති වී ගෙවුණු අවුරුද්දයි මාස හතරක් තුළ ජනතාව මත තව තවත් පීඩාව පැටවීම හැර වෙන කිසි දෙයක් සිදුකර නැහැ. එක ඩොලරයකින්වත් විදේශ ණය කපාහැරගෙන නැහැ. අයි.එම්.එෆ්. එකේ පදයට නටන්න ගිහින් ජනතාවට ජීවත් වෙන්න බැරි ආර්ථිකයක් ඉතිරි කර තිබෙනවා.

මේ වගේ අසංවේදී පාලනයක් තුළ ඉදිරි අයවැයේදිත් ජනතාව මත පීඩාව පැටවීම පමණක් සිදුකරන බව ඉතාම පැහැදිලියි. රටේ දළ දේශීය නිෂ්පාදිතය වැඩි කර ආදායම් උත්පාදනය කෙරෙන කිසිදු පියවරක් පේන තෙක් මානයක නැහැ. මේ ආර්ථික මොඩලය අසාර්ථකයි කියන එක රනිල් – රාජපක්ෂ පාලනයෙන් තවදුරටත් තහවුරු කර තිබෙනවා. ඔවුන්ට ප්‍රශ්න විසඳන්න බැරි බව ඉතා පැහැදිලිව ඔප්පුකර තිබෙනවා. ආණ්ඩුවේ ජනතා විරෝධී ක්‍රියාමාර්ගවලට එරෙහිව ජනතාව පෙළ ගැසෙමින් සිටිනවා. තවදුරටත් සංවිධානාත්මකව පෙළ ගැසෙන ලෙස ආරාධනා කරනවා.

“ආණ්ඩුවේ ක්‍රියාමාර්ග, සරලව ගතහොත් මනුෂ්‍යත්වයට එරෙහි සාපරාධී ක්‍රියාමාර්ග ලෙස හඳුන්වන්න පුළුවන්…” ජාතික ජන බලවේගයේ ජාතික විධායක කමිටු සාමාජික – මහාචාර්ය අනිල් ජයන්ත

පවතින අර්බුද විසඳීමේ මාර්ගය ජාත්‍යන්තර මූල්‍ය අරමුදල බව ප්‍රකාශ කරමින් මහජනතාවට ඕනෑම පීඩනයක් ඇති කිරීමේ ක්‍රියාමාර්ගවල ආණ්ඩුව නිරත වී සිටිනවා. පාලකයන්ට වැදගත් වී තිබෙන්නේ බලහත්කාරයෙන් ලබාගත් බලය ගිලිහී යාමට නොදී, තවදුරටත් රැකගැනීමයි. වංචා දූෂණවලින් පිරුණු ප්‍රජාතන්ත්‍රී විරෝධී, ක්‍රියාමාර්ග සරලව ගතහොත් මනුෂ්‍යත්වයට එරෙහි සාපරාධී ක්‍රියාමාර්ග ලෙස හඳුන්වන්න පුළුවන්. අයවැයේ ප්‍රාථමික ශේෂය දළ දේශීය නිෂ්පාදිතයෙන් 2.3%කට ගෙන එන ලෙස මූල්‍ය අරමුදල නියෝග කර තිබෙනවා. ඒ තුළ තව තවත් බදු ඉහළ දැමීමත් පොදු ජනතාව වෙනුවෙන් දැරිය යුතු වියදම් කපා හැරීමත් සිදුකරමින් සිටිනවා. වැට් බද්ද 18% දක්වා වැඩිකිරීමේදී තවත් විශාල පීඩනයක් මහජනතාවට එනවා. නමුත් වංචා, දූෂණ නතර කරන්න ක්‍රියාමාර්ග අනුගමනය කරන්නේ නැහැ. ජනතාව මත ඍජු සහ වක්‍ර වශයෙන් විශාල බදුබරක් පටවලත් ආණ්ඩුවේ ආදායම දළ දේශීය නිෂ්පාදිතයෙන් 10%ට වඩා අඩු නම්, බදු වංචා සහ අකාර්යක්ෂමතා ගැන ඉතා පැහැදිලිව පෙනෙනවා.

මූල්‍ය අරමුදලේ ණය ලැබුණම ආර්ථිකය දියුණු කළ හැකි බව මුලදී කීවා. නමුත් මුලින්ම වංචා-දූෂණ නතර කළ යුතු බව ජාතික ජන බලවේගය හඬ නඟන විට උසුළු විසුළු කළ බව ඔබට මතක ඇති. නමුත් අද වනවිට වංචා-දූෂණ සම්බන්ධයෙන් මහජනතාව සැලකිය යුතු අවබෝධයක සිටිනවා. අනිත් පැත්තෙන් ආණ්ඩුව සාමාන්‍ය ජනතාවට භාණ්ඩ හා සේවා මිලදී ගැනීමේ හැකියාව (ක්‍රය ශක්තිය) අඩුකරනවා. ආර්ථිකය ඉදිරියේදී දියුණු කරන්න යම් හෝ උත්සාහයක් ගත්තත් ඒ නිෂ්පාදන මිලදී ගැනීමට ජනතාවට හැකිවෙන්නේ නැහැ. මේ නිසා භයානක තත්වයක් ඇතිවිය හැකියි. අසාධාරණයට එරෙහිව සමාජයේ ප්‍රතිචාර දක්වමින්, ආණ්ඩුවෙන් මනුෂ්‍යත්වයට එරෙහිව ගෙන එන ක්‍රියාමාර්ග පරාජය කරන්නත් අවශ්‍යයි. ඒ වෙනුවෙන් පාලන බල ව්‍යුහයේ වෙනසක් ඇති කළ යුතු බව අපි අවධාරණය කරනවා.

මාධ්‍යවේදීන් නැගූ ප්‍රශ්නවලට පිළිතුරු

ප්‍රශ්නය:- මිනිරන් සම්බන්ධයෙන් වෙනම සාකච්ඡාවක් ඇති වී තිබෙනවා. ඇත්තටම මොකක්ද වුණේ? මිනිරන්වලින් රටක් දියුණු කරන්න පුළුවන්ද?

පිළිතුර:- (ජ්‍යෙෂ්ඨ භූ විද්‍යාඥ – ඇන්ටන් ජයකොඩි පිළිතුරු දෙමින්) ප්‍රශ්නයට පිළිතුර නිවැරදිව පැහැදිලි කර ගැනීම අවශ්‍යයි. අපේ රටේ 1600 දී විතර මිනිරන් හඳුනාගෙන තිබුණත් වාණිජ මට්ටමින් හෑරීම පටන් ගන්නේ 1800න් පසුවයි. ලෝක යුද්ධවලදී උණ්ඩ නිෂ්පාදනය කරන්න මිනිරන් අවශ්‍ය වූ නිසා අපේ රටේ මිනිරන්වලට විශාල ඉල්ලුමක් නිර්මාණය වුණා. තාක්ෂණික දුර්වලතාවයන් නිසා අත්හැර දැමූ කුඩා මිනිරන් පතල් 3000කට වැඩිය අපේ රටේ තිබෙනවා. ලෝක යුද්ධවලින් පසුව වගේම න්‍යෂ්ටික අවි තැනීමත් සමග මිනිරන්වල අවශ්‍යතාවය අඩුවෙන්ම පටන් ගත්තා. නමුත් 2007 දී භෞතික විද්‍යාව පිළිබඳ එංගලන්තයේ මැන්චෙස්ටර් විශ්වවිද්‍යාලයේ මහාචාර්යවරුන් දෙදෙනෙක් වන Andrige Geim සහ Konstantin Novoselov කළ පරීක්ෂණවල වාර්තා නිකුත් කිරීමත් සමග නැවත මිනිරන් පිළිබඳ ඉහළ සාකච්ඡාවක් ඇති වුණා. “මොනෝලේයර් ග්‍රැෆයිට්”වල ඉලෙක්ට්‍රෝන හැසිරීම ඔවුන් සොයා ගත්තා. මෙය කෙතරම් වැදගත් සොයා ගැනීමක් දැයි කියනවා නම්, 2010 දී ඔවුන්ට භෞතික විද්‍යාව පිළිබඳ නොබෙල් ත්‍යාගය පිරිනමා තිබෙනවා.

ඒ නිසා මිනිරන්වල මිල ලෝකයේ විශාල වශයෙන් ඉහළ යන්න පටන් ගත්තා. වාහනවල විද්‍යුත් ආරෝපන බැටරි නිෂ්පාදනය කරන්න යොදා ගත්තේ, අර පර්යේෂණයේ ප්‍රතිඵලයක් වශයෙන්. ලෝක වෙළඳපොළේ මේ ආකාරයේ නව ඉල්ලුමක් ඇති වුණු අතර, අපේ මිනිරන් සම්බන්ධයෙන් අපනයනය කරන්න ආණ්ඩු මොනවාද කළේ? රජයට අයත්ව තිබුණු රාජ්‍ය පතල් හා ඛනිජ සංවර්ධන සංස්ථාව 1991 වන විට බාරව සිටියේ රනිල් වික්‍රමසිංහ ඇමතිවරයායි. මේ සංස්ථාව කර්මාන්ත ඇමතිවරයා හැටියට රනිල් වික්‍රමසිංහත් ජනාධිපති රණසිංහ ප්‍රේමදාසත් එකතු වී වසා දැම්මා. ඒ නිසා බෝගල සහ කහටගහ මිනිරන් පතල් දෙකත් එප්පාවල පොස්පේට් නිධියත් අභාවයට යන්න පටන් ගත්තා. මිනිරන් පතල් දෙක විකුණා දමන්නත් ඔහු ක්‍රියා කළා. කහටගහ පතල රාජ්‍ය බැංකු ණයක් මත ලබාගත්තේ එක්සත් ජාතික පක්ෂයේ ක්‍රියාකාරිකයෙක්. ඔවුන්ට මිනිරන් කර්මාන්තය පිළිබඳව කිසිදු අවබෝධයක් තිබුණේ නැහැ. පතලයෙන් ගොඩදමා තිබූ මිනිරන් විකුණා පතලයේ කටයුතුවලට ගෙනා උපකරණවල යකඩත් විකුණා විශාල මුදලක් සොයා ගත්තා. ඒ නිසා පතල අභාවයට ගියා. චන්ද්‍රිකා ආණ්ඩුව කාලයේ බෝගල පතලත් විකුණුවා. මිනිරන්වලින් ලබා ගන්නා ‘ග්‍රැෆීන්’ සිමෙන්ති නිෂ්පාදනයටත් ටයර් නිෂ්පාදනයටත් යොදවා ගන්නවා. නමුත් දැන් විශේෂ ඉල්ලුමක් තිබෙන්නේ ඉලෙක්ටි්‍රක් වාහන බැටරිවලට. ඉදිරි කෙටි කාලයක් තුළ විදුලි වාහන ඉල්ලුම 700%කින් පමණද, මිනිරන්වල ඉල්ලුම වාර්ෂිකව ඩොලර් බිලියන 27 – 28ක් පමණ වී යැයි පුරෝකථනය කර තිබෙනවා. 2035 වන විට එම වෙළඳපොළ ඩොලර් බිලියන 35 ඉක්මවනවා.

ලෝකයේ ඒ මිනිරන් ඉල්ලුමෙන් කොටසක් සැපයීම අපේ ආර්ථිකයේ මූලික කාර්යභාරයක් විය යුතුයි. ජාතික ජන බලවේගයේ ප්‍රතිපත්තිවල මේ සම්බන්ධයෙන් පැහැදිලිව දක්වා තිබෙනවා. මේ සම්බන්ධයෙන් සම්පූර්ණ විස්තරයක් අඩංගු ග්‍රන්ථයක් ජාතික විද්වත් සංසදය කියන අපේ සංවිධානයෙන් 2012 දී නිකුත් කරනු ලැබුවා. “අපෙන් කොල්ලකන ඛනිජ සම්පත්” කියන පොතේ මේ පිළිබඳ සම්පූර්ණ විස්තර ඇතුළත් වෙනවා. මේ ඛනිජ සම්පත් යොදාගෙන රටේ ආර්ථිකයට වඩා ඵලදායි ලෙස යොදා ගැනීම පිළිබඳව මූලික දැක්මකින් අපි ඉටුකර තිබෙනවා. ඔබ නැගූ ප්‍රශ්නය අදාළව අනුර කුමාර සහෝදරයා ඇමෙරිකාවේදී පැවැත්වූ ජන හමුවකදී වචනයක් පටැලවීම අල්ලාගෙන දඟලනවා වෙනුවට සිදුවිය යුත්තේ අපේ සම්පත්වලින් උපරිම ප්‍රයෝජන ගැනීම සම්බන්ධයෙන් පුළුල් සංවාදයක් ඇති කිරීමය. නමුත් දැන් සිදුවන්නේ වචනයක් අල්ලා ගෙන පුළුල් ලෙස මාධ්‍ය සාච්ඡා පවත්වමින් ජනතාව නොමග යැවීමයි. නමුත් ලෝකයේ ‘ග්‍රැෆයිට්’ සම්බන්ධයෙන් වෙළඳපොළ කොටසක් අත්පත් කර ගැනීම පිළිබඳ සංවාදයක් ගොඩනඟනවා නම්, එය රටට ඵලදායක බව අප හිතනවා.

විජිත හේරත් සහෝදරයා අදහස් දක්වමින්, ජාතික ජන බලවේගයේ නායක අනුර දිසානායක සහෝදරයා මේ වන විටත් ඇමෙරිකාවේ සිටින ශ්‍රී ලාංකිකයන් අමතමින් විශාල කාර්යභාරයක් සිදුකරමින් සිටිනවා. ඒ ජන හමුවලට ශ්‍රී ලාංකිකයන් අති විශාල ලෙස සහභාගී වීම දරාගත නොහැකි පිරිස්, වෛරයෙන් ඇස් අන්ධ කරගෙන මාධ්‍ය හමු පවත්වමින් විවේචනය කරන්න පටන්ගෙන තිබෙනවා. එක්සත් ජාතික පක්ෂය, සමගි ජන බලවේගය, අනුර සහෝදරයාගේ ඇමෙරිකානු ගමන පිළිබඳව වෙනමම, මාධ්‍ය සාකච්ඡා පවත්වමින් යනවා. එක්සත් ජාතික පක්ෂයේ නායකත්ව මණ්ඩලයේ සාමාජිකයන්, සමගි ජන බලවේගයේ මහා ලේකම්, මේ සාකච්ඡාවල ප්‍රමුඛත්වය ගෙන තිබෙනවා. මේ විදිහට මාධ්‍ය සාකච්ඡා පවත්වන්න සිදුවීමෙන්ම ඔවුන්ගේ බංකොලොත් බව පැහැදිලි වී තිබෙනවා. ජාතික කොඩිය සහ ඇමෙරිකානු කොඩිය ඒ රැස්වීම්වලට යොදා ගැනීම ගැනත්, වෛරයෙන් ඇස් අන්ධ වුණු අය කතාකර තිබුණා. නමුත් මේ රටේ ජනතාවගේ ඇස් අන්ධ වී නැහැ. ඔවුන් ශ්‍රී ලංකාවේ ජාතික කොඩියත් ඇමෙරිකාවේ කොඩියත් දෙකම දැක්කා. සමගි ජන බලවේගයේ තිස්ස අත්තනායකට පෙනී තිබෙන්නේ ඇමෙරිකන් කොඩිය විතරයි.

මේවාට කලබල වී වැඩක් නැහැ. අපි අපේ විදේශ ප්‍රතිපත්තිය, ලංකාවට ආයෝජකයන් ගෙන්වා ගැනීම පිළිබඳව ඉතා පැහැදිලිව ප්‍රතිපත්ති ප්‍රකාශනයේ අඩංගු කර තිබෙනවා. ලෝකයේ දියුණු වුණු තාක්ෂණයත් එක්ක විශේෂයෙන් නැනෝ තාක්ෂණයත් එක්ක විදේශ විනිමය උපයා ගැනීම සම්බන්ධයෙන් අපිත් එක්ක වැඩකරන විද්‍යාඥයන් හොඳින් කරුණු අවබෝධ කරගෙන සිටිනවා. විදේශ ණය ගෙවීම පිළිබඳව අනුර සහෝදරයාගෙන් ඇසූ ප්‍රශ්නයට ලබාදුන් පිළිතුරෙන් තර්කානුකූල කොටසක් ලෙස ‘ග්‍රැෆයිට්’ ගැන සඳහන් කළා. එවැනි උදාහරණ තව කිහිපයක්ම තිබෙනවා. මේ ගැන පර්යේෂණ සිදුකළේ ජාතික ජන බලවේගය නොවෙයි. ලංකාවේ පේටන්ට් අයිතිය ‘සිංටෙක්ස්’ ආයතනය ලබාගෙන දැන් අවුරුදු 12ක් 13ක් විතර වෙනවා. ලෝක වෙළඳපොළෙන් වැඩි ඩොලර් ආදායමක් උපයාගන්න අපේ සම්පත් යොදවා ගන්නා ආකාරයයි; අනුර සහෝදරයා පැහැදිලි කළේ. වෛරයෙන් ඇස් අන්ධ වුණු තිස්ස අත්තනායකලාට, ආශුලාට, මොකුත් දන්නැති සමන් රත්නප්‍රියලාට අපි කියන්නේ බඹරු ආවත්, දෙබරු ආවත් සිනා සිසී අපි අපේ ගමන යනවා කියලයි. මෙතෙක් රට පාලනය කළ කිසිම ආණ්ඩුවක් අපේ මිනිරන් කර්මාන්තය නවීන වෙළඳපොළට ගලපා විදේශ විනිමය සොයා ගන්න සමත් වුණේ නැහැ.

ප්‍රශ්නය:- ඇමෙරිකන් ප්‍රතිපත්තිය සම්බන්ධයෙන් පසුගිය කාලයේ විවේචනාත්මකව කරුණු දැක්වූවා. ඒ ඇමෙරිකන් කොඩිය පිටුපස තබාගෙන දේශපාලනය කරන්න පුළුවන් ද?

පිළිතුර:- ලෝකයේ සියලු රාජ්‍යයන් එක්ක විදේශ සම්බන්ධතා පැවැත්වීම අපේ විදේශ ප්‍රතිපත්තියයි. සමාජවාදී කඳවුරේ රටවල්, බටහිර රටවල් වගේම අසල්වැසි ඉන්දියාව එක්ක අපි රාජ්‍ය තාන්ත්‍රික වශයෙන් ගනුදෙනු කරනවා. අපේ තිබෙන එකම ප්‍රතිපත්තිය සකස් කිරීමේ පදනම කරගෙන තිබෙන්නේ ‘පනහට පනහ’ යන්නයි. ඒ පදනමේ සිට සියලුම රටවල් සමග රාජ්‍ය තාන්ත්‍රික සම්බන්ධතා පවත්වාගෙන යනවා. ඒ රටවලින් ආයෝජන ගෙන්වන්න කටයුතු කරනවා. අපි එදා ඉඳලාම කියන්නේ අවශ්‍ය ප්‍රාග්ධනය, තාක්ෂණය, අපිට නැත්නම් ඒ දෙක ගෙන්වා ගෙන අපේ සම්පත්වලින් උපරිම ප්‍රයෝජන ගන්නා බවයි. හැබැයි වංචා, දූෂණ, කොමිස් නැහැ. ඕනෑම රටක් එක්ක ඍජු විනිවිද පෙනෙන සුළු ආකාරයෙන් කටයුතු කරනවා.

ප්‍රශ්නය:- විශ්වවිද්‍යාල ආචාර්යවරුන් සහ වෛද්‍යවරුන් උද්ඝෝෂණ ව්‍යාපාර පටන්ගෙන තිබෙනවා. ඔබලාගේ මෙහෙයවීමෙන් ඒවා සිදුවෙනවාද?

පිළිතුර:- අපේ රටේ විශ්වවිද්‍යාල පද්ධතියත්, රෝහල් පද්ධතියත් දැනුවත්ව කඩා දාන්න ආණ්ඩුව ක්‍රියාකරමින් සිටිනවා. විශ්වවිද්‍යාල ආචර්ය, මහාචාර්යවරුන්ට වගේම අනෙකුත් වෘත්තීයවේදීන්ට අසාධාරණ ලෙස බදු ගසා තිබෙනවා. ඒ තුළින් විශ්වවිද්‍යාල පද්ධතියත් රෝහල් පද්ධතියත් කඩා වට්ටවා තිබෙනවා. එයට එරෙහිවයි රට පුරා සංකේත වැඩ වර්ජන සහ විරෝධතා පැන නැගී තිබෙන්නේ. බදු ප්‍රතිපත්තිය වෙනස් කර, මේ ආයතන ආරක්ෂා කර ගන්න ආණ්ඩුව සමත් වෙන්න ඕනෑ. එසේ නොකළහොත් අපේ නිදහස් අධ්‍යාපනයත්, නිදහස් සෞඛ්‍යයත් මුළුමනින්ම කඩා වැටෙනවා. දැනටමත් විශාල කඩා වැට්ටීමක් සිදුකර තිබෙනවා. ඒ නිසා මේ ගෙන යන සාධාරණ අරගලවලට අපි සහාය පළ කරනවා. ඒ අරගල තුළ අපි සක්‍රීයව ඉන්නවා. වෛද්‍යවරුන් සහ ආචාර්යවරුන් විදේශ ගත වෙන්නේ මේ රටේ තිබෙන දේපොළත් විකුණා මදි අඩුවට ණයත් අරගෙනයි. පවුල් පිටින් යන ඔවුන් ආපසු එන්නේ නැහැ. රට ගොඩනඟන්න මේ ක්ෂේත්‍රවල වෘත්තිකයන් ඉතාම වැදගත්. ඔවුන් රට අත්හැර යාමෙන් සිදුවන්නේ තවදුරටත් රට කඩා වැට්ටවීමක්.

-Colombo, November 03, 2023-

පාසැල් අධ්‍යාපනයේ බර දෙමාපියන් මත පැවටවීම නතර කරන ලෙසත්, අධ්‍යාපනයට දළ දේශීය නිෂ්පාදිතයෙන් 6%ක් වෙන කරන ලෙසත් ආණ්ඩුවට බල කරමින් පාසල් සුරැකීමේ ජනතා ව්‍යාපාරය අධ්‍යාපන අමාත්‍යංශය ඉදිරිපිට පසුගිය නොවැම්බර් 02 දින පෙරවරුවේ විරෝධතා ව්‍යාපාරයක් පැවැත්වූහ. උද්ඝෝෂණයෙන් අනතුරුව පාසල් සුරැකීමේ ජනතා ව්‍යාපාරයේ කැඳවුම්කරු නාගස්තැන්නේ අරුණ හිමි, පාසල් සුරැකීමේ ජනතා ව්‍යාපාරයේ සභාපති යසරත්න දිසානායක ඇතුළු දෙමාපියන් කිහිප දෙනෙක් අදහස් පළ කළහ.

-Colombo, November 01, 2023-

ජාතික ජන බලවේගයේ නායක අනුර දිසානායක සහෝදරයාගේ ඇමරිකානු සංචාරයේ තවත් ජන හමුවක් පසුගිය නොවැම්බර් පළමු වන දා පැවැත්විණි. ඒ ඇමරිකා එක්සත් ජනපදයේ BOSTON, Worcester, Massachusetts හි දීය.

-Colombo, November 01, 2023-

ජාතික ජන බලවේගයේ පාතදුම්බර ආසන සමුළුව පසුගිය ඔක්තෝබර් 29 දා වත්තේගම නවයාලතැන්න ක්‍රීඩාංගනයේ දී පැවැත්වූණි. මෙම අවස්ථාව සඳහා ජාතික ජන බලවේගයේ ජාතික විධායක සභික, පාර්ලිමේන්තු මන්ත්‍රී විජිත හේරත්, ජාතික විධායක සභික කේ. ඩී. ලාල් කාන්ත, පාර්ලිමේන්තු මන්ත්‍රීති ආචාර්ය හරිනි අමරසුරිය, නාට්‍යවේදී ප්‍රසන්නජිත් අබේසුරිය ඇතුළු ආරාධිතයන් රැසක් සහභාගී වූහ. විශාල ජන සහභාගීත්වයකින් පැවති මෙම සමුළුවේ ප්‍රධාන දේශනවලට අමතරව ආචාර්ය නිකවැවේ පඤ්ඤාසේකර නාහිමියන්ද, හිටපු නාගරික මන්ත්‍රී මන්සිල් මුතාලිබ්, සමස්ථ ලංකා ගොවිජන සම්මේලනයේ මහනුවර දිස්ත්‍රික් සංවිධායක ඊ.එම්. බස්නායක ද අදහස් දැක්වූහ. පාතදුම්බර ආසනයේ නායකත්ව මණ්ඩලය මෙහිදී පත්කර ගන්නා ලදී.

-Colombo, October 31, 2023-

ඊශ්‍රායල සහ එක්සත් ජනපද යුධ යන්ත්‍රණය මගින් පලස්තීන ගාසා තීරය ඉවක් බවක් නොමැතිව විනාශ කරමින් සෑම විනාඩි 15කට වරක්ම කුඩා දරුවෙකු මරා දමමින් සිටින අතර ජනතා විමුක්ති පෙරමුණ ලෙස අපි, ජීවිත බේරා ගැනීමටත් ආහාර සහ වෛද්‍ය ආධාර රථ පෙළ පලස්තීන ජනතාව වෙත ළඟා වීමටත් වහා සටන් විරාමයක අවශ්‍යතාවය අවධාරණය කරමු.

පලස්තීනයේ අමානුෂික තත්ත්වය ඇති කළේ 1917 ට පෙර සහ වඩාත් නිවැරදිව කිවහොත් 1948ට පෙර පලස්තීනයේ ජීවත් වූ ජනතාව නොව එක්සත් ජාතීන්ගේ සංවිධානය ප්‍රමුඛ ජාත්‍යන්තර ප්‍රජාව විසිනි. බ්‍රිතාන්‍යයේ කුප්‍රකට බෙදා වෙන්කර පාලනය කිරීමේ ප‍්‍රතිපත්තිය හේතුවෙන් ඇති වූ ගැටුම්කාරී තත්වයන්ට විසඳුමක් ලෙස ඊශ්‍රායලය සහ පලස්තීනය නමින් වෙනම රාජ්‍ය දෙකක් පිහිටුවීමට එහි යෝජනාවෙන් පොරොන්දු විය. කෙසේ වෙතත්, වසර 75 ක් ගතවී ඇතත් එක්සත් ජාතීන්ගේ සංවිධානය සහ ජාත්‍යන්තර ප්‍රජාව ස්වාධීන පලස්තීන රාජ්‍යයක් පිහිටුවීමේ පොරොන්දුව ඉටු කර නොමැත. මෙම බරපතළ වගකීම් විරහිතභාවය සහ අධිරාජ්‍යවාදී දේශපාලනය හේතුවෙන් පලස්තීන ජනතාවගේ මෙන්ම ඊශ්‍රායල ජනතාවගේද පරම්පරා ගණනාවක් අපමණ වේදනාවන්ට සහ දුෂ්කරතාවලට ගොදුරු වී ඇත. ඒ නිසාම මේ ලේ වැකි අර්බුදයට එකම විසඳුම ලෙස අපි අවධාරණය කරන්නේ පලස්තීන සහ ඊශ්‍රායල රජයන්, එක්සත් ජාතීන්ගේ සංවිධානය සහ ශ්‍රී ලංකාව ඇතුළු ලෝකයේ රටවල් 136කට වැඩි ප්‍රමාණයක් එකඟ වූ පරිදි ස්වාධීන පලස්තීනයක් ස්ථාපිත කිරීමය.

යුධකාමීන්ගේ සහ එක්සත් ජනපද අධිරාජ්‍යවාදී රූකඩ රාජ්‍යයන්ගේ කුඩා කණ්ඩායමක හුදකලා විරෝධය මැද ක්ෂණික සටන් විරාමයක් සඳහා වූ එක්සත් ජාතීන්ගේ යෝජනාව 120ක් පමණ වූ ලෝකයේ අතිමහත් බහුතරයක් රටවල් විසින් අනුමත කරනු ලැබීම අපි අගය කරමු. ඒ අතරම නිව්යෝර්ක්හිදී යෝජනා සම්මත වුවද ඒ කිසිවක් ගාසාහි ක්‍රියාවේ නොයෙදවෙනතාක් මුළුමනින්ම නිෂ්ඵල බවද ප්‍රකාශ කළ යුතුව තිබේ. වසර 30ක කාලයක් පුරා එක්සත් ජාතීන් පදනම් කරගත් ලෝක රටාව දුර්වල කර විනාශ කළා වූ අධිරාජ්‍යවාදී ව්‍යාපෘතිය හේතුවෙන් එහි ප්‍රතිපත්ති ක්‍රියාත්මක කිරීමට හැකියාවක් නැති හුදු හඬක් පමණක් බවට පත්වී ඇති බව මෙයින් නැවත වරක් පෙනී යයි. එක්සත් ජාතීන් පදනම් කරගත් රටාව විනාශ කරනු ලැබ ඇත්තේ නේටෝව ප්‍රමුඛ කර ගත්, නීති රීති මොනවාදැයි කිසිවෙකු නොදන්නා, ඊනියා ‘නීතිරීති පදනම් කරගත් ජාත්‍යන්තර පරිපාටිය’ මගින් එය ප්‍රතිස්ථාපනය කරන බව කියමිනි. මෙම තත්වය, එක්සත් ජාතීන්ගේ ක්‍රමය (සැබැවින්ම එහිද බොහෝ දෝෂ ඇත) විනාශ කිරීමේ අධිරාජ්‍යවාදී න්‍යාය පත්‍රය පරාජය කිරීමට එකමුතු වන ලෙසට අධිරාජ්‍යවාදී නොවන ස්වෛරී රටවල් සියල්ල වෙත කෙරෙන හඬනැගීමකි.

එසේම, වත්මන් ගැටුම රික්තකයක් තුළ ඇති වූවක් නොවන බව ප්‍රකාශ කරන එක්සත් ජාතීන්ගේ මහලේකම්වරයා අගය කිරීමටද අපි මෙය අවස්ථාවක් කර ගනිමු. එම ප්‍රකාශය ගැටලුවේ මූල හේතුව ආමන්ත්‍රණය කර පලස්තීනුවන්ගේ නිදහස සඳහා වන ප්‍රයත්නයට ස්ථිර විසඳුමක් සෙවීමේ අවශ්‍යතාවය අවධාරණය කරයි.

මනුෂ්‍යත්වයට දැවැන්ත සදාචාර බලයක් ලබා දෙමින්, පලස්තීන ජනතාව උදෙසා සහයෝගීතාවය පළ කිරීම වෙනුවෙන් ලෝකයේ සියලු මහද්වීප නියෝජනය කරන බ්‍රසීලයේ, වොෂින්ටනයේ, ලන්ඩනයේ, රෝමයේ, දකුණු අප්‍රිකාවේ, කේරළයේ, මැලේසියාවේ, ඕස්ට්‍රේලියාවේ මිලියන සියගණනක් ජනයාට අපි අපගේ ගෞරවය හා උපහාරය පුද කිරීමට කැමැත්තෙමු. පලස්තීන ජනතාවට සහයෝගීතාවය පළ කරන ලොව පුරා සිටින ලක්ෂ සංඛ්‍යාත යුදෙව් ජනතාවගේ නිර්භීත හා මානුෂීය ප්‍රතිපත්තියටත්, දෙවන ලෝක යුද්ධ සමයේ නාසි ම්ලේච්ඡ ක්‍රියාවලට එරෙහිව යුරෝපයේ ප්‍රගතිශීලී ජනතාව විසින් භාවිතා කරන ලද නිර්භීත සටන් පාඨයක් වන ‘මගේ නමින් නොවේ’ යනුවෙන් ඊශ්‍රායල රජයට කියා සිටීම පිළිබඳවත් අපි අගය කිරීමට කැමැත්තෙමු.

මෙම තත්වය තුළ ජනතා විමුක්ති පෙරමුණ ලෙස අපි,

1. වහාම සටන් විරාමයක් ඇති කිරීම සඳහා වූ එක්සත් ජාතීන්ගේ යෝජනාවටත්,

2. 21 වැනි සියවසේ ඉතාමත් ම්ලේච්ඡ යුද්ධය නැවැත්වීමේ ක්ෂණික පියවරක් ලෙස දෙපාර්ශවයේම සියලුම සිරකරුවන් සහ ප්‍රාණ ඇපකරුවන් හුවමාරු කර ගැනීම සඳහාත් සහයෝගය පළ කරමු.

අවසාන වශයෙන්, පලස්තීනයේ සහ ඊශ්‍රායලයේ සාමය ස්ථාපිත කිරීමට ඇති එකම ක්‍රමය, නිදහස්, ස්වාධීන පලස්තීන රාජ්‍යයක් පිහිටුවීම අර්ථ ගැන්වෙන ද්වි රාජ්‍ය විසඳුම ක්‍රියාත්මක කිරීම බව අපි අවධාරණය කරනු කැමැත්තෙමු. ආසියාවේ අවසාන යටත්විජිතය අවසන් කර ඊශ්‍රායලයේ සහ පලස්තීනයේ ජනතාව සාමකාමීව එකට ජීවත් වීමට සැලැස්විය හැකි වනු ඇත්තේ එසේ කිරීමෙන් පමණි.

ජාත්‍යන්තර සබඳතා දෙපාර්තමේන්තුව

ජනතා විමුක්ති පෙරමුණ

2023.10.31

-Colombo, October 31, 2023-

පලස්තීනය තුළ සාමාන්‍ය ජනතාව ඝාතනය කිරීම වහාම නවත්වා ස්වාධීන පලස්තීනයක් සහ ස්වාධීන ඊශ්‍රායලයක් යන දෙරට සම්බන්ධයෙන් එක්සත් ජාතීන්ගේ සංවිධානය පිළිගෙන තිබෙන ප්‍රතිපත්තිය ක්‍රියාවට නැගිය යුතුයි කියන ස්ථාවරයේ ජනතා විමුක්ති පෙරමුණ ආරම්භයේ සිටම ඉන්නවා. 1948දී නිදහස් ඊශ්‍රායලය එක්සත් ජාතීන්ගේ සංවිධානය මැදිහත්වීමෙන් පිහිටුවූවත් නිදහස් පලස්තීනය මේ දක්වා පිහිටුවා නැහැ. දකුණු අප්‍රිකාවේ කළු ජාතිකයන් යටත් විජිකරණයට ලක්කර පීඩාවට පත් කළා සේ පලස්තීන ජනතාව ජීවත් වෙනවා. ඒ තුළ ඇති වුණු ගැටුමෙන් පසුගිය වසර 75 කාලය පුරාම පලස්තීන ජනතාවත් ඊශ්‍රායල ජනතාවත් පීඩා විඳිනවා. විශේෂයෙන්ම පලස්තීනයේ කොටසක් වන ගාසා තීරය තුළ 21වෙනි ශත වර්ෂයේ විශාලතම ඛේදජනක යුද්ධය ඊශ්‍රායල ආණ්ඩුව සහ ඇමෙරිකානු ආණ්ඩුව මගින් දියත් කර තිබෙනවා. දස දහස් ගණන් ජනතාව අවතැන්වී දරුවන් ඇතුළු දහස් ගණනක් මියගොස් තිබෙනවා. මේ නිසා අපේ ස්ථාවරය පැහැදිලි කිරීම වැදගත් කියලා අපි හිතුවා.

මේ යුද්ධය නිසා ලෝක ආර්ථිකය 5%කින් පමණ බිඳ වැටෙයි කියා, පුරෝකථනය කර තිබෙනවා. ඒ වගේම මැදපෙරදිග කලාපයේ ඇති වන ඕනෑම ගැටලුවක් තෙල් මිල සම්බන්ධයෙන් ශ්‍රී ලංකාවට බලපානවා. තව පැත්තකින් එම කලාපයේ ලක්ෂ 20කට ආසන්න ශ්‍රී ලාංකිකයන් පිරිසක් සේවය කිරීම නිසා බලපෑමක් ඇති වෙනවා. ලෝකයේ තිබෙන ඉතාම වැදගත් ගැටලු වෙනුවෙන් ස්වෛරී රාජ්‍යයක් හැටියට ශ්‍රී ලංකාවත්, ප්‍රගතිශීලී වමේ පක්ෂයක් හැටියට ජනතා විමුක්ති පෙරමුණටත් තිබෙන ස්ථාවරය පැහැදිලි කළ යුතුයි. ඔක්තෝබර් 07 වැනිදා හමාස් සංවිධානය විසින් ඊශ්‍රායල ජනතාවට එල්ල කළ ප්‍රහාරය සමග බටහිර යුධවාදී මාධ්‍යය ප්‍රචාරය කරමින් සිටින්නේ මේ ගැටලුව ඔක්තෝබර් 07 වැනිදා පටන් ගත්තා කියලයි. නමුත් 1948 සිට ඊශ්‍රායලය ස්වාධීන රාජ්‍යයක් ලෙස එක්සත් ජාතීන්ගේ සංවිධානයෙන් පිළිගත් වහාම අති විශාල පලස්තීන ජනතාවක් ඔවුන්ගේ ගම්වලින් පළවා හැරියා. එදා සිට මේ දක්වා ලෝකයේ විශාලතම අවතැන් ජනතාව හැටියට පලස්තීන ජනතාව සිටිනවා. මිලියන 14යි. එයින් මිලියන 6.9ක් පලස්තීනය තුළ සිටින අතර, බහුතරයක් වූ මිලියන 7.1ක් වෙනත් රටවල් තුළ සරණාගතයන් වී සිටිනවා. එම සරණාගතයින්ගෙන් බහුතරයක් ජෝර්දානය ඇතුළු පලස්තීනය අවට රටවල සිටිනවා. එක්සත් ජාතීන්ගේ සංවිධානය සහ ලෝක බලවතුන් විසින් ඊශ්‍රායලය බිහිකර, පලස්තීන රාජ්‍ය බිහි නොකිරීමෙන් මේ ප්‍රශ්නය වසර 75ක් පුරා ඇදී එනවා.

ඇමෙරිකාවේ නිව්යෝර්ක් ටයිම්ස් පුවත්පත 2021 මැයි 28 වැනිදා ඡායාරූප සහිතව ඊශ්‍රායල් ගුවන් ප්‍රහාරවලින් මිය ගිය දරුවන් හැට ගණනක් පිළිබඳව වාර්තා කර තිබුණා. ඔක්තෝබර් 07වැනිදා පලස්තීන සටන්කාමී සංවිධානයකින් ප්‍රහාර එල්ල කිරීම නිසා මේ ප්‍රශ්නය ඇති නොවූ බව අපි අවධාරණය කරනවා. 2007 සිට ඔක්තෝබර් 07දා දක්වා හයදහසකට අධික පලස්තීනුවන් සංඛ්‍යාවක් ද සිය ගණනක් ඊශ්‍රායල් ජාතිකයන්ද ඝාතනය වී තිබෙනවා. ඒ කාලය තුළ පලස්තීනුවන්ට අයිති ගම්මාන 170ක් පමණ ඊශ්‍රායලයට ඈඳාගෙන තිබෙනවා. ඒ ගම්වල සිටි පලස්තීන ජනතාව පළවා හැරියා. ගාසා තීරය ඩෝසර් කරමින් 8500කට අධික දරුවන් ඇතුළු ජනතාව මිය යාම ගැන ඇමෙරිකන් ජනාධිපති, ඊශ්‍රායල් අගමැති ඇතුළු යුධවාදීන් මිය යන සියලු දෙනා ත්‍රස්තවාදීන් ලෙස නම්කර තිබෙනවා. නමුත් බටහිර රටවලින් නිර්මාණය කළ Save the children කියන ස්වේච්ඡා සංවිධානයෙන් හෙළිකර තිබෙන්නේ සති තුනක් තුළ ගාසා තීරයේ මිය ගිය දරුවන් ප්‍රමාණය වසර පහක් තුළ ලෝකයේ යුධ ගැටුම්වලින් මිය ගිය දරුවන් සංඛ්‍යාවට වඩා වැඩි බවයි. මේ මිය යන්නේ සටන්කාමීන් නොව දරුවන් බව මේ සංවිධානයෙන් අවධාරණ කර තිබෙනවා. ඒ වගේම එක්සත් ජාතීන්ගේ සංවිධානයේ මහා ලේකම්වරයා සහ එම සංවිධානය විසින්ම නිකුත් කළ නිවේදනයක දැක්වෙන්නේ ඔක්තෝබර් 29 වැනිදා එක්සත් ජාතීන්ගේ කාර්යාලයේ ධජය අඩකුඹු කර ශෝක දිනයක් ප්‍රකාශයට පත්කර තිබුණා. එක්සත් ජාතීන්ගේ සංවිධානය විසින් ගාසා තීරයේ ක්‍රියාත්මක වැඩසටහන්වල සේවය කළ 59දෙනෙකු ඊශ්‍රායල් සහ ඇමෙරිකානු බෝම්බ ප්‍රහාරවලින් ඝාතනය වී තිබෙනවා.

යුධවාදීන් මේ ප්‍රශ්නය ඉස්ලාම්, ක්‍රිස්තියානි, යුදෙව් ගැටුමක් ලෙස අර්ථකථනය කරන්න උත්සාහ කරනවා. නමුත් අවුරුදු සියයකට වඩා පැරණි ක්‍රිස්තියානි දේවස්ථාන පවා ඊශ්‍රායල් ප්‍රහාරයෙන් විනාශ කර තිබෙනවා. ඊශ්‍රායලයේ තිබෙන ආණ්ඩුව සියෝන්වාදී ජාතිවාදී කණ්ඩායමක් බව ලොව පුරා සිටින යුදෙව් ජනතාව හඬගා කියමින් යුදෙව්වන්ගේ නාමයෙන් ගෙන යන මේ ප්‍රහාර නතර කරන ලෙස බලපෑම් කරමින් සිටිනවා. යුදෙව්වන් විසින්ම සියෝන්වාදී ජාතිවාදී කණ්ඩායමට එරෙහිව පෙන්වන මානවවාදී ගුණය සම්බන්ධයෙන් අපි අගය කරනවා. නිදහස් පලස්තීනයක් ඇති කළ යුතුයි කියන ස්ථාවරයේ වතිකානුවන් සිටිනවා. මෙතැන ඉස්ලාම් ක්‍රිස්තියානි ගැටුමක් නැති බවත් ඇමෙරිකාව ප්‍රමුඛ යුදවාදීන්ගේ මැදිහත්වීමක් තිබෙන බවත් ප්‍රකාශ කර තිබෙනවා. ඊශ්‍රායලය විසින් අද ක්‍රියාත්මක කරන්නේ දකුණු අප්‍රිකාව තුළ තිබුණු වර්ණ භේදවාදයටත් වඩා ම්ලේච්ඡ සංහාරයක් බව පිළිගන්නා ලෝකයේ රටවල් අතරට වතිකානුවත් ඇතුළත් වෙනවා. ආගමික ප්‍රශ්නයක් මත යුද්ධයක් සිදුනොවන බව ලොව පුරා ප්‍රගතිශීලීන් පිළිගෙන තිබෙනවා. පාප් වහන්සේ සහ වතිකානුවත් ඒ ස්ථාවරය දරනවා.

ජනතා විමුක්ති පෙරමුණ මේ සම්බන්ධයෙන් දරන ස්ථාවරය සම්බන්ධයෙන් සමහර අය විවිධ ප්‍රශ්න මතුකර තිබෙනවා. ශ්‍රී ලංකාව මේ ප්‍රශ්නය වෙද්දී ප්‍රහාරයන්ට විරුද්ධව සාධාරණත්වය වෙනුවෙන් ක්‍රියාකිරීමෙන් ලෝකයෙන් හුදකලා නොවෙන බව පැහැදිලියි. අවස්ථාවාදී දෘෂ්ටි කෝණයෙන් නොව මානවවාදී දෘෂ්ටි කෝණයෙන් බලා ජනතා විමුක්ති පෙරමුණේ ස්ථාවරය ගොඩනඟාගෙන තිබෙනවා. එක්සත් ජාතීන්ගේ සංවිධානයට ඉදිරිපත් කළ යෝජනාවකින් ආරක්ෂක මණ්ඩලයේ රටවල් 15න් 11ක් සටන් විරාමයකට යන යෝජනාවක් අනුමත කළා. නමුත් එක්සත් ජනපදයේ නිශේධ බලය පාවිච්චි කර සටන් විරාම යෝජනාව පරාජයට පත් කළා. ඉන්පසුව එක්සත් ජාතීන්ගේ සංවිධානය තුළ මහා මණ්ඩලයේදී සටන් විරාම යෝජනාවක් සම්මත කළා. එයට රටවල් 120ක් පක්ෂ වී රටවල් 14ක් විරුද්ධ වී රටවල් හතළිස් ගණනක් ඡන්දය දීමෙන් වැළකී සිටියා. ලෝකයේ අති බහුතරයක් රටවල් යුධවාදයට විරුද්ධව මෙය නතර කළ යුතුයි කියන ස්ථාවරයේ සිටිනවා. සටන් විරාමයට පක්ෂව ශ්‍රී ලංකාවේ විදේශ අමාත්‍යාංශයත් ඡන්දය පාවිච්චි කිරීම ගැනත් අපි අගය කරනවා. ඊශ්‍රායල් ආණ්ඩුවේ සහ අමෙරිකාවේ ගොඩට වැටුණොත් ලෝකයෙන් හුදකලා වෙනවා මිස ලෝකයේ රටවල් 138කට අධික ප්‍රමාණයක් නිදහස් පලස්තීනයක් පිළිගැනීම පදනම් කරගෙන අපි අපේ ස්ථාවරය සකස් කරගෙන තිබෙනවා. ඇමෙරිකාවේ රටවල් කිහිපයක් හැරුනහම අති බහුතරයක් රාජ්‍යයන් නිදහස් පලස්තීනයක් ඇති කළ යුතුයි කියන ස්ථාවරයේ අවුරුදු 50කට වැඩි කාලයක් සිටිනවා.

එක්සත් ජනපදය පවා මේ ප්‍රතිපත්තිය පිළි ගත්තත් ඔවුන් එය ක්‍රියාත්මක කිරීමට ඉඩ නොදී තමන්ට විරුද්ධව තමන්ම ක්‍රියාකිරීමේ තැනකට එක්සත් ජනපදය තල්ලු වී සිටිනවා. නිදහස් පලස්තීනයක් එක්සත් ජාතීන්ගේ සංවිධානය ඇතුළු අන්තර් ජාතික සංවිධානය 150කට වැඩි සංඛ්‍යාවක් පිළිගෙන තිබෙනවා. අද ලෝකයේ ඉන්න යුධවාදී කල්ලිය දකුණු අප්‍රිකාවේ වර්ණ භේදවාදී පාලනය සමග එක්වී එරට ජනතාවට විරුද්ධව ක්‍රියා කළා. නෙල්සල් මැන්ඩෙලා ත්‍රස්තවාදියෙක් ලෙස හැඳින්වූවා. නමුත් නෙල්සන් මැන්ඩෙලා සහ මුළු මහත් ලෝකයම එක්වී දකුණු අප්‍රිකාව නිදහස් කර ගත්තාට පසු ඒ පාලනය පිළිගන්න යුධවාදීන්ට සිදුවුණා.

මේ යුද්ධය නිසා ශ්‍රී ලංකාවෙන් ඊශ්‍රායලයේ සේවයට ගොස් සිටියදී මියගිය අනුලා රත්නායක සම්බන්ධයෙන් ශ්‍රී ලාංකිකයන් වශයෙන් වගේම පක්ෂයක් වශයෙනුත් කණගාටුවට පත්වෙනවා. ඊශ්‍රායලය තුළ රැකියා කරන ශ්‍රී ලාංකිකයන්ගේ ආරක්ෂාව තහවුරු කිරීමට ලංකා ආණ්ඩුව ක්‍රියාකළ යුතුයි. ගාසා තීරයේ සිට බටහිර ඉවුරේ සරණාගත කඳවුරුවලට පවා බෝම්බ හෙළමින් තිබෙන වටපිටාවක සේවය කරන ශ්‍රී ලාංකිකයන් සම්බන්ධයෙන් සොයා බැලිය යුතුයි. මේ අනාරක්ෂිත තත්වය යටතේ ඊශ්‍රායලය තුළ රැකියා ලබාදෙන්න ඇතැම් ව්‍යාපාරික ආයතන කටයුතු කරනවා. ව්‍යාපාරික උවමනාවන් වෙනුවෙන් අනාරක්ෂිත ප්‍රදේශවලට ශ්‍රී ලාංකිකයන් යැවීම වැළැක්වීමට ආණ්ඩුව කටයුතු කළ යුතුයි. මේ ගැටලුවට විසඳුම් සෙවීම සම්බන්ධයෙන් අපේ ස්ථාවරය වී තිබෙන්නේ පලස්තීනය සහ ඊශ්‍රායලය යනු දෙරටේම ජනතාව පිළිගන්නා විසඳුමක් සෙවිය යුතු බවයි. මේ ප්‍රශ්නය නිර්මාණය කළ එක්සත් ජාතීන්ගේ සංවිධානයට මෙය නිරාකරණය කිරීමේ මූලික වගකීමක් තිබෙන බවත් අවධාරණය කළ යුතුයි. අද තිබෙන නිදහස් ඊශ්‍රායලය රාජ්‍යය වගේම නිදහස් පලස්තීන රාජ්‍යයක් පැවතිය යුතුයි කියන ස්ථාවරය අපි අවධාරණය කරනවා. ආරක්ෂක මණ්ඩලයේ සභාපතිත්වය දරන බ්‍රසීලය මැදිහත් වී ප්‍රායෝගිකව සටන් විරාමයක් ඇති කිරීමට ක්‍රියා කළ යුතුයි කියන ස්ථාවරය අපි ප්‍රකාශ කරනවා. දෙපාර්ශ්වයම රඳවාගෙන තිබෙන සිරකරුවන් හුවමාරු කර ගත යුතුයි. ශ්‍රී ලංකාව කුඩා රාජ්‍යයක් වුණත්, අපේ හඬ ප්‍රබල නොවුණත්, එක උදාහරණයක් දක්වන්න කැමතියි. සූවස් ඇළ ජනසතු කිරීමේදී අද ගාසාවලට බෝම්බ හෙළනවා වගේ එදා ඊජිප්තුවටත් බලවතුන් බෝම්බ හෙළුවා. එදා 1950 දශකයේදී ශ්‍රී ලංකා රජය සූවස් ඇළ ජනසතු කිරීමට තිබෙන අයිතිය වෙනුවෙන් පෙනී සිටියා. ඒ වෙනුවෙන් පිහිටවූ රාජ්‍ය තාන්ත්‍රික කමිටුවල ශ්‍රී ලංකාව ක්‍රියා කළා. ඒ පිළිබඳව අදටත් ඇගයීමක් තිබෙනවා. එවැනි වාසියක් ශ්‍රී ලංකාවට ලබා ගැනීම වෙනුවෙන් සාධාරණ සහ යුක්තිගරුක ස්ථාවරයක සිට ක්‍රියාකිරීම අත්‍යවශ්‍ය වෙනවා.

“ජනතාවගේ ජීවිත ආරක්ෂා කර ගැනීමට ලෝක පරිමාණයෙන් සිදුවන මැදිහත්වීමේ කොටස්කරුවන් බවට අපිත් එකතු වෙනවා…” ජනතා විමුක්ති පෙරමුණේ මධ්‍යම කමිටු සාමාජික – වෛද්‍ය නලින්ද ජයතිස්ස

යුද්ධයක් කියන්නේම ඛේදවාචකයක්. යුද්ධය සම්බන්ධයෙන් තීන්දු ගැනීමට දායක නොවුණු ජනතාව හැමදාමත් පීඩාවට පත්වුණා. මේ වෙනවිට 8,000කට අධික පිරිසකගේ ජීවිත අහිමි වී ජීවත්ව සිටින්නන්ගේ ආහාර, ජලය ඇතුළු මූලික අවශ්‍යතා සපුරා ගැනීමට නොහැකි වී සිටිනවා. ගෝලීය බලවතුන්ගේ යුද අවශ්‍යතා හේතුවෙන් පීඩාවට පත්වුණු ජනතාව පිළිබඳව ජනතා විමුක්ති පෙරමුණ ස්ථාවරයන් සකස් කරගෙන තිබෙන්නේ, මනුෂ්‍යත්වය පදනම් කරගෙනයි. ජනතාවගේ ජීවිත ආරක්ෂා කර ගැනීම වෙනුවෙන් ලෝක පරිමාණයෙන් සිදුවන මැදිහත්වීමේ කොටස්කරුවන් බවට අපිත් එකතු වෙනවා. ලංකාව රටක් හැටියට සාධාරණත්වය වෙනුවෙන් ලෝකය ඉදිරියේ ගත් ක්‍රියාමාර්ග නිසා අද බංකොලොත් රටක් වී තිබුණත් ඒ ගෞරවය අදත් හිමි වී තිබෙනවා. දෙවන ලෝක යුද්ධයෙන් පසුව එක්සත් ජාතීන්ගේ සංවිධානය ගොඩනැඟුවේම මෙවැනි තීරණාත්මක ගැටුම්වලදී මැදිහත් වී ලෝකයේ ජනතාවට සාධාරණත්වය ඉෂ්ට කරන්නයි. එක්සත් ජාතීන්ගේ සංවිධානය ඒ වෙනුවෙන් මෙම ගැටුමේදී පවා නිකුත් කරන ප්‍රකාශ සම්බන්ධයෙන් අපේ ඇගයීමක් තිබෙනවා. අවසන් වශයෙන් ගැටුමට මුල පිරුවේ කවුද? යන්න සොයනවාට වඩා කාලයක් පුරා පවතින මේ ප්‍රශ්නයට විසඳුම් සෙවිය යුතු බව එක්සත් ජාතීන්ගේ සංවිධානයේ මහා ලේකම්වරයා කර තිබෙන ප්‍රකාශය ජනතා විමුක්ති පෙරමුණේ විශේෂ ඇගයීමට ලක්වෙනවා. ලෝකයේ මෙවැනි රටවල මනුෂ්‍යත්වය පිළිබඳව කල්පනා කරන ජනතාව මේ ගැටුම නිරාකරණය කිරීමට හඬ නැගීම ගැන ඇගයීමට ලක්කරන අතර එහි කොටස්කරුවන් වෙන්නත් අපි ක්‍රියාකරනවා. යුද්ධයට එරෙහිව යුදෙව් ජනතාව ගෙන තිබෙන ස්ථාවරයත් අපි අගය කරනවා. නිදහස් ඊශ්‍රායලය සහ නිදහස් පලස්තීනය සම්බන්ධයෙන් එක්සත් ජාතීන්ගේ ස්ථාවරය අනුව ක්‍රියාකරමින් එක්සත් ජාතීන්ගේ සංවිධානය සම්මත කරගත් සටන් විරාමයට ඉක්මනින්ම යා යුතුයි.