NPP News

-Colombo, October 24, 2023-

මෙම වසර තුළ පිට පිට තෙවෙනි වතාවටත් පසුගියදා විදුලි ගාස්තු වැඩි කරන ලදී. ඊට විරෝධය පාමින් ජාතික ජන බලවේගය විසින් සංවිධානය කළ පන්දම් විරෝධතාවය ඊයේ(23) රාත්‍රියේ මහරගමදී පැවත්විණි. එහිදී ජනතාවට තෙවැනි වරටත් ආණ්ඩුවෙන් විදුලි සැර!, අසාධාරණ විදුලි ගාස්තු වහා පහත හෙළනු!, IMF සතුටු කිරීමට ජනතාවට නැවතත් විදුලි සැර! ආදී සටන් පාඨ ඇතුළත් විරෝධතා පුවරු ජනතාව අත දක්නට ලැබිණි.

විරෝධතාවට එරෙහිව අධිකරණ නියෝගද සහිතව පැමිණි පොලිසිය ප්‍රධාන මාර්ග අවහිර කරමින් එයට බාධා එල්ල කරන්නට වූ නමුත් විරෝධය නතර කිරීමට නොහැකි විය..

මෙහිදී ජාතික ජන බලවේගයේ ජාතික විධායක සභිකයින් වන සුනිල් හඳුන්නෙත්ති, ලක්ෂ්මන් නිපුණ ආරච්චි, සමන්මලී ගුණසිංහ, මහින්ද රත්නායක, ව්‍රායි කැලි බල්තසාර් මාධ්‍ය වෙත අදහස් දක්වන ලදී. මේ සදහා පොලිස් විරෝධතා නොතකා විශාල ජන පිරිසක් සහභාගී වූහ.

-Colombo, October 24, 2023-

අපිට ප්‍රධාන කරුණු දෙකක් පැහැදිලියි. එක බලය ලබාගැනීම. දෙක මේ රට හැදීම. අපි හමුවේ තිබෙන්නේ ඔය අභියෝග දෙක. ලබන අවුරුද්දේ ඔක්තෝබර් වෙන කොට අපේ රටේ තිබෙන්නේ අලුත් පාලනයක්. ආණ්ඩු පෙරළියක් සිදුවන මැතිවරණ වළක්වන්න ඒ ගොල්ලෝ විශාල උත්සාහයක් දරමින් ඉන්නවා. ඒ උත්සාහය සාර්ථක කර ගන්න රනිල් වික්‍රමසිංහට ඉඩ නොදෙන බවත් අපි සහතික කරනවා. අද ජනතාව ඉවසිය නොහැකි තරමට පීඩාවට පත්වී සිටිනවා. නමුත් ඉවසන්නේ ලබන අවුරුද්දේ එන ජාතික මැතිවරණයේදී බලය පෙන්වීමේ අදහසින්. නමුත් රනිල් වික්‍රමසිංහ ඡන්දය නොතියා බලෙන් ඉන්න හදනවා නම්, ව්‍යවස්ථානුකූලව ඔහුට ඉන්න තිබෙන කාලයටවත් ඉන්න හම්බවෙන්නේ නැහැ.

රනිල් වික්‍රමසිංහගේ ක්‍රියාකාරිත්වයෙන් ඡන්දය නැති බව පැහැදිලි වෙනවා නම්, ගෝඨාභය දෙක සිදුවෙනවා. රනිල් වික්‍රමසිංහ මහත්තයා කියලා තිබෙනවා “යූ.එන්.පී.කාරයෝ ආඩම්බරයි, යූ.එන්.පී.කාරයෝ ණය නැහැ කියලා” ගමේ ඉන්න එක්සත් ජාතික පාක්ෂිකයන්ගේ සිට සියලු දෙනා ණය නැද්ද? රත්රං බඩු උගස් කරලා. ගොවියෝ වතුර මෝටරේ උකස් කරලා. ගේ හදාගන්න ණය වෙලා. හැබැයි ණය නැති කණ්ඩායමක් ඉන්නවා. රනිල් වික්‍රමසිංහලාගේ කණ්ඩායම බැංකුවට ණය නෑ, හැබැයි රටට ණයයි. රවි කරුණානායක, වජිර අබේවර්ධන, රුවන් විජේවර්ධන, සාගල රත්නායක වගේ උඩ ඉන්න අය බැංකුවලට ණය නැති බව ඇත්ත. හැබැයි ඒගොල්ලෝ රට ණය උගුලක හිරකළා. 1948 ඉඳලා 2015 දක්වා අවුරුදු 67ක් ණය ලබාගෙන තිබුණේ රුපියල් ට්‍රිලියන 8.5යි. නමුත් 2019 අවසන් වන විට ට්‍රිලියන 15ක් ණය කර තිබුණා. රනිල්ගේ අවුරුදු 05ට ආසන්න වශයෙන් රුපියල් කෝටි හයලක්ෂ පනස් දහසකින් රටම ණයකරුවෙක් බවට පත් කළා. 2022 දෙසැම්බර් 31ට අපෙ රටේ ණය ට්‍රිලියන 30යි. රට හිඟන රටක් බවට පත්කර ඒගොල්ලෝ ආඩම්බර වෙනවාලු. දැන් සියලු සම්පත් විකුණමින් සිටිනවා. අපිට තිබෙන්නේ එක පාරයි. පැරණි ගතානුගතික පිළුණු දේශපාලන ව්‍යාපාර වෙනුවට ශ්‍රී ලංකාව ලෝකයත් සමග අනාගතයට කැඳවාගෙන යන්නේ නූතන ශ්‍රී ලංකාවක් ගොඩනඟන ජාතික ජන බලවේගයේ පාලනයයි.

ඒ ගොල්ලෝ ජනාධිපතිවරණය වෙනුවෙන් වංචනිකයන්ගෙන් දූෂිතයන්ගෙන් සල්ලි එකතු කරමින් ලැහැස්ති වෙනවා. රටේ සම්පත් විකුණමින් යටිමඩි ගහන සල්ලි මැතිවරණයට ගන්න සූදානම් වෙනවා. මහින්දට බැසිල් වගේ රනිල්ට සාගල රත්නායක ඉන්නවා. සල්ලි එකතු කරන්නේ ඔහු. සමාජ මාධ්‍ය දඩයම් කර, ඔවුන් ඡන්දයට ලැහැස්ති වෙනවා. ඒ වගේම ජනතාවගේ විරෝධතා මැඩපවත්වන්න ත්‍රස්ත විරෝධී පනත් ගේන්න උත්සාහ කරනවා. ඒ ගොල්ලෝ ඡන්දයට ලැහැස්ති වෙන්නේ ඔය ආකාරයටයි. ජාතික ජන බලවේගය ඡන්දයට සූදානම් වෙන්නේ එහෙම නොවෙයි. අපේ ව්‍යාපාරයට විනාශකාරීන්ගෙන් අරමුදල් ලැබෙන්නේ නැහැ. මාධ්‍ය බලය, රාජ්‍ය බලය වගේ දේවල්වලිනුත් ඔවුන් අපිට වඩා උඩින් ඉන්නේ. නමුත් ඒ සියලු දෙනාට වඩා උඩින් මහජන බලය අපිට තිබෙනවා.

මහජන බලය සංවිධානය කිරීමේ ප්‍රධානම වැඩ කොටසක් විශ්‍රාමික ත්‍රිවිධ හමුදා සාමූහිකය ගොඩනැගීමෙන් සිදුකර තිබෙනවා. සමාජ ගරුත්වය, සමාජ පිළිගැනීම, වෘත්තීයක නියැලී සිටීම, ඒ නිසාම සමාජ වගකීමක් තිබීම වැනි ගුණාංග නිසා මේ සාමූහිකය විශේෂයක්.

රාජ්‍ය බුද්ධි අංශයෙන් ළඟදී සමීක්ෂණයක් කර තිබුණා. 2009ට පෙර විශ්‍රාම ගිය ත්‍රිවිධ හමුදා පවුල් 14,000ක් මෙයට යොදාගෙන තිබුණා. සමීක්ෂණයේ ප්‍රතිඵලවලින් කියැවුණේ ඒ පවුල්වලින් 90%ක් එන්.පී.පී. බවයි. විශ්‍රාමික ත්‍රිවිධ හමුදා සාමජිකයින් පමණක් නොවෙයි ගමේ ජනතාව සංවිධානය කරන්න බොහෝ වැඩකටයුතු අවුරුදු දෙකක් පුරා අඛණ්ඩව අප සිදුකර තිබෙනවා. ඡන්ද කල් දමමින් අපිට මේ තත්වය අල්ලාගෙන ඉන්න බැරිවෙයි කියලා ඒ ගොල්ලෝ හිතුවා. නමුත් තිබෙන තත්වය එන්න එන්න වර්ධනය කරමින් අපි ඉදිරියට යනවා. පසුගිය පෙබරවාරි මාසයේ මාතලේදී එකතු කර ගත හැකි වුණු ත්‍රිවිධ හමුදා සාමූහිකයේ සාමාජික සංඛ්‍යාව අටයි. අද මේ ශාලාව උතුරා යන්න තරම් පිරිසක් ඉන්නවා. රනිල් වික්‍රමසිංහ ජනතාව හමුනොවී ජනාධිපති බලතල උපයෝගී කරගෙන විවිධ පිරිස් එකතු කරනවා. ඒ හැර ජනතාව ආමන්ත්‍රණය කරන්න ඒ ගොල්ලන්ට හිතන්නවත් බැහැ. තව කෙනෙක් ජනතාව ආමන්ත්‍රණය කරන්නේ පන්සලක ආධාරයක් දීලා, ඉස්කෝලෙට බස් එකක් දීලා. නමුත් අපි අවුරුදු දෙකක් අඛණ්ඩව සියලු ක්ෂේත්‍රවල ජනතාව ඒකරාශී කරමින් නායකයන් ගොඩනඟමින් ඉදිරියට යනවා. අපට වඩා හැකියාව තිබෙන, දැනුම තිබෙන, අත්දැකීම් තිබෙන එළියෙ ඉන්න සියලුදෙනා එකතු කරමින් ඉදිරියට යනවා. තව අවුරුද්දකට ආසන්න කාලයක් අඛණ්ඩව මෙහෙම ගිහින් ජාතික ජන බලවේගයේ පාලනයක් සහතික වශයෙන්ම පිහිටුවනවා.

බලය ගත්තාට පසු මේ රට ගොඩනඟවා. ඒ වෙනුවෙන් වංචනිකයන්ට දූෂිතයන්ට දඬුවම් කර වංචාව දූෂණය නතර කර, වංචා කළ මුදල්, දේපළ නැවත අත්පත් කර ගන්නවා. මේ දක්වා වංචනිකයන්ට, දූෂිතයන්ට රැවටුනු ජනතාව අප කෙරෙහි විශ්වාසය තබන්නේ කොහොමදැයි සමහර අය අහනවා. අපි මාස 14ක්ම ඇමතිකම් දැරුවා. අපි කැබිනට් මණ්ඩලයෙන් එළියට ආව වහාම චන්ද්‍රිකා ජනාධිපතිවරිය අප අමාත්‍යාංශ වගකීම් දැරූ කාලයේ වංචා දූෂණ සොයන්න විශේෂ ජනාධිපති ඒකකයක් පත් කළා. ඔවුන් අවසානයේ වාර්තාව ලබාදුන්නේ කිසිදු වංචාවක් දූෂණයක් සිදුවී නැහැ කියලයි. ඒ වගේම අපිට නිල වශයෙන් ලබාදෙන පොලිස් ආරක්ෂාව ලබාගෙන නැහැ. අමාත්‍ය ධුර දරන කාලයෙත් එහෙමයි. අනෙක් මන්ත්‍රීවරුන් ඒ දවස්වල ලැබුණු ලක්ෂ 480ක වාහන පර්මිට් එක ගත්තා. අපි ඒ වෙලාවේ ගත්තේ ටොයොටා ඩබල් කැබ් රථයක්. මිල අවම වාහනය අරගෙන ආදර්ශ දී තිබෙනවා. පළාත් සභාවේ අපේ මන්ත්‍රීවරුන් 82ක් සිටි වෙලාවේ ඒ 82දෙදෙනාටම වාහන පර්මිට් ලැබුණා. අපි ඒවා ආපසු යැව්වා. තමන්ට ලැබුණු වාහන පර්මිට් විකුණපු නැති දේශපාලන ව්‍යාපාරයක් තිබෙනවා නම්, ඒ ජාතික ජන බලවේගය තුළ සිටින ජනතා විමුක්ති පෙරමුණ පමණයි. අපි අමාත්‍ය ධුර දැරූ කාලයේ ඇමතිකම්වලට වඩා රට ඉදිරියෙන් තබා දේශපාලනය කළ ව්‍යාපාරයක්. නමුත් අනික් අය එහෙම වෙන්නේ නැහැ. එක උදාහරණයක් කියන්නම්. මන්ත්‍රීවරු එක්ක ප්‍රශ්න ඇතිකර ගත්ත නෝනට මන්ත්‍රී ධුරය දුන්නේ සජිත් ප්‍රේමදාස. නමුත් එයාට ඇමති ධුරය දුන්නේ රනිල් වික්‍රමසිංහ. එයා අපේ පක්ෂයේ නම් පසුවදාම එළියේ.

අපි අපේ භාවිතය ගැන විශ්වාසය තබනවා. මෙතනට රැස්වී සිටින ඔබ අපව ඒ තරම් දන්නේ නැහැ. නමුත් ඔබ සැමදෙනා සම්පත් තුයියකොන්තා මහත්මයා, අරුණ මහත්මයා, රෝහණ මහත්මයා ගැන හොඳින් දන්නවා. ඒ අය ගැන අවිශ්වාසයක් තිබෙනවා නම් ඔබ මෙතනට එන්නේ නැහැ. අපව අවිශ්වාස නම් ඒ මහත්වරු මේ වේදිකාවට එන්නේ නැහැ. අනෙක් පැත්තෙන් අපට එක සැරයක් දීලා බලන්න. අවුරුදු 75ක්ම වැරදුණු එකේ පහකට දීලා බලන්න, ඔබට වරදින්නේ නැහැ. මේ රට ගොඩනඟන්න ඔබට තිබෙන වුවමනාව හා සමානවම හෝ සමහර විට ඊටත් වඩා වැඩි වුවමනාවක් අපට තිබෙනවා. මා මේ දේශපාලනයට ඇතුල් වෙන්නේ උසස්පෙළ ශිෂ්‍යයෙක් හැටියට. ආසන්න වශයෙන් දැන් අවුරුදු 35ක් පමණ මේ දේශපාලනයේ නියැලෙනවා. අපේ ව්‍යාපාරය විශාල කැළඹිලිවලට, අභියෝගවලට මුහුණ දුන්නා. ජනතාව අපව ප්‍රතික්ෂේප කළ අවස්ථා තිබුණා. 2019දී අපට 3% කියන ලේබල් එක ගැහුවා. ජනතාව අපට විහිළු කරන තත්වයකට මුහුණ දුන්නා. එහෙත් මොකක් වෙනුවෙන්ද අපි මේ දේශපාලනය කරන්නේ. මුදල් ඕනෑ නම්, තනතුරු ඕනෑ නම් ඉතා වේගයෙන් අලෙවි වෙන්න පුළුවන් මිනිස්සු අපි. නමුත් ඉතාම අසීරු තත්වයන්ගේදී වුවත් අපි මේ ව්‍යාපාරය පවත්වාගෙන ආවේ මේ රටට ඔබ අප එකතු වී අලුත් මාවතක් ලබාදිය යුතු නිසයි. අපි සියල්ල දරාගෙන හිටියේ කවර හෝ මොහොතක මේ රටේ ජනතාව අපව විශ්වාස කරන බව අවබෝධ කරගෙනයි. මේ රට වෙනස් කරනවා කියන සුබ සිහිනය අත් නොහැර සිටි නිසයි. මේ හමුවට පැමිණීමෙන් පෙන්නුම් කරන්නේ මේ රට වෙනස් කිරීමට ඔබ සූදානම් බවයි.

ශ්‍රී ලංකා නිදහස් පක්ෂය ගොඩනඟන කොට සමාජයේ සිටි යම් ගුණයක් තිබෙන පිරිස එයට එකතු වුණා. නමුත් ඒ මුළු ශ්‍රී ලංකා නිදහස් පක්ෂයම මහින්ද රාජපක්ෂ විශේෂයෙන් පාදඩකරණයට ලක් කළා. මහා ජාවාරම්කාර ව්‍යාපාර පෙළැන්තියක්, පාතාලය එයට උඩින් එකතු වුණා. දැන් මේ රට වෙනස් කළ යුතුයැයි සිතන හැමදෙනාම ඒ වෙනස කෙරෙහි විශ්වාසය තැබිය යුතු වන්නේ ජාතික ජන බලවේගය ගැන පමණයි. විනයක්, නීතියක්, රීතියක්, සම්ප්‍රදායක් නැති සියල්ල කඩා බිඳ දැමූ රටක් තිබෙන්නේ. ආගමික ස්ථාන ඇතුළු සියලු ආයතනත් මෙයට ගොදුරු වී තිබෙනවා. පොලිස්පතිවරයෙක් පත්කර ගන්න බැරි තත්වයකට පොලීසිය කඩා වැටී තිබෙනවා. එනිසා මේ සමාජය ගොඩනැගීමේදී ධනය, බලය, දුප්පත්, පොහොසත් භේදයකින් තොරව සැමදෙනාටම නීතිය එකසේ ක්‍රියාත්මක වන පාලනයක් අපි ගොඩනඟනවා. පොදු සමාජයේ මිනිසුන් අතින් වැරදි විය හැකියි. ජාතික ජන බලවේගයේ අය අතිනුත් වැරදි විය හැකියි. නමුත් ජාතික ජන බලවේගය ගොඩනඟන්නේ තරාතිරම නොබලා නීතිය හමුවට පැමිණවීමේ ආණ්ඩුවක්. පාර්ලිමේන්තුවේ ඇති වුණු සිදුවීමේ නෝනා හෝ මහත්වරු දෙන්නා අපේ පක්ෂයේ නම් පසුවදා ගෙදර යවනවා. රටට විනය ගේන, නීතිය හදන, ආදර්ශය දෙන තැනක් මෙහෙම වෙන්න දෙන්න බැහැ.

මත්ද්‍රව්‍ය ප්‍රශ්නය මෙතනදීත් කතා කළා. අදත් කෝටි 400ක කුඩු අසුවී තිබෙනවා. කෝටි 400ක කුඩු ගේන්න පුළුවන්නේ කාටද? මේ ජාවාරම නතර කරන්න බැරි නීතිය කාටත් සාධාරණව ක්‍රියාත්මක නොවන නිසයි. අපි එය කරනවා. දේශපාලකයා හරි සරල ඇවතුම් පැවතුම් තිබෙන පුද්ගලයෙක් කරන්න ඕනෑ. ඉතිහාසයේ කෝච්චියෙන් ආව මන්ත්‍රීවරු ගැන, මැරෙණ කොට බැංකු ගිණුමේ රුපියල් සියයක් තිබුණු මන්ත්‍රීවරුන් ගැන අපි අහලා තිබුණා. නමුත් අද වේගයෙන් සල්ලි සොයන මාධ්‍යයක් බවට දේශපාලනය පත්කර ගෙන තිබෙනවා. කැත, මජර, ත්‍රාඩ දේශපාලන සංස්කෘතියක් ගොඩනඟා තිබෙනවා. ඒ වගේම ඔවුන්ගේ ජීවිත සාම්ප්‍රදායික, මජර කැත ජීවිත බවට පත්වී තිබෙනවා. මේ තත්වය වෙනස් කර, අනෙකාට ඇහුම්කන් දෙන, වගකියන, මහජනයාගේ දුක වේදනාව දැනෙන නව දේශපාලන සංස්කෘතියක් සහිත ආණ්ඩුවක් ජාතික ජන බලවේගයෙන් ගොඩනඟනවා. ගුණාත්මකව මේ වෙනස්කම් කරන අතර, ආර්ථික ක්ෂේත්‍රයේ විශාල පරිවර්තනයක් කරමින් රට ගොඩනඟන්නත් ඕනෑ.

එහිදී කෘෂිකර්මාන්තය මූලිකයි. විවිධත්වයක් සහිත බීජ සම්පතක් අපේ රටේ තිබුණා. අපේ රටේ ජෛව විවිධත්වයට ගැලපෙන බීජ තිබුණා. නමුත් අපේ රටේ ඒ බීජ සියල්ල අහිමි කර බීජ පර්යේෂණායතන සියල්ල විනාශ කර දැම්මා. නමුත් අපේ පාලනයක් යටතේ ගුණත්වයෙන් ඉහළ නවීන බීජ වර්ග නිෂ්පාදනය කර බෙදා හරිනවා. ඒ සම්බන්ධයෙන් කෘෂිවිද්‍යාඥයෝ විශාල පිරිසක් ජාතික ජන බලවේගය සමග අත්වැල් බැඳගෙන සිටිනවා. ජලය සහ ඉඩම් හොඳින් කළමනාකරණය කර, කෘෂිකර්මාන්තයටත් යොදා ගන්නවා. අලුත් තරුණ පරම්පරාව නවීන තාක්ෂණයත් සමග කෘෂිකර්මාන්තයට බද්ධ කරනවා. එළවළු ප්‍රවාහනයේදී අපතේ යාම වළක්වා ගන්න කටයුතු කරනවා. ඒ වගේම ගොවියාට සාධාරණ ආදායමකුත් පාරිභෝගිකයාට සාධාරණ මිලකට ලබාගැනීමේ හැකියාවත් අපි තහවුරු කරනවා. මේ වගේම රැස්වී ගොවි ජනතාව දැනුවත් කරමින් ඒ වෙනුවෙන් යොදා ගන්නවා.

ඒ වගේම ජාතික ආරක්ෂාව සම්බන්ධයෙන් නිශ්චිත පනතකින් ආරක්ෂක කවුන්සිලය තහවුරු කරනවා. නමුත් දැන් ආරක්ෂක කවුන්සිලය රැස්වී මොනවාද කරන්නේ? මම උදාහරණයක් කියන්නම්. ඒ.එස්.පී. ලියනගේට අයිති නිවාසය මහින්ද රාජපක්ෂට දෙන්න සූදානම් වුණා. ‘පීකොක් මන්දිරය’ කියලා නම් කර තිබුණු ඒ ගෙදර පිහිනුම් තටාකය නක්ෂත්‍රකරුවන්ගේ උපදෙස් මත වැලිදමා පිරවූවා. සී.අයි.ඩී. එකේ මහත්තුරු එතනැට යවා බය කළ මෛත්‍රීපාල සිරිසේන ඒ ගනුදෙනුව නැවැත්තුවා. රාජ්‍ය බුද්ධි සේවය යොදා ගත්තේ ඔය වගේ වැඩවලට. මේ ඔක්කොම යොදා ගන්නේ දේශපාලන බලය සඳහා. අපි මේ තත්වය නවත්වනවා. ලෝකයේ අයි.ටී. ක්ෂේත්‍රයෙන් ඩොලර් බිලියන 15ක වාර්ෂික ආදායමක් රටට උපයා ගත හැකි බව අපේ විශේෂඥයන් පෙන්වා දී තිබෙනවා. දැන් අපි ජනතාව දැනුවත් කරනවා හා සමාන ආකාරටම විද්වත් කණ්ඩායම් එකතු කරමින් සමස්ත රට ගොඩනැගීමේ ඒකාබද්ධ වැඩපිළිවෙළක් ගොඩනඟනවා.

රට මේ වෙලාවේ ඉල්ලා සිටින්නේ පරිවර්තනීය යුගයක්. මේ විදිහට තව අඟලක්වත් ඉදිරියට යන්න බැහැ. මේ රටේ වෘත්තිකයන් අද රට දාලා යන්නේ තමන් කෙසේ හෝ මේ තත්වයට මුහුණ දීගෙන සිටියත් දරුවන්ට මොකද වෙන්නේ කියලා හිතලා. නමුත් ඒ දරුවන් වෙනුවෙන් රට පරිවර්තනීය යුගයකට ගෙන යාමේ වගකීම ජාතික ජන බලවේගය බාර ගන්නවා. ඔබ යුද බිමේ යුද්ධය අවසන් කිරීමේ කාලයක් නොදැන කෙතරම් අසීරුවෙන් වැඩ කළාද? දේශපාලකයන් හැටියට අපි කොතරම් පරාජයක් හමුවේ වුවත් අරමුණ ජයග්‍රහණය කිරීම සඳහා අල්ලා ගෙන අධිෂ්ඨානයෙන් වැඩ කළා. ඒ කාලයකටත් වඩා ඉදිරි මාස 10 ඉතාමත්ම වැදගත්. මේ මාස 10යේදී අපි හැමදෙනාම හැකි උපරිමයෙන් වැඩ කරමු. මේ ව්‍යායාමය ගැන බලාපොරොත්තු තබාගෙන විශාල පිරිසක් රට හැර නොයා සිටිනවා. අද මේ සමාජයට රටේ ඉන්න බලාපොරොත්තුවක් හදලා තිබෙන්නේ ජාතික ජන බලවේගය විතරයි. ඒ ජනතාවගේ බලාපොරොත්තු බොඳ වෙන්න අපි කිසිකෙනෙක් ඉඩ දෙන්නේ නැහැ.

ඒ තුළ විශාල වැඩ කොටසක් ත්‍රිවිධ හමුදා සාමූහිකයට තිබෙනවා. ආණ්ඩුව මේ සංවිධානය ගැන විශාල වශයෙන් බිය වී සිටිනවා. කමල් ගුණරත්න උදේ හවා ඒ ගැන කල්පනා කරනවා. හමුදාපතිවරයාත්, කමල් ගුණරත්නත් නයිජීරියාවට ගෙන ගියේ නැද්ද කියලා පාර්ලිමේන්තුවේදි මම ප්‍රශ්න කරනවා. ඒ ගොල්ලෝ පොත ලීවාම සමස්ත හමුදාවම ඔවුන් සමග ඇති කියලා හිතුවා. නමුත් ඒ අය ලියපු පොත්වලට වඩා පෙරළු පොත් ප්‍රමාණය වැඩි බව ඔබ සැම දන්නවා. ඔවුන් ඒ බය නිසාම විවිධ තාලයේ අඩම්තේට්ටම් කරන්න උත්සාහ කරනවා. නමුත් ජාතික ජන බලවේගය එක්ක එකතු වී ඉන්නේ කමල් ගුණරත්නලාගේ, ආරක්ෂක ඇමතිලාගේ කුඩා කුඩා කෙනෙත්තිලිවලට පසුබසින ව්‍යාපාරයක් නොවෙයි. ජාතික ජන බලවේගය ඉතාමත්ම ශක්තිමත්, නිර්භයම සහ තමන් හමුවේ තිබෙන අභියෝග ජයග්‍රාහීව කෙළවර කළ හැකි කඳවුරක් ලෙස සියලු දෙනාම පිළිගෙන තිබෙනවා. ත්‍රිවිධ හමුදා සාමූහිකයේ සියලුදෙනා එක්වී සිටින්නේ ඒ ජයග්‍රහණයේ කොටස්කරුවන් හැටියටයි. අපි සියලු දෙනාම එක්වී මේ අභියෝගය සාර්ථකව ජයග්‍රහණය කරමු කියලා ආරාධනා කරනවා.

“ජාතික ජන බලවේගයේ ආණ්ඩුවක් තුළින් උත්තරීතර පාර්ලිමේන්තුවක් දැක ගන්න හැකි වේවි”
-එයාර් වයිස් මාෂල් සම්පත් තුයියකොන්තා-

අද වන විට අදිටන විශ්‍රාමික සාමූහිකයට විශාල පිරිසක් එක්වෙමින් දිස්ත්‍රික් ගණනාවක සමුළු පවත්වමින් යනවා. විවිධ බාධකයන් පැමිණුනත් ඒවා යටපත් කරමින් අපට සාර්ථකව ඉදිරියට යාමට හැකිවීම ගැන සතුටු වෙනවා.

අද අපේ රටේ අපට සෑහිමකට පත්විය හැකි එකම ක්ෂේත්‍රයක්වත් ඉතිරි වී නැහැ. උත්තරීතර පාර්ලිමේන්තුවේ එකිනෙකාට දොස් පවරමින්, ජනතාව මුලා කරමින් පැමිණි අය එකට එකතු වී දේශපාලනය කරනවා. ආර්ථිකය පැත්තෙන් ගත්තත්, බඩු මිල, ඉන්ධන මිල ඉතාම ඉහළයි. ලයිට් බිල නැවතත් වැඩි වුණා. ඉදිරියටත් වැඩිවීමට නියමිතයි. මේව පාලනය කරලා ජනතාවට සහනයක් සැලැසීමට මූල්‍ය උපායක් පාලකයන්ට නැහැ. සෞඛ්‍ය මුළුමනින්ම කඩා වැටිලා. අධ්‍යාපනයත් එහෙමයි. නගරයේ පාසල්වලට තිබුණු පහසුකම් ටික වැඩිවෙලා නැහැ. ගම්බද පාසල් ඉතාමත් අඩු පහසුකම් යටතේ පවතින්නේ. නගරයේ හා ගම්බද පාසල් අතර විශාල පරතරයක් තිබෙන්නේ. මේවා නගා සිටුවන්න පාලකයන්ට වුවමනාවක් නැහැ. තරුෂි දරුවා ගොල්ඩ් මෙඩ්ල් එකක් ලංකාවට අරගෙන දුන්නා. ඇයගේ උත්සාහය, කැපවීම අපි අගය කරනවා. නමුත් සමස්තයක් ලෙස ගත්විට ක්‍රීඩා ක්ෂේත්‍රයේත් කිසියම් හෝ ප්‍රගතියක් නැහැ. සෑම ක්ෂේත්‍රයක්ම පිරිහිලා. එයට ප්‍රධානම හේතුව ලෙස අපි දකින්නේ පාලකයෝ විනය අතින් ඉතාමත්ම පිරිහිලා. උත්තරීතර පාර්ලිමේන්තුවේ හැසිරීම් රටාව අපි දුටුවා. පාර්ලිමේන්තුවේ උත්තරීතර වෙන්නේ පාර්ලිමේන්තුවෙ පුටු, මේස නොවෙයි. පාර්ලිමේන්තුවේ සිටින සභිකයන්ගෙන් තමයි පාර්ලිමේන්තුව උත්තරීතර වෙන්නේ. අද පාර්ලිමේන්තුව තුළ සිටින 225 එපා කියා සටන් පාඨයක් තිබෙනවා. නමුත් මම ආඩම්බරයෙන් කියනවා, අපව නියෝජනය කරමින් පාර්ලිමේන්තුවේ සිටින ජාතික ජන බලවේගයේ මන්ත්‍රී තුන්දෙනා ගැන ආඩම්බර වෙන්න පුළුවන්. ජාතික ජන බලවේගයේ ආණ්ඩුවක් තුළින් උත්තරීතර පාර්ලිමේන්තුවක් අපිට දැක ගන්න හැකි වේවි. ඒ විශ්වාසය ඇති නිසා තමයි අපි ජාතික ජන බලවේගය දිනවන්න කැපවීමෙන් වැඩ කරන්නේ.

අපි විනය කියන්නේ මොකක්ද කියා ඔප්පු කරපු අය. තිස් වසරක යුද්ධයක් සාර්ථකව නිමා කරන්න හැකි වූ ප්‍රධානම සාධකය තමයි විනයගරුක බව. හමුදාව තුළ එයට ආවේණික නීතියක් තිබෙනවා. ඒ නීතිය අනුව ගොස් අපේ කර්තව්‍යය ඉටුකළා. හමුදාව තුළ නීතිය කඩ කරලා කිසිම ගමනක් ඉස්සරහට යන්න බැහැ. උසස්වීම් ලැබෙන්නේ ඒ අනුව කටයුතු කිරීමෙන් තමයි. ඒ නීති කඩකරපු අය අය පහළට දමා හෝ නෙරපා දමා තිබෙනවා. අපි සියලු දෙනා ඒ විනයගරුක බව රැකගෙන නියම නායකත්වයන් යටතේ කටයුතු කිරීම නිසා අපට හැකි වුණා අපේ අරමුණු ජයග්‍රහණය කරන්න. යුද්ධය ජයග්‍රාහී ලෙස නිමා කරන්න. සුනාමි අවස්ථාවේ, කොවිඩ් වසංගතය අවස්ථාවේ, ගංවතුර අවස්ථාවල අපි මැදිහත් වෙලා සාර්ථකව ඒ කාර්යයන් ඉටුකළා. අපි කණ්ඩායමක් සමග සාමූහිකත්වයෙන් තමයි ඒ කාර්යයන් ඉෂ්ට කළේ. විනයගරුක නම්, අරමුණ පැහැදිලි නම් ඕනෑම අමාරු කාර්යයක් ඉතා සාර්ථකව නිමා කරන්න පුළුවන් කියලා අපි ඔප්පු කර තිබෙනවා. අපේ දේශපාලකයාගේ ඒ විනයගරුක බව නැති නිසාම තමයි පළමුවෙන් පැවසූ දේවල් පවතින්නේ සහ ඉදිරියටත් පවතින්නේ.

“අපි සම්බන්ධ වී සිටින්නේ ජනතාවගේ විශ්වාසය දිනා ගත් පාලනයක් බිහිකිරීමේ චේතනාවෙන්”
-විශ්‍රාමික රියර් අද්මිරාල් ෆ්‍රෙඩ් සෙනෙවිරත්න-

මම මේ විශ්‍රාමික නිලධාරියෙක් ලෙස මේ කාර්යයේ යෙදෙන්නේ බොහෝම ආඩම්බරයෙන්, වුවමනාවෙන් හා ආශාවෙන්. ඒක ජාතික වගකීමක්, කාලීන අවශ්‍යතාවයක්. මම සමාජයේ විවිධ අය සමග සංවාදයේ යෙදී තිබෙනවා. ඔවුන් මේ වැඩපිළිවෙළ ගැන බොහෝම දෙනෙක් ප්‍රශංසා කරනවා. කිහිප දෙනෙක් ඉන්නවා කටු අනිනවා වගේ කොටසක්. එයාලා කියනවා, හමුදා සේවය තුළ සිටින විට අපිට නොලැබුණු යම් යම් නිලතල නිසා තෘප්තිමත් වෙලා නැති නිසා ඊර්ෂ්‍යාවට මේ දේශපාලනයේ යෙදෙනවා කියලා. මේ දේශපාලනය තුළින් තාන්නමාන්න බලාපොරොත්තුවෙන් වැඩ කරන බවට ඔවුන් චෝදනා කරනවා. අපේ ප්‍රධානී ලෙස වැඩකරන මේජර් අරුණ ජයසේකර මහත්මා, මම වසර ගණනාවක සිට දන්න, එකට වැඩ කර තිබෙන කෙනෙක්. ඔහු තෘප්තිමත්ව සේවය කර, වැදගත් හමුදා නිලධාරියෙක් විදිහට, ජ්‍යෙෂ්ඨ පුරවැසියෙක් විදිහට සමාජයට ආවා. ඒ වගේම එයාර් වයිස් මාෂල් තුයියකොන්ත මහත්මා කීර්තිමත් හමුදා නිලධාරියෙක්. එයාර් ෆෝස් පයිලට් කෙනෙක්. තමන්ට යා හැකි ඉහළම නිලයට ගොස් බොහෝම සතුටින් එළියට ආ කෙනෙක්. මමත් නාවුක හමුදාවෙන් එනකොට බොහෝම සතුටින් ආවේ. මට යා හැකි ඉහළම නිලයට ගියා. මම බොහෝම සතුටින් එළියට ආවා. අපිට කා සමගවත් කිසිම වෛරයක්, තරහක් නැහැ.

අපි මේ දේශපාලන ව්‍යාපාරය තුළින් හරි හම්බ කර ගන්න ඇවිත් නැහැ. පසුගිය කාලය තුළ මේ රටේ තුළ සිදුවුණු ආර්ථික කඩා වැටීමත් සමග යම් යම් පීඩනයන්ට පත්වෙලා තිබෙනවා. මේ රට වසර ගණනාවක් ප්‍රධාන පක්ෂ දෙකකින් තට්ටු මාරු ක්‍රමයට පාලනය කළා. අපි ඔවුන් කළ වැරදි දැන දැන, අන්ධයන් විදිහට ඔවුන්ව බලයට පත්කළා. ඔවුන් ඔප්පු කර තිබෙනවා ඔවුන් දන්න එකම දේශපාලන සංස්කෘතිය වන හොරකම, දූෂණය, වංචාව තුළින් මේ රට බංකොලොත් කරලා, ඔප්පු කර තිබෙනවා, ඔවුන්ට මේ රට පාලනය කරන්න බැරි බව. මේ දූෂිතයන් පාලනයෙන් පළවා හැර, ජනතා හිතවාදී, මනුෂ්‍යත්වය ගරු කරන, ප්‍රජාතන්ත්‍රවාදය ගරු කරන, මිනිසුන්ගේ සිතුම් පැතුම් තේරුම් ගත්, ජනතාවගේ විශ්වාසය දිනා ගත් ජාතික ජන බලවේගයේ පාලනයක් බිහිකිරීමේ එකම චේතනාවෙන් තමයි අපි මේ කාර්යයට සම්බන්ධ වෙලා තිබෙන්නේ. ඒක ඔබෙත් මගෙත් යුතුකමක්, වගකීමක්, කාලීන අවශ්‍යතාවයක්.

අපිට චෝදනා කරන අය කියන එක දෙයක් තමයි, මේ දේශපාලනය කිරීම තුළ අපි රාජකාරි කළ හමුදාවට අපි අගෞරවයක්, නිලතලවලට අගෞරවයක් කරනවා කියන එක. මම එයාලගෙන් මේ ප්‍රශ්නය අහනවා. මෙතෙක් මේ රට පාලනය කළ පාලකයන්ව බලයට ගේන්න, වංචාකාරයෝ, දූෂිතයන් බව දැන දැනම, ඔවුන්ට උදව් උපකාර කර, ත්‍රිවිධ හමුදාවේ සක්‍රීය සේවයේ සිටිමින්, යුනිෆෝම් ඇඳගෙන, හමුදා නීතියට විරුද්ධව ඔවුන්ට උදව් උපකාර කළ අය ඉන්නවා. එහෙම බලයට ආව අය මේ රට විනාශ කරලා, අහිංසක මිනිසුන්ව හිඟමනයට ඇදලා දාලා යාචක සමාජයක් බිහිකර තිබෙනවා. එහෙම නම් හමුදාවට අගෞරව කරන්නේ අපිද, එයාලද?

අපේ දේශපාලනය ඒ වගේ එකක් නොවෙයි. මෙතන සිටින අපි කිසිවෙක් සක්‍රීය සේවයේ සිටියදී දේශපාලනය කළ අය නොවෙයි. ඒ වෙලාවේ දේශපාලන මතවාදයක් තිබ්බෙත් නැහැ. මෙතන කවුරුත් දූෂිතයොත් නැහැ. අපි අභිමානවත්ව සේවය කර, ගෞරවාන්විතව එළියට ආ අය. අපිට ගෞරවක් සමාජය තුළ තිබෙනවා. මිනිසුන්ගේ දුක අපට දැනෙනවා. සමාජය තුළ තිබෙන පිළිගැනීම තුළ, මේ රට ගොඩගැනීමට තිබෙන එකම දේශපාලන ව්‍යාපාරය වන ජාතික ජන බලවේග රජයක් බිහිකිරීම සඳහා ඔවුන්ගේ ප්‍රතිපත්තීන්, ඔවුන්ගේ ක්‍රියාකාරකම් අපිව පිළිගන්නා සමාජ තලය වෙත සම්ප්‍රේෂණය කිරීමයි අපි මේ සිදුකරමින් ඉන්නේ.

මේ ත්‍රිවිධ හමුදා සාමූහිකයේ ප්‍රමාණය මුහුදේ පාවෙන අයිස් කුට්ටියක් වගේ. පෙනෙන්නේ පොඩි කොටසක් නොපෙනෙන කොටස යට. අපිට පේනවාට වඩා විශාල පිරිසක් අපි පසුපස එනවා. අපේ නෙට්වර්ක් එක හොඳයි. ජාතික ජන බලවේගයේ පාලනයක් යටතේ ඒ ඒ ක්ෂේත්‍රයන් ක්‍රියාකරන්නේ කොහොමද කියන එක ප්‍රතිපත්ති හදා තිබෙනවා. සමහර ඒවා හදමින් තිබෙනවා. අපි ආරක්ෂක ප්‍රතිපත්ති හදන්න ප්‍රධාන මෙහෙයුම් කමිටුවේ සිට ප්‍රතිපත්ති මාලාවක් සැකසුම් කර තිබෙනවා. එහි සැලසුම මහරගම සමුළුවේදී අනුර ජයසේකර මහතා විසින් දැනුම් දුන්නා. එවැනි ආරක්ෂක ප්‍රතිපත්තියක් අවශ්‍ය ඇයි? මම උදාහරණ දෙකක් දෙන්නම්.

යුද්ධය සාර්ථකව නිමා වුණු වෙලාවේ රටවල් බොහොමයක් පුදුම වුණා කොහොමද මෙය ජයග්‍රහණය කළේ කියලා. සම්ප්‍රදායික යුධ උපක්‍රමයන්ට අමතරව, ඒ ඒ හමුදාවන් තමනට ආවේණික වුණු උපක්‍රම සහ නොයෙකුත් උපකරණ භාවිතා කරමින් අපි සටන නිමා කළා. ඒ තුළින් ලෝකය ඉදිරියේ අපට ලොකු අභිමානයක් ඇති වුණා. හමුදාවන් ලෙස ලොකු පිළිගැනීමක් ඇති වුණා. යුද නිමාවත් සමග රට තුළ ඇතිවුණු දේශපාලන මතවාදයන් නිසා, ඇනකොටා ගැනීම් නිසා අපිව ලෝකය ඉදිරියේ සමච්චලයට පත්වුණා. අපේ හමුදා නිලධාරියෙකුට යුරෝපයේ රටකට යන්න බැරි තත්වයට පාර කැපුණා. ඒ වගේම පාස්කු ප්‍රහාරයෙන් පසු නොයෙකුත් පරීක්ෂණ මණ්ඩල තිබ්බා. ඒ මණ්ඩලවලදි වගකිවයුතු දේශපාලන නායකයින්, සහ හමුදා නායකයින්, පොලිස් නිලධාරීන් ඒ පරීක්ෂණ මණ්ඩලවලදි දෙන උත්තර දැක්කාම මේ මිනිසුන්ටද අපි මේ පඩි ගෙවන්නේ කියලා හිතෙනවා. එයාලගේ වගකීම මොකක්ද කියා හිතෙනවා. ඔබ හොඳින් මතක තබා ගන්න අපි හදන ආරක්ෂක ප්‍රතිපත්තිය තුළ සෑම දෙනාටම වගකීමක් තිබෙනවා මොකක්ද කරන්නේ කියලා. එවැනි අවස්ථාවක මම දන්නේ නැහැ. මට මතක නැහැ. කියන්න බැහැ. මේ විශ්‍රාමික සාමූහිකය කියන්නේ බොහොම වැදගත් ව්‍යාපාරයක්. මේ රට ජාතික ජන බලවේගයේ පාලනයක් යටතේ රටට හොඳ වැඩකොටසක් කර සතුටින් මිය යා හැකි, වැඩ කොටසක් කළ හැකි සංවිධානයක් බව ප්‍රකාශ කරනවා.

“අපි ඉදිරිපත් වී සිටින්නේ හෙට හොඳ රටකට පාරක් හදා දෙන්නයි”
-විශ්‍රාමික මේජර් ජනරාල් අරුණ ජයසේකර–

අපි අපේ තාරුණ්‍යය කැපකරලා, අපේ පවුල්, ළමයි සියලුම දේවල් අමතක කරලා, අපි බලාපොරොත්තු වුණේ මොකක්ද?, අපිට ලැබී තිබෙන්නේ මොකක්ද? බොහෝ දෙනෙක් මේ ආර්ථික කළමනාකාරිත්වයේ අදක්ෂකම ගැන කතා කරනවා. ඊට එහා ගිය එකක් තමයි අපේ සාරධර්ම කඩා වැටීම, රාජ්‍යකරණයේ අර්බුදය. අපිට ජාතික විද්‍යා පීඨවල උගන්වනවා හදිසි අවස්ථාවකදී, රටක කැළඹීමක්, මහා වැඩ වර්ජනයක්, අර්බුදයක්, ස්වභාවික විපතක්, සෞඛ්‍ය අතින් පිරිහීමකට පත්වු කැළඹීමකදි එයට මුහුණ දීලා ජනතාවට සහාය දෙන්නේ කොහොමද කියලා. වසර ගණනාවකට සිට පැමිණ තිබෙන දේශපාලන අර්බුදයේ ප්‍රතිඵලයක් ලෙස මේ ආර්ථිකයේ, සාරධර්මවල කඩා වැටීම. කෝ විනය?

අපි සුවිශේෂී විනයක් දරපු, සුවිශේෂී කොටසක්. අපි විශ්‍රාම ගොස් විනයක් සහිත සුවිශේෂී තැනක් තිබුණා. ඒ ඔබ, අපි සොයාගත් තැන තමයි ජාතික ජන බලවේගය යටතේ ගොඩනැගුණු ‘අදිටන’ සාමුහිකය. එතනත් විනය, අපෙත් විනය, අපි දෙගොල්ලෝම එකට බද්ධ වෙනවා. එකට කැපනෙවා. නායකයාට, පක්ෂයට, ප්‍රතිපත්තියට විනයක් නැතිනම් වැඩක් නැහැ. ආමි, එයාර්, නේවි ඇක්ට් එක තුළ තිබෙන්නේ හමුදා විනය. අපි ළඟ තිබෙන්නේ ඒ විනය. ඒ වගේම තමයි මේ පක්ෂය තුළ ප්‍රතිපත්තිමය වශයෙන් විනය මාලාවක් තිබෙනවා. ඒ ප්‍රතිපත්තිවලින් එහාට යන්න බැහැ. ඒ විනය නිසා තමයි වසර ගණනාවක් ගියත් රබර් බෝලය කොතරම් වතුර යට දැමුවත් උඩට එනවා වගේ ජන මතයක් හැටියට උඩට එනවා. අපි හරි තැන හිටගෙන ඉන්නේ.

පසුගියදා පාර්ලිමේන්තුවේ හැසිරීම, හරිම අශෝභනයි. අපි දෙන පණිවිඩය මොකක්ද? පාර්ලිමේන්තු සංකීර්ණය ඇතුළේ හැසිරීම. අපිට හිතාගත හැකියි එයාලත් සමග ඉන්න අනෙක් අයගේ හැසිරීම. ඔබ සහ මම ඒක අනුමත කරනවාද? එහෙම හැසිරෙන පුද්ගලයන් රටක තීරණ ගන්නවා. මේ අය තීරණ ගන්නෙ ඔබ සහ අප වෙනුවෙන්. ඒක තමයි පිරිහීම. ඒක තමයි අපි ජාත්‍යන්තරයට දෙන පණිවිඩය. අපේ ජාතික ආරක්ෂාවේ තිබෙන එක තමයි ශ්‍රී ලංකන් අයිඩින්ටිටි එක. රටක් තවත් රටක ජීවත් වන මිනිසුන්ගේ පැවැත්ම. ඒ රටේ රාජ්‍යකරණයේ පැවැත්ම. ජාත්‍යන්තරය පිළිගන්නේ ඒ රටේ මිනිසුන්ගේ හැදියාව. අපි සෑහෙන කාලයක් කැපවෙලා, උරදීලා පැතූ දේද අපට ලැබුණේ කියන ප්‍රශ්නය අපි අහනවා. අපි මෙහෙම ඉන්න ඕන කොටසක් නොවෙයි.

අපි මේ ඉදිරිපත් වෙලා තිබෙන්නේ හෙට හොඳ රටකට පාරක් හදලා දෙන්න. ජාතික ජන බලවේගය පක්ෂය ගොඩනැගෙන්නේ ඒ අරමුණු මුල්කරගෙනයි. අධිෂ්ඨානශීලී නායකත්වය, විනය, හොඳ දැක්මක් එක්ක ස්වේච්ඡාවෙන් ඉදිරිපත් වූ විශාල කණ්ඩායමක්. සමජයෙන් දෙයක් ලබාගැනීමේ අපේක්ෂාවෙන් තොරව, රට ගොඩගන්න අපි ඉන්නේ මහා ප්‍රපාතයක් ඉදිරියේ. මම සහ ඔබ, ඔබගේ දරුවොත්, ඒ දරුවන්ගේ දරුවොත් එක්ක ඒ ප්‍රපාතයට වැටෙනවාද? එහෙම නැතිනම් අපි සියලු දෙනාම එකතු වෙලා නව මාවතක් සොයාගෙන යනවාද? අපි දැක්කේ කළු රටක්. දුප්පත් රටක්. බංකොලොත් වුණු රටක්. අපි බලාපොරොත්තු එවන් රටක්ද? අපි දරුවන්ට දෙන්නේ එහෙම රටක්ද?

අද අහිංසක මිනිස්සු ජීවත් වෙන ප්‍රාදේශීය රෝහල් පවා වැහෙන්න යනවා. දූෂිත පාලකයන්ගෙන් පිරුණු සංස්කෘතියක් තමයි හැදිලා තිබෙන්නේ. පසුගිය දිනවල රෝහල්වලින් බැහැර කරන අපද්‍රව්‍ය කන්ටේනර්වලින් විශාල තොගයක් ගෙනවා. ඒ අය කවුද කියලා සොයලා බලන්න. ඒ ගෙනාපු අය පාර්ලිමේන්තුවටත් ගේන්න හදනවා. ඒ සල්ලිවල බලයෙන්. බලය ආවොත් මොනවා කරයිද? අපි එවැනි දේ දරුවන්ට, මිතුරන්ට, අනෙකුත් අයට දැනුවත් කළ යුතුයි. අද අවුරුදු පහේ ළමයා මේ අපි කතා කරන හැමදෙයක්ම ෆෝන් එකෙන් බලනවා. තව අවුරුදු 12කින් තරුණ වියට පා තබනවා. ඒ වෙනකොට අද තත්වයට වඩා පිරිහුණු සමාජයකට මුහුණ දෙන්න සිදුවෙනවා. තාක්ෂණය තවත් දියුණු වෙනකොට මීට වඩා සංකීර්ණ වෙනවා. අපි එවැනි සමාජයක් දරුවන්ට ලබාදිය යුතුද? මේ ගැන හොඳින් කල්පනා කර බලන්න.

අපට අවුරුදු ගණනකට කලින් හොඳ අධිෂ්ඨානයක් තිබුණා. ඒ වගේම අපි අධිෂ්ඨානයෙන් මහජනයාට වගවෙන, වගකියන ජාතික ආරක්ෂක ප්‍රතිපත්තියක් සහිත රජයක් ගොඩනගන්න කැපවෙමු. අද ජාතික ආරක්ෂක ප්‍රතිපත්තියක් නැහැ. ඒ නිසා තමයි අද මේ සොරකම්, මිනීමැරුම්, දූෂණ, වංචා සිදුවෙන්නේ. 2022දී දරිද්‍රතාවය 7.2% සිට 9.2% දක්වා වැඩිවෙලා තිබෙනවා. අත්‍යවශ්‍ය ආහාර ගැනීම් අඩුකළ ප්‍රතිශතය සියයට අනූ ගණනක් වැඩිවී තිබෙනවා. පාසල් අතහැර යාම, උසස් පෙළ නොකරන දරුවන් මේ සමාජයට තල්ලු වෙනවා. ඒක ජාතික ආරක්ෂාවට බලපෑමක් කරනවා. ඒ දරුවන්ට මත්ද්‍රව්‍ය දෙන්න හරිම පහසුයි. එතකොට ලෝකයට යන අපේ ප්‍රතිරූපය බලන්න. අපේ ජාතික අභිමානය කෝ? පාතාලය රජ කරන, මත්ද්‍රව්‍යවලට ඇබ්බැහි කරන. මැරකම්වලට හුරු කරන පාලකයන්ට මේ රට බාරදී ඉන්නද අපට කියන්නේ.

මේ අවසාන අවස්ථාව. මේ රට වලපල්ලට වැටෙනවා. හොඳ සිහිබුද්ධියෙන් ඉදිරියේ වැඩකටයුතු කරන්න. අනාගත දරු පරපුර වෙනුවෙන් අපි කටයුතු කරමු. යාළුවන්, හිතවතුන් හමුවෙන්න. ඒ අයව දැනුවත් කරන්න.

-Colombo, October 23, 2023-

ජාතික ජන බලවේගයේ ආසන සමුළු 90%ක් පමණ රට පුරා පවත්වා අවසන්. ඒ වගේම වැඩකරන ජනතාව වෘත්තීය සමිති සමුළු පවත්වමින් ඒකරාශී කර ගෙන යනවා. ගොවි ජනතාවගේ සමුළු, තරුණ සංගමයේ අලුත් දේශපාලන සාකච්ඡා, විශ්‍රාමික ත්‍රිවිධ හමුදා සාමූහිකය ඇතුළුව විවිධ වෘත්තිකයන් සංවිධානය කරමින් ව්‍යාපාරිකයන් සහ කර්මාන්තකරුවන් සංවිධානය කරමින් යනවා. ඒ වගේම දෙසැම්බර් අවසන් වන විට අප රටේ දැවැන්තම කාන්තා එකතුවත් නිර්මාණය කරනවා. මේ විදිහට සංවිධානය කරමින් මේ රටේ බලය හුවමාරු කර ගන්න අපිත් සූදානම් වෙනවා. අනෙක් පාර්ශ්වයේ අය අතේ මෙවලම් ගොඩක් තිබෙනවා. බදු වංචාවලින් ගොඩගසා ගත්, අති විශාල ධනස්කන්ධයක් ඔවුන් අත තිබෙනවා. ජනතාවගෙන් කොල්ලකා ගත් ඒ ධනය ඔවුන්ගේ මැතිවරණ වෙනුවෙන් පොම්ප කරනවා. රනිල් වික්‍රමසිංහ මඩකලපුවට ගිහින් නැවතිලා හිටිය හෝටලයට වියදම් කළේ කවුද කියලා පුළුවන් නම් කියන්න. ආණ්ඩුවේ රැකවරණය සහිතව කුප්‍රකට ජාවාරම්කරුවන් එක්රැස්කර ගෙන තිබෙන ධනය ඡන්ද කාලයේදී එළියට එනවා. ගමේ ජනතාවට සල්ලි දීලා රවට්ටලා ඡන්ද ගන්න සූදුව හැමදාම කරන්න ඒ ගොල්ලන් හිතාගෙන ඉන්නවා. ඔවුන් කුප්‍රකට ජාවාරම්කරුවන්ගේ ධනය මැතිවරණය වෙනුවෙන් එකතු කරන කොට අපි ජනතාව එකතු කරමින් මැතිවරණය වෙත යනවා.

අනෙක් පැත්තෙන් රනිල් වික්‍රමසිංහලා ඡන්දය කල්දාන්න මාලිගා කුමන්ත්‍රණ කරමින් සිටිනවා. ජනතාවට මුහුණ නොදී ඔවුන් මාලිගා කුමන්ත්‍රණ කරන කොට අපි ජනතාව එකතු කරමින් බලය ලබා ගන්න පෙළගැහෙනවා. ගම්පොළ ආසන සමුළුව පවත්වන්නේ ඉතාමත් වැදගත් වෙලාවක. ඉදිරි මාස 10 තුළ ලංකාවේ ඉරණම ලියවෙන කාල පරිච්ඡේදයක් වෙනවා. රනිල් ඇවිත් ආර්ථිකය ගොඩගනියි කියලා සමහර විශේෂඥයෝ පත්තරවල ලිව්වා. ටී.වී.වලට ඇවිත් කිවුවා. හැබැයි මොකක්ද සිදුවී තිබෙන්නේ. මේ අර්බුදයේ මූලයේ තිබෙන ණය ගැනීම සහ විකිණීම මත අර්බුදයේ මූලය පදනම් වී තිබෙනවා. දිගු කාලයක් මේ පාරේ ආවා. ණය ගැනීම සහ විකිණීම හැරුණු කොට වෙන ආර්ථික උපායමාර්ගයක් අපේ රටට හඳුන්වා දුන්නේ නැහැ. රජයේ කර්මාන්ත ශාලා සියල්ලක්ම වගේ විකුණුවා. වතු සමාගම් 21ක් විකුණුවා. ටෙලිකොම් එකේ භාගයකට කිට්ටු ප්‍රමාණයක් විකුණුවා. සමහර බැංකු විකුණුවා. දැන් විකුණන්න දෙයක් නැතිව හිරවෙන තැනට පැමිණ තිබෙනවා. රනිල් වික්‍රමසිංහ සූදානම් වෙන්නේ ඉතිරි වී තිබෙන දේවල් වේගයෙන් විකුණන්නයි.

මුලින්ම ශ්‍රී ලංකා රක්ෂණ සංස්ථාව විකුණන්න යනවා. ආර්ථික අර්බුදයක් තිබියෙදී රක්ෂණ සංස්ථාව රුපියල් කෝටි 1000ක ලාභයක් ලැබුවා. ජාතික ආරක්ෂාව වගේම රටේ ආනාගතය සමග ගැටගැසී තිබෙන ටෙලිකොම් ආයතනය විකුණන්නත් සූදානම් වෙනවා. ඒකෙ අවුරුද්දක ලාභය රුපියල් කෝටි 1300යි. හිල්ටන් හෝටලය, ලංකා හොස්පිට්ල් එක, ලිට්රෝ ගෑස් සමාගම, මිල්කෝ ආයතනය, ජාතික පශු සම්පත් ආයතනය, පොස්පේට් නිධිය, ඛනිජ වැලි සම්පත සහ මැණික් ඉඩම් විකුණා දමන්න පෙළගස්වා තිබෙනවා. ඉදිරි මාස හත අට ඇතුළත අපේ සියලු සම්පත් විකුණන්න සූදානම් වෙනවා. විදුලි බල මණ්ඩලයේ විදුලි උත්පාදනය සමනල වැව, මහවැලි පද්ධතිය සහ ලක්ෂපාන වශයෙන් කෑලි තුනකට කඩා විකුණන්න යනවා. මේ විකුණන්නේ බලාගාර ටික. ඒ එක්කම ජලාශවල අයිතියත් විකුණන්න යනවා. ඒ සමගම ජල සම්පත විකුණන්න යනවා.

විශාල බදු බරක් අපේ රටේ වෘත්තිකයන් මත පටවා ඔවුන් රට හැර දමා යන තත්වයකට පත්කර තිබෙනවා. අපේ රටේ ශ්‍රම බලකායෙන් 15%ක් ඉන්නේ වෘත්තිකයන්. බදුබර දරා ගන්න බැරිව ඔවුන් රට දාලා යනවා වගේම මහජනතාව මත විශාල බදු බරක් පටවා තිබෙනවා. අනෙක පැත්තෙන් මාස කිහිපයකට වරක් තෙල් මිල, විදුලිබිල, වැඩි කරමින් යනවා. ජනතාවට දරා ගන්න බැරි ජීවන බරක් පටවමින් ඉතිරි සම්පත් සියල්ල ඡන්දයට කලින් විකුණා දමන්න රනිල් ක්‍රියාකරනවා. ඔවුන් ඊළඟ ඡන්දයකට සැලසුම් හදනවා මිස රටේ අනාගතය වෙනුවෙන් සැලසුම් හදන්නේ නැහැ. ලෝකයේ අද තිබෙන්නේ තාක්ෂණයෙන්, වෙළඳපොළෙන්, සංවර්ධනයෙන්, ගැටගැහිලයි. මේ නිසා ලෝකයේ ඇති වෙන ඕනෑම කුඩා චලනයක් තව රටකට බලපෑම් කිරීම වළක්වන්න බැහැ. කෝවිඩ් වසංගත තත්වය ලෝකයටම බලපෑම් කරමින් කියා සිටියේ පැමිණි ආර්ථික ගමන් මඟ ගැන සලකා බලන්න කියලයි. යුක්රේන් යුද්ධය ඇමෙරිකාව, ප්‍රංශය, බි්‍රතාන්‍යය වගේ රටවල්වලටත් බලපෑම් කර තිබෙනවා. ගාසා තීරය කේන්ද්‍ර කරගෙන ඇති වී තිබෙන ගැටුම නිරාකරණය කර නොගතහොත් අලුත් ලෝකයක් නිර්මාණය වන තත්වයට ගමන් කළ හැකියි. එක්සත් ජනපදය සහ බටහිර රාජ්‍යයන් කිහිපයක් හුදකලා වී අනෙක් රටවල් සියල්ලම ඒවාට එරෙහිව පෙළගැහෙන තත්වයක් ඇති විය හැකියි. මෙ කරුණු ගැන සැලකිල්ලකට ලක් නොකර තවදුරටත් ගමනක් යන්න බැහැ.

මේ සියල්ල හමුවේත් ශක්තිමත්ව මුහුණ දෙන රටවල් කිහිපයේ පදනම තිබෙන්නේ ඔවුන්ගේ ජාතික නිෂ්පාදිතය ඉහළ නංවා තිබීමයි. දකුණු කොරියාවේ වසරක අපනයන ආදායම ඩොලර් බිලියන 680යි. අපේ ඩොලර් බිලියන 12යි. නව වෙළඳපොළවල් අත්පත් කර ගන්න ඔවුන්ට සැලසුම් තිබුණා. රූපලාවන්‍ය උපකරණ වගේම සැම්සුන් ෆෝන්වලින් ප්‍රමුඛතම ලෝක නිෂ්පාදකයා කොරියාවයි. මිනිසුන්ගේ රුචිකත්වයන් සහ සතුට සොයා යාමේ මාර්ග විවිධත්වයට පත්වී තිබෙනවා. මිනිසුන් එකතැන නතර වෙනවා නම්, ලෝකය නතර වී ගොඩක් කල්. කොරියාව වගේම චීනයට, ඉන්දියාවට, වියට්නාමයට අනාගත සැලසුම් තිබුණු නිසා, කෝවිඩ්වලින් පසුවත් යුක්රේන් යුද්ධයක් තිබියෙදීත් ඔරොත්තු දෙමින් වර්ධනය වීමේ හැකියාවක් ඔවුන් අත්පත් කරගෙන තිබෙනවා. නමුත් ප්‍රංශය, ජර්මනිය වගේ රටවල් එවැනි වර්ධනයක් අත්පත් කර ගත්තේ නැහැ.

නමුත් අපේ රටේ ඉන්නේ තවමත් ඡන්දයකදී කුල පදනම මත අපේක්ෂකයන් තෝරන ගතානුගතික නායකයන්. එහෙමත් නැතිනම් ඉන්දීය කෝවිල්වලට ගිහින් බාරහාර වන නායකයන්. රනිල් වික්‍රමසිංහ ජනාධිපති වුණාට පස්සේ විදේශ ගමන්වලට ශ්‍රී ලංකන් ගුවන් සේවය පාවිච්චි කළේ නැහැ. හේතුව ෆස්ට් ක්ලාස් නැතිවීමයි. අගමැතිවරයාට ලක්ෂ තුන්දහස් නවසියයක කාර් එකක් ගත්තා. ඔය වාහනවල උපරිම යන්නේ කිලෝ මිටර් 25ක් විතර. ඉතිරි දුර යන්නේ හෙළිකොප්ටර්වලින්. මන්තර කරපු වළලු දාගෙන, ආරක්ෂාව පිරිවරා ගත් තඩි ජීප්වලින් ඔවුන් යන්නේ තමිල්නාඩු චිත්‍රපටවල වගෙයි. මන්නය විතරයි අඩු. ඔවුන්ට පුළුවන්ද, නූතනත්වය වෙත රට ගෙනයන්න.

චිත්‍රපට කලාවේ, සංගීතයේ, සාහිත්‍යයේ පරිවර්තන කොපමණ ලෝකය පුරා සිදුවී තිබෙනවාද? නමුත් දෙකෝටි විසි ලක්ෂයක් ඉන්න අපේ රටේ සාහිත්‍ය පොතක පිටපත් දහසක් විකුණා ගන්න බැහැ. කවියක් රස විඳින්නේ නැති, චිත්‍රපටක් රස විඳින්න නැති, ගීතයක් රස විඳින්න නැති, අලුත් දේ උකහා ගන්න අසමත් වුණු රටක් නිර්මාණය කර තිබෙනවා. මේ පැරණි බැමි ගලවා දමා නව ලෝකයකට රට පරිවර්තනය කරන යුගය අපි ආරම්භ කරන්න ඕනෑ. පේරාදෙණිය උද්‍යානයේ ආදායමෙන් රුපියල් කෝටි දාහක් වැයකර දී.මු. ජයරත්න අම්බුළුවාව හැදුවා. ඊට පස්සේ ඔහු යටතේ තිබුණු අමාත්‍යාංශවලින් සල්ලි වියදම කළා. අන්තිමට පාර්ලිමේන්තුවට පනතක් ගෙනාවා ඒක ඔවුන්ගේ පවුලට ලියා ගන්න. මේ රටේ කඳු, උද්‍යාන තමන්ගෙ පවුලට ලියාගන්න නායකයන්ට මොන වගේ ලෙඩක් තියෙන්න ඕනෑද? මේ වගේ නායකයෝ තමන්ගේ පවුලත් තමන් වටේ ඉන්න චෞර වළල්ලත් හදාගත්තා විතරයි. පසුගිය අවුරුදු 20 තුළ ලෝකය මහා ජයග්‍රහණ අත්පත් කරගෙන තිබෙනවා. අපේ පාලකයෝ ඒ කාලය තුළ අපේ රට පස්සට ගෙනගියා. මේ මජර, කැත, සාම්ප්‍රදායික, ගතානුගතික, දේශපාලනය වෙනස් කර, නූතන රාජ්‍යයක් අපි නිර්මාණය කරනවා.

සරලභාවය අපේ දේශපාලන සංස්කෘතිය වෙන්න ඕනෑ. ඇහුම්කන් දීම, නීතියට ගරු කිරීම, අපේ සංස්කෘතියක් වෙන්න ඕනෑ. මහජනයාගේ සෑම සතයක්ම පෙරළා නැවත මහජන සේවය වෙනුවෙන් යොදවන දේශපාලන සංස්කෘතියක් ඕනෑ. මේ පාලකයන්ගේ ඇඳුම් පැළඳුම්, පාට නූතන වෙන්න පුළුවන්. නමුත් ඔවුන්ගේ සිතුම් පැතුම් ශත වර්ෂයකටත් වඩා පැරණියි. පාර්ලිමේන්තුව ඇතුලේ ගහගන්නේ ඒ නිසයි. ඔවුන් මොන මනසකින් ක්‍රියා කරනවා දැයි සිතා ගන්න වත් බැහැ. ඒ පාලකයන් මේ රටට කරපු දේවල්වලින් කළ විනාශයට වඩා ඒ මොහොතේ කළ යුතුව දේවල් නොකිරීමෙන් වැඩි විනාශයක් කර තිබෙනවා. ලෝකයත් සමග ඉදිරියට යන ක්‍රියාමාර්ග නොගැනීම ඒ විනාශයයි.

ජාතික ජන බලවේගය ලෝකයත් සමග පෙරට යන පාලනයක් ගෙන එනවා. ඔවුන් බය වී තිබෙන්නේ ඒකටයි. ඡන්ද නොතියා වෙට්ටු දාන්නේ ඒ නිසයි. රට තුළ ජීවත් වෙන සෑම ජන කොට්ඨාසයකගේම අයිතිවාසිකම් පිළිගෙන ආරක්ෂා කරමින් සිංහල, දෙමළ, මුස්ලිම් ජනතාවගේ සමගිය වර්ධනය කරන පාලනයක් අපි පිහිටුවනවා. අපි හදන්නේ සිංහල, දෙමළ, මුස්ලිම් සියලු දෙනා නියෝජනය කරන ඒ සියලු ජනතාවගේ අයිතිවාසිකම් ආරක්ෂා කරන පාලනයක්. ජාතික ජන බලවේගයෙන් ගොඩනඟන්නේ ජාතික සමගිය ආරක්ෂා කරන පාලනයක්. ඒ වෙනුවෙන් අපි සියලු දෙනාම සංවිධානය වී ශක්තිමත්ව පෙරට එන ලෙස ඉල්ලා සිටිනවා. ගම්පොළ ආසනය තුළ ජාතික ජන බලවේගයේ කොඩිය ඉහළින්ම එසවීමට සියලු දෙනාම පෙරට එන ලෙස ආරාධනා කරනවා.

“ව්‍යවස්ථා කුමන්ත්‍රණ කරමින් කොච්චර දුර යන්න පුළුවන්ද කියලා බලමුකෝ”
-ජාතික ජන බලවේගයේ ජාතික විධායක සභික කේ.ඩී. ලාල් කාන්ත-

ඊයේ වෙනකොට විදුලි බිල වැඩිකළ බව අපි කවුරුත් දන්නවා. ඊට විරුද්ධව රටේ විවිධ ප්‍රදේශවල පන්දම් උද්ඝෝෂණ ආරම්භ කර තිබෙනවා. මේ ආසන්න දිනවල අපිත් ඊට සහභාගි වෙනවා. රනිල්ලා, රාජපක්ෂලා, මහින්දානන්දලා, එකතු වී ජනතාවගේ ඡන්ද අයිතිය ලබා නොදී විවිධ වෙට්ටු දමමින් යන ගමනක් ආරම්භ කර තිබෙනවා. නමුත් අපි මැතිවරණ මාවතට අමතරව බලය ගන්න, බලය මාරු කරන්න තිබෙන විකල්ප ක්‍රම ගැනත් හිතන්න වෙලා තිබෙනවා. නමුත් අපි වඩාත්ම කැමති මැතිවරණයකින් බලය ලබාගන්න. ඒ නිසාම රනිල්ලා වෙට්ටු දැමීම නිසා අපි තෙවැනි මාවතකුත් ආරම්භ කර ඇති බව ගම්පොළ ආසන සමුළුවේ ඉඳලා කියන්න සතුටුයි. ඡන්ද නොතියා යනවා නම්, පාලකයන් වෙනත් ක්‍රමයකින් පළවා හරින්න වැඩ පිළිවෙළකුත් ආරම්භ කර තිබෙනවා. ඉන් එකක් අපි සතු දැවැන්ත වෘත්තිය සමිති බලය. ඒ වගේම විශාල ගොවි ජනතාවක්, ධීවර ජනතාවක් කාන්තා, තරුණ, ශිෂ්‍ය, වගේම කලා සංවිධාන ඇතුළු විවිධ බලවේග ඒකරාශී කරමින් යනවා.

ගිය අවුරුද්දේ මැයි මාසයේ නව වැනිදා මහින්දට අගමැතිකම දාලා යන්න සිදුවුණා. කැමැත්තෙන් ගියා නොවෙයි පැන්නුවා. ඒකත් එක විදිහක්. ගෝඨාභය රාජපක්ෂ ජනාධිපතිකම දාලා පැනලා ගියා. ඒවා සිදුවුණේ ඡන්දයකින් නොවෙයි. ඒ අරගලය ඒ වෙලාවේ පාර්ලිමේන්තුව පැත්තට ගෙන ගියා නම්, ඒකත් විසුරුවා හරින්න සිදුවෙනවාම තමයි. ඒ මාවත ගැනත් රනිල්ලාට රාජපක්ෂලාට අපි මතක් කර දෙනවා. වෘත්තිය සමිති ව්‍යාපාරයට අමතරව නගරවල වෙළඳ සංගම්, නීතිඥ සංගම්, වගේ සංවිධානත් තිබෙනවා. ඔවුන්ව සංවිධානය කිරීමේ මාවතෙත් අපි විශාල දුරක් ගිහින් තිබෙනවා. “උඹලාගේ පාලනය යටතේ තවදුරටත් වැඩ කරන්න අපි ලැහැස්ති නැහැ, උඹලා වැඩි කළ විදුලි බිල් ගෙවන්න අපි ලැහැස්ති නැහැ, උඹලා වැඩි කළ බදු ගෙවන්න අපි ලැහැස්ති නැහැ, උඹලා පලයල්ලා.” කියන තැනට බලකරමින් අපි වැඩ නතර කරනවා. ඊට පස්සෙ අපේ පාලනයක් යටතේ ඩබල් එකේ වැඩකරනවා. ව්‍යවස්ථා කුමන්ත්‍රණ කර කර කොච්චර දුරට යන්න පුළුවන්ද කියලා බලමුකෝ. අපිත් සමුළු පවත්වමින් ජනතාව සංවිධානය කරමින්, පාලකයෝ ගෙදර යවන්න වැඩකරමින් යනවා. අපි ඡන්දයට ලැහැස්ති වෙමු. ඡන්දය තියන්නේ නැතිනම් පාරට බැහැලා මොවුන් පළවා හරින තුරු අරගල කරන්න සූදානම් වෙමු කියලා හැමදෙනාටම ආරාධනා කරනවා.

“අපි වෙහෙසිය යුත්තේ නොනගත කාලය අවසන් කරන්නයි”
-ජාතික ජන බලවේගයේ ජාතික විධායක සභික, ප්‍රවීණ කලාකරු ජගත් මනුවර්ණ–

අද නැකැත් දවසක්. නමුත් අපි ඉන්නේ රටම නොනගතයකට ගිල්වූ පාලනයක් යටතේ. එහෙම රටක සුබ නැකතික් දේවල් ආරම්භ කරනවාටත් වඩා අපි වෙහෙසෙන්න ඕනෑ නොනගත කාලය අවසන් කරන්න. නා කපන වැස්ස ඇද හැලෙන කාලගුණ තත්වය නොතකා මෙතනට ඔබ ඇවිත් ඉන්නේ ඒ නොනගතය අවසන් කරන්න බව අපි දන්නවා. මේ රටේ අනාගතය හැමෝටම යහපත් කර දෙන්න, මෙතෙක් කල් පාලකයින් කළ බොරුව තේරුම් ගත් නිසයි මාලිමාව වටා ජනතාව ඒකරාශී වෙන්නේ. මේ පළාතේ බහුතරයක් දෙනා දෛනික ඉපයීම් මත යැපෙන වගේම දෙශපාලනඥයන්ගෙන් යම් සහනයක් අපේක්ෂාවෙන් ඉන්න අයයි. ඒ නිසා තමන්ගේ දේශපාලන මතය නොබියව කියන්න තවමත් පිරිසක් බයයි. මෙතනට එකතු වී ඉන්නේ එහෙම බය නැති පිරිසක්.

අපට වගකීමක් තිබෙනවා අනික් අයට ධෛර්යය සපයන්න. ඒ වෙනුවෙන් බොහෝ දේවල් කරන්න සිදුවෙනවා. මේ පාලකයන් කළ විනාශයන් පැහැදිලි කරන්නත් ජාතික ජන බලවේගය රට ගොඩනඟන හැටි පැහැදිලි කරන්නත් කැප වෙන්න ඕනෑ. අවුරුදු 75ක් මේ රට පාලනය කළ කිසිම පක්ෂයකට ඊළඟ මැතිවරණයකින් බලයට එන්න බැරි බව සියලුම සමීක්ෂණ වාර්තාවලින් පැහැදිලිව හෙළිවී තිබෙනවා. ජාතික ජන බලවේගය ඉදිරියෙන්ම සිටින බව සියලුම සමීක්ෂණ වාර්තාවලින් තහවුරු වී තිබෙනවා. ඒ නිසා ඔවුන් සියලු දෙනා ඡන්ද සිතියම් අකුලන්න විවිධ උපක්‍රම තෝරනවා. නමුත් ජාතික ජන බලවේගය වටා ඉන්න අය ජනතාවගේ ඡන්ද අයිතිය වෙනුවෙන් පාරට බැහැලා තේරෙන භාෂාවෙන් කියා දෙන්න වෙනවා. ගම්පොළ නගරයේ අපිරිසිදු කාණු පද්ධතිය ඇතුළු සියල්ල අදත් ඒ විදිහට තිබෙන්නේ ගම්පොළින් අගමැතිවරයෙකුත් පත්කළ පසුබිමකයි. ඒ අයගේ පරම්පාරාව ඇවිත් මේ තත්වය වෙනස් කරයි කියා හිතනවාද? බූදලයෙන් දේශපාලනය කළ කාලය අවසන් කරන්න කල්පනා කරන ලක්ෂ ගණන් ජනතාව අද මාලිමාව වටා එකතු වී සිටිනවා. මාලිමාවේ පාලනයක් තවදුරටත් සිහිනයක් නොවන බව මුළු රටේම ජනතාව පිළිගන්නවා.

“පීඩාවට පත් කාන්තාවන් දේශපාලන පරිවර්තනයක් සඳහා පෙළගැසිය යුතුයි”
-අයිතීන් උදෙසා කාන්තාවෝ සංවිධානයේ ගම්පහ සංවිධායක මණ්ඩල සභික, ගුරු විද්‍යාල කථිකාචාර්ය චූලා කුමුදිනී-

නිර්පාක්ෂික නාමයෙන් එකතු වුණු ජනතාව අරගල කර, හිටපු ජනාධිපති සහ අගමැතිවරයා පළවා හැරියා. නමුත් ඉන් පසුව බලයට පත්වුණු පාලකයන් යටතේ ජනතාව අන්ත අසරණ වෙලා. කාන්තාවක් හැටියට මේ දක්වා මමත් හිතුවේ රටේ අනෙකුත් කාන්තාවන් සිතන පතන ආකාරයටමයි. විශේෂයෙන්ම දේශපාලනය අපට අයිති නැහැ කියලා හිතුවා. අපි සොයා ගත්තොත් අපට කාල හිටිය හැකි බව හිතුවා. නමුත් අයිතීන් උදෙසා කාන්තාවෝ සංවිධානය සහ ප්‍රගතිශීලී ස්ත්‍රී එකමුතුව සමග කටයුතු කරන්න ලැබීමෙන් පසුව ඊනියා ප්‍රභූ දේශපාලකයන්ට රැවටීමේ තරම තේරුම් ගත්තා. අපේ අයිතීන් වෙනුවෙන් හඬක් නඟන්න අවශ්‍ය බව තේරුම් ගත්තා. අපිටත් සංවේදී හිතක් තිබෙනවා. කාන්තාවන් අතිශයින් පීඩාවට පත්ව සිටින මේ කාලයේ සැබෑම දේශපාලන පරිවර්තනයක් සඳහා පෙළගැසිය යුතු බව අපි හැමෝම තේරුම් ගත යුතු වෙනවා. අඳුරේ අතපත ගෑම නවත්වා එකාවන්ව ඉදිරියට ඇවිත් සංවිධානාත්මකව ජයග්‍රහණය කරා යා යුතුයි.

“ජාතික ජන බලවේගය හැර කිසිවෙක් සමග පෙළගැසී තේරුමක් නැති බව ජනතාව දන්නවා”
-ජාතික ජන බලවේගයේ ජාතික විධායක සභික මව්ලවි මුනීර් මුලෆ්ෆර්-

නිදහසෙන් පස්සේ විවිධ අවස්ථාවලදී විවිධ පොරොන්දු ලබාදී අවුරුදු පහෙන් පහට බලයට පැමිණි පිරිස් ගැන අපි දන්නවා. මැතිවරණ වේදිකාවල ඔවුන් කියූ කරුණු විශ්වාස කර ඡන්දය දුන් අපි අවුරුදු 75කට පස්සේ සිදුවුණු විනාශය අත් විඳිනවා. නමුත් ජාතික ජන බලවේගය හැර වෙන කිසිකෙනෙක් සමග පෙළගැසී තේරුමක් නැති බව ජනතාව තේරුම් ගෙන තිබෙනවා. චන්ද්‍රිකා ජනාධිපතිවරිය යටතේ ඇමති ධුර දරා පසුව අගමැති වුණු ගම්පොළ ප්‍රදේශයේ දී.මු. ජයරත්න ගැනත් හොරණ රත්නසිරි වික්‍රමනායක ගැනත් අපි දන්නවා. ඔවුන් අද ජීවතුන් අතර නැතත් ඒ දෙදෙනාගේම පුත්තු දෙදෙනෙක් අද රනිල් වික්‍රමසිංහ යටතේ ඇමතිවරුන් වෙලා ඉන්නවා. එදා ශ්‍රී ලංකා නිදහස් පක්ෂය, එක්සත් ජාතික පක්ෂය කියලා මරා ගත්තත් ඒ අගමැතිවරුන්ගේ පුතුන් දෙදෙනා අද ඉන්නේ රනිල් වික්‍රමසිංහ යටතේ.

ඒ පාලකයන් සහ දේශපාලනඥයන් තමන්ට වහල්කම් කරන අයට රජයේ ආයතනවල තනතුරු දෙන්න ක්‍රියා කළා. ඒ ආයතනවල මහජන මුදල් ඕනතරම් කොල්ල කා ගන්න ඉඩදී සිටියා. ඒ මුදල්වලින් කොටසක් ඒ දේශපාලකයන්ගේ මැතිවරණ වෙනුවෙන් නැවත ලබාගත්තා. ඒ පාලකයන් යටතේ පීඩාවට පත්වුණු ජනතාව කිසිදු භේදයකින් තොරව පාරට ඇවිත් කැත දේශපාලන සංස්කෘතිය වෙනස් කළ යුතු බව හඬගා කීවා. අරගල කළා. එවැනි තත්වයක පත්වුණු රනිල් වික්‍රමසිංහ මේ දේශපාලන සංස්කෘතිය වෙනස් කරාවි යැයි සමහර දෙනෙක් කල්පනා කළා. නමුත් ඔහු ජනාධිපති වූ තැන් සිට පැරණි, කැත, ත්‍රාඩ දේශපාල සංස්කෘතිය ඉදිරියට ගෙන එමින් තිබෙනවා. මැතිවරණය කුමන්ත්‍රණකාරීව නොපැවැත්වීමට කොමිසමෙන් ඉල්ලා අස්වූ නෝනාට උතුරේ ආණ්ඩුකාර ධුරය ලබා දුනනා. ඔවුන් දිගටම දේශපාලනය කළේ මේ කැත සංස්කෘතිය රැක ගන්න මිස පොදු ජනතාවට යහපතක් කරන්න නොවෙයි. රට කොතරම් පරිහානියකට ගෙනගොස් තිබෙනවාද කියනවා නම්, මේ සුන්දර රට මාලදිවයින හමුවේ පරාජය කරන තත්වයකට ඇද දමා තිබෙනවා. මේ පාලකයන්ගේ මංකොල්ලකාරී ක්‍රියාකලාපය නිසා අපේ රටේ මිනිසුන් අද ලෝකය ඉදිරියේ යාචකයන් බවට පත්කර සිටිනවා. තමන්ගේම ගෙදරක සිටියත් කුලී ගෙයක ඉන්නවා වගේ හැඟීමක් බොහෝ දෙනෙකුට ඇතිවී තිබෙනවා. කොයි වෙලේ, විදුලිය, ජලය කපා දායිද කියන ප්‍රශ්නයෙන් මිරිකී සිටිනවා. නමුත් අපි සියලු දෙනා බලා පොරොත්තු කඩ නොකර ගත යුතුයි. සියලු ජාතීන්ට, ආගමිකයන්ට “ශ්‍රී ලාංකිකයි”, කියන අභිමානයෙන් කටයුතු කළ හැකි ජාතික ජන බලවේගයේ පාලනයක් පිහිටුවා ගමු කියන ආරාධනය සැමදෙනාටම කරනවා.

-Colombo, October 23, 2023-

රාජපක්ෂ පුතුන්ගේ මඟුල් ගෙවල්වල ලයිට් බිල් ලක්ෂ 26 වෙද්දි, ජනතාවට මළ ගෙදරක ලයිට් එකක් දාගන්නත් බැරිතරමට බිල් වැඩිකර තිබෙන බව අයිතීන් උදෙසා කාන්තාවෝ සංවිධානය චෝදනා නැගීය.

බත්තරමුල්ල පැලවත්ත හි පිහිටි ජනතා විමුක්ති පෙරමුණේ ප්‍රධාන කාර්යාලයේ පසුගිය සෙනසුරාදා(21) පෙරවරුවේ පැවති මාධ්‍ය හමුවක් අමතමින් එම සංවිධානයේ ලේකම් සමන්මලී ගුණසිංහ වැඩිදුරටත් කරුණු දක්වමින් මෙසේ ද සදහන් කළාය.

“අපේ රටේ ජනාධිපති රනිල් රාජපක්ෂ එක විදේශ සවාරියක් ගියාම තෙල් මිල වැඩිවෙනවා. ඊළඟ සවාරිය ගිහින් ආවාම ගෑස් මිල වැඩිවෙනවා. ඊළඟ සවාරිය ගිහින් එනකොට විදුලි බිල වැඩිවෙනවා. මේ විදිහට වට ගණනාවකින් මිල වැඩි කිරීම් කරන බව ඔප්පු කර තිබෙනවා. තෙල්, ගෑස්, විදුලිය, මිල වැඩිවීමත් එක්කම නැවත වටයකින් භාණ්ඩ මිල වැඩිවෙන බව අපි දන්නවා. මේ වැඩිවීම් විශේෂයෙන්ම කාන්තාවන්ටත් රටේ බහුතරයක් ජනතාවටත් කිසිසේත්ම දරා ගන්න බැහැ. ඒ නිසාම අපේ තරුණ කොටස්වල සහ දරුවන්ගේ ජීවිත විශාල වශයෙන් කඩා වැටෙමින් තිබෙනවා. රනිල් රාජපක්ෂ ජනාධිපතිවරයා ඊළඟට ලෝකය වටේ ගිහින් එද්දී මොනවා වැඩිවෙයිද දන්නේ නැහැ. කල්පනාවෙන් ඉන්න කියලා අපි ජනතාවට අනතුරු හඟවනවා.

අපේ රටේ රාජ්‍ය සේවකයෝ ලක්ෂ 13කට වැඩියෙන් ඉන්නවා. බඩු මිල වැඩිවීම දරාගත නොහැකි නිසා වැටුප් වැඩිකරන ලෙස දිගටම ඉල්ලීම් කළා. ඒත් වැඩි කළේ නැහැ. ඒ නිසා භාණ්ඩ මිලදී ගැනීමේ හැකියාව පහත වැටුණා. මහ බැංකු වාර්තාවලට අනුව 2022 තිබුණු ඒකක 133.1ක් වූ නාමික වැටුප් අනුපාතිකය මේ අවුරුද්දෙත් ඒ මට්ටමේම තිබෙනවා. නමුත් එම නාමික වැටුපෙන් ලබාගත හැකි භාණ්ඩ හා සේවා ප්‍රමාණය, ඒ කියන්නේ මූර්ත අගය 2022 දී ඒකක 62ක්ව තිබී මේ අවුරුද්දේ මේ වෙනකොට ඒකක 58.7 දක්වා අඩු වී තිබෙනවා. මේ විදිහට සමස්ත ජනතාවගේම මිල දී ගැනීමේ හැකියාව අඩුවීමේ විපාක ලෙස අධි මන්දපෝෂණ තත්වයට පත්වුණු දරුවන් 52,000කට වැඩි පිරිසක් ඉන්න බව පාර්ලිමේන්තු ආංශික කාරක සභාවට පිළිගන්න සිදුවුණා. මේ විදිහට අපේ අම්මලාගේ ප්‍රශ්න වැඩිවෙනවා. දරුවාගේ කෑම වේල අඩුවෙනවා. ජීවිත මේ විදිහට කඩා වැටෙද්දීත් අයි.එම්.ෆ්. එකේ කොන්දේසි මත දුවමින් මේ වන විට ණය වාරික දෙකක් අරගෙන තිබෙනවා. මේ වාරික දෙකම ඩොලර් මිලියන 663යි. ඔවුනේ කොන්දේසි ක්‍රියාත්මක කිරීමෙන් අපේ අපනයන ආදායම ඩොලර් මිලියන 910කින් කඩා වැටී තිබෙනවා. 2022 මුල් මාස අට 08 තුළ ඩොලර් මිලියන

8912ක වෙළඳ භාණ්ඩ අපනයනය කර තිබුණත් 2023 මුල් මාස අට තුළ එම අපනයන ආදායම ඩොලර් මිලියන 8010ක් දක්වා බිඳ වැටිලා. ආණ්ඩුව අනුගමනය කරන ආර්ථික ක්‍රියාවලිය නිසා ඩොලර් මිලියන 910ක් අහිමි කර ගෙන මූල්‍ය අරමුදලෙන් ඩොලර් මිලියන 663ක ණය අරගෙන තිබෙනවා.

ආර්ථිකය හැකිළීමේ ක්‍රියාවලියකින් උද්ධමනය තනි ඉලක්කමකට ගෙන ආ බව ආණ්ඩුව කියනවා. නමුත් ඇත්ත උද්ධමන අනුපාතය හොයලා දෙන්න කාට හෝ පුළුවන් නම් ලොකු දෙයක්. ආණ්ඩුව කෘත්‍රිමව නිර්මාණය කරන උද්ධමන අනුපාතය ඇත්ත ජීවිතවල උද්ධමනය නිරූපණය කරන්නේ නැහැ. ආර්ථිකය හකුළමින්, කර්මාන්තකරුවන්ගේ කර්මාන්ත කඩා වැටෙමින් රැකි රක්ෂා දස දහස් ගණනින් අහිමි කරමින් තිබෙන මොහොතක විදුලි බිල 18%කින් වැඩි කර තිබෙනවා. ගෘහස්ථ, කර්මාන්ත, වගේම සේවා කටයුතු යන සියලුම අංශවල විදුලි බිල වැඩිකිරීමෙන් තවදුරටත් ආර්ථිකය හැකිළෙනවා. විදුලි බිල වැඩිකරනවා කියන්නේ භාණ්ඩ හා සේවා නිෂ්පාදනය තවදුරටත් කඩා වැට්ටීමක්. එවැනි තත්වයක් තුළ තවදුරටත් ඇත්ත උද්ධමනය සඟවන්න ඒ පිළිබඳව දත්ත තීන්දු කිරීම කැබිනට් මණ්ඩලය විසින් පවරාගෙන තිබෙනවා. නමුත් මේ දක්වා ඒ දත්ත තීන්දු කළේ නමට හරි ස්වාධීනයි කියන නිලධාරීන්ගෙන් සැදුම්ලත් ආයතනවලින්. නමුත් ඒ තීන්දු ගැනීමත් කැබිනට් මණ්ඩලයට පවරා ගැනීමෙන් උද්ධමන නාටකයකුත් ඉදිරියේදී බලා ගන්න පුළුවන්. පාර්ලිමේන්තුවට, කැබිනට් එකට මේ දත්ත තීරණය කරන්න පුළුවන් නම්, ඉහළ වැටුප් ගෙවමින් මහ බැංකුවේ නිලධාරීන් තියාගෙන ඉන්නේ මොකටද? අපේ ආර්ථිකය වගේම ජනතාවගේ ජීවිත තවත් වටයකින් කඩා වැටීම සඟවන්න මේ වගේ තීන්දු ගන්නවා.

සති අන්තයේ දේශය පුවත්පතේ ප්‍රධාන ප්‍රවෘත්තියෙන් හෙළි කර තිබෙන්නේ රුපියල් 400ක බෙහෙත් එක රුපියල් 4000කට ගත්ත බවයි. මේ තත්වයන් මිනිසුන්ගේ සෞඛ්‍යය ප්‍රශ්නත් එක්ක දරාගන්නේ කොහොමද? බදුවලින් පීඩාවට පත්වී, විදුලි බිලෙන් කරන්ට් වැදී, ආර්ථිකය මෙතරම් කඩා වැටී තිබෙන මොහොතකද කූට මිලදී ගැනීම සිදු කරනවා. ඒ වගේම බාල බෙහෙත් ගෙන්වීම නිසා තවත් පැත්තකින් බරපතළ ප්‍රශ්න ඇති වෙනවා. මේ ආණ්ඩුවේ උපායමාර්ගය මිනිස්සු මරණ එකද? තමන්ට ඕනෑ දේවල් කර ගන්න ජනතාවගේ ජීවිත බිලිදීමද? මිනිසුන් විඳින පීඩාවලින්, වේදනාවලින් මිදීමට මේ වන විට වේදනා නාශක ඖෂධවලට වැඩිම ඉල්ලුමක් තිබෙන බව මේ පුවතපත විසින් වාර්තා කර තිබෙනවා. ඒ තරමට දරා ගන්න බැරි වේදනාවක්, පීඩාවක් තිබෙනවා. අනෙක් පැත්තෙන් ලෝක බැංකුවෙන් ඩොලර් මිලියන 200ක් ලැබුණා. අස්වැසුම සහනාධාර ක්‍රමය ක්‍රියාත්මක කරන බව ආණ්ඩුව පැවසුවත් එය සම්පූර්ණයෙන් අසාර්ථක බව ඇමිනෙස්ටි ආයතනය ප්‍රකාශ කර තිබෙනවා. මේ දක්වා සමෘද්ධි ලබාගත් අයට එයත් කපා හාර, අස්වැසුමත් අහෝසි කර තිබෙනවා. මේ වගේ සෑම පැත්තකින්ම බැට කන සාමාන්‍ය ජනතාව මත ඊයේ සිට නැවත වටයකින් විදුලි බිල වැඩි කළා.

ඇත්තටම විදුලි බිල වැඩි කළේ අයි.එම්.එෆ්. එක නියෝග කර තිබෙන අමතර රුපියල් බිලියන 30ක ආදායමක් විදුලි බල මණ්ඩලයට ලබාගන්නයි. අපිට මහජන උපයෝගීතා කොමිසම හෝ වෙන ආයතන අදාළ නැහැ. අපේ විවේචනය තිබෙන්නේ රනිල් රාජපක්ෂ ආණ්ඩුවට. මේ සියල්ල පිටුපස ඉන්නේ අයි.එම්.එෆ්. නියෝග ක්‍රියාත්මක කරන මේ ආණ්ඩුවයි. අපි විදුලි බිල 18%ක වැඩිවීම ඍජුවම ගෙවන අතර, අපි ලබාගන්නා භාණ්ඩ හා සේවාවල මිල විදුලි බිල වැඩිවීම
හේතුවෙන් වැඩිවීමේ වක්‍ර බරකුත් දරන්න සිදුවෙනවා. මේ අනුව විදුලි බිල 18%කින් වැඩි කිරීම නිසා ජනතාවට වක්‍රව භාණ්ඩ මිල ඉහළ යාමත් ඇතුළුව 40%කට වැඩි ගෙවීමක් කරන්න සිදුවෙනවා. තමන්ගේ දරුවාට කිරි පැකට් එකක් ගැනීමට හොරකම් කළ යුතු තත්වයට අම්මලාගේ පීඩනය ඉහළ ගොස් තිබෙනවා. ජනතාවගේ මුදල් ආණ්ඩුව බලහත්කාරයෙන් ගන්නා නිසා, මේ සටනෙන් පීඩාවට පත් ජනතාවට 33,000ක අධි වෝලිටීයතාවයෙන් කරන්ට් වද්දා තිබෙනවා. මේ වන විටත් ජනතාව විදුලි පරිහරණය ඉතා අවම තත්වයකට ගෙනත් තිබියදී මේ විදිහට බිල වැඩිකිරීමෙන් අධ්‍යාපනය ලබන දරුවාගේ අනාගතයට සිදුවන්නේ කුමක්ද?. දරුවන්ගේ අධ්‍යාපනය බිඳ වැටීම මගින් නැවත වටයකින් මේ රටේ ජනතාව පීඩාවට පත්වෙනවා.

ජනාධිපතිවරයා සියලු වරප්‍රසාද භුක්ති විඳිමින් ලෝකය වටේ කරක් ගහන අතර, අපේ කාන්තාවන්ට සහ දරුවන්ට අඳුරේ ගිලී කුස්සිය වටේ කරක් ගහන්න සිදුවී තිබෙනවා. රනිල් රාජපක්ෂ මහත්තයාට ආර්ථිකය ප්‍රතිව්‍යුහගත කරන්න හෝ විදේශ ණය ප්‍රතිව්‍යුහගත කරන්න බැරි වී තිබෙනවා. ඒ පීඩාවෙන් අපේ ගෙදර අම්මලාට දරුවන්ගේ කැම බීම පවා අඩුකරමින් ලයිට් නිවා දමා තමන්ගේ ආර්ථිකය ප්‍රතිව්‍යුහගත කර ගන්න සිදුවී තිබෙනවා. අවශ්‍යතාවය මත මේ දක්වා පරිහරණය කළ විදුලි උපකරණ සියල්ල පැත්තකට දමලා, නැවත ලිප්ගල්වලට මාරුවෙන්න සිදුවී තිබෙනවා. අපේ රටේ බහුතරයක් වූ ඡන්දදායිකාවන්ට මේ ආණ්ඩුවෙන් උරුම කර දී තිබෙන්නේ ලිප්ගල් තුනයි අනෙක් පැත්තෙන්, අඳුරත් විතරයි. ආණ්ඩුව අධි වෝල්ටීයතාවයෙන් ජනතාවට කරන්ට් වැද්දුවත් සෑම දෙයක්ම දරාගන සිටි කාලය නිමා කරන ලෙස සියලු දෙනාගෙන් අපි ඉල්ලා සිටිනවා. මෙ රටේ සමස්ත පුරවැසියන්ම හඬ අවදි කළ යුතුයි. විරෝධය පළ කළ යුතුයි. ආණ්ඩුව පළවා හැරීමේ පළමු පියවර විදුලි බිල වැඩිකිරීමට එරෙහිව
පාරට බැස ආරම්භ කරන ලෙස අපි ඉල්ලා සිටිනවා.

රාජපක්ෂ පුතුන්ගේ මඟුල් ගෙවල්වල ලයිට් බිල ගෙවන්න යාළුවෝ හිටියා. නමුත් අපේ රටේ ජනතාවගේ මළ ගෙදරක ලයිට් එකක් දාගන්නත් බැරිතරමට වට්ටවා තිබෙනවා. අයි.එම්.එෆ්. එකේ පදයට නටන ආණ්ඩුව ගෙනයන ක්‍රියාමාර්ගවල අඳුරෙන් රට මුදා ගැනීම සඳහා රටේ බහුතරයක් ගැහැනුන් එළියට බහින්න ඕන කාලය ඇවිල්ලා. සංවිධානය වී පෙරමුණ ගන්න ඕන කාලය ඇවිල්ලා. රටම අඳුරට දැමූ ආණ්ඩුවට; මේ සමාජ ක්‍රමයට; එරෙහිව අලුත් ජීවිතයක් සහ අලුත් එළියක් ලබාගැනීමට සියලුම ජනතාව එක මිටකට එකතු වන්න. ගැහැනුන් ඇතුළු සියලු දෙනා එකතු වී විරෝධතාවය දක්වන ලෙස අපි ඉල්ලා සිටිනවා.”

මෙම මාධ්‍ය හමුවට ජාතික ජන බලවේගයේ ජාතික කමිටු සාමාජිකා නිමලා සිරිවර්ධන සහ අයිතීන් උදෙසා කාන්තාවෝ සංවිධානයේ කොළඹ දිස්ත්‍රික් විධායක කමිටු සාමාජිකා දමයන්ති බාලසූරියද එක්ව සිටියෝය.

-Colombo, October 20, 2023-

එක්සත් ජාතීන්ගේ ළමා අරමුදල (UNICEF) සහ ජාතික ජන බලවේගය අතර හමුවක් අද (20) දින පෙරවරුවේ ජවිපෙ ප්‍රධාන කාර්යාලයේදී පැවැත්විණි.

මෙම අවස්ථාව සඳහා UNICEF සංවිධානය වෙනුවෙන් ශ්‍රී ලංකා නියෝජිත ක්‍රිස්ටියන් ස්කූග් (Christian Skoog) සහ දකුණු ආසියානු කලාප අධ්‍යක්ෂ සංජය වීරසේකර යන මහත්වරුද ජාතික ජනබලවේගය වෙනුවෙන් නායක අනුර කුමාර දිසානායක, ලේකම් විශේෂඥ වෛද්‍ය නිහාල් අබේසිංහ සහ ජාතික විධායක සභික නීතිඥ හර්ෂණ නානායක්කාර යන සහෝදරවරුද සහභාගි වූහ.

මෙහිදී ශ්‍රී ලංකාවේ ආර්ථික අර්බුදය හේතුවෙන් ළමුන්ට මුහුණපෑමට සිදු වී ඇති ගැටලුකාරී තත්වයන් සහ ඔවුන්ගේ පෝෂණ මට්ටම්වල ගැටලු පිළිබඳව දෙපාර්ශ්වය අතර දීර්ඝව සාකච්ඡාවට බඳුන් විය. එමෙන්ම UNICEF සංවිධානය විසින් මෙරට දරුවන් වෙනුවෙන් ගනු ලැබූ ක්‍රියාමාර්ග සම්බන්ධයෙන් එම සංවිධානය විසින් පැහැදිලි කරන ලැබීය.

මෙහිදී ශ්‍රී ලංකාවේ ළමුන් සහ කාන්තාවන් වෙනුවෙන් ඉටු කරනු ලබන කාර්යභාරය වෙනුවෙන් ජාතික ජන බලවේගය විසින් UNICEF සංවිධානයට සතූතිය පළකරන ලදී.

එක්සත් ජනපද තානාපතිනි ජුලී චන්ග් (Julie Chung) මහත්මිය සහ ජාතික ජන බලවේගයේ නායක අනුර දිසානායක සහෝදරයා අතර හමුවක් අද (19) පස්වරුවේ ජ.වි.පෙ. ප්‍රධාන කාර්යාලයේදී සිදු විය.

මෙම හමුව සඳහා එ.ජ. තානාපති කාර්යාලයේ දේශපාලන නිලධාරි මැතිව් හින්සන් (Matthew Hinson) සහ දේශපාලන විශේෂඥ නස්රීන් මරික්කාර් (Nazreen Marikkar) යන මහත්ම මහත්මීහුද ජාතික ජන බලවේගයේ ජාතික විධායක සභික විජිත හේරත් සහ ජාතික විධායක සභික මුදිත නානායක්කාර යන සහෝදරවරුද එක්ව සිටියහ.

මෙහිදී ඊශ්‍රායලය සහ පලස්තීනය අතර පවතින යුද ගැටුම හේතුවෙන් සිදු වෙමින් පවතින මානුෂීය ව්‍යසනය වැළැක්වීම සඳහා එක්සත් ජාතීන්ගේ සංවිධානය මගින් කඩිනමින් මැදිහත්වීමේ අවශ්‍යතාව ජාතික ජන බලවේගය එ.ජ. තානාපතිවරියගේ අවධානයට ලක් කරන ලදී.

මේ වන විට ශ්‍රී ලංකාවේ ජනතාව විඳිමින් සිටින ආර්ථික දුෂ්කරතා ජාත්‍යන්තර මූල්‍ය අරමුදලේ මැදිහත්වීම් හමුවේ තීව්‍ර වී තිබීම පිළිබඳව ජාතික ජන බලවේගය කරුණු දක්වා සිටි අතර එක්සත් ජනපදය වසරක කාලයක් තුළ ශ්‍රී ලංකාවට මානුෂීය ආධාර ලෙස ඩො.මි. 278ක් ප්‍රදානය කර තිබෙන බව තානාපතිවරිය සඳහන් කළාය.

ආණ්ඩුව විසින් ජනතාවගේ ප්‍රජාතන්ත්‍රවාදී අයිතීන් යටපත් කිරීමට ගන්නා උත්සාහය පිළිබඳව මෙහිදී ජාතික ජන බලවේගයේ නියෝජිතයින් විසින් පෙන්වා දෙන ලදී. පළාත් පාලන මැතිවරණය කල්දැමීම, පළාත් සභා මැතිවරණය නොපවත්වා සිටීම සහ එළඹෙන ජනාධිපතිවරණය නොපවත්වා සිටීමට උත්සාහ කිරීම පිළිබඳව ජාතික ජන බලවේගයේ නියෝජිතයින් විසින් තානාපතිවරිගේ අවධානයට ලක් කරවන ලදී.

එළඹෙන 26වැනි දින ඇරඹෙන ජාතික ජන බලවේගයේ නායක අනුර කුමාර දිසානායක සහෝදරයාගේ එක්සත් ජනපද සංචාරයට සුබපැතීමටද තානාපතිනිය මෙහිදී කටයුතු කළාය.