(-Colombo, August 30, 2024-) අද (30) පස්වරුවේ කොළඹදී මහතා ජාතික ජන බලවේගයේ නායක සහ ජනාධිපති අපේක්ෂක අනුර කුමාර දිසානායක මහතා ඉන්දීය ආරක්ෂක උපදේශක Ajit Doval මහතා හමුවිය. දෙරට අතර පවතින දේශපාලන සම්බන්ධතාවයන් සහ ජනාධිපතිවරණය ආශ්‍රිත දේශපාලන තත්වය පිළිබඳව මෙහිදී සාකච්ඡාවට බඳුන් විය. මෙම අවස්ථාව සඳහා ජාතික ජන බලවේගයේ ජාතික විධායක සභික විජිත හේරත් ද සහභාගී […]
(-Colombo, August 30, 2024-)
අද (30) පස්වරුවේ කොළඹදී මහතා ජාතික ජන බලවේගයේ නායක සහ ජනාධිපති අපේක්ෂක අනුර කුමාර දිසානායක මහතා ඉන්දීය ආරක්ෂක උපදේශක Ajit Doval මහතා හමුවිය.
දෙරට අතර පවතින දේශපාලන සම්බන්ධතාවයන් සහ ජනාධිපතිවරණය ආශ්‍රිත දේශපාලන තත්වය පිළිබඳව මෙහිදී සාකච්ඡාවට බඳුන් විය.
මෙම අවස්ථාව සඳහා ජාතික ජන බලවේගයේ ජාතික විධායක සභික විජිත හේරත් ද සහභාගී විය.
(-ජාතික ජන බලවේගයේ ගණකාධිකාරී සහ විගණක වෘත්තිකයින්ගේ සංවිධානය – මාධ්‍ය හමුව – 2024.08.30-) අපේ රට බංකොලොත්භාවයට හෙළා ඇති බව අපි හැමෝම දන්නවා. ඊට බලපෑ ප්‍රධාන හේතුව නාස්තිය, දූෂණය, හොරකම වගේ දේවල්. අපේ රටේ තිබුණු ගෞරවනීය රාජ්‍ය සේවය මෙතෙක් සිටි පාලකයන් විසින් බිඳවට්ටා තිබෙන පසුබිමක ජනාධිපතිවරණය වෙනුවෙන් සූදානම් වෙනවා. එහි තැපැල් ඡන්දය හතරවැනිදා සිට ආරම්භ කෙරෙනවා. […]
(-ජාතික ජන බලවේගයේ ගණකාධිකාරී සහ විගණක වෘත්තිකයින්ගේ සංවිධානය – මාධ්‍ය හමුව – 2024.08.30-)
අපේ රට බංකොලොත්භාවයට හෙළා ඇති බව අපි හැමෝම දන්නවා. ඊට බලපෑ ප්‍රධාන හේතුව නාස්තිය, දූෂණය, හොරකම වගේ දේවල්. අපේ රටේ තිබුණු ගෞරවනීය රාජ්‍ය සේවය මෙතෙක් සිටි පාලකයන් විසින් බිඳවට්ටා තිබෙන පසුබිමක ජනාධිපතිවරණය වෙනුවෙන් සූදානම් වෙනවා. එහි තැපැල් ඡන්දය හතරවැනිදා සිට ආරම්භ කෙරෙනවා. මේ ඡන්දය නැවත ගෞරවාන්විත රාජ්‍ය සේවයක් ඇති කිරීමට පාවිච්චි කරන්නේ කොහොමද කියන දේ සාකච්ඡා කළ යුතු වෙනවා. මේ වන විට ජනාධිපති අපේක්ෂකයන් තමන්ගේ ප්‍රතිපත්ති ප්‍රකාශ ඉදිරිපත්කර තිබෙන පසුබිමකයි අපි මේ මාධ්‍ය සාකච්ඡාව පවත්වන්නේ. රට බිඳ වැටුණු ආකාරය මේ ඉදිරිපත් කර තිබෙන ප්‍රතිපත්ති ප්‍රකාශන ඇතුළින් තේරුම් ගන්නේ කොහොමද? සජිත් ප්‍රේමදාස මහතා ඉදිරිපත් කර තිබෙන ප්‍රතිපත්ති ප්‍රකාශනයේ “රාජ්‍ය සේවය සඳහා බඳවා ගැනීම්, උසස්වීම් සඳහා සුදුසුකම් සහ හැකියා කුසලතා සලකා බැලෙන විනිවිද පෙනෙන ක්‍රමවේදයක්” ස්ථාපිත කරනවා කියලා සඳහන් වෙනවා. මේ වගේ ප්‍රතිපත්ති ප්‍රකාශන ඉදිරිපත් කරන අයම තමයි, උස නම් සිකියුරිටි, මිටිනම් කම්කරු න්‍යායයෙන් ගස් යට වාඩිවෙලා තනතුරු බෙදන්න කතා කළේ. මේ අයගේ භාවිතය සහ ඉදිරිපත් කරන ප්‍රතිපත්ති අතර පවතින ගැටුම අවබෝධ කර ගත යුතුයි.
“මෙම ජනාධිපතිවරණය වංචා දූෂණ නැවැත්වීමේ තීරණාත්මක කඩඉමක්”
-හිටපු විගණකාධිපති සරත් චන්ද්‍රසිරි මායාදුන්න-
අද රට විශාල විනාශයකට පත්වීමට බලපෑ හේතුත් සමග ගලපා ගනිමින් අපිට බොහෝ දේ කල්පනා කළ යුතු වෙනවා. මෙතෙක් සිටි නායකයෝ වගේම ඔවුන්ගේ ඒජන්තවරුන් වේදිකා සහ මාධ්‍ය ඔස්සේ ජනතාව රවටන්න තවදුරටත් විශාල උත්සාහයක් ගන්නවා. අපේ රාජකාරි ජීවිතය තුළ සකස් කළ නිල වාර්තාවලින් මේ නායකයන් සහ ඔවුන් සමග සිටින කණ්ඩායම් ක්‍රියා කළ ආකාරය හෙළිවී තිබෙනවා. රට විනාශ කරන්න දායක වූ අයම විශාල අත්දැකීම් සම්භාරයක් තිබෙන බව ප්‍රකාශ කරමින් දැන් ඉදිරියට එන අවස්ථාවේ අපට අහන්න සිද්ධ වෙන්නේ ඒ ගොල්ලන් සිටිය කාලේ ඒ දේවල් නොකළේ ඇයි කියලා. ඔවුන්ගේ හත්මුතු පරම්පරාව ගොඩදාගත් ආකාරයත් මේ අවස්ථාවේ අත්සන් කරන ගිවිසුම් ගැනත් අපේ අවධානය යොමු කරන්න ඕනෑ. මාධ්‍යවලින් පෙන්වන ගිවිසුම් අත්සන් කිරීම් යට සැඟවී තිබෙන්නේ මොනවාදැයි ජනතාව දන්නේ නැහැ. රජයේ මුදල් හොරකම් කරන්න කොතරම් අවස්ථාවන් තිබෙනවාද කියලා, අපට පැහැදිලි වෙන්නේ නැහැ. විගණකාධිපතිවරයා ඉදිරිපත් කර තිබෙන වාර්තා පාර්ලිමේන්තුවේ සභාගත කර තිබෙනවා. ආණ්ඩුක්‍රම ව්‍යවස්ථාවේ විධිවිධානවල හැටියට රාජ්‍ය ආයතනවල නිල තොරතුරුවලින් අපි ඒ වාර්තා සකස් කර තිබෙනවා. කිසිදු දේශපාලන පක්ෂයකට මඩ ගහන්නවත් වෙනත් අරමුණුවලින්වත් අපි මේ වාර්තා සකස් කර නැහැ. ඉංග්‍රීසි පාලනය යටතේ පිහිටවූ විගණකාධිපති දෙපාර්තමේන්තුවේ මේ දක්වා නිකුත් කළ වාර්තා රහස් වාර්තා නොවෙයි. පාර්ලිමේන්තුවේ සහ ජාතික විගණන කාර්යාලයේ වෙබ් අඩවියේ පළ කෙරෙනවා. ඕනෑම කෙනෙකුට වැඩි විස්තර පරිශීලනය කරන්න පුළුවන්. මෙතෙක් සිටි පාලකයන් වංචා දූෂණ සිදුකළේ කොහොමද කියලා ඒ වාර්තාවල වගේම වාචික සහ නිල ලිපි ලේඛනවලින් සාක්ෂි හැටියට තහවුරු ඒවා.
නමුත් එම වාර්තාවල දේශපාලකයන්ගේ නම් හෝ ඔවුන් සිදුකළ වංචා දූෂණ පිළිබඳව සඳහන් වන්නේ නැහැ. පොදු රජ්‍ය මණ්ඩලීය ආකෘතිය තුළ පැවරී තිබෙන්නේ ආයතන විගණනය කිරීම මිස පුද්ගලයන් විගණනය කිරිම නොවෙයි. ආයතනයේ ගිණුම් අනුව සකස් කරන වාර්තා මඟින් දේශපාලකයනට චෝදනා එල්ල කරන්නේ ඇයි? ආණ්ඩුක්‍රම ව්‍යවස්ථාව අනුව අමාත්‍යාංශයේ ලේකම්වරයා තම ඇමතිවරයාගේ විධානය සහ පාලනයට යටත්ව සියලුම ආයතන මෙහෙයවනවා. ඒ ආයතනවල ප්‍රධාන ගණන් තැබීමේ නිලධාරී පත්කර සිටිනවා. ආණ්ඩුක්‍රම ව්‍යවස්ථාවේ හැටියට තමන් යටතේ තිබෙන ආයතනවල මූල්‍ය අවභාවිතා සම්බන්ධයෙන් පළමු කොටම අදාළ ඇමතිවරයාට වගකීම පැවරෙනවා. සියල්ල මෙහෙයවීමේ බලය දී තිබෙන්නේ අමාත්‍යවරයාටයි. අපිට ලැබී තිබෙන විගණන සාක්ෂි අනුව බොහෝ වංචා දූෂණ සිදුකර තිබෙන්නේ අමාත්‍යවරයාට සම්බන්ධයක් තිබෙන විවිධ ක්‍රියාමාර්ග මගින්. මේ නිසා අදාළ වගකීම්වල වැඩිම ප්‍රමාණය තිබෙන්නේ නිලධාරීන්ට නොව අදාළ අමාත්‍යවරයාටයි. නමුත් පාර්ලිමේන්තු මන්ත්‍රීවරු සහ ඇමතිවරු විශේෂයෙන්ම චෝදනා එල්ල කරන්නේ නිලධාරීන්ට. නමුත් අමාත්‍යවරයා අදාළ වගකීම් බාර ගන්නේ නැතිනම්, ඔහු නිසි පරිදි ක්‍රියාකර නැති බවයි තහවුරු වෙන්නේ. සමස්ත මූල්‍ය අපරාධවලින් සුළු ප්‍රමාණයක වගකීමක් පමණයි නිලධාරීන් වෙත පැවරෙන්නේ.
මූල්‍ය පරිපාලනය සම්බන්ධයෙන් වගවීම පාර්ලිමේන්තුවට පැවරී තිබුණත් ආණ්ඩු පක්ෂයේ බලය යොදාගෙන බහුතර ඡන්දයෙන් ක්‍රියාකර තිබෙන ආකාරය කෙබඳුදැයි අපි දන්නවා. කැනඩාව, ඕස්ටේ්‍රලියාව, මහා බි්‍රතාන්‍යය පමණක් නොවෙයි, ඉන්දියාව දිහා බැලුවත් විගණන වාර්තා සම්බන්ධයෙන් පාර්ලිමේන්තුවේ විවාදයට ලක් කරනවා. නමුත් අපේ පාර්ලිමේන්තුවේ ස්ථාවර නියෝගවලින් විධායකය පාලනය කරන්න සහ යම් වැරදි සිදුකරනවා නම් ඒවාට එරෙහිව පියවර ගන්න අතිවිශාල බලයක් ලබාදී තිබෙනවා. ඒ වගේම 148 ව්‍යවස්ථාව යටතේ මූල්‍ය පාලනය සම්බන්ධයෙන් පාර්ලිමේන්තුවට විශාල බලයක් ලබාදී තිබෙනවා. කිසියම් ආයතනයක් සම්බන්ධයෙන් කෝප් සභාව සහ කෝපා සභාව යන්න කමිටු දෙකෙන් බොහෝ විමර්ශන සිදුකර නිසි පරිදි වගවීම් ඉටුකළ හැකියි. නමුත් ඒ කිසිවක් ඉටුනොකර, මාධ්‍ය ඉදිරියට ඇවිත් ප්‍රකාශ සිදුකරන ආකාරය විශේෂයෙන්ම මේ මැතිවරණ සමයේ අපි හොඳින් දකිනවා. වංචා දූෂණ සම්බන්ධයෙන් වගඋත්තරකරුවන් වී සිටින අය දැන් එවැනි තත්වයන් වළක්වන්න කතා කරන බව අපි දකිනවා. නමුත් ඔවුන් මේ අවස්ථාවේ විවිධ අසත්‍ය සහ මඩ ප්‍රචාර, වංචා, දූෂණවලට සැබැවින්ම විරුද්ධව පෙළ ගැසී සිටින ජාතික ජන බලවේගයට එල්ල කරන ආකාරය අපි දකිනවා. විශේෂයෙන්ම තෝරා ගත්ත නියැදියකින් හෙළි වී තිබෙන්නේ බිලියන 399ක මුදලක් එක් ආයතනයකින් විනාශ කර ඇති බවයි. මේ වැනි විෂයයන් 35ක් සම්බන්ධයෙන් වාර්තා අපේ අවධානයට යොමු වී තිබෙනවා. මාරුවෙන් මාරුවට බලයට ආ දෙපිල මෙවැනි අපරාධ සම්බන්ධයෙන් ඇමතිවරයාගෙන් ප්‍රශ්න කළේ නැහැ. ආණ්ඩු පක්ෂයේ පමණක් නොවෙයි විපක්ෂයේ බහුතර කණඩායම් කියන අයත් වංචා දූෂණ සිදු කර ඒවා හැමදාමත් යටපත් කළා. එම තත්වය නැවැත්වීමේ තීරණාත්මක කඩඉමකට මෙම ජනාධිපතිවරණයෙන් අපි සියලු දෙනා පැමිණ සිටිනවා.
“රට බංකොලොත් කළ පිරිස වේදිකා තුනකට බෙදී නැවතත් රට කරන්න බලය ඉල්ලනවා”
-හිටපු විගණකාධිපති ගාමිණී විජේසිංහ-
අපේ රාජකාරි ජීවිතය තුළ ලබාගත් බොහෝ අත්දැකීම් කතා කරන්න මෙතෙක් වේදිකාවක් තිබුණේ නැහැ. හොරුන්ගෙන් දූෂිතයන්ගෙන් පිරී තිබුණු ආකාරය අපි කවුරුත් දන්නවා. රට බංකොලොත්භාවයට හැරවූ ප්‍රධාන කඩඉම 2015 බැඳුම්කර වංචාවයි. එයින් ඒ මොහොතේ සිදුවූ බලපෑම සහ ඉදිරි අනාගතයේ තවත් බොහෝ කාලයකට බලපෑම් සිදුවෙනවා. නමුත් ඔවුන් අද වේදිකාවට ගොඩවී නැවතත් රට ගොඩනගන්න බලය ඉල්ලා සිටිනවා. රට බංකොලොත් කිරීමේ වැරදිකරුවන් ලෙස ශ්‍රේෂ්ඨාධිකරණය තීන්දු කළ තවත් කණ්ඩායමක් ඉන්නවා. ඔවුනුත් තවත් වේදිකාවක ඉඳලා රට ගොඩනඟන්න අවස්ථාව ඉල්ලා සිටිනවා. පසුගිය අවුරුදු 76ක කාලය පුරාම රට බංකොලොත් කරන්න දායක වූ පිරිස වේදිකා තුනකට බෙදිලා රට සංවර්ධනය කරන්න බලය ඉල්ලනවා. තවත් කණ්ඩායමක් රට අයිඑම්එෆ් එකට බාරදීලා රට ගොඩනැගූ බව කියමින් බලය ඉල්ලනවා. මේක පුදුම සහගත විහිළුවක් බවට පත්වී තිබෙනවා. විගණකාධිපතිවරයා විසින් 2017 ඉඳලා රට බංකොලොත් වෙනවාය කියන අනතුරු ඇඟවීම සහිත වාර්තා පාර්ලිමේන්තුවට ඉදිරිපත් කළා. විශේෂයෙන්ම 2015දී සිදු කළ බිලියන 6.5ක බැඳුම්කර වංචාවත් එක්ක මේ රට ගමන් කරන මාර්ගය වැරදියි කියන දේ අපි පැහැදිලිව පෙන්වා දුන්නා. රටේ මූල්‍ය පාලනය සම්පූර්ණයෙන්ම අසාර්ථක බවට පාර්ලිමේන්තුව දැනුවත් කළා. නමුත් ඒ කිසිදු වාර්තාවක් කෙරෙහි පාර්ලිමේන්තුවේ අවධානය යොමුකර වැඩපිළිවෙළක් සකස් කළේ නැහැ.
විශේෂයෙන්ම 2016දී මුදල් අමාත්‍යාංශය විසින් ලබාදුන් ගිණුම් වැරදි නිසා විගණකාධිපතිවරයා විසින් ප්රතික්ෂේප කළා. එහි සඳහන් වත්කම් සහ ණය ප්‍රමාණය සම්බන්ධ දත්ත වැරදි බව පෙන්වා දුන්නා. පාර්ලිමේන්තුවට දැනුම් දුන්නා. නමුත් පාර්ලිමේන්තුව ඒ කිසිම දෙයක් ගණන් නොගෙන රට බංකොලොත් වෙන්න ඉඩ හැරියා. 2016 මුදල් අමාත්‍යාංශයේ ගිණුම් විගණකාධිපතිවරයා ප්රතික්ෂේප කළ අවස්ථාවේ පාර්ලිමේන්තුවේදී ලැබුණු විනාඩි 20ක කාලය තුළ කතා කළේ අනුර කුමාර සහෝදරයා විතරයි. වෙන කිසිකෙනෙක් ඒ ගැන කතා නොකර මුදල් අමාත්‍යාංශයේ ගිණුම් පාර්ලිමේන්තුවේදී සම්මත කර දුන්නා. 2022 දී රට බංකොලොත් වුණේ ඒවාගේ ප්‍රතිඵල හැටියට. 2017 දී ණය කළමනාකරණය පිළිබඳව විශේෂ වාර්තාවක් අපි සකස් කළා. පසුගිය අවුරුදු 50ක ණය ගැනීම් පිළිබඳව විශ්ලේෂණය කර, මේ ණය ගැනීම් සහ ඒ ආශ්‍රිත දුෂණ වංචා වහාම නතර කරන ලෙස දැනුම් දුන්නා. නමුත් ඒ කිසි දෙයක් පසුගිය කාලයේ රට පාලනය කළ පුද්ගලයන් ගණන් ගත්තේ නැහැ. ඒ වැරදි දිගින් දිගටම සිදුකර ගෙන ගියා. උදාහරණයක් හැටියට ඩී.ඒ. රාජපක්ෂගේ සොහොන් කොත් ඉදිකිරීමට මූල්‍ය අවභාවිතා කළ ආකාරය දක්වන්න පුළුවන්. විගණන වාර්තාවෙන් ඒ බව හෙළි කිරීම නිසා වැය කළ මුදලින් කොටසක් නැවත ගෙවා තිබුණා. විල්පත්තුවේ වන විනාශය සම්බන්ධයෙන් ශ්‍රේෂ්ඨාධිකරණය පවා විගණන වාර්තා පදනම් කරගෙන තීන්දුවක් දුන්නා. නමුත් ඒ නියෝග ඒ ආකාරයෙන් ඉටු නොකර, අද වේදිකාවල සිටිමින් රට සංවර්ධනය කරන්න බලය ඉල්ලනවා. ඔවුන් ඉදිරියේදී එවැනි ක්‍රියා නොකර සිටීවී යැයි මම නම් විශ්වාස කරන්නේ නැහැ.
ඒ වගේම සතොසෙන් හාල් ගෙන්වීමෙ අලාභය 2016 – 2017 කාලයේ රුපියල් බිලියන 16ක් බවත් ඒ මුදල වහාම අදාළ අයගෙන් අයකර ගන්න ක්‍රියා කරන ලෙසත් නිර්දේශ කළා. නමුත් එය සම්පූර්ණයෙන්ම යට ගසා දැම්මා. දේශපාලකයන් විසින් රාජ්‍ය සේවයත්, රාජ්‍ය සේවයේ ගෞරවයත් සම්පූර්ණයෙන්ම විනාශ කළා. මේ වගේ තත්වයක් යටතේ මෙතෙක් ආණ්ඩු කළ දේශපාලන පක්ෂවලට බලය දෙන්න ඉඩ හැරිය නොහැකියි. අපි මේ මාධ්‍ය හමුවට පැමිණියේ ඒ නිසයි. විශ්වාසය තැබිය හැකි තැනකට රට බාර දෙන්න ඕනෑ. අයිඑම්එෆ් එකට රට සම්පූර්ණයෙන්ම බාරදීලා කිසි දවසක ගොඩගන්න ලැබෙන්නේ නැහැ. එවැනි මාර්ගයක ගිය රටවල් සම්පූර්ණයෙන්ම විනාශ වුණා. අපේ රටත් දහසය වැනි වරට අයිඑම්එෆ් එකට ගිහින් ඩොලර් බිලියන 03කට ආසන්න ණයක් අරගෙන ගොඩගන්න ලැබෙන්නේ නැහැ. මුදල් අමාත්‍යාංශයේ පළවැනි කාර්තුවට අදාළ ණය බුලටින් එකෙන් ඒ බව තහවුරු වෙනවා. මේ වන විට රටේ ණය ප්‍රමාණය ඩොලර් බිලියන 100 ඉක්මවා ගිහින් තිබෙනවා. රට අගාධයෙන් ගොඩගත් බව ප්‍රකාශ කළද, ඇත්ත වශයෙන්ම එහෙම දෙයක් සිදුවී නැති බව එයින් පැහැදිලියි. භාණ්ඩාගාරයේ ඍණ ශේෂය රුපියල ටි්‍රලියන 22ක් බව විගණන වාර්තාවේ සඳහන් වෙනවා. එවැනි රටක් ගොඩගෙන ඇති බව කියන්නේ කොහොමද? මුදල් අමාත්‍යාංශය ඉදිරිපත් කර තිබෙන දත්ත අනුව දවසක රජයේ ආදායම රුපියල් කෝටි 850යි. නමුත් දවසක මුළු වියදම රුපියල් කෝටි 1490යි. ඒ කියන්නේ දවසකට රුපියල් කෝටි 660ක ණය ගන්නා ආර්ථිකයක් අද පවතින්නේ. එහෙම තිබියෙදී රාජ්‍ය සේවකයන්ගේ පඩි දෙගුණයකින් වැඩිකරන බව ප්‍රකාශ කිරීම පිළිගත හැකිද?
රාජ්‍ය සේවකයන්ගේ පඩි වැඩි නොකළ යුතු බව එයින් කියැවෙන්නේ නැහැ. රුපියල් කෝටි 1490ක් වන දවසක රජයේ වියදම අවම කර ගනිමින් වංචා දූෂණ නැවැත්වීම මෙතෙක් බලයේ සිටි කිසිම පක්ෂයකට කරන්න බැහැ. එය කළ හැක්කේ රටේ වංචාව, දූෂණය සහ නාස්තිය සම්පූර්ණයෙන්ම නතර කළ හැකි බලවේගයකට පමණයි. දේශපාලකයන් සිදුකරන දූෂණය සම්පූර්ණයෙන්ම නතර කර, මේ රට වෙනස්ම යුගයකට පරිවර්තනය කළ යුතුයි. දුප්පත්කම නඩත්තු කරමින් යන දේශපාලන පක්ෂ කිසි එකකට මේ රට මෙතනින් ගොඩගන්න බැහැ. විකල්ප වැඩපිළිවෙළක් තිබෙන මාලිමාව යටතේ මේ වෙනස කළ හැකි බවට විශ්වාසයක් අපට ගොඩනැගී තිබෙනවා. රාජ්‍ය අංශය ගෞරවාන්විත රාජ්‍ය අංශයක් බවට පරිවර්තනය කර ගන්න, දේශපාලන බලපෑම්වලින් තොර, රාජ්‍ය අංශයක් බවට පරිවර්තනය කර ගන්න තමන්ගේ ආත්මගරුත්වය ඇතිව කෙලින් සිටගත හැකි රටක් ගොඩනැගීම අත්‍යවශ්‍යයි. මේ වෙනුවෙන් තමන්ගේ තැපැල් ඡන්දය භාවිතා කරන්න කියන ඉල්ලීම ඉතා ඕනෑකමින් කරනවා.
මාධ්‍යවේදීන් නැගූ ප්‍රශ්නවලට පිළිතුරු දෙමින්
ප්‍රශ්නය: ඔබතුමන්ලා මෙයට කලින් වෙනත් දේශපාලන කඳවුරකට සහයෝගය දුන්නාද? මේ අවස්ථාවේ මාලිමාව තෝරා ගත්තේ ඇයි?
හිටපු විගණකාධිපති ගාමිණී විජේසිංහ – පිළිතුර:
මම කවදාවත් එහෙම දේශපාලන කඳවුරකට ගියේ නැහැ. නමුත් රට යන්න ඕනැ තැන දැනගෙන අවබෝධයෙන් සිටියේ. 2019 වන විටත් ඒ අවබෝධයෙන් තමයි කටයුතු කළේ. ආණ්ඩු කළ දේශපාලන පක්ෂවලට මේ රට ගොඩගන්න බැහැ කියන දැඩි ස්ථාවරයේ සිටිමින් කටයුතු කළා.
ප්‍රශ්නය: මේ වන විට ප්‍රතිපත්ති ප්‍රකාශ රැසක් නිකුත් කර තිබෙනවා. මේ අයගේ ප්‍රතිපත්ති ප්‍රකාශ සම්බන්ධයෙන් අධ්‍යයනයක් කළාද?
හිටපු ප්‍රධාන ගණකාධිකාරී ඇන්ටන් පෙරේරා – පිළිතුර:
රනිල් වික්‍රමසිංහ මහත්මයා ඉදිරිපත් කළ ප්‍රතිපත්ති ප්‍රකාශය ගැන අධ්‍යයනයක් කළා. එහි සමස්ත කරුණු පිළිබඳව විග්‍රහයක් කරන්න අවස්ථාවක් නැහැ. නමුත් දේශපාලන සමස්තය ගැන කරුණු දෙක තුනක් ගත්තාම අවබෝධයක් ලබාගන්න පුළුවන්. එහි 27වැනි පිටුවේ “කිරි නැති හන්දා රට කිරි දීලා…” කියන හැඳින්වීම යටතේ සඳහන් කර තිබෙන්නේ රටට අවශ්‍ය කිරිවලින් 35%ක් පමණක් රට තුළ නිපදවන බවයි. මිල්කෝ ආයතනයේ යන්ත්‍ර සූත්‍ර වසරේ වැඩි කාලයක් අක්‍රීයව තබන බවත් කිරි ආනයනය සඳහා වසරකට ඩොලර් බිලියන 282ක් පිටරටට ඇදී යන බවත් සඳහන් කර තිබෙනවා. 2015දී දේශීය කිරි නිෂ්පාදනය වැඩි කිරීමේ අරමුණෙන් විදේශ කිරි ගවයන් ලංකාවට ගෙන ආවා. කිරි ගවයන් 5000ක් ගෙනාවත් එයින් වැඩි සංඛ්‍යාවක් විවිධ රෝගාබාධ නිසා මිය ගියා. පී. හැරිසන් ඇමතිවරයා මේ ව්‍යාපෘතිය සම්පූර්ණයෙන් මෙහෙය වූවා. එසේ තිබියෙදී 2018 මැයි මාසයේ තවත් කිරි ගවයන් 5000ක් ගෙන එන්න ඩොලර් මිලියන 11කට වැඩි මුදලක් වෙලාඩ් සමාගමට ගෙව්වා. නමුත් එක හරකෙක් වත් ආනයනය කළේ නැහැ. ඒ ඇමතිවරයා රනිල් වික්‍රමසිංහ මහත්තයත් එක්ක ඉන්නවා. මේ සංකල්පයට ගාමිණී විජිත් විජිතමුණි සොයිසාත්, පී. හැරිසන් ඇමතිවරයාගෙන් පස්සේ ඒ අමාත්‍ය ධුරයට පත් කළා. ග්‍රාමීය ආර්ථික කටයුතු අමාත්‍යාංශයට අයත් මුදල් රුපියල් ලක්ෂ 98ක් පාර්ලිමේන්තුවේ ලංකා බැංකු ශාඛාවෙන් බැරකර තිබෙනවා. මේ සල්ලි බැරකර තිබුණේ ජී.ඩබ්.ඩබ්. සොයිසා කියන නමට. ඒ පිළිබඳ විමර්ශනවලදී හෙළිවුණේ ගාමිණී විජිත විජයමුණි සොයිසා ඇමතිගේ ගිණුමක්. සොයිසා ඇමතිවරයා කිරි ගවයන් 50දෙනෙක් ලබාගෙන තිබුණා. රුපියල් ලක්ෂ පහක් වූ එක් කිරි ගවයෙක් සහනාධාර මුදලක් යටතේ ලබාදුන්නේ රුපියල් ලක්ෂ දෙකකට. ඒ සොයිසත් රනිල් වික්‍රමසිංහ මහත්තයාගේ කණ්ඩායමේ ඉන්නනවා. බැඳුම්කර මුදල් වංචාවට සම්බන්ධ රනිල් වික්‍රමසිංහ මහත්මයාගේ කණ්ඩායමේ කිරි ගවයන් ආනයනයට සම්බන්ධ පී. හැරිසන් සහ ගාමිණි සොයිසා යන දෙදෙනාම සිටිනවා. ඒ අතින් ඔවුන් හොඳම ටීම් එක බව අපි පිළිගන්නවා, රටේ ඉතිරි ටිකත් හොඳටම විනාශ කරන්න.
ෆොක්ස්වැගන් ව්‍යාපෘතිය සතියකින් ආරම්භ කරන බව කියූ හර්ෂ ද සිල්වා සජිත් ප්‍රේමදාස සමග ඉන්නවා. ඒ ව්‍යාපෘතිය පිළිබඳව කිසිම සඳහනක් මේ ප්‍රතිපත්ති ප්‍රකාශනයේ නැහැ. තමන් ආරම්භ කර, අතරමග නැවැත්වූ ව්‍යාපෘතිය ගැනවත් සඳහන් නොවෙන තත්වයක ඉතිරි ටික ගැන හිතා ගන්න පුළුවන්. අපිට කියන්න තිබෙන්නේ මේ ප්‍රතිපත්ති ප්‍රකාශනයෙන් රට ගොඩනඟන්න බැරි බවයි. ජනාධිපතිවරයාගේ සිට පහළට රාජ්‍ය සේවයට බලපෑම් කර, විනාශකාරී අන්තයකට ඇදගෙන ගිය ආකාරය හිටපු විගණකාධිපතිවරුන් පෙන්වා දුන්නා. රාජ්‍ය සේවයේ නිලධාරීන්ට වැරදි ආකාරයෙන් ක්‍රියාකරන්න සිදුවුණේ ඇමතිවරයාගේ සිට ලබාදුන් වැරදි නියෝග නිසයි. ජාතික ජන බලවේගය ජනාධිපතිවරයාගේ සිට පහළට කිසිම ස්ථරයක වංචාවට, දූෂණයට ඉඩ තබන්නේ නැහැ. ඒ නිසා අපිට අපේ ප්‍රතිපත්ති ප්‍රකාශනය ක්‍රියාත්මක කරන්න පුළුවන්.
(-‘රට අනුරට’ ජාතික ජන බලවේගයේ විජයග්‍රාහී රැලිය පොළොන්නරුව – 2024.08.29-) අපේ වැඩිහිටි අය මීට කලින් ආණ්ඩු හැදුවා, නායකයෝ ගෙනාවා. ඒත් අවසානයේ ඉස්පිරිතාලවල බෙහෙත් ටික නැතිවුණා. අධ්‍යාපන පහසුකම් නැති වුණා. ලෝකය ඉදිරියේ බාල්දු වුණු රටක් බවට මේ රට පත්වුණා. අද ණය ගෙවා ගන්න බැරි, ආහාර ටික සපයා ගන්න බැරි ජනතාවක් බවට පත්වී තිබෙනවා. පැරණි ඉතිහාසයෙන් මිදිලා, […]
(-‘රට අනුරට’ ජාතික ජන බලවේගයේ විජයග්‍රාහී රැලිය පොළොන්නරුව – 2024.08.29-)
අපේ වැඩිහිටි අය මීට කලින් ආණ්ඩු හැදුවා, නායකයෝ ගෙනාවා. ඒත් අවසානයේ ඉස්පිරිතාලවල බෙහෙත් ටික නැතිවුණා. අධ්‍යාපන පහසුකම් නැති වුණා. ලෝකය ඉදිරියේ බාල්දු වුණු රටක් බවට මේ රට පත්වුණා. අද ණය ගෙවා ගන්න බැරි, ආහාර ටික සපයා ගන්න බැරි ජනතාවක් බවට පත්වී තිබෙනවා. පැරණි ඉතිහාසයෙන් මිදිලා, ලෝකය ඉදිරියේ පිළිගන්නා රටක්, ජනතාවට හොඳ ජීවිතයක්, පොහොසත් රටක් නව ආණ්ඩුවක් අපි හදන්න ඕනෑ. සැප්තැම්බර් 21 දා ඔය ආණ්ඩුව හදමු කියලා අපි යෝජනා කරනවා.
අපට තීරණය කරන්න තිබෙන්නේ පැති දෙකයි. රට දුප්පත් කරපු, ඒගොල්ලන් පොහොසත් වුණු පරණ පාර. එහෙම නැතිනම් මේ රට අලුත් දිසාවකට යොමු කරලා, ලෝකයේ කීර්තිමත් රාජ්‍යයක් බවට පත් කරන්න යෝජනා කරන ජාතික ජන බලවේගයේ පාර. අපි කල්පනා කරන්න ඕනැ මේ දෙකෙන් මොකක්ද අපි තෝරා ගන්නේ කියලා. ජාතික ජන බලවේගයේ ආණ්ඩුවක් හදපුවාම, කවදාවත් අනේ අපොයි කියන්න සිදුවෙන්නේ නැහැ. මේ සැරේ තමයි තීන්දුව හරියට ගත්තේ කියලා සතුටු වෙන්න පුළුවන්. මම හෝ මේ වේදිකාවේ ඉන්න කිසිවෙකු හෝ මේ දේශපාලනය තෝරා ගත්තෙත්, ආණ්ඩු හදන්න ඕන කියන්නෙත් අපට යමක් උපයා ගන්න නොවෙයි. අපට ඕනැ මේ රට පොහොසත් රටක් කරන්න. අපට ඕනෙ මේ රටේ ජීවත් වෙන ජනතාවට මීට වඩා හොඳ ජීවිතයක් දෙන්න. ඒ ඇයි? අපේ ගම්වල අම්මලා තාත්තලා මියැදෙනවා රස ආහාර වේලක් මොකක්ද කියලා දන්නේ නැතිව. අපේ දරුවෝ හොඳ පහසුකම් සහිත පාසලක් කියන්නේ මොකක්ද කියලා දන්නේ නැතිව ගතවෙනවා. අපේ තරුණ තරුණියන් විශාල ලෙස අවිනිශ්චිතතාවයකට පත්වෙලා තිබෙනවා. සෑම පැත්තෙන්ම වේදනාවට, දුකට පත්වුණු ජනතාවක් ඉන්නේ. මේක අපේ පරම්පරාවෙන් අවසන් කරන්න ඕනෑ. ඒකට අපි ආණ්ඩුවක් හදමු. එකින් එක අපි පටන් ගනිමු. රට හදන්න නම් හොරකම් නතර කරන්න ඕනෑ. අපිට ආයෝජකයෙක් ආව ගමන් බලන්නේ ඇමතියාට කීයක් දෙනවාද? කියලා. පාරක් හැදුවත් හොරකම් කරනවා, බෙහෙත්වලින් හොරකම් කරනවා. මේ හොරකම ආර්ථිකය වැටීමේ ප්‍රධාන සාධකයක්. හොරකම, වංචාව, දූෂණය නතර කිරීමකින් තොරව අපේ රට හදන්න බැහැ. ඒ විතරක් නොවෙයි හොරකම් කරපු දේපළ ආපහු ගන්න ඕනෑ. ඒ වැඩේ කරන්නේ ජාතික ජන බලවේගයේ ආණ්ඩුව විතරයි.
ඒ වගේම නීතියේ විධානයේ ආධිපත්‍යය අපේ රටට අවශ්‍යයි. ලෝකයේ දියුණු හැම රටකම නීතිය ඉදිරියේ හැමෝම සමානයි. අපේ රටේ ධනය, බලය තිබෙන කෙනාට එක නීතියක්, දුප්පත්, බලය නැති අයට තව නීතියක්. මේ නිසා මත්ද්‍රව්‍ය, අපරාධ විශාල ලෙස වැඩිවෙනවා. අපරාධ, මත්ද්‍රව්‍ය ව්‍යාපාර තිබෙන්නේ සංවිධානාත්මකව. මේවා පිටිපස්සේ දේශපාලනය තිබෙනවා. මේ සංවිධානාත්මක අපරාධවලට එරෙහිව සංවිධානාත්මක මෙහෙයුමක් යන්න ඕනෑ. ඒ වැඩේ කරන්නේ ජාතික ජන බලවේගයේ ආණ්ඩුව විතරයි. පළමුවෙන්ම අපේ ගම්වල දුප්පත්භාවය නැති කරන්න ඕනෑ. දුප්පත්භාවය කියන්නේ කන්න නැතිකම විතරක් නොවෙයි. දුප්පත්කම නිසාම, නොසැලකීමට ලක්කෙරෙනවා. අධ්‍යාපනය නතර වෙනවා. අපි ග්‍රාමීය දුප්පත්භාවය තුරන් කරනවා. දුප්පත්භාවයෙන් ගොඩ එන්න තිබෙන එක පාරක් තමයි අධ්‍යාපනය. අපි අධ්‍යාපන ක්‍රමයේ වෙනසක් ඇති කරනවා. අපේ ගුරු පුරප්පාඩු තිබෙනවා. රැකියා නැති උපාධිධාරීන් ඉන්නවා. අපි ආරම්භයේදීම පුරප්පාඩු සඳහා 20,000ක් බඳවා ගන්න සැලසුමක් හදා තිබෙනවා. කිලෝ මීටර් තුනක් ඇතුළත පහසුකම් සහිත පාසලක් හැම දරුවෙකුට ලැබෙන අධ්‍යාපන ක්‍රමයක් අපි හදනවා. නවය වසර හෝ දහය වසරේදී තෝරා ගැනීමේ විභාගයක් තියනවා. ඒ විභාගය අනුව දරුවයි, දෙමව්පියොයි, ගුරුවරයයි එකතු වෙලා දරුවාගේ දක්ෂතාවය අනුව දරුවාට යන්න තියෙන පාරට යොමු කරනවා. එවැනි පාරවල් ගණනාවකින් දරුවන් ඉස්සරහට ගෙනැල්ලා පාසලෙන් එළියට එනකොට වෘත්තියවේදියෙක් හැටියට හෝ අධ්‍යාපනයෙන් ඉස්සරහට යන නව අධ්‍යාපන ක්‍රමයක් ජාතික ජන බලවේගය ස්ථාපිත කරනවා. අධ්‍යාපනය තමයි ගමේ දුප්පත්භාවය තුරන් කරන පාර.
අපේ ග්‍රාමීය දුප්පත්භාවය තුරන් කර ගන්න තිබෙන අනෙක් පාර තමයි කෘෂිකර්මාන්තය නගා සිටුවීම. අපි බීජ පර්යේෂණායතන දියුණු කරලා අඩු වියදම් සහිත හොඳ බීජ ගොවියාට ලබා දෙන්න සැලසුම් කොට තිබෙනවා. ගොවිතැනට අවශ්‍ය වතුර ලබාදීමට සුළු හා මධ්‍ය පරිමාණයේ වැව් පද්ධතිය පිරිසිදු කොට නැවත පැරණි කාලයේ පමණටම ජලය පුරවන්න තරමේ ධාරිතාවෙන් වැඩි කරනවා. මහ කන්නය යල කන්නය පමණක් නොවෙයි අතරමැදි කන්නයක් වගා කරන්න අවශ්‍ය වතුර ප්‍රශ්නය විසඳනවා. යෙදවුම්වලටත් සහනාධාර දීමේ වැඩපිළිවෙළක් අපි සකස් කරනවා. ගොවි ජනතාව ණය බරින් මිරිකිලා ඉන්නේ. අපි ඉතා හොඳින් සමීක්ෂණයක් කරලා, ගෙවා ගන්න බැරි ණය යම් ප්‍රමාණයක් කපා හරින්න අපි යෝජනා කර තිබෙනවා. ඒ වගේම අඩු පොලියට ණයක් ලබා ගන්න සංවර්ධන බැංකුවක් අපි ඇති කරනවා.
ඊළඟට, අපි හැමදාම කියනවා වී සහ හාල් වෙළඳපොළේ විකෘතියක් තිබෙනවා. වී මිල තීරණය කරන්නේ එක්කෙනෙක් හෝ දෙන්නෙක්. ඒගොල්ලන්ට පොළොන්නරුවෙම මිල තීරණය කරන්න පුළුවන්. සුළු හා මධ්‍ය පරිමාණ මෝල් පද්ධතියක්ම තිබුණා. ඒ පද්ධතිය කඩා වැටුණා. ලොකු මෝල් හිමියන්ට ණය දීල තමයි පොඩි මෝල් හිමියන්ට ණය දෙන්නේ. ලොකු මොල් හිමියා අඩු මිලට කිරලා, පොඩි මෝල් හිමිය වී කිරන්න එනකොට මිල වැඩි කරනවා. වැඩි කරලා මේ මෝල් පද්ධතියම කඩා වැට්ටුවා. අපි නැවත සුළු හා මධ්‍ය පරිමාණ මෝල් නඟා සිටුවලා, ඔවුන් මුහුණ දීල තිබෙන මූල්‍ය දුෂ්කරතාවලට වැඩපිළිවෙළක් හදලා තව මෝල් හිමියන් ගණනාවක් නිර්මාණය කරනවා. වී සහ සහල්වල මිලත් සාධාරණ ලෙස තීන්දු කරන්න පුළුවන්. ගොවි ජනතාව ණය උගුලෙන් ගලවා ගන්නවා.
ඉස්සර ලෝකයේ ආර්ථිකය හයිය තිබුණෙ අමු ද්‍රව්‍ය තිබුණ විදිහට. ලෝකයේ ඉස්සරහට වටිනාකම් හැදෙන්නේ දැනුමට. ලෝකයේ හැමතැනම අලුත් ආර්ථික ප්‍රවණතා හැදිලා තිබෙන්නේ නව නිර්මාණවලින්. නව නිපැයුම්වලින්. ජාතික ජන බලවේගයේ ආණ්ඩුව පර්යේෂණ හා සංවර්ධන අංශය, විද්‍යා හා තාක්ෂණය පැත්ත පුළුල් කිරීම සඳහා සැලසුමක් සකස් කොට තිබෙනවා. අලුත් පර්යේෂණ කරනවා. අලුත් සොයා ගැනීම් කරනවා. ඒවායෙන් නිර්මාණයන් ඇති කරනවා. අපි 2030 වෙනකොට අයි.ටී. ඉංජිනේරුවන් ලක්ෂ දෙකක් හදනවා. ඒ මානව සම්පත් ගම්වලට ගලාගෙන යනවා. නව ආදායම් මාර්ග ඉපැද්දෙනවා. ගම්වල ජීවිතය උසස් වෙනවා. ඒ වැඩේ කරන්න තමයි ජාතික ජන බලවේගය ආණ්ඩුවක් ඉල්ලන්නේ. එක පැත්තකින් රට පොහොසත් වෙන්න ඕනෑ. ජනතාවට මුදල් ගලාගෙන එන්න ඕනෑ. අපේ රට දුප්පත් වුණා. පාලකයා පොහොසත් වුණා.
ජාතික ජන බලවේගයේ ආණ්ඩුව පියවරෙන් පියවර අපේ රට පොහොසත් කරන ජනතාවගේ ජීවිතය ලස්සන කරන ආර්ථිකයක් අපි හදනවා. අද ආණ්ඩුව අරගෙන හෙට මේ වෙනස කරන්න බැහැ. එතකන් ජනතාව බලා ගන්න ඕනෑ. රනිල් වික්‍රමසිංහ 2048 දී ආර්ථිකය හදනවාලු. 2048 ආර්ථිකය හදනකම් මිනිසුන්ට කන්න නැතිව, බෙහෙත් ගන්නෙ නැතිව, දරුවා ඉගෙන ගත්තේ නැතිවට කමක් නැහැ. අපි අධ්‍යාපනය ගන්න බැරි, ආහාර ගන්න බැරි, සෞඛ්‍ය පහසුකම් කන්න බැරි, පවුල්වලට ආරම්භයේ සිටම රුපියල් 10,000ක අවම මුදලක් ගෙවන්න සැලසුම් කොට තිබෙනවා. ගොඩක් අමාරු නම් දහ දාහට වඩා වැඩි මුදලක් ගෙවන්න සූදානම්. හැමදාමද? හැමදාම ඕනැද? අපේ ගම්වල ජනතාව අතපාලා ජීවත් වුණු ජනතාවක් නොවෙයි. ගෞරවයක්, වටිනාකමත් තියාගෙන හිටි ජනතාවක්. වී කඳු පිටින් ගොඩගැහුවා. අපේ ගම්වල මතයක් තිබුණා කඩෙන් හාල් කන එක සෙකන්ඩ් ක්ලාස් වැඩක් කියලා. වී තම්බලා හාල් කොටාගෙන කෑවා. වී කඳු ගෙවල්වල ගොඩගහපු පොළොන්නරුවේ ජනතාව. අද හාල් කිලෝ 10ක් ගන්න පෝලිමේ යනවා. ජනතාව දුප්පත්භාවයේ ගිලිටීනයට තල්ලු කළා. අපි මාසිකව 10,000 දීමනාවක් ගෙවනවා, ආර්ථික වැඩපිළිවෙළ හදලා ආර්ථිකයෙන් ජනතාව පොහොසත් වෙන තෙක් මේ මුදල දෙනවා. අධ්‍යාපනයට, ආහාරවලට, සෞඛ්‍යයට මේ ආණ්ඩුව ගසා තිබෙන බද්ද අයින් කර, ඒ සඳහා යන වියදම අඩු කරනවා.
ඒ වගේම අවුරුදු එකහමාරක්, දෙකක් වැනි කාලයක් ඇතුළත විදුලි බිල 1/3කින් අඩු කරන්න පුළුවන්. අනාගතයේ 85%ක් පමණ බලය උපදවන්නේ පුනර්ජනනීය බලශක්තියෙන්. මන්නරාම් ද්‍රොණියේ සුළං බලයෙන් ගිගාවොට් 40කට වැඩිය නිපදවන්න පුළුවන්. 2040 වෙන විට අපේ රටට මුළු ඉල්ලුමම ගිගාවොට් 08යි. අපට සුළංවලින් විතරක් මෙගාවොට් 40,000ක් විතර හදන්න පුළුවන්. අපට විශාල විභවතාවක් තිබෙනවා. එතනට අපි ආයොජනය ගෙනත් මේ සුළං බලය හදන්න ඕනෑ. මේ ගොල්ලොත් ගෙනාවා අදානිව. අදානි විදුලි ඒකකයක් හදන්න ඩොලර් සත 8.22ක් ගන්නවා. හැබැයි ඒ අදානිම ඉන්දියාවේ සුළංවලින් හදනවා ඩොලර් සත 04ට අඩුයි. ඇයි ඒ? ඇමතියාට ගාන දෙන්න ඕනෑ. ඒ ව්‍යාපෘති ගැන නැවත සැලකිල්ලට ලක්කරලා, සුළං බලයෙන්, සූර්ය බලයෙන් විදුලිය නිපදවන ව්‍යාපෘති ඉස්සරහට ගෙනත් අඩු මිලට විදුලියත්, අතිරේක විදුලිය එළියට යවන්නත් සැලසුමක් ජාතික ජන බලවේගය හදා තිබෙනවා.
අපේ සෞඛ්‍ය සේවය හොඳ මට්ටමක නැහැ. කොහෙන්ද බෙහෙත් ගන්නේ කියලා ලෙඩා තමයි තීරණය කරන්නේ. බෙහෙත් ගැනීම තීරණය කරන්නේ ප්‍රාථමික වෛද්‍යවරයෙක්. වෛද්‍යවරයා ලෙඩාගේ ස්වභාවය බලලා, එයා තමයි ලෙඩේට ප්‍රතිකාර ගන්න යන්න ඕන තැන තීරණය කරන්නේ. යම් පවුල් සංඛ්‍යාවක් තීරණය කරලා, ඒ පවුල් සංඛ්‍යාවට වෛද්‍යවරයෙක් යොදනවා. ලෙඩා ඉස්සෙල්ලාම යන්න ඕනෙ තමන්ගේ වෛද්‍යවරයා ළඟට. එයා ළඟ ඉතිහාසය තිබෙනවා. පවුලේ පරම්පරාවේ රෝග තිබෙනවාද? සියලුම විස්තර ඔහු සතුව තිබෙනවා. එයා යා යුතු ස්ථානයට ලිපියක් දෙනවා. සෞඛ්‍ය සේවය විධිමත් වෙනවා. අද තිබෙන සෞඛ්‍ය සේවය අවිධිමත්. පෝලිමේ ඉන්න ඕන නැති, දොස්තර මහතා ලෙඩා ගැන දන්නවා, එහෙම තමයි විධිමත් සෞඛ්‍ය සේවයක් වෙන්න ඕනෑ.
ප්‍රවාහනයත් ප්‍රධාන ප්‍රශ්නයක්. ලෝකයේ ගොඩක් රටවල්වල පාවිච්චි කරන්නේ පොදු ප්‍රවාහනය. දිරි දෙන්නේ පොදු ප්‍රවාහනයට. අපි වැඩිපුර පොදු ප්‍රවාහනය දිරි ගන්වනවා. කාර් එකට මාසෙකට 35,000ක් වියදම් වෙනවා. ප්‍රවාහනයට තමන්ගේ වැටුපෙන්, තමන්ගේ ආදායමෙන් ඒතරම් දරන්න ඕනෑද? අද ගාමන්ට්වල වැඩකරන සහෝදරියන් ඉස්සෙල්ලාම ගන්නේ ස්කූටියක්. පඩිය 40,000යි. ස්කූටියට මාසෙකට කැපෙනවා 35,000ක්. අන්තිමට මුළු පඩියම ස්කූටියට. පොදු ප්‍රවාහනය පිළිබඳ විශ්වාසයක් නැහැ. ඒ නිසා ජාතික ජන බලවේගයේ ආණ්ඩුව කාර්යක්ෂම පොදු ප්‍රවාහන සේවයක් හදනවා. තමන් කැමති නම්, ආදායම හොඳ නම්, දරා ගන්න පුළුවන් නම්, කාර් එකක් ගන්න. අද දරා ගන්න පුළුවන් හන්දා නෙමෙයි ගන්නේ. යන්න එන්න වෙන විදිහක් නැති නිසා. විශ්වාසවන්ත, පහසුකම් සහිත, හොඳ ප්‍රවාහන සේවයක් නැති නිසා.
අධ්‍යාපනයේ බර අඩුවෙන, ප්‍රවාහනයේ බර අඩුවෙන, සෞඛ්‍ය සේවයේ බර අඩුවෙන ආණ්ඩුවක් අපට ඕනෑ නැද්ද? එහෙම ආණ්ඩුවක් තමයි අපි හදන්නේ. ජාතික ජන බලවේගය මේ සැලසුම් කොට තිබෙන්නේ ඉතාම රට දියුණු කරන, සැලසුම් සහගත ආර්ථික වැඩපිළිවෙළක්. අවුරුදු හතරක් පහක් හොඳට පොර බැදුවොත් හොඳ රටක් බවට මේ රට පත්කර ගන්න පුළුවන්. ඒ වෙනුවෙන් අපි සියලු දෙනා එකතු වෙන්න ඕනෑ. මේකෙ අවස්ථා දෙකක් තිබෙනවා. එක බලය ගැනීම. දෙක බලය අරගෙන රට හදන එක. දැන් තිබෙන්නේ බලය ගන්න එක. ගමේ ඡන්ද පෙට්ටිය මාලිමාවට කතිරෙ ගහලා පුරවන්න ඕනෑ. මේ ටික දවසේ අපි මහන්සි වෙමු. ශක්තිමත් ජන වරමක්, සැප්තැම්බර් 21 දාට ලබා දෙන්න. අපි ඉස්සෙල්ලා ආණ්ඩුව හදමු. පස්සේ අපි හැමෝම එකතු වෙලා මේ රට හදමු.
“රට ගොඩනැගීමට සුදුසුම නායකයා සොයා ගැනීමට හැකිවීම විශාල සතුටක්”
-ජාතික විද්වත් සංවිධානයේ පොළොන්නරුව දිස්ත්‍රික් සභාපති, පුලතිසිපුර අධ්‍යාපන විද්‍යා පීඨයේ හිටපු උප පීඨාධිපති සමන් පත්ම කුමාර-
මම දේශපාලනයට ආවෙ 2019 දී. දැන් අවුරුදු පහයි. ඒ කාලය තුළ මේ රට ගොඩනැගීමට සුදුසුම නායකයා අපට සොයා ගැනීමට හැකිවීම ගැන මම අතිශයින් සතුටට පත්වෙනවා. 1957දී ඉංග්‍රීසි ශබ්දකෝෂයට වචනයක් එකතු වෙනවා වෙපනයිස් කියලා. ඒකෙ තේරුම තමයි ආයුධයක් බවට පත්කර ගන්න බැරි දෙයක් ආයුධයක් හැටියට පාවිච්චි කරන්න පුළුවන් වීම. විවිධ මිනිස් බලවේග තමයි අපේ ආයුධ. අද 2019 න් පස්සේ අපි අද ඒ සියලු සමාජ බලවේග කණ්ඩායම් අපේ ජයග්‍රහණය සඳහා සංවිධානය කරගෙන තිබෙනවා. අපි විශ්‍රාමික හමුදාවේ දහස් ගණනක් එකතු කළා. කාන්තාවන් දස දහස් ගණනක් එකතු කළා. රට වෙනුවෙන් මහා සංඝරත්නය දැන් අපත් සමග පෙළගැසී ඉන්නවා. ඒ වගේම ත්‍රීරෝද රථ සංගම්, ඉංජිනේරුවන්, වෛද්‍යවරුන්, විද්‍යාඥයින්, කලාකරුවන්, ගොවීන්, ධීවරයින්, කම්කරුවන් සියලු බලවේග අපි එකතු කළා. ඒ අනුව ශ්‍රී ලංකාවේ සතර දිග්භාගයේ සිටින ජනතාව දැන් අපි එකතු කරලා ඉවරයි.
කොළඹ රාජකීය විද්‍යාලයේ ඉගෙන ගත්තු දෙන්නෙක් මේ ජනාධිපතිවරණ තරගයේ ඉන්නවා. හැබැයි තමුන්නාන්සේලාගේ දහඩිය සුවඳ හඳුනන තඹුත්තේගමින් බිහිවුණු අපේම පංතියේ සහෝදරයෙක් මේ සටනේ ඉන්නවා. සමහරු අපෙන් අහනවා සජිත් එක්ක නේද සටන තිබෙන්නේ කියලා. අපිට එයා සමග කිසිම තරගයක් නැහැ. අපි දැන් ඉන්නේ ජය කණුව පෙනි පෙනී. ඒ ආසන්නයේ සජිත් පේනතෙක් මානෙකවත් නැහැ. ඒ නිසා අපේ රටේ ගමේ කොල්ලෙක් වන අපේ ජනාධිපති අපේක්ෂක අනුර කුමාර දිසානායක සහෝදරයා ලබන සැප්තැම්බර් 21 වාර්තා පිට වාර්තා තබමින් ජයග්‍රහණය කරනවා.
“ගොවි ජනතාවට සාධාරණය ඉටු කරන ආණ්ඩුව ලබන 21 වැනිදා හදා ගන්නවා”
-ජාතික ජන බලවේගයේ ජාතික විධායක සභික ටී.බී. සරත්-
මෙතනට රැස්වෙලා ඉන්න මේ දහස් සංඛ්‍යාත ජනතාව කියා පාන්නේ අන්කිසිවක් නොවෙයි, ලබන සැප්තැම්බර් 21 වැනිදාට මේ රටේ නියත ජනාධිපති අනුර කුමාර දිසානායක සහෝදරයා කියන එකයි. අපේ රටේ ගොවි ජනතාව හැමදාමත් ප්‍රාර්ථනය කළේ ඔවුන්ගේ නිෂ්පාදනවලට සාධාරණ මිලක් ලැබෙන්න ඕනෑ කියලා. අන්න ඒ ප්‍රාර්ථනය නියත ලෙසම මල්ඵල ගැන්වෙන දිනය සැප්තැම්බර් 21වැනිදායි. ගොවියාගේ වී ඇතුළු සියලු නිෂ්පාදනවලට සාධාරණ මිලක් ලබාදීමේ වගකීම ජාතික ජන බලවේගයේ ආණ්ඩුවක් විසින් අනිවාර්යයෙන්ම බාර ගන්නවා වගේම මේ රටේ ගොවියා මුහුණදී සිටින සියලු ප්‍රශ්නවලින් ඔවුන් මුදා ගන්නා දිනයත් සැප්තැම්බර් 21යි.
රනිල්ගේ ආණ්ඩුව මේ දවස්වල අපේ ගොවියාගේ වී කිලෝ එක ගන්නේ රුපියල් 105/-ට. නිෂ්පාදන වියදමට රුපියල් 105/ක් වෙනවා. මේරටේ ගොවියාගේ වීවලට සාධාරණ මිලක් ගෙවන ආණ්ඩුවක් ලබන 21 වැනිදායින් මේ රටේ ගොවියෝ ඇතුළු සියලු ජනතාව එකතු වෙලා හදා ගන්නවා. මීට අවුරුදු 1 1/2කට උඩදී අරගලයට තුන්මාසයක් ගත වන නදියේදී අපි අපේ ගොවි ජනතාව සමග කොළඹ හයිඩ් පිටියට ඇවිල්ලා අපි රනිල්ට කිවුවා “රනිල් අපි මින් පසසේ ඔයාගෙන් වීවලට සාධාරණ මිලක්, පොහොරවලට සහනයක් ඉල්නන්නේ නැහැ. වතුර ඉල්ලලා එන්නෙත් නැහැ”. ඔයාව එලවන සටන ගොවි ජනතාව හැටියට අපි බාරගන්නවා කියලා කිවුවා. ඔන්න අද පුලතිසි පුරවරයෙන් ඒක බාර අරගෙන තිබෙනවා. නැවත අපි මේ කොළපාට නිල්පාට ආණ්ඩුවලින් ඉල්ලිම් ඉල්ලලා කෑ ගසන දිනය අවසන් කරලා ගොවියෝ අපි ඔක්කෝම රටේ සමස්ත ජනතාවත් සමග එකතුවෙලා අපිට සාධාරණය ඉටු කරන ආණ්ඩුව ලබන 21 වැනිදා හදා ගන්න එක හදා ගන්නවාමයි.
පසුගිය 25 වැනිදා කින්ස් නෙල්සන් මහත්තයා මට අභියෝගයක් කළා. සැප්තැම්බර් 21 වැනිදා එයා සජබ ආණ්ඩුවක් හදනවා ඒක බලන්න එන්න කියලා. මම අද අහනවා, අනේ නෙල්සන් ඔයා අපේ රතුපාට, දම්පාට කොඩි වැල් දැකලා ඒව ගලවන්න කිය කියා නාහෙන් අඬ අඬ පොලීසි ගානේ ගියා නේද? ඒවා දකින කොට ඔයාට නින්ද යන්නේ නෑ කියලා. නෙල්සන් මහත්තයෝ සැප්තැම්බර් 21 වැනිදාට ඔයා කළුවර කාමරයක් හදා ගන්න. ඔයාට මින් පස්සේ පේන්නේ රතු කොඩි වැල් විතරයි. කිල්ස් නෙල්සන් ඔයාගෙ තාත්තාට කරන්න බැරි වැඩේ ඔයා කළා. වාලච්චේනෙන් පටන් අරගෙන ලග්ගලට ගිහිල්ලා, ලග්ගලින් මාතලේට ගිහිල්ලා එතනින් කුරුණෑගලට ගිහිල්ලා දිස්ත්‍රික් සිතියම ලොකු කරන්න ඔයාගේ තාත්තාට බැරි වුණා. ගිය 25වැනිදා දිස්ත්‍රික් ගණනකම බඩ ගාලත් මේ තරම් විශාල ජනතාවක් පුලතිසි පුරවරයට එකතු කරන්න ඔයාට බැරි වුණා. එළඹෙන 21 වැනිදා මේ රටේ සුවිශේෂී දිනයක්. අන්න ඒ සුවිශේෂි දිනය මේ රටේ සිංහල, දෙමළ, මුස්ලිම්, මැලේ, බර්ගර් ජනයා තමන්ගේ විමුක්තියේ දවස, නව සංවර්ධනයේ දවස, නව නිදහස් අරගලයේ දවස බවට පත් කර ගන්නවා. සැප්තැම්බර් 21 වැනිදාට උදෙන්ම ගිහිල්ලා රටත් ජනතාවත් දිනවන්න ශක්තියෙන්, ධෛර්යයෙන් ඉදිරියට එන්න කියලා අපි ඉල්ලා සිටිනවා.
(-‘රට අනුරට’ ජාතික ජන බලවේගයේ කින්නියා විජයග්‍රාහී රැලිය – 2024.08.28-) කාලය ගොඩක් ගෙවී ගිහින් තිබෙන නිසා දීර්ඝ කතාවක් කරන්න බලාපොරොත්තු නොවුණත්, අත්‍යවශ්‍ය කරුණු කිහිපයක් කෙරෙහි අවධානය යොමු කරන්න ඕනෑ. සැප්තැම්බර් මාසයේ 21 වැනිදාට ජාතික ජන බලවේගයේ ආණ්ඩුවක් හදන්න පුළුවන්. අපට ඕනෑකම තිබෙන්නේ සිංහල, දෙමළ, මුස්ලිම් සියලු ජනයාගේ විශ්වාසය දිනා ගත් ආණ්ඩුවක් හදන්න. සිංහල ජනතාව බහුතරයකගේ […]
(-‘රට අනුරට’ ජාතික ජන බලවේගයේ කින්නියා විජයග්‍රාහී රැලිය – 2024.08.28-)
කාලය ගොඩක් ගෙවී ගිහින් තිබෙන නිසා දීර්ඝ කතාවක් කරන්න බලාපොරොත්තු නොවුණත්, අත්‍යවශ්‍ය කරුණු කිහිපයක් කෙරෙහි අවධානය යොමු කරන්න ඕනෑ. සැප්තැම්බර් මාසයේ 21 වැනිදාට ජාතික ජන බලවේගයේ ආණ්ඩුවක් හදන්න පුළුවන්. අපට ඕනෑකම තිබෙන්නේ සිංහල, දෙමළ, මුස්ලිම් සියලු ජනයාගේ විශ්වාසය දිනා ගත් ආණ්ඩුවක් හදන්න. සිංහල ජනතාව බහුතරයකගේ කැමැත්තෙන් විතරක් ආණ්ඩුවක් හදලා වැඩක් නැහැ. ඔබ සැමගේත් සහයෝගය අවශ්‍යයි. පසුගිය කාලයේ අපේ රටේ තිබුණේ ජාතිවාදී දේශපාලනය. දකුණේ මුළුමනින්ම සිංහල ජාතිවාදය ජයග්‍රහණය කරනවා. ඊට ප්‍රතිපක්‍ෂව නැගෙනහිර මුස්ලිම් ජාතිවාදය උත්සන්න වෙනවා. ඒ වාගේම උතුරේ ජාතිවාදයකුත් පෝෂණය වෙනවා. ජනතාව අතර ජාතිවාදයක් නොතිබුණත්, එක් ජාතිවාදයක් විසින් අනෙක් ජාතිවාදය පෝෂණය කරන දේශපාලනයක් ගෙන යන්න පාලකයන් උත්සාහ කළා. 2019 ගෝඨාභය රාජපක්ෂ ජයග්‍රහණය කරන්න ප්‍රධාන සාධකය වෙන්නේ ජාතිවාදය. 2015 පැරැදුණු රාජපක්ෂලා නැවත නැගීසිටියේ වංචාව, දූෂණය, ප්‍රජාතන්ත්‍රවාදය, ජාතික සමඟිය වැනි කරුණු සාකච්ඡා කරමින් නෙමෙයි. ඔවුන් රාජ්‍ය අනුග්‍රහයෙන් මුස්ලිම් ජනයාට එරෙහිව දේශපාලන ව්‍යාපෘතියක් පටන් ගත්තා. වඳ කොත්තු, වඳ ඇඳුම්, වඳ දොස්තරලා පිළිබඳ ප්‍රචාරයන්ගෙන් පස්සේ පාස්කු ප්‍රහාරය එල්ල කළා. 2019 අප්‍රේල් 21 පාස්කු ප්‍රහාරය එල්ල කළ දිනයේම ගෝඨාභය ජයග්‍රහණය කරන බව සහතික කෙරුණා. ඒ ජාතිවාදය නිසයි.
කොවිඩ් වසංගතයෙන් මිනිසුන් මිය ගියාම ලෝකයේ අනෙකුත් රටවල ආදාහනය සහ භූමදානය දෙකම කරන කොට ලංකාවේ ආණ්ඩුව විතරක් ආදාහනය පමණක් කිරීමේ තීන්දුවක් ගත්තා. ජාතිවාදීව හදන ආණ්ඩු වැඩ කරන්නෙත් ජාතිවාදීවයි. ඔබ සැමගේ ආගම අනුව ඔබගේ ඥාතියකු මිය ගිය විට අවසන් කටයුතු කිරීම ජීවත් වන අයගේ වගකීමක්. නමුත්, ආගමට පටහැණිව ආදාහනය කරන්න ඔබලාට සිදු වුණා. සමහර තැන්වල කොවිඩ් වසංගතයෙන් මිය ගිය ඉස්ලාම් භක්තිකයන් ආදාහනය කරන්න වෙයි කියලා හැංගුවා. ජාතිවාදය විසින් හදන ආණ්ඩු ජාතිවාදීව මේ ලෙස ක්‍රියා කිරීමෙන් තවදුරටත් වේදනාවල් ගෙන දෙනවා. ඒ නිසා ජාතිවාදයට යටත් නොවන ජාතිවාදය න්‍යාය පත්‍රය බවට පත් කර නොගත් ආණ්ඩුවක් හදන්න ඕනෑ. පොහොට්ටුව කියන්නේ ජාතිවාදයේ එකතුවක්. දැන් ඒ පොහොට්ටුව පුංචි කෑල්ල මහින්ද එක්ක. තව කොටසක් රනිල් එක්ක. ඉතිරි කොටස සජිත් ප්‍රේමදාස එක්ක බෙදිලා ඉන්නේ 2019දී මුස්ලිම් විරෝධී කටයුතු කළ අයයි. මුස්ලිම් විරෝධී ආණ්ඩුව තුළ සිටි අය දැන් රනිල්, සජිත්, නාමල් වශයෙන් තුනට බෙදිලා ඉන්නවා. සජිත් ප්‍රේමදාස නැගෙනහිරට එන කොට චම්පික රණවක හංගලා එන්නේ හකීම් එක්ක. නමුත්, දකුණට යන්නේ චම්පිකත් එක්ක. මාතරට හකීම් එක්ක හෝ රිෂාඩ් එක්ක යන්නේ නැහැ. එහෙ යන්නේ චම්පික, තිලංග සුමතිපාල, නාලක ගොඩහේවා වාගේ අයත් එක්ක. එතැන දෙබිඩිකමක් නැද්ද? මහරගම ජාතිවාදී වේදිකාවේ චම්පිකලා, තිලංගලා එකට නැඟ හිටියා. ඒ දෙන්නාම අද සජිත්ගේ වේදිකාවේ. ඉතිහාසයේ විවිධ අවස්ථාවල ජාතිවාදී දේශපාලනය කර තියාගෙන ගිය කට්ටිය තුනට බෙදිලා.
ඉතිහාසයේ කිසිම අවස්ථාවකවත් ජාතිවාදය තමන්ගේ දේශපාලනයට පාවිච්චි නොකළ එකම ව්‍යාපාරය ජාතික ජන බලවේගය විතරයි. ඔබ ඇත්තටම ජාතිවාදයට විරුද්ධ නම්, තෝරා ගන්න තිබෙන්නේ ජාතික ජන බලවේගය විතරයි. ජාතිවාදයට විරුද්ධයි කියලා චම්පික, සජිත් එක්ක නැත්නම්, රනිල්ට කතිරය ගහන්න දෙබිඩි පිළිවෙතක් එපා. ජාතිවාදයට එරෙහි ජාතික සමගිය පිළිබඳ ආණ්ඩුවක් ඕනෑ නම්, ඔබ කතිරය ගහන්න ඕනෑ ජාතික ජන බලවේගයට විතරයි.
දකුණේ සිංහල බහුතර ජනතාවක් මාලිමාවත් එක්ක. දකුණ, සබරගමුව, බස්නාහිර, උතුරු මැද, මධ්‍යම, වයඹ වාගේ සෑම පළාතකම බහුතර ජනතාව අප වටා එක් වී සිටිනවා. ඒ අය අපෙන් අහන්නේ “සහෝදරයා, නැඟෙනහිර කොහොම වෙයිද” කියලා. රටම එක විදියට එන කොට නැඟෙනහිර විතරක් වෙන පාරක යනවාද? ඔබලාට අපි ආරාධනා කරන්නේ මේ සැරේ ජාතික ජන බලවේගය තෝරා ගන්න කියලයි. නියමිතව තිබෙන්නේ ජනාධිපතිවරණය. ඒ වෙලාවේදී ජාතික ජන බලවේගයට ඡන්දය දී, මහා මැතිවරණය ආවාම ඔබ කැමැති, ඔබගේ පළාතට ඕනෑ මන්ත්‍රී කෙනෙක් පත් කර ගන්න. හැබැයි, ඒ තෝරා ගන්න කොටත්, හරියට තෝරා ගන්න. 2019දී මුස්ලිම් කොන්ග්‍රසයට කතිරය ගහලා තවුෆික් පාර්ලිමේන්තුවට යැව්වා, හාරිස් පාර්ලිමේන්තුවට යැව්වා, ෆයිසර් කාසිම් පාර්ලිමේන්තුවට යැව්වා. ගෝඨාභය පරාජය කරන්න කියලා ඡන්දය ඉල්ලපු අය. පාර්ලිමේන්තුවට ආණ්ඩුක්‍රම ව්‍යවස්ථාවේ විසිවැනි සංශෝධනය ගෙන ආවේ ගෝඨාභයගේ බලය වැඩි කරන්න. ගෝඨාභයට විරුද්ධව ඔබලා ඡන්දය දුන්නත්, ඒ පාර්ලිමේන්තු මන්ත්‍රීවරු ගිහින් ගෝඨාභයගේ බලය වැඩි කරන්න ඡන්දය දුන්නා. ජනාධිපතිවරණයේ දී අපට ඡන්දය දී පරණ දේවල් හොයලා බලලා පාර්ලිමේන්තු මැතිවරණයකදී ඔබලා කැමැති නායකයකුට ඡන්දය දෙන්න. අනෙක් පක්‍ෂවල අයට ප්‍රතිපත්ති නැහැ, කරුණු නැහැ. ඒක නිසා මඩ, අවලාද නඟනවා. සිංහල ප්‍රදේශවලට අපි ගිහින් ආවාම පෙරහැර නතර කරන බව සජබයේ කට්ටිය කියනවා. සමහර හාමුදුරුවන් වහන්සේලාත් කියන්නේ අපි ආවාම දානය නතර කරනවා කියලා. සිංහල ජනතාවට ඒ විදියට කියලා මුස්ලිම් ප්‍රදේශවලට ආවාම කියන්නේ අපේ ආණ්ඩුවක් යටතේ ඔබලා පස් වතාවක් වඳින එක නතර කරනවාලු. ව්‍යාපාර කරන්න දෙන්නේ නැහැලු. රැවුල වවන්න දෙන්නේ නැහැ කියනවා.
මේ වාගේ අවලාද, අසත්‍ය, විකෘති කරන ලද තොරතුරු පතුරුවනවා. හකීම් ඔය වාගේම කතාවක් කියලා තිබුණා. මම කීවාලු, “මුස්ලිම් අම්මලාගේ ගර්භාෂයේ ත්‍රස්තවාදය ඇති වුණා” කියලා. මම කියන්නේ හැමදාමත් ජාතිවාදය කියන ගර්භාෂයේ ප්‍රචණ්ඩත්වය ඇති වෙනවා. සිංහල ජාතිවාදය කියන ගර්භාෂය ඇතුළේ ප්‍රචණ්ඩත්වය ඇති වෙනවා. මුස්ලිම් ජාතිවාදය කියන ගර්භාෂය ඇතුළේ මුස්ලිම් ප්‍රචණ්ඩත්වය ඇති වෙනවා. දෙමළ ජාතිවාදය කියන ගර්භාෂය ඇතුළේ දෙමළ ප්‍රචණ්ඩත්වය ඇති වෙනවා. මේ විදියට කරුණු කියන කොට හකීම් කියනවා, මුස්ලිම් අම්මාගේ ගර්භාෂය ඇතුළේ ත්‍රස්තවාදය ඇති වුණු බව මම කීවාලු. මම සිංහලෙන් කියපු දේ හකීම්ට තේරුණේ නැද්ද දන්නේ නැහැ. ඒ නිසා මම කීවා, මා කළ ප්‍රකාශය නිවැරැදිව කියන්න. එහෙම නොකීවොත්, නඩු දානවා කියලා. නිවැරැදි නොකළ නිසා නඩු දැම්මා. අපේ රටේ දේශපාලන වේදිකාවේ තවදුරටත් ජාතිවාදී සටන් පාඨ කියන්න ඉඩ දෙන්න ඕනෑ නැහැ. ජාතික ජන බලවේගයේ වේදිකාවකවත්, වෙන කොතැනකවත් ජාතිවාදී ප්‍රකාශයක් කරන්න අපේ ආණ්ඩුවකින් ඉඩ දෙන්නේ නැහැ. ඒ ආකාරයෙන් ජාතික සමඟිය ගොඩනඟන ආණ්ඩුවක් අපි බිහි කරනවා.
ඒ වාගේම හොරකම් නතර කර මේ රට ගොඩනඟන්න ඕනෑ. හොරකම නතර කළොත්, දිගු කාලයක් පවතින්න පාරවල් හදන්න පුළුවන්. පසුගිය කාලයේ සෞඛ්‍ය ඇමැති, කෙහෙළිය රඹුක්වැල්ල ඉන්ජෙක්ෂන් කියලා ගෙනාව වතුර අපේ රටේ රෝගීන්ට ගැහැව්වා. මේ වාගේ හොරකම, දූෂණය, නාස්තිය නතර කරන ආණ්ඩුවක් හදන්න ඕනෑ. එහෙම ආණ්ඩුවක් සජිත්ට හදන්න පුළුවන් ද? හොරකම් නතර කරන්න ඕනෑ කියලා සජිත්ට කතිරය ගහලා වැඩක් නැහැ. රනිල්ට කතිරය ගහලාත් වැඩක් තියෙනවා ද? මෙච්චර හොරකම් කරලා තියෙද්දිත්, ඡන්දය දෙනවා නම්, ඒ ගොල්ලෝ හිතන්නේ හොරකම් කළාට කමක් නැහැ කියලා. ඒ නිසා ඔබ හොරකමට විරුද්ධ නම්, ඡන්දය දෙන්න ඕනෑ ජාතික ජන බලවේගයට.
හොරකම් නතර කර විතරක් ප්‍රමාණවත් නැහැ. හොරකම් කළ අයට දඬුවම් දෙන්නත් ඕනෑ. 1994දී චන්ද්‍රිකා කීවා, හොරු අල්ලලා, ගෝල්ෆේස් පිටියට ගෙනැවිත්, හම ගහනවා කියලා. විජේපාල මෙන්ඩිස් ආණ්ඩුවේ පොල්වතු හොරට ලියා ගත්තා කියලා දඬුවම් කරන බව කීවත්, අවුරුදු දෙක තුනක් යන කොට එයාට ඇමැතිකමකුත් දුන්නා. 2015දී මෛත්‍රීපාල සිරිසේන කීවේ, එයාර්පෝට් වහනවා කියලා. අවුරුදු තුනක් යන කොට මෛත්‍රීපාල සිරිසේන, මහින්ද රාජපක්‍ෂට නීති විරෝධීව අගමැතිකම දුන්නා. 2019 ගෝඨාභයගේ වේදිකාවේදී කීවේ, මහ බැංකුව කැඩුව රනිල් වික්‍රමසිංහව හිරේ දානවා කියලා. ඒ වෙනුවෙන් ඔබ කතිරය ගැහුවත්, අවුරුදු දෙක තුනක් යන කොට ජනාධිපතිකම දුන්නා. ඒ නිසා හොරුන්ට දඬුවම් දෙන ආණ්ඩුවක් හදන්න ඕනෑ. ඒ වෙනුවෙන් සජිත්ට, රනිල්ට කතිරය ගහලා වැඩක් නැහැ. ඔබගේ දහමට අනුව ඔබට හොරකම නතර කරන්න බැරි නම්, එය කරන්න පුළුවන් කෙනාට සහයෝගය දෙන්න ඕනෑ කියනවා. පාර්ලිමේන්තුවේ සිටි මුස්ලිම් ඇමැති කෙනෙක් මට ඒ බව කීවේ. එයා ඇමැති මණ්ඩලයේ ඉන්න කොට සමහර කැබිනට් පත්‍රිකා මට දුන්නා. “සහෝදරයා, මට හොරකම් නතර කරන්න බැහැ. ඒ නිසා නතර කරන කෙනකුට උදවු දෙන්න කියලා, අපේ ආගමේ උගන්වනවා. ඒ නිසා මේ පත්‍රිකා මම ඔබට දෙනවා” කියලා කිවුවා. ඔබට හොරකම් නතර කරන්න බැරිව හොරකම් කරන කෙනාට ඡන්දය දුන්නොත්, ඒක හරාම්. එහෙම නම්, හොරකම් නතර කරන්න ජාතික ජන බලවේගයට ඡන්දය දෙන්න ඕනෑ. ඒක තමයි, හලාල්. ඔබගේ ආගම අනුව බැලුවත්, මෙවර කතිරය ගහන්න ඕනෑ ජාතික ජන බලවේගයට. හොරකම් නතර කරනවා පමණක් නොවෙයි, හොරකම් කළ අයට දඬුවම් කරනවා පමණක් නොවෙයි, හොරකම් කළ දේපොළත් පවරා ගන්නවා.
අපි ඡන්දය ඉල්ලන්නේ ඒකට. ඒක විතරක් ප්‍රමාණවත් වෙන්නෙත් නැහැ. රටේ ආර්ථිකය හදන්න ඕනෑ. මම හෝ අපේ ඉහළ මණ්ඩලවල කිසි කෙනෙක් ව්‍යාපාර කරන්න එන්නේ නැහැ. එයාලා බාර් ලයිෂන් දෙන්නෙත් මන්ත්‍රීවරුන්ට. රනිල් වික්‍රමසිංහ පසුගිය දා එයාගේ කට්ටියටත්, සජිත්ගේ කට්ටියටත් බාර් ලයිෂන් බෙදලා දුන්නා. ඒ වාගේම පෙට්‍රල් ෂෙඩ් බෙදා දුන්නා. රත්නපුරේ මැණික් පතල් කපන්නේ දේශපාලකයන්. වැලි පර්මිට් ගන්නෙත් දේශපාලකයන්. නැගෙනහිර වෙරළ තීරයේ හෝටල් ඉදි කරන්නේත්, ගල් වළවල් පවත්වාගෙන යන්නේත් දේශපාලකයන්. අපි ඒවා කරන්න එන්නේ නැහැ. මේ රටේ ව්‍යාපාර කරන්න ඕනෑ ඔයගොල්ලෝ. ඒවා දියුණු කර ගන්න සහයෝගය දීමයි, අපේ ආණ්ඩුවකින් කරන්නේ. ඔයගොල්ලන්ට සංචාරක හෝටලයක් හදන්න ඕනෑ නම්, ඉඩම ආණ්ඩුවෙන් දෙනවා. අපට ඇල්වතුර වීදුරුවක්වත් එපා. හැබැයි, නියමිත කාලයට හෝටලය ඉදි කළේ නැත් නම්, එය පවරාගෙන කරන්න පුළුවන් කෙනකුට දෙනවා. එහෙම ක්‍රමයක් හොඳ නැද්ද? මේ රටේ විතරක් බිස්නස් කරලා මඳි. ලෝකයේ වෙළෙඳපොළටත් අපේ ව්‍යාපාර ගෙන යන්න ඕනෑ. ඒ විදියට කර්මාන්ත, ව්‍යාපාර දියුණු කරලා ආණ්ඩුවට බදු අය කරනවා. ඒ විදියට අය කරන බදු මුදල් යෙදවූයේ කොහොමද කියලා ෆෝන් එකට එස්.එම්.එස්. පණිවුඩයක් එවන තරමට අවුරුදු කිහිපයක් තුළ සිස්ටම් එකක් ගොඩනඟනවා. අධ්‍යාපනයට, සෞඛ්‍යයට, ආරක්‍ෂාවට, පාරවල් හදන්න වාගේ විවිධ අංශවලට ඔබේ බදු සල්ලි යොදවපු ආකාරය විස්තර සහිතව ඉදිරිපත් කරනවා. ජාතික සමගිය හදන, හොරකම නතර කරන, විනිවිදභාවයෙන් කටයුතු කරන ආණ්ඩුවක් ගොඩනැඟීමේ ආරම්භක දිනය ලබන 21 වැනිදා.
ඔබලා 21 වැනිදා තෝරා ගන්නේ අලුත් ආණ්ඩුවක්ද? පරණ පාරේම යන ආණ්ඩුවක්ද? අපට කළ හැක්කේ කරුණු පැහැදිලි කර දීමයි. නමුත්, ගමේ ඡන්ද පෙට්ටියේ ඡන්ද මාලිමාවෙන් පුරවන එක කරන්න ඕනෑ ඔබලාමයි. පරණ මුස්ලිම් පක්ෂ කලබල වෙලා ඉන්නේ. තරුණ විශාල මුස්ලිම් ප්‍රජාවක් ජාතික ජන බලවේගයේ ජයග්‍රහණය වෙනුවෙන් කටයුතු කිරීම නිසා ඔවුන් කලබල වෙලා ඉන්නවා. මේ වේදිකාව පිරී තිබෙන්නේ ඒ අලුත් තරුණයන්ගෙන්. ඔවුන් ගමට ගොස් වැඩිහිටියන්ට කතා කරනවා. ෆේස්බුක් එකේ ලියනවා, ත්‍රීවීල් එක පදිනකොට කතා කරනවා, කඩේට ආවාම කතා කරනවා. ඒ නිසා මේ අවස්ථාව අත්හරින්න එපා. රට දුප්පත් කළ හොරුන් එළවන්න පුළුවන් වෙලාව මේකයි. රට පොහොසත් කරන ආණ්ඩුවක් හදන්න පුළුවන් වෙලාව මේකයි. අන්න ඒ වෙනුවෙන් සියලු දෙනාට කතා කරන්න. 21 වැනිදාට කින්නියා ප්‍රදේශයේ ඡන්ද පෙට්ටි මාලිමාවේ ඡන්දවලින් පුරවමු.
(-‘රට අනුරට’ ජාතික ජන බලවේගයේ විජයග්‍රාහී කන්තලේ රැලිය – 2024.08.28-) මේ ලංකාවේ පළමුවැනි වතාවට පැවැත්වෙන්නේ, ලක්ෂ සංඛ්‍යාත ජනතාවක් ස්වේච්ඡාවෙන් වැඩ කර, ජාතික ජන බලවේගය දිනවන්න වෙහෙසෙන ඡන්දයක්. ඉතිහාසයේ මෙතෙක් ඡන්ද කළේ සල්ලිවලට, බඩුවලට, අරක්කු බෝතලයට, සිල් රෙද්දට. මේ පෙළගැසෙමින් තිබෙන ජනතාවගේ බලය කිසි ලෙසකින් හෝ ආපස්සට හරවන්න බැහැ, මෙය ජයග්‍රහණයෙන් කෙළවර කරන බව සහතිකයි. රාජ්‍ය […]
(-‘රට අනුරට’ ජාතික ජන බලවේගයේ විජයග්‍රාහී කන්තලේ රැලිය – 2024.08.28-)
මේ ලංකාවේ පළමුවැනි වතාවට පැවැත්වෙන්නේ, ලක්ෂ සංඛ්‍යාත ජනතාවක් ස්වේච්ඡාවෙන් වැඩ කර, ජාතික ජන බලවේගය දිනවන්න වෙහෙසෙන ඡන්දයක්. ඉතිහාසයේ මෙතෙක් ඡන්ද කළේ සල්ලිවලට, බඩුවලට, අරක්කු බෝතලයට, සිල් රෙද්දට. මේ පෙළගැසෙමින් තිබෙන ජනතාවගේ බලය කිසි ලෙසකින් හෝ ආපස්සට හරවන්න බැහැ, මෙය ජයග්‍රහණයෙන් කෙළවර කරන බව සහතිකයි. රාජ්‍ය නිලධාරීන්, පොලීසිය, හමුදාව ජාතික ජන බලවේගයේ බලයක් අපේක්ෂාවෙන් ඉන්න අයයි. මේ ජනතාවගේ බලාපොරොත්තවෙන් යන මේ ගමන මොන ජගතෙකුටවත් ආයේ නම්, නතර කරන්න බැහැ. අපට අවශ්‍ය ශක්තිමත් ජයග්‍රහණයක්. මේ ගමන වෙනස් කරලා, රට ගොඩනඟන, ජනතාවගේ ජීවිතය උසස් කරන දිසාවකට ආණ්ඩු පත්කරන්න ශක්තිමත් තීන්දු තීරණ ටිකක් ගන්න ඕනෑ. එහෙම තීන්දු ගන්න ජනතාවගේ සහාය අවශ්‍යයි. මම ඔබට ආරාධනා කරන්නේ ආණ්ඩුව ගොඩනැගීම සඳහා සැප්තැම්බර් 21 දක්වා වැඩ කරන්න විතරක් නොවෙයි. ආණ්ඩුව හැදුවාට පස්සේ, රට ගොඩනැගීමටත් හැමෝම එකතු වෙලා උරදෙමු. මහන්සි වෙමු. අපේ ජයග්‍රහණයෙන් පස්සේ අපට සහාය නොදුන් කිසිදු වෙනත් පාර්ශ්වයකට නිය තුඩකින්වත් හානියක් වෙන්න ඉඩ දෙන්න එපා. අපට අලුත් දේශපාලන සංස්කෘතියක් අවශ්‍යයි.
ඉතිහාසයේ හැමදාම අපට ගහගන්න ඉඩ සැලැස්සුවා. හැබැයි රනිලුයි, මහින්දයි කවදාවත් ගහ ගත්තේ නැහැ. ජනතාව දෙකට බෙදිලා ගහ ගත්තා. ඒගොල්ලෝ අතර කවදාවත් වෛරයක් තිබුණේ නැහැ. රනිලුයි මහින්දයි එකතු වෙලා ආණ්ඩු හැදුවා. අපි හැමදාම ගහගත්තා. සැප්තැම්බර් 21 දක්වා අපි ජාතික ජන බලවේගයේ ආණ්ඩුවක් හදන්න වැඩ කරනවා. 22 දායින් පස්සේ පක්ෂ පාට භේදයකින් තොරව අපි හැමෝම එකතු වෙලා රට හදන්න මැදිහත් වෙන ආණ්ඩුවක් හදනවා. ඒ මිත්‍රශීලිත්වය තියෙන්නේ ජනතාවත් එක්ක. ඉහළ අයත් එක්ක නොවෙයි. හැබැයි මහජනයාගේ දේපළ හොරකම්, අපරාධ කර තිබෙනවා නම්, නිීතිය හමුවට ගොස් දඬුවම් දෙනවා. එය පළිගැනීමක් නොවෙයි; යුතුකමක්. ඒ වගේම සොරකම් කරපුවා ආපහු ගන්නත් කටයුතු කරනවා.
80 දශකයේ අග භාගයේ ඉන්දියාව නිෂ්පාදනයෙන් දියුණුව තිබූ රටක් නොවෙයි. ඒ රටේ නායකයන්ට දැක්මක් තිබ්බා නිෂ්පාදනයෙන් ආර්ථිකය උඩට ගේන්න. අද මේ කලාපෙට අවශ්‍ය ඖෂධ, බීජ, ආහාර, ත්‍රී විලර්, බයිසිකල් නිෂ්පාදනය විතරක් නොවෙයි අද හඳට යන්න තරම් දියුණු ආර්ථිකයක් ගොඩනඟා තිබෙනවා. අපේ පාලකයන්ට නිෂ්පාදනය ගැන උනන්දුවක් තිබුණේ නැහැ. ‘බයින් ඇන්ඩ් සෙලින්’ ආර්ථිකයක් තමයි තබුණේ. කන්තලේ සීනි කම්හල, වාලච්චේන, ඇඹිලිපිටිය කඩදාසි කම්හල, තුල්හිරිය, මත්තේගොඩ, පූගොඩ රෙදි කම්හල් වැනි සියලුම කර්මාන්ත ශාලා වසා දැමුවා. බඩු ගේනවා, විකුණනවා. ඒක ලාභයි. ඉන්දියාව බයිසිකල්, ත්‍රී විලර්, බෙහෙත්, බිත්තර හදනවා. අපි ගේනවා; පාවිච්චි කරනවා. ඉන්දියාව නිෂ්පාදනයට පණ දුන්නා. අපි නිෂ්පාදනය කඩා වට්ටලා බඩු ගේනවා. විකුණනවා. එහෙම ගේනකොට එයාලට ලාභයි. බිත්තරයකින් රුපියල් 8ක කොමිස් මුදලක් තිබෙනවා. සීනි බදු වංචාවෙන් කෝටි 1500යි. පොල්තෙල්වල බදු වංචාව කෝටි 350යි. පොහොර නැවක් ගෙනවා. එක පොහොර ඇටයක් බෑවේ නැහැ. ඒ වුණාට ඩොලර් ලක්ෂ 60ක් ගෙව්වා. රුපියල් දශලක්ෂ 1800ක් නිකම් ගෙව්වා. ආර්ථිකය හදන්න ඒගොල්ලන්ට වුවමනාවක් තිබුණේ නැහැ. නිෂ්පාදනය කඩා වැටුණාම රට දුප්පත් වෙනවා. වෙන රටවල්වලින් ගේන්න වෙන කොට රට දුප්පත් වෙනවා.
අපේ ගම්වල දුප්පත්භාවය පැතිරිලා තිබෙනවා. මේ දුප්පත් බව කොයිතරම් ද කියනවා නම්, අතේ, කරේ, කණේ තිබුණු වළලු, මාල, කරාබු බැංකුවට සින්න වෙලා. ග්‍රාමීය ජනතාව දුප්පත්භාවයෙන් ගොඩගන්න ආර්ථික වැඩපිළිවෙළක් ඕනෑ. ඒකෙ ප්‍රධාන වැඩක් තමයි අධ්‍යාපනය. දුප්පත් රේඛාවයි, නූගත් රේඛාවයි තිබෙන්නේ එකට. මේ දුප්පත්භාවයෙන් එළියට එන්න දරුවන්ට හොඳට උගන්වන්න ඕනෑ. අපි ප්‍රධාන වගකීම බාර ගන්නේ අපේ රටේ අධ්‍යාපනය. අද දෙමව්පියන්ට දරුවන්ගේ අධ්‍යාපනය බරක් වෙලා. මෙවැනි තත්වයක් ලෝකේ කොහේවත් නැහැ. අපේ අම්මලා ජීවිත කාලය වැඩිපුර ගෙවන්නේ දරුවන්ට උගන්වන්න. දරුවා හොඳ පාසලකට දාගන්න ඕන වුණහම දෙමව්පියන්ට පදිංචිය මාරු කරන්න සිදුවෙලා තිබෙනවා. ජාතික ජන බලවේගයේ ආණ්ඩුවකදි සෑම දරුවෙකුටම කිලෝ මීටර් තුනකට මෙහා තිබෙන පාසල් හොඳ පාසලක් බවට පරිවර්තනය කරනවා. විශාල ලෙස ගුරු පුරප්පාඩු තිබෙනවා. ඒ සියල්ල පුරවලා හැම පාසලකටම අවශ්‍ය වන ගුරුවරුන් ලබාදෙනවා. ළමයි 50කට වඩා අඩුවෙන් ඉන්න පාසල් ගැන සලකා බැලීමක් කර පාසල් පද්ධතිය වෙනස් කරනවා. සෑම දරුවෙකුටම නවය, දහය වසරවලට ආසන්නයේදී තේරීමේ විභාගයක් පවත්වනවා. ගුරුවරයා, ළමයා, දෙමව්පියන් සමග සාකච්ඡාවක් කොට ළමයට ඉදිරියට යන්න පාර හදාදෙනවා. සෑම දරුවෙකුටම අධ්‍යාපනයෙන් නිපුණතාවකට යන හෝ වෘත්තිමය නිපුණතාවකින් ඉස්සරහට යන්න මාර්ගය සකසා දෙනවා. එකම දරුවෙකුට හෝ පාසලෙන් එළියට වැටෙන්න ඉඩ දෙන්නේ නැහැ. සෑම පවුලකම උගත් දරුවෙක්, ආර්ථිකය සරුකරන දරුවෙක් ඉන්නවා. දුප්පත්භාවයෙන් ගොඩඑන්න නම් හැමෝම අධ්‍යාපනය ලබන්න ඕනෑ.
මේ ප්‍රදේශයේ ජනතාවගේ වැඩි දෙනෙකුගේ ජීවන ආර්ථික මාර්ගය කෘෂිකර්මාන්තය. මේ ගොවි ජනතාව විශාල ණය බරකින් පෙළෙනවා. ජාතික ජන බලවේගයේ අපි ඉතා හොඳින් සමීක්ෂණයක් කරලා, ගොවි ජනතාව ණය බරින් මුදා ගැනීම සඳහාත්, බැංකුවලින් අරගෙන තිබෙන ණයවලින් යම් ප්‍රමාණයක් කපා හරිනවා. ඒ වගේම නැවත ණය නොවෙන්න සංවර්ධන බැංකුවක් ඇති කරනවා. ඉන්දියාවේ, චීනයේ, වියට්නාමයේ හැම රටකම සංවර්ධන බැංකු තිබෙනවා. ගොවීන්ට 1%,- 2% ඉතා අඩු පොලියකට ණය දෙනවා. අපි ක්‍රමානුකූලව ගොවි ජනතාව ණය බරින් නිදහස් කර ගන්නවා. ඒ වගේම අපේ නිෂ්පාදන පිරිවැය අඩු කරන්න ඕනෑ. ඉන්දියාවේ බිත්තරයක් ලංකාවේ බිත්තරයකට වඩා මිල අඩුයි. හේතුව නිෂ්පාදන පිරිවැය අඩු වීම. අපේ අස්වැන්න වැඩි කළොත් නිෂ්පාදන පිරිවැය අඩු කරන්න පුළුවන්. අක්කරයකට අස්වැන්න වැඩි කළොත් වී බුසලකට යන වියදම අඩු වෙනවා. අපේ සැලැස්මක් තිබෙනවා වී අස්වැන්න වැඩිකිරීමට. හොඳ බිත්තර වී ලබා දෙන්න ඕනෑ. අපේ බීජ පර්යේෂණායතන සියල්ලම වසා දමා තිබෙනවා. අපි මේ බීජ පර්යේෂණායතනවලට පණ දෙනවා. කන්තලේ ගොවි කණ්ඩායමක් ඉන්නවා. එයාලගේ වැඩේ බිත්තර වී හදන එක. ඒ ගොවි කණ්ඩායමට බිත්තර වී හදන්න බාර දෙනවා. ආණ්ඩුව බීජ ගොවිපළවල් හදනවා, බීජ හදනවා. ගොවියාට සාධාරණ මිලකට බිත්තර වී කිලෝ එකක් ලබා දෙන්න සැලසුමක් හදනවා. අද බිත්තර වී කිලෝ එකක් රුපියල් 500කට වැඩියි. බීජවලින් විතරක් මිල අඩු කරන්න බැහැ. වී වගාවට වතුරත් ඕනෑ. ඒ සඳහා අපේ තිබුණු සුළු හා මධ්‍ය පරිමාණ වැව් ප්‍රතිසංස්කරණය කරන්න ඕනෑ. පැරණි වැව් 32,000න් ඉතිරි වෙලා තිබෙන්නේ වැව් 14,000ක් පමණයි. සතියක් වහින කොට ඒ වැව් පිටාර ගලනවා. සති දෙකක් පායන කොට වැව හිඳෙනවා. රොන් මඩවලින් පිරුණු මේ වැව් සුද්ද කරලා, කිසිදු බාධාවකින් තොරව යල කන්නයත් මහ කන්නයත් වගා කරන්න වතුර දෙනවා. ඒ විතරක් නොවෙයි අතර මැද කන්නයක් ගැනත් හිතන්න ඕනෑ. යළි අපේ රටේ කුඹුරේ කන්න තුනක් අස්වැන්න නෙළන්න පුළුවන් විදිහට කෘෂිකර්මාන්තයට අපි උර දෙනවා. කුඹුරට අවශ්‍ය තෙල්, පොහොර ලබා දෙන්න ඕනෙ. අපි ඒ වැඩේ කර දෙන්නම්. ඊළඟට නෙළන අස්වැන්න රැක ගන්න ඕනෑ. සාධාරණ මිලක් දෙන්න ඕනෑ. ඒ සියල්ලම සඳහා අපි සැලසුම් හදා තිබෙනවා. මේවා කරන්න පුළුවන්. අපේ නායකයන්ට කවදාවත් එය කරන්න වුවමනාවක් තිබුණේ නැහැ. අපි ඒ විදිහට ගොවි ජනතාවගේ ජීවිතය උසස් කරනවා. ඒ විතරක් මදි. තවත් ගම්වල රස්සා ඇති වෙන්න ඕනෑ. කන්තලේ සීනි සමාගම ඒ සඳහා හොඳ තැනක්. යළි ඒක අපි පටන් ගන්නවා.
මම ඉඩම් ඇමති කාලෙ, ඕකෙ ඉඩම් අයිතිය තිබුණේ මට. ෆැක්ටරිය අයිතිවෙලා තිබුණේ කර්මාන්ත ඇමති අනුර බණ්ඩාරනායකට. චීන ආයෝජකයෙක් ආවා. අනුර බණ්ඩාරනායකගෙන් මම ඇහුවා මේ වැඩේ අපි කරමුද කියලා. එයා හොරෙක් නොවෙයි. එයා කිවුවා අනුර ඔයාට කැමති දෙයක් කරන්න කියලා. මම ආයෝජකයාට කිවුවා කළු ගඟේ අත්තක් තිබුණා. ඒක ප්‍රතිසංස්කරණය කරලා වගාවට අවශ්‍ය වතුර ගන්න. මම චීන ආයෝජකයාට කිවුවා, ඒ ව්‍යාපෘතිය කරලා, මේ ෆැක්ටරිය පටන් ගන්න කියලා. චීන ආයෝජකයා හා කිවුවා. මම අමාත්‍යාංශය දාලා ආවා. චීන ජාතිකයා චීනෙට ගියා. ඊට පස්සෙ ආව අය පගා ඉල්ලන්න, කොමිස් ඉල්ලන්න පටන් ගත්තා. අපි මේ සීනි සමාගම යළි ආරම්භ කරලා ගොවි ජනතාවගේ ජීවිතයට තවත් ආදායම් මාර්ගයක් ඇති කරනවා.
ඒ වගේම ත්‍රීකුණාමලයේ තිබෙනවා තෙල් ටැංකි 99ක්. එක ටැංකියක මෙට්්‍රක් ටොන් 10,000ක් ගබඩා කරන්න පුළුවන්. ආසන්න වශයෙන් මෙට්්‍රක් ටොන් ලක්ෂ දහයක් ගබඩා කරන්න පුළුවන්. ඕකෙ තෙල් අපට වැඩියි. තෙල් පිරිපහදුව ආරම්භ කරලා, තෙල් පිරිපහදු කරලා, ගබඩා කරලා, ළඟම තිබෙන වරායෙන් මාර්කට් එකට යවන්න පුළුවන්. ඒ වැඩේ කරන්න පුළුවන් ජාත්‍යන්තර සමාගමකුයි, තෙල් සංස්ථාවයි ඒකාබද්ධ වෙලා නැවත මේ ත්‍රීකුණාමලයේ තෙල් ටැංකි සංකීර්ණයට පණ දෙනවා. දැන් ඒක මළකඩ කමින් තිබෙනවා. අපි ඒක ගොඩ ගන්නවා. පුල්මුඩේ ඛනිජ වැලි නිධිය තිබෙනවා. දශක ගණනාවක සිට කුඩා නිස්සාරණයක් කොට අමු වැලි පටවනවා. ජාතික ජන බලවේගයේ අපි අලුත් රසායනික කර්මාන්ත ශාලාවක් ගෙනවිත් වැඩි වටිනාකම් සහිත ඛනිජ නිෂ්පාදනය කරලා, ලෝකෙට විකුණන සැලැස්ම අපි හදනවා. ඒ ඇතුලේ රස්සා ඇති වෙනවා. කන්තලේ ඉන්න දරුවා රස්සා කරන්න කොළඹ යන්න ඕනෑ නැහැ. ඒක ලොකු ව්‍යසනයක්. අද චීනයේ, ෂැංහයි, ඩැකා, චෙන්නායිවලට නාගරික ජනාවාස ප්‍රශ්නයක් වී තිබෙනවා. ගමේ අය ගමේ ඉන්න ගමන් ආර්ථික තත්වයත්, සමාජ ජීවිතයත් උසස් කරන වැඩපිළිවෙළක් තමයි ජාතික ජන බලවේගයේ ආර්ථික සැලැස්ම වී තිබෙන්නේ. මහ මුහුදේ තිබෙන මාළු සම්පත නෙළා ගන්න අපි වැඩපිළිවෙළ හදනවා. මේ වැඩපිළිවෙළ සාර්ථක කර ගැනීම තුළින් රටත් පොහොසත් වෙනවා, ජනතාවත් පොහොසත් වෙනවා.
මේ වැඩේ අද බලය අරගෙන හෙට සිදුවෙන්නේ නැහැ. අපි කවුරුත් අවුරුදු කිහිපයක් දරාගෙන, මහන්සි වෙලා මේක ගොඩගනිමු. එතෙක් ආහාර ගන්න, බෙහෙත් ගන්න, අධ්‍යාපනය ලබන්න, ආබාධිත වී ඉන්න අයට අවම වශයෙන් 10,000 සිට අමාරුම අය සොයා බලා වැඩි මුදලක් සහනාධාර ලෙස ලබා දෙනවා. අපි ණයක් වෙන්න බය, ලැජ්ජා තිබුණු මිනිස්සු. අපි ගෞරවාන්විත විදිහට ගම්වල ජීවත් වුණ මිනිස්සු. පාලකයන් තමා මිනිස්සු නැති බැරි කළේ. හාල් කිලෝ 10ට පොලිමේ ඉන්න සිද්ධ කළා. රනිල් වික්‍රමසිංහ කිව්වේ ‘ෆ්‍රී වයිෆයි’ දෙනවා කියලා. ‘ෆොක්ස්වැගන්’ ගේනවා කිවුවා. ‘බ්‍රේස්ලට්’ දෙනවා කිවුවා. අන්තිමේට හාල් කිලෝ 10ක් දුන්නා. මේ පාලකයෝ අපේ ආත්මගරුත්වය නැති කළා. අපේ කුඹුරුවල ලියැද්දක් විතර කුරුල්ලන්ටත් කන්න ඇරලා දුන්නා. අපි නෙළන අස්වැන්නේ පළමු කොටසින් දානය පන්සලට පූජා කළ මිනිස්සු. එහෙම අපිට අතපාන්න සිදුවෙලා තිබෙනවා. නැවත මේ ගම්වල ජනතාවගේ ආත්මගරුත්වය, පෞරුෂය, බලය ගෙනත් දෙන ආණ්ඩුවක් තමයි ජාතික ජන බලවේගයේ ආණ්ඩුව. අපේ යුද්ධය වෙලාවේ විශාල වැඩ කොටසක් කළ සිවිල් ආරක්ෂක බලකායේ ඉන්න අයගේ තෘප්තිමත්භාවය ඇති කරන, ඔවුන්ගේ ශ්‍රමය රටේ ආර්ථිකයට උපයෝගී කර ගත හැකි විදිහටත් අපි සැලැස්ම හදනවා. අපි හැමෝම එකතු වෙලා, පොර බදලා මේ රට දියුණු කරන්න පුළුවන්. ඒ වෙනුවෙන් අපි ආණ්ඩුව හදමු. ඒ වෙනුවෙන් මැදිහත් වෙමු.
“තක්කඩි දේශපාලන ක්‍රමය අවසන් කිරීම සඳහා අපි නිවැරදි තීරණයක් ගනිමු”
-රංගන ශිල්පී අලෝක සම්පත්-
මගේ දේශපාලන මතය ප්‍රකාශ කරන්න මම තෝරාගත් මාධ්‍යය තමා කලාව. නමුත් ඒ කලාව විඳින්න පුළුවන් ආර්ථික ශක්තියක්, මානසික සුවයක් අපේ රටේ මිනිසුන්ට තිබෙනවාද කියන එක මට ප්‍රශ්නයක්. අපි මොනතරම් නිර්මාණ කළත් වැඩක් නෑ. ඒ නිර්මාණ රසවිඳින්න ප්‍රක්ෂකාගාරයක් නැත්නම්. ඔබ පොඩ්ඩක් හිතල බලන්න. ඔබේ දූදරුවන් සමග, බිරිඳ සමග, ආදරවන්තිය හෝ ආදරවන්තයා සමග, යාළුවො සමග චිත්‍රපටයක් බැලුවේ කොච්චර කාලෙකින්ද කියල. එච්චර එපා. මේ කන්තලේ වැව් ඉස්මත්තේ ඉඳගෙන ඔබේ දුවට, පුතාට අයිස් ක්‍රීම් එකක්, වඩේ එකක් අරන්දීලා විවේකයෙන් මදක් හෝ ගතකරන්න ඔබට ආර්ථික ශක්තියක් තිබෙනවාද? ඒ අතින් අපි කොච්චර අසරණද? අපි මොනතරම් බලාපොරොත්තු හීන තියාගෙන ජීවත්වන පරම්පරාවක කොටස්කරුවෝද? තමන්ගේ දරුවන්ගේ අනාගතය, මගේ අනාගතය ගැන මම වගේම ඔබත් කොච්චර වද විඳිනවද? තමන්ගේ මව්පියන්ට, නෑදෑයන්ට යුතුකම් ඉටුකර ගන්න බැරිව අපි කොච්චර වද විඳිනවද? ඒක මේ දේශපාලන හා ආර්ථික ක්‍රමයේ ප්‍රශ්නයක්. ඒ නිසා අපි මේ ක්‍රමය වෙනස් කරන්න ඕනද, නැද්ද කියා ඔබම තීරණය කළ යුතුයි. අපි මේ දේශපාලන ක්‍රමය වෙනස් කළ යුතුමයි. අපේ රටේ දුප්පත් මිනිසුන්ගේ සතුට වෙනුවෙන් මේ ක්‍රමය වෙනස් කරන්න සැප්තැම්බර් 21ක අපිට අවස්ථාවක් ලැබී තිබෙනවා. මේ හොර තක්කඩි දේශපාලන ක්‍රමය අවසන් කිරීම සඳහා එදාට අපි නිවැරදි තීරණයක් ගනිමු. මම දන්නවා ඒ වෙනුවෙන් තමයි මගේ ගමේ, කන්තලේ මිනිස්සු, මගේ මිත්‍රයෝ, හිතවතුන් අද වෙනකොට එකතුවෙලා ඉන්නේ කියල.
මම විශ්වාස කරනවා අපිට සතුටින් නිදහසේ ඉන්න පුළුවන් හොඳ ආර්ථිකයක් ගොඩනගන්න පුළුවන් ජාතික ජන බලවේගයට පමණයි කියලා. ඔබත් එය විශ්වාස කරන නිසා තමයි අද මෙම ස්ථානයට රැස්වෙලා ජාතික ජන බලවේගය දිනවන් ඔබේ ශක්තිය එකතු කර තිබෙන්නෙ. ජාතික ජන බලවේගය අපට අපේ දරුවන්ට පොහොසත් රටක් ලස්සන ජීවිතයක් උදාකර දෙන්නට පෙරමුණ ගෙන තිබෙනවා.
අපේ රට හා අපේ මිනිස්සු දුප්පත් කළේ ඔබද? මමද? නැහැ. ඒ තත්වයට අපිව හා රට පත් කළේ මේ රට පාලනය කරපු හොර තක්කඩි දේශපාලන රැළක්. ඒ හොර තක්කඩි දේශපාලන කඳවුරු ගෙදර යවන්න සුදුසුම කාලය තමයි මේක. ඒක කරන්න තමයි අපි දැන් ඔක්කොම එකතුවෙලා ඉන්නේ. අපෙන් හොරකම් කරපු ධනය ආපසු ලබාගන්න, හොරුන්ට දඬුවම් දෙන්න, අපේ රටේ දරුවන්ට යහපත් හෙටක් ගොඩනගන්න මේ රටේ මේ වතාවේ පත්වෙන ජනාධිපතිවරයා ඉන්නෙ අපිත් එක්ක.
මේ සැප්තැම්බර් 20දා අපේ නායක, ඔබේ නායක අනුර කුමාර දිසානායක සහෝදරයා ජනාධිපතිවරයා ලෙස තෝරා පත්කර ගෙන අපි රට අලුත් දිසාවකට හැරවීම සඳහා පෙරමුණ ගමු කියන ඉල්ලීම මම ඔබට කරනවා. සැප්තැම්බර් 21 මෙරටට බිහිවෙන්නේ 9වෙනි ජනාධිපතිවරයා නෙවෙයි. 21වැනි සියවසට ගැලපෙන දියුණුම නායකයායි. ඔහු අපේ ජනාධිපතිවරයෙක්. මහජනතාවගේ ජනාධිපතිවරයෙක්. ඒ සහතිකය මම ඔබට දෙනවා.
මගේ තාත්තා පට්ට යුඑන්පීකාරයෙක්. මගේ තාත්තා යුඑන්පී වුණ හින්දා මගේ අම්මත් යුඑන්පී වුණා. ඒ දෙන්න යුඑන්පී වුණ නිසා අපේ පවුලේ අනිත් අයත් යූඑන්පී වුණා. හැබැයි මම, 3% කාලයේත් හිටියේ ජාතික ජන බලවේගය එක්ක. අද ඉන්නේත් ඒකත් එක්ක. හෙට ඉන්නේත් ඒකත් එක්ක. දැන් ඇත්ත වටහාගත්තු අපේ පවුලේ අයත් අද ජාතික ජන බලවේගය දෙසට හැරෙමින් තිබෙනවා.
ලබන සැප්තැම්බර් 21වැනිදාට ඔබේ වටිනා ඡන්දය අනුර කුමාර දිසානායක සහෝදරයාට ලබාදී ඔහුව මේ රටේ ප්‍රථම මහජන ජනාධිපතිවරයා කර, ලස්සන රටක් නිර්මාණය කිරීමේ මහඟු කාර්යයට දායක වෙන්න කියල මම මේ රටේ සියලු ජනතාවගෙන් ඉල්ලා සිටිනවා.
“‘පොහොසත් රටක් – ලස්සන ජීවිතයක්’ ජනතාවට උරුම කර දිය හැක්කේ මාලිමාවට පමණයි”
-ජාතික ජන බලවේගයේ ජාතික විධායක සභික සුනිල් හඳුන්නෙත්ති-
ත්‍රීකුණාමල දිස්ත්‍රික්කය කියන්නේ සිංහල, දෙමළ, මුස්ලිම් ජනතාවගේ සමගිය නියෝජනය සංකේතවත් කරන දිස්ත්‍රික්කයක්. ඒ වගේම අපි ඉදිරිපත් කරලා තිබෙන සංවර්ධන සැලැස්මට අනුව මෙම ත්‍රිකුණාමල දිස්ත්‍රික්කයට ඒ වෙනුවෙන් විශාල දායකත්වයක් දිය හැකි බව අපේ දැඩි සැලකිල්ලට ලක්වෙලා තිබෙනවා.
අර පුළුවන් කියන නායකයයි, එයාගේ මාමයි එකතු වෙලා මේ ත්‍රිකුණාමල දිස්ත්‍රික්කයේ වටිනා ස්ථාන හා සම්පත් රාශියක් කුණු කොල්ලයට විදේශවලට විකුණා දමා තිබෙනවා. සමහර ඒවා විනාශ කර දමා තිබෙනවා. රනිල්ට බැරි බව මුළුරටම දන්නවා. ඒ නිසා තමයි පුළුවන් කියන කෑල්ල බලෙන්ම දාගෙන තිබෙන්නේ. අපේ ත්‍රිකුණාමලේ කන්තලේ තිබුණු සීනි කර්මාන්ත ශාලාව අක්කර 2500ක භූමි ප්‍රමාණයක්. ආසියාවේ විශාලම සීනි කර්මාන්ත ශාලාව බවට පත්කරන්න තිබුණු තැන. ඒක නැති කළේ කවුද? රාජපක්ෂ, රනිල් වික්‍රමසිංහ, සජිත් ප්‍රේමදාසලාගේ හවුල් ආණ්ඩු. සුද්දා හදාපු තෙල් ටැංකි ටික අපිට විශාල සම්පතක්. ඒක අපට නැති කළේ කවුද? දැන් ඔය පුළුවන් කියන රනිල්ලාම තමයි. අද අපිට කොටසක් බැරි කරලා, ඉන්දියාවට කොටසක් කරන්න දීලා.
අපේ ජාතික නිෂ්පාදන සැලැස්මේ බලශක්ති ක්ෂේත්රය ශක්තිමත් කිරීමේදී අපේ ත්‍රිකුණාමලේ තෙල් ටැංකි ටික ඉතා වැදගත්. එය යළි ප්‍රතිසංස්කරණය කර, ඔබට ප්‍රතිලාභ ලබාදීමට අපේ පාලනයක් තුළ අපි ඉක්මනින්ම පියවර ගන්නවා. අනෙක් අතට ත්‍රිකුණාමල වරාය අපේ රටට විශාල සම්පතක්. ඒකෙ පිහිටීම අතින් ලෝකයේම අති විශේෂ වරායක්. එකෙන් අපේ ආර්ථිකය ගොඩනැගීම සඳහා දායක කරගත හැකි අවස්ථාව අපට නැති කළේ කවුද? ඔය රනිල්ලා, රාජපක්ෂලා, ප්‍රේමදාසලා තමයි. ඒ වගේම ඉල්මනයිට් නිධිය මගින් එකතු කළ අගය මත නව නිෂ්පාදන ක්‍රමවේදයකට සකස් කරලා එම ඛනිජ සම්පතින් විදේශ විනිමය උපයා ගන්න තිබුණ අවස්ථාව අපේ රටට ලබා දෙන්න බැරි කළේ මේ පාලකයන් තමයි. අනුර සහෝදරයා ජනාධිපති වූ පසු ජනතාවගේ සහභාගිත්වයත් සමග නවීන තාක්ෂණය යොදා එම සම්පත වැඩිදියුණු කර, රටට විදේශ විනිමය උපයා ගන්න අපි සැලසුම් කර තිබෙනවා. කන්තලේ ගොවි ජනපද ව්‍යාපාරය වැනි මහ ගොවි ජනපද ව්‍යාපාර වැඩි දියුණු කරලා, අස්වද්දලා මේ ප්‍රදේශයේ ජනතාවට වගේම රටේ ජනතාවටත් ප්‍රතිලාභ අත්පත් කරලා දෙන්න ජාතික ජන බලවේගයේ ආණ්ඩුවක් යටතේ අපි සැලසුම් කර තිබෙනවා.
පොහොර ටික, බීජ ටික, වතුර ටික වෙලාවට දෙනවා නම් මේ ප්‍රදේශය අස්වද්දලා රටේ ජාතික නිෂ්පාදනයටත් කොටසක් දායක කර දෙන්න සූදානම් බව අපි දන්නවා. මේ දේවල්වලින් ප්‍රයෝජනය ගන්න රනිල්ට, සජිත්ලට, රාජපක්ෂලාට බැහැ කියලා දැන් ඔප්පු කරලා හමාරයි. කිරි කර්මාන්තය ගැන කථා කරනකොට කන්තලේ කිරි කියලා කියන්නේ රට පුරාම ප්‍රසිද්ධ එකක්. ඒ විතරක් නොවෙයි, ධීවර කර්මාන්තය ගත්තත්, මිරිදිය ධීවර කර්මාන්තය කන්තලේ වැව හා ගොඩබිම් ජලාශ ආශ්‍රිතව තිබෙනවා. අනෙක් පැත්තෙන් කින්නියාව වගේ පැතිවලට යන කොට කරදිය ධීවර කර්මාන්තය කරනවා. ත්‍රීකුණාමලයට ගියත්, මුතූර්වලට ගියත් මාළු ටික, කරෝල ටික රටට සපයනවා. ඒ මහා මත්ස්‍ය සම්පත ආර්ථිකයට විශාල වටිනාකමක් එකතු කරන්න පුළුවන් එකක්. නමුත් මේ පාලකයෝ ඒවා සැලකිල්ලට අරන් නැහැ. ඒ ගොල්ලන්ට කරන්නත් බැහැ. දැන් පුළුවන් කිවුවාට එයාලට ඒක කරන්න බැහැ. දැන් ඒ ගොල්ලන්ගේ කාලය ඉවරයි. ඓතිහාසික වටිනාකමක් සහිත සංචාරක ස්ථාන, බෞද්ධ, හින්දු, ඉස්ලාම් පූජනීය ස්ථානවලින්ද ත්‍රිකුණාමල දිස්ත්‍රික්කයට අඩුවක් නැහැ. ඒ ආශ්‍රිත විධිමත් සැලැස්මක් යටතේ සංචාරක ව්‍යාපාරය දියුණු කරන්න හැකි වුණොත් අපේ රටට ඩොලර් උපයා ගැනීමේ හැකියාව ඒ තුළින් ලැබෙනවා. ජාතික ජන බලවේගයේ පාලනයක් තුළ අපි ඒ දේවල් කරන්න පුළුල් සැලසුම් හදා තිබෙනවා. ත්‍රීකුණාමලය කියන්නේ සංචාරක පුරයක් බවට පත් කරන්න පුළුවන් භූමි ප්‍රදේශයක්. ඒ අනුව අපේ රටේ ආර්ථිකයට විශාල පංගුවක් එකතු කරන්න ඒ මගින් පුළුවන්. මේක ඉතාම සුන්දර දිස්ත්‍රික්කයක්. ඒකෙන් රටට ප්‍රයෝජන අත්කර දෙන්න රනිල්ට බැහැ. සජිත්ටත් බැහැ. රාජපක්ෂලාටත් බැහැ. බැරි බව අමුතුවෙන් කියන්න දෙයකුත් නැහැ. ඔවුන් බැරි බව ඔප්පු කර හමාරයි.
ජාතික ජන බලවේගයට වැඩපිළිවෙළක් නැහැ. ඒ ගොල්ලෝ බලයට ආවොත් රට කරන්නේ කෙහොමද කියලා අසමින් සිටි අයගේ දැන් දෙකොණ පූට්ටු වෙලා. කට උත්තර නැතිවෙලා. දැන් ඒ ගොල්ලෝ තමන්ගේ ප්‍රතිපත්ති හැදීම පැත්තක තියලා අපේ ප්‍රතිපත්ති ප්‍රකාශනය අල්ලාගෙන කියෝනවා. සමහරු පොටෝ කොපි ගහගෙන කියෝනවා. මේ දවස්වල අපේ ප්‍රතිපත්ති ප්‍රකාශය වැඩියෙන්ම ඩවුන්ලෝඩ් කරන්නේ සජබයේ කට්ටිය. ඒ ගොල්ලෝ අගෝස්තු 22වැනිදා ප්‍රතිපත්ති දාන්න බලාගෙන හිටියේ. ඒත් දැම්මෙ නැහැ. මේ දවස්වල අපේ එක බලාගෙන පිටපත් කිරීම කරනවා. අපි බලමු කවදාද ඒක එළියට දාන්නේ කියලා. ඒ ගොල්ලන්ට වැඩපිළිවෙළක් නැහැ. මේ කාටවත් එහෙම එකක් නැහැ. මේ රට ගොඩනගන “පොහොසත් රටක් – ලස්සන ජීවිතයක්” ජනතාවට උරුම කර දිය හැකි විද්‍යාත්මක හා දියුණුව ප්‍රතිපත්ති ප්‍රකාශනය ඉදිරිපත් කර තිබෙන්නේ ජාතික ජන බලවේගය පමණයි.
(-ජාතික ජන බලවේගයේ ආර්ථික කවුන්සිලයේ මාධ්‍ය හමුව – 2024.08.29-) ජාතික ජන බලවේගයේ ප්‍රතිපත්ති ප්‍රකාශනය එළිදක්වා තිබෙනවා. එහි අඩංගු නිසි තොරතුරු තේරුම් ගන්නේ නැතිව විකෘති තොරතුරු ජනගත කරන්න සමහර අය උත්සාහ කරමින් සිටිනවා. මෙයට පෙර වැට් බද්දට යටත් කර නොතිබුණු පාසල් දරුවන්ගේ උපකරණ, සෞඛ්‍ය උපකරණ, ආහාර වැනි එදිනෙදා ජීවිතයට අවශ්‍ය භාණ්ඩවලට අලුතින් වැට් බදු අය කරන […]
(-ජාතික ජන බලවේගයේ ආර්ථික කවුන්සිලයේ මාධ්‍ය හමුව – 2024.08.29-)
ජාතික ජන බලවේගයේ ප්‍රතිපත්ති ප්‍රකාශනය එළිදක්වා තිබෙනවා. එහි අඩංගු නිසි තොරතුරු තේරුම් ගන්නේ නැතිව විකෘති තොරතුරු ජනගත කරන්න සමහර අය උත්සාහ කරමින් සිටිනවා. මෙයට පෙර වැට් බද්දට යටත් කර නොතිබුණු පාසල් දරුවන්ගේ උපකරණ, සෞඛ්‍ය උපකරණ, ආහාර වැනි එදිනෙදා ජීවිතයට අවශ්‍ය භාණ්ඩවලට අලුතින් වැට් බදු අය කරන බව දේශීය ආදායම් බදු දෙපාර්තමේන්තුවෙන් නිකුත් කළ 2023/02 චක්‍රලේඛය අනුව පැහැදිලි වෙනවා. 2024 ජනවාරි 01 වැනි දින සිට වැට් බදු අය කරන බව නිල වශයෙන් දක්වා තිබෙනවා. උදාහරණයක් හැටියට දේශීය වශයෙන් නිෂ්පාදනය කෙරෙන බිත්තර, කිරි, කෘෂිකර්මාන්තයට අවශ්‍ය උපකරණ, සෞඛ්‍ය ක්‍ෂේත්‍රයට සම්බන්ධ උපකරණ වැනි කරුණු රාශියක් මේ බද්දට යටත් වෙනවා. දේශීය නිෂ්පාදකයන්ට සහ අපේ පාරිභෝගිකයන්ට පටවා තිබෙන වැට් බදු බර සම්බන්ධයෙන් අපි ප්‍රතිපත්ති ප්‍රකාශනයේ කරුණු ඉදිරිපත් කර තිබෙනවා. අපේ රටේ ජනතාව අවම ජීවන මට්ටමටත් පහතින් පවතින තත්වයක් ගත කරමින් ඉන්නේ. ඒ නිසයි ජාතික ජන බලවේගය ‘පොහොසත් රටක් – ලස්සන ජීවිතයක්’ කියන ප්‍රතිපත්ති ප්‍රකාශනය ඉදිරිපත් කරනු ලැබුවේ. මේ සහනය ලබා දෙන්න රුපියල් බිලියන 50කට ආසන්න වැඩි මුදලක් වැය වෙනවා. ඒ වාගේම රාජ්‍ය හා පෞද්ගලික යන දෙඅංශයේම ඉන්න මාසික වැටුප් ලබන්නන් සියයට 36ක් තරම් වූ බද්දකට යටත් කර තිබෙනවා. ඒ නිසා දැනට බදු අය කරන සීමාව රුපියල් ලක්‍ෂයේ ඉඳලා, ලක්ෂ දෙක දක්වා වැඩි කරන්න අපි බලාපොරොත්තු වෙනවා.
මේ මඟින් අපි ජාතික වැඩපිළිවෙළ ක්‍රියාත්මක කිරීම සඳහා ආර්ථිකය ප්‍රසාරණය කිරීම සඳහා නැවත වතාවක් ජනතාවට මිල දී ගැනීමේ හැකියාව ලබා දෙන්න ඕනෑ. දැනට තිබෙන ලක්‍ෂයේ සීමාව ලක්ෂ දෙක දක්වා වැඩි කිරීමෙන් ඒ සඳහා සෑහෙන සහනයක් ලැබේවි කියලා අපි බලාපොරොත්තු වෙනවා. ආදායම් බද්දට යටත් වන සීමාව ලක්ෂ දෙක දක්වා වැඩි කිරීම නිසා තව රුපියල් බිලියන 50කට අඩු මුදලක් අමතරව දැරිය යුතු වෙනවා. ඒ අනුව වැට් බදු පෙර කී භාණ්ඩවලින් ඉවත් කිරීම සහ මාසික ආදායම් ලබන අයගේ බදු සීමාව වැඩි කිරීම යන අංශ දෙකට රුපියල් බිලියන 110ක පමණ අමතර බරක් දරන්න වෙනවා. ඒ වෙනුවෙන් වැඩපිළිවෙළක් සූදානම් කර තිබෙනවා. අපි අයි.එම්.එෆ්. එකත් එක්ක කතා කරන කොට අවධාරණය කළේ රටේ ජනතාව නිෂ්පාදන ක්‍රියාවලියට දායක කර ගැනීමේ වැඩපිළිවෙළක් අවශ්‍ය බවයි. අපි මේ ප්‍රතිපත්ති ප්‍රකාශය සකස් කළේ ජාතික ජන බලවේගයේ පිරිසක් එක් වීමෙන් පමණක් නොවෙයි; කර්මාන්තකරුවන් වාගේම පළපුරුද්ද තිබෙන ඉහළ නිලතල දැරූ කර්මාන්ත ක්‍ෂේත්‍රයේ වෘත්තිකයන් සහභාගි කර ගත්තා. අයවැයේදී මේ සඳහා දැරිය යුතු වන මුදල් පියවා ගන්න දැනටත් භාණ්ඩාගාරයට අය විය යුතු නමුත්, අය කරගෙන නැති අතිවිශාල ආදායම් ප්‍රමාණය අය කර ගන්නත්, නාස්තිකාර වියදම් අඩු කර ගන්නත් සැලසුම් සකස් කර තිබෙනවා. මෙයට සමගාමීව ඉංජිනේරු ක්ෂේත්රය, තාක්‍ෂණික ක්ෂේත්රය, සන්නිවේදන ක්ෂේත්රය, සංවර්ධන සහ පර්යේෂණ ක්ෂේත්රය, ව්‍යාපාරික ක්ෂේත්රය සහ සංචාරක ක්ෂේත්රය යන බොහෝ අංශ සම්බන්ධ කර ගනිමින්, පෙරට යන ගමනක් අපි ඉදිරිපත් කර තිබෙනවා.
“සැලසුමේ සමස්තය සලකනවා මිස වලිගයෙන් අල්ලා ගන්න එපා”
-ජාතික ජන බලවේගයේ ආර්ථික කමිටු සාමාජික මහාචාර්ය අනිල් ජයන්ත-
නව පුනරුද යුගයකට රට ගෙන යන ආකාරය පිළිබඳව ජාතික ජන බලවේගය ඉදිරිපත් කර තිබෙන ප්‍රතිපත්ති ප්‍රකාශනය ඉතාමත් පුළුල් එකක්. එය ඉදිරිපත් කළ පසුව අධ්‍යයනය කර කරුණු දක්වනවා වෙනුවට පදනම් විරහිත චෝදනා කිහිපයක් ඉදිරිපත් කර තිබෙනවා. මේ වන විටත් විශේෂයෙන් විදේශීය ණය ප්‍රතිව්‍යුහගත කිරීමේ ක්‍රියාවලිය තුළ රට හිර වී තිබෙනවා. ඒ සම්බන්ධයෙන් නැවත සාකච්ඡා කරන්න ජාත්‍යන්තර මූල්‍ය අරමුදල එකඟත්වය පළ කර තිබෙනවා. විශේෂයෙන් විපක්ෂයේ හර්ෂ ද සිල්වා මන්ත්‍රීවරයා ඇතුළු පිරිසක් පරස්පර විරෝධී මත පළ කරමින් සිටිනවා. අයි.එම්.එෆ්. ගිවිසුමේ අඩංගු කරුණු සංශෝධනය කරන්න බැරි බව හර්ෂ ද සිල්වා මන්ත්‍රීවරයා ප්‍රකාශ කරන අතර, එම පක්ෂයේ තව පිරිසක් කියන්නේ ඒ ගිවිසුම නැවත සමාලෝචනය කරන බවයි. මේ ගැන විග්‍රහ කරන්න කලින් හර්ෂ ද සිල්වා මන්ත්‍රීවරයා පෙනී සිටින්නේ රනිල් වික්‍රමසිංහ ප්‍රකාශ කරන එම ගිවිසුම සමාලෝචනය කරන්න බැහැ කියන මතය වෙනුවෙන්ද, එහෙම නැත්නම්, තමන්ගේ පක්ෂයේ නායකයා ප්‍රකාශ කරන මෙය සංශෝධනය කරනවා කියන මතය වෙනුවෙන්ද යන්න පැහැදිලිව ප්‍රකාශ කළ යුතුයි. නමුත්, පසුගිය 28 වැනිදා රනිල් වික්‍රමසිංහ මහතා ප්‍රකාශ කර තිබෙන්නේ ඡන්දයක් කටේ තබාගෙන මෙම ගිවිසුමේ ඇතුළත් ආදායම් බදු අය කිරීමේ කාණ්ඩ සමාලෝචනය කර ගන්නා බවයි. ජාතික ජන බලවේගය ඉතා පැහැදිලිව ප්‍රකාශ කරන්නේ මේ වන විට පවත්වාගෙන යන අයි.එම්.එෆ්. වැඩපිළිවෙළ සම්බන්ධයෙන් සාකච්ඡා කර අපේ රටට වාසිදායක ලෙස සංශෝධනය කරගත යුතුයි කියන අදහසයි. ඒ වාගේම ප්‍රාථමික ශේෂය දළ දේශීය නිෂ්පාදිතයේ 2.3%ක පවත්වාගෙන යා යුතුයි කියන එක පවත්වාගෙන යන්න සිදු වෙනවා. එවැනි නිර්ණායක කිහිපයක් වෙනස් කළ නොහැකිව පවතිනවා.
නමුත්, මෙය කරන්නේ කොහොමද කියන ප්‍රශ්නයේදී විකල්ප කිහිපයක් තිබෙනවා. හර්ෂ ද සිල්වා වැනි මන්ත්‍රීවරුන් ප්‍රකාශ කරන්නේ මේ අත්සන් කර තිබෙන ගිවිසුම අනුව ක්‍රියා කිරීම පමණක් සිදු කළ යුතු බවයි. අයි.එම්.එෆ්. ගිවිසුම වෙනස් කිරීමට සාකච්ඡා කිරීමේදී ආණ්ඩුවේ ආදායමට සාපේක්‍ෂව වියදම් කළමනාකරණය කර ගන්නේ කොහොමද කියන ප්‍රශ්නය කෙරෙහි මූලික අවධානය යොමු කරනවා. ඒ වෙනුවෙන් පවතින බදු ව්‍යුහය සාධාරණ ලෙස සකස් කර ගැනීමට නවීන තාක්ෂණය යොදා ගැනීම සහ තමන්ගේ හිතවතුන්ට බදු සහන ලබා දීම වැනි ක්‍රියාමාර්ග නවත්වා ආදායම් මාර්ග වැඩි කර ගන්නවා. ඒ අතර, බදු සහන ලබා දිය යුතු තැන් හඳුනාගෙන ඒ සහන ලබා දිය යුතුයි. පුද්ගලයන්ගේ ආදායම් බදු සීමාව මාසයකට රුපියල් ලක්‍ෂයේ සිට ලක්ෂ දෙක දක්වා වැඩි කරන්න යෝජනා කිරීම එක් උදාහරණයක්. රුපියල් බිලියන දහස ඉක්මවූ බදු ප්‍රමාණයක් අය කරගත යුතුව තිබෙනවා. අපි ඒ බව සඳහන් කළාම සුරාබදු දෙපාර්තමේන්තුවේ හෝ වෙනත් දෙපාර්තමේන්තුවක ප්‍රධානීන් ඇවිත්, එවැනි බදු ප්‍රමාණයක් අය කර ගැනීමට නැති බව ප්‍රකාශ කරනවා. නමුත්, අපි පැහැදිලිව ප්‍රකාශ කරන්නේ විගණන වාර්තාව පදනම් කරගෙනයි.
අනෙක් පැත්තෙන් වියදම් දැරීමේදී ලෝක බැංකුව වැනි ආයතන ඩොලර් මිලියන 200කින් ප්‍රතිපාදන ලබා දෙන්න එකඟ වී තිබෙනවා. අන්න ඒ ක්‍රියාදාමය පුළුල් කරන්නයි අපි යෝජනා කරන්නේ. සෘජුවම එතැනදී රුපියල් බිලියන 60ක පමණ අමතර වියදමක් දරන්න සිදු වුණත්, වංචා, දූෂණ සහ අකාර්යක්‍ෂමතාව නිසා අහිමි වන විශාල ආදායම් ප්‍රමාණයක් තිබෙනවා. ඒ නිසා කාටවත් කලබල වෙන්න එපා කියලා අපි කියනවා. විපක්ෂයේ වගේ හිටියාට මේ දූෂිත ආණ්ඩුව රැකගන්න ක්‍රියා කරන කණ්ඩායම්වලට අමතරව මහ බැංකුවේ අධිපතිවරයාත් තාක්‍ෂණික කරුණු දක්වමින්, නොමඟ යවනසුළු ප්‍රකාශ සිදු කිරීමට පටන්ගෙන තිබෙනවා. මූල්‍ය අරමුදල සමඟ ගිවිසුම් ගැන නැවත සාකච්ඡා කරන්න යනවා නම්, ආර්ථිකය කඩාවැටෙන බව ඔහු ප්‍රකාශ කර තිබෙනවා. සහනය ලබා දී ආදායම් අඩු වන ආකාරය වාගේම නාස්තිකාර වියදම් අඩු කරගෙන මුදල් ඉතිරි කර ගන්නා හැටිත් අප ප්‍රකාශ කර තිබෙනවා. සමස්තයක් ලෙස රාජ්‍ය වියදම් අඩු කරගෙන ආදායම් වැඩි කර ගන්න තිබෙන සැලසුමේ සමස්තය අර ගන්නවා මිස එක කොටසක් පමණක් අල්ලා ගන්න එපා කියලා අපි අවධාරණය කරනවා. ප්‍රාථමික ශේෂය දළ දේශීය නිෂ්පාදිතයෙන් 2.3%ක අඩු මට්ටමේ පවත්වාගත යුතු නිර්ණායකයක් දී තිබුණත්, දැන් එම ප්‍රමාණය සියයට 10ත් පැන තිබෙන්නේ අතිවිශාල පොලී ගෙවීම් නිසයි. ණය හිමියන්ගෙන් ඒ පොලිය ප්‍රතිව්‍යුහගත කරගෙන නැහැ. අයිඑම්එෆ් එක සහ අපේ ප්‍රතිපත්ති සම්බන්ධයෙන් ඒ අය මවන බිල්ලාට හසු නොවන ලෙස ජනතාවගෙන් ඉල්ලා සිටිනවා.
විකල්ප ණය තිරසර කිරීම සම්බන්ධයෙන් අපි කථා කරන්නේ සමස්ත සැලැස්මත් සමඟයි. ඒ වාගේම මේ දක්වා ලබාගෙන තිබෙන ණය සියල්ල විගණනයකට ලක් කරන බව අපේ ප්‍රතිපත්ති ප්‍රකාශනයේ පැහැදිලිව දක්වා තිබෙනවා. නමුත්, ඔවුන් ඒ කරුණත් හංඟනවා. ඒකට හේතුව 2015-2019 කාලයේ වැඩිම ස්වෛරීත්ව බැඳුම්කර ණය ප්‍රමාණයක් ලබාගෙන තිබෙන්නේ ඔවුන් වීමයි. ස්වෛරීත්ව බැඳුම්කර ණය මුළු මුදල ඩොලර් බිලියන 17යි. එයින් බිලියන 12.5කට වැඩි ප්‍රමාණයක් ලබා ගත්තේ ඔවුන්ගේ පාලන කාලය තුළයි. ණය ප්‍රතිව්‍යුහගත කිරීමේදී අතිශයින් තීරණාත්මක ස්වෛරීත්ව බැඳුම්කර සම්බන්ධයෙන් තවමත් එහෙට මෙහෙට ඇද ඇද ඉන්නවා. මූලික අවබෝධතාව මිස ණය හිමියන් සමඟ අවසාන එකඟතාවකට ඇවිත් නැහැ. ඒ සාකච්ඡා අතරමඟ හිර වෙලයි තියෙන්නේ.
ඒ වාගේ ම අපි යෝජනා කර තිබෙන සංවර්ධන බැංකුව ගැනත් ව්‍යාජ මත පතුරුවනවා. අපි යෝජනා කරන්නේ දැන් පවතින අවිනිශ්චිතතාව තුළ දිගුකාලීන අවදානම් ගන්න පෞද්ගලික අංශය අකමැති නිසා සංවර්ධන බැංකුවක අවශ්‍යතාව තිබෙන බවයි. ඕනෑම රටක ආර්ථිකය ඇතුළේ සංවර්ධන බැංකු තිබෙනවා. ඒ බැංකුවල මූලික අරමුණ අනෙක් බැංකු වාගේ ලාභ ලබන එක නොවෙයි. අපට තිබුණ සංවර්ධන බැංකුවත් 1993දී හර්ෂලා, රනිල්ලාගේ ආර්ථික ප්‍රතිපත්ති අනුව විකුණලා දැම්මා. අලුතින් පටන් ගන්න දිගුකාලීන බැඳුම්කර මගින් රුපියල් බිලියන 60ක පමණ මුදලක් ලබා ගන්න ඇස්තමේන්තු කර තිබෙනවා. ඒ වාගේම දැනටමත් දරන ප්‍රාග්ධන වියදම්වලින් සියයට 5ක් පමණ යොදවා තවත් රුපියල් බිලියන 40ක් පමණ සොයා ගන්න ඉලක්ක කර තිබෙනවා. ආරම්භක අවස්ථාවේදී සංවර්ධන බැංකුව පටන් ගන්න රුපියල් බිලියන 100ක් හොඳටම ඇති. ක්‍රමානුකූලව ප්‍රසාරණය වෙන කොට තවත් පුළුල් කර ගන්න පුළුවන්. දැනට ක්‍රියාත්මක කරන සමහර ආයතනවල අලාභය මහා භාණ්ඩාගාරයට මාරු කිරීමේ සෙල්ලමත් නතර කරනවා.
මාධ්‍යවේදීන් නැඟූ ප්‍රශ්නවලට පිළිතුරු :
ප්‍රශ්නය: ජනාධිපතිවරයාගේ ප්‍රතිපත්ති මාලාව ඉදිරිපත් කර තිබෙනවා. ඒ සම්බන්ධයෙන් මොකද කියන්නේ ?
පිළිතුර: ඔහු 1977 ඉඳලා පාර්ලිමේන්තුවේ හිඳිමින්, ඇමැති තනතුරු, අගමැති තනතුර අවස්ථා ගණනාවකදීත්, ජනාධිපති ධුරය වසර දෙකක් පුරාත් දරමින් ක්‍රියා කළ ආකාරය අපි කවුරුත් දන්නවා. ඒ ප්‍රතිපත්ති අමුතුවෙන් නොකීවත්, රට බංකොලොත් කළ ආකාරයෙන් කාටත් ඔහුගේ ගමන පැහැදිලියි. 2015දී රනිල් වික්‍රමසිංහ මහතා තමන්ගේ මුහුණ දාගෙන ‘මාස හැටෙන් අලුත් රටක්’ කියලා වැඩපිළිවෙළක් ගෙනාවා. ඒ මාස හැට ඉවර වෙන කොට රට බංකොලොත් වීමේ පාරට වැටිලයි නතර වුණේ. ඒ නිසා රනිල් වික්‍රමසිංහ කියන්නේ, මේ රටට අලුත් වැඩපිළිවෙළක් දෙන්න පුළුවන් කෙනෙක් නොවෙයි. ඔහුගේ වැඩපිළිවෙළ රටේ දේපොළ විකිණීම, ජනතාව මත අධික ලෙස ණය සහ බදු බර පැටවීම හැර වෙනත් සූත්‍රයක් ඔහුට නැහැ. මූල්‍ය අරමුදල පෙන්වමින්, තවදුරටත් ණය ගැනීමේ මාර්ගය හැරුණුකොට ඔහුට අලුත් දෙයක් තියෙනවා කියලා අපි හිතන්නේ නැහැ. එය අලුත් දෙයකුත් නොවෙයි, සාකච්ඡාවට බඳුන් කළ යුතු දෙයකුත් නොවෙයි.
ප්‍රශ්නය: රනිල් වික්‍රමසිංහගේ ප්‍රතිපත්ති ප්‍රකාශය සම්බන්ධයෙන් මාධ්‍ය හමුවක් පවත්වමින්, ඇමැතිවරුන් ප්‍රකාශ කළේ ජාතික ජන බලවේගයේ ප්‍රතිපත්ති කිසිදු ප්‍රායෝගික වැඩපිළිවෙළක් නොවන බවත්, ප්‍රායෝගික වැඩපිළිවෙළක් ඉදිරිපත් කර තිබෙන්නේ ඔවුන් බවත්. ඒ ගැන මොකද කියන්නේ ?
පිළිතුර: එතැන හිටපු ඇමැතිවරු අලි සබි්‍ර, ෂෙහාන් සේමසිංහ, කංචන විජේසේකර. මේ තුන්දෙනාම කවුරුන්ද? අලි සබි්‍ර ගෝඨාභයගේ ආණ්ඩුවේ මුදල් ඇමැති හැටියටත් හිටියා. සේමසිංහ සහ කංචන ඒ ආණ්ඩුවේ ඇමැතිවරු. එදා ගෝඨාභයගේ ප්‍රතිපත්තිය කරතියාගෙන රට හදන්න පුළුවන් ඒකෙන් බව පම්පෝරි ගැසූ අය බලය ගත්තේ රනිල් වික්‍රමසිංහගේ ප්‍රතිපත්ති විවේචනය කරලා. ‘වැඩබිමක් ලෙස තිබූ රට මුඩුබිමක් කළ බව’ ඒ කාලයේ කංචනලා, ෂෙහාන්ලා සංවාද කීයකට ඇවිත් කීවාද? එහෙම කියපු අයගේ කටෙන් රනිල් වික්‍රමසිංහගේ ප්‍රතිපත්තිය මාරයි, ඒකෙන් තමයි, රට හැදෙන්නේ කියලා කීම ඉතිහාසයේ සරදමක්. ඒ ගොල්ලන්ම පට්ටා ගහපු රනිල්ගේ ප්‍රතිපත්තියට ආවඩන්න ඔවුන්ට සිදු වී තිබෙනවා නම්, සබි්‍රලා, සේමසිංහලා, කංචනලාගේ ප්‍රතිපත්තිය මොකක්ද කියලා ඒකෙන්ම තේරුම් ගන්න පුළුවන්. තමන්ගේ පැවැත්ම වෙනුවෙන් කොහේ හරි ලගින අයගේ ප්‍රකාශයක් ගැන කතා කරලා වැඩක් නැහැ. රනිල් වික්‍රමසිංහලා 2015-2019 කාලයේ ක්‍රියාත්මක කළ ආකාරය නිසා තමයි, ගෝඨාභය රාජපක්‍:ෂලාට යම් යම් තීරණ ගන්න සිදු වුණේ. ඒ පාපකර්මයෙන් ගැලවෙන්න රනිල් වික්‍රමසිංහලාට බැහැ.
අනෙක් පැත්තෙන් මේ රටේ ජනතාව ජාත්‍යන්තර මූල්‍ය අරමුදල සම්බන්ධයෙන් පිළිගන්න ඕනෑ රනිල් වික්‍රමසිංහ කියන එකද? එහෙම නැත්නම්, මූල්‍ය අරමුදලේ ප්‍රධානී, පීටර් බෘවර් කියන එකද? ජනවරමක් සහිත ආණ්ඩුවක් එක්ක ඒ අය සාකච්ඡා කරන්න සූදානම් බව මූල්‍ය අරමුදලේ ප්‍රධානීන්ම කියනවා නම්, රනිල් වික්‍රමසිංහ කියන දෙයින් වැඩක් නැහැ. ඔහු අයි.එම්.එෆ්. එකේ නියෝජිතයා නොවෙයි. ලෝකයේ සියලුම රටවල් ජනවරමක් සහිත ආණ්ඩු පත් වුණු පසුව ලෝක බැංකුව, මූල්‍ය අරමුදල හෝ වෙනත් ආයතන සමඟ ඇති කර ගන්නා ගිවිසුම් පිළිබඳව සමාලෝචනය කරන්න ඉදිරිපත් වෙනවා. එවැනි අයිතියක් ජනවරමක් සහිත ආණ්ඩුවකටත් තිබෙනවා. ජාත්‍යන්තර ආයතන ජනවරමක් සහිත ආණ්ඩුවක් එක්ක සුහදව සාකච්ඡා කරන ආකාරය දන්නවා. අපි නියෝජනය කරන්නේ මෙරට ජනතාව අනුර කුමාර සහෝදරයාට ලබා දෙන ජනවරමේ වගකීමයි. අපි අයි.එම්.එෆ්. එක ප්රතික්ෂේප කරනවා නොවෙයි. ඔවුන් එක්ක කටයුතු කරමින්, අර්බුදකාරී අවස්ථාවේදී යම් විසඳුමක් ලබා ගැනීම සඳහා ඔවුන්ගේ පැත්තෙන් ලබාගත යුතු සහයෝගය ලබා ගන්න විවෘතව කටයුතු කරන්න අපි සූදානම්. ඇත්තටම අද සිදු වී තිබෙන්නේ අයිඑම්එෆ් එකේ ව්‍යාපෘතිය රනිල් වික්‍රමසිංහගේ දේශපාලන ව්‍යාපෘතියේ කොටසක් කර ගැනීමයි. නමුත්, මේ දක්වා විදේශ ණය ප්‍රතිව්‍යුහගත කර ගැනීම සාර්ථක කර ගන්නවත් ආණ්ඩුව සමත් වී නැහැ. ඒ නිසා රනිල්ට බැහැ කියන එක පැහැදිලියි. තව දවස් විසි ගණනකින් රටේ ජනතාවත් ඔහුට ඒ බව කියා දේවි.
ප්‍රශ්නය: රාජ්‍ය නිලධාරියකු වන මහ බැංකුවේ අධිපති, නන්දලාල් වීරසිංහ මහතා ප්‍රකාශ කර තිබෙනවා, අත්සන් කර තිබෙන ගිවිසුම් සාකච්ඡා මඟින් සංශෝධනය කරන්න බෑ, එවැනි උත්සාහයක් දැරුවොත්, නැවත ගොඩගත නොහැකි සේ රට වැටෙනවා කියලා. ඒ සම්බන්ධයෙන් පැහැදිලි කරන්න.
පිළිතුර: මහ බැංකු අධිපතිවරයා ආචාර්යවරයෙක් හැටියටත්, විෂයය දන්නා කෙනෙක් හැටියටත් දේශපාලනඥයන්ට අවශ්‍ය ආකාරයෙන් ප්‍රකාශ කරන්න තමන්ගේ දැනුම යොදා ගැනීම ගැන ඔහු වගකියන්න ඕනෑ. මහ බැංකු අධිපතිවරයා සමහර ප්‍රකාශ සිදු කරන්නේ ඔහුගේ වුවමනාවට වඩා රනිල් වික්‍රමසිංහගේ වුවමනාවට බව පැහැදිලියි. එවැනි මහ බැංකු අධිපතිවරු අතීතයෙත් සිටියා. එක් මහ බැංකු අධිපතිවරයෙක් ශ්‍රේෂ්ඨාධිකරණය ඉදිරියේ රට බංකොලොත් කිරීමේ වැරදිකරුවකු ලෙසත් තීන්දු කර තිබෙනවා. ලෝකයේ ඕනෑම රටක ගිවිසුම් සම්බන්ධයෙන් සාකච්ඡා කිරීමේ අවස්ථාව තිබෙනවා. මෙයට මාස දෙකකට පෙර මූල්‍ය අරමුදල ප්‍රසිද්ධ මාධ්‍ය සාකච්ඡාවක දී කළ ප්‍රකාශය නැවත අරගෙන බලන්න.
