NPP News

-2023 නොවැ. 18 දින පැවති ජාතික ජන බලවේගයේ ජන බල විරෝධය රැලිය – නුගේගොඩ-

අපි නුගේගොඩට එකතු වී සිටින්නේ, රනිල් වික්‍රමසිංහටත් මහින්ද රාජපක්ෂ කල්ලියටත් අවසන් නිවේදනය දෙන්නයි; ‘අපේ රට අපට ඉතුරු කරලා, බැහැලා යන්න’ කියන්නයි; මේ දුෂ්ට පාලනය නිමාකර, ජාතික ජන බලවේගයේ පාලනයකින් රට ගොඩනඟන බව තහවුරු කරන්නත් ඒ වෙනුවෙන් රටේම ජනතාව අත්වැල් බැඳගත් බවටත් පණිවිඩය දෙන්නයි. අපේ රටේ ආර්ථිකය, කෘෂිකර්මාන්තය, සෞඛ්‍යය වශයෙන් එකක් දෙකක් වට්ටලා තිබෙනවා නම්, ගොඩගන්න ලෙහෙසියි. නමුත් පසුගිය කාලය පුරාම රට ආර්ථික වශයෙන්, දේශපාලනික වශයෙන් සමාජීය වශයෙන් සහ සංස්කෘතික යන සියලුම අංශවලින් බිඳ වට්ටා තිබෙනවා. එවැනි රටක් ප්‍රතිපත්තිවලින් විතරක් ගොඩගන්න බැහැ. එය ගොඩගන්න අලුත් ගුණයන් ගොඩක් අවශ්‍යයි. ඒ සියල්ල තිබෙන්නේ ජාතික ජන බලවේගය තුළ පමණක් බව මේ විනයගරුක සටන්කාමී පෙළපාළියෙන් ඔප්පු කර තිබෙනවා. අපි එකම අරමුණකින් එකම සටන් පාඨ කියමින් විනය සහ සංයමය සහිතව පෞද්ගලික අරමුණු වෙනුවට පොදු අරමුණකින් පෙළපාළියෙන් මෙතනට ආවා. අපිට තිබෙන්නේ තනි තනි පුද්ගලික අරමුණු නොව, වට්ටපු රට ගොඩනඟන පොදු සහ එකම අරමුණක් බව තහවුරු කළා. වෙන පක්ෂවල පෙළපාළිවල එකිනෙකාගේ මුහුණු දමාගෙන එකිනෙකා දිනවන්න එන පිරිස් සිටින්නේ. අපි ඇවිත් තිබෙන්නේ එකිනෙකාගේ පස්සෙන් යන්න නොවෙයි. විනාශ කර තිබෙන අපේ මව්බිම ගොඩනැගීම වෙනුවෙන් සටන් කරන්න, කැපවෙන්න සූදානම් බව ඔප්පු කරන්නයි. ඊට අවශ්‍ය ගුණය, ජවය, ආධ්‍යාත්මය තිබෙන්නේ ජාතික ජන බලවේගයේ පමණයි.

රටට හෙණ ගැහුවත් අද ඉන්න පාලකයන්ට ප්‍රශ්නයක් නැහැ. රටේ ජනතාව ආහාර නැතිව, ඖෂධ නැතිව, ඉගෙන ගන්න පහසුකම් නැතිව සිටියදී පාලකයන් මහා පරිමාණයෙන් වංචා-දූෂණවල යෙදී සිටිනවා. මිනිසාට මිනිසුන් ආදරය කරන, තමන්ට පෞද්ගලිකව කිසිවක් අපේක්ෂා නොකර වසර 75ක් පුරා පීඩාවට පත්කර සිටින ජනතාවට ආදරේ බව අපි ඔප්පු කර තිබෙනවා. මේ රට ගොඩනඟන්න අවශ්‍ය සියලු කැපකිරීම් කරන්න, අපි සූදානම් බව නැවත නැවතත් තහවුරු කර තිබෙනවා. මෙතන තිබෙන්නේ නිකම් ඔළුගෙඩි ටිකක් විතරක් නොවෙයි; අපේ රටේ තිබෙන හොඳම ගුණයන් සහිත ධෛර්යය සම්පන්න මිනිසුන් දස දහස් ගණනක්. කලක් බොරුවට බෙදී සිට, රංගනයන් පවත්වා, දැන් එකට එකතු වී පැරණි ඉතිහාසයේ අවසන් ජවනිකාව ඔවුන් විසින් රඟ දක්වමින් සිටිනවා. අපේ රටේ ඉතිහාසය අලුතින් ලියන්න සමත් බලවේගය මෙතැනට එකතු වී සිටිනවා. අපි ආ, දුර ගමන වගේම සංයමයෙන්, ධෛර්යයෙන්, ඉදිරියට යාමේ වගකීමක් අපට තිබෙනවා.

අද සතුරා ජාතික ජන බලවේගයට බය වී සිටින්නේ මෙතැනට රැස්වී ඉන්නේ නිකම්ම නිකම් හුදකලා මිනිසුන් නොවෙන නිසයි; නිකම්ම ඡන්දදායකයන් නොවෙන නිසයි. මෙතනට රැස්වී ඉන්නේ තීන්දුවක් ගතහොත් ගල් පර්වත වුණත් අස්වද්දන්න හැකියාවක් තිබෙන මිනිසුන්. රනිල් වික්‍රමසිංහලා, මහින්ද රාජපක්ෂලා, ජනමතයට බයවී ඉන්නවා. මැතිවරණ මගින් ජන මතය ප්‍රකාශයට පත්වීම ගැන බය වූ රනිල් වික්‍රමසිංහලා, මහින්ද රාජපක්ෂලා, ඡන්ද කල්දමා තිබෙනවා. ඊට එරෙහිව ශ්‍රේෂ්ඨාධිකරණය ඉදිරියේ අපි පනවා තිබෙන නඩුවත් කල්දමමින් යනවා. ඒ අතර ආණ්ඩුව ඡන්දයට මෙපිට ජනමතය ප්‍රකාශ කරන, සමාජ මාධ්‍ය මර්දනය කරන්න පනත් ගෙනෙමින් සිටිනවා. ජන මතය ප්‍රකාශ කරන උද්ඝෝෂණවලට බයේ ත්‍රස්ත මර්දන පනතක් අලුතින ගේන්න සූදානම් වෙනවා. කවුරු සමග ඒ සෙල්ලම් කළත්, මහා දැවැන්ත ජනතා බලයක් සහිත, විනයක් සහ අධිෂ්ඨානයක් සහිත ජාතික ජන බලවේගය එක්ක ඔය සෙල්ලම් බැරි බව රනිල්ට සහ ගෝල බාලයන්ට කියනවා. රනිල් වික්‍රමසිංහට ඉතිරි වී තිබෙන්නේ උපරිම තව මාස දහයකින් කොට්ට, පැදුරු අකුළාගෙන යාමක් පමණක් බව අවධාරණය කරනවා. රාජපක්ෂලාටත් එහෙම තමයි. ආණ්ඩු මාරු කරමින්, මැච් එක ගහපු සතුරන්ගේ යුගය අවසානයි. දැන් උදාවී තිබෙන්නේ ජනතාවගේ යුගයයි. අපි මෙතනට රැස්වී සිටින්නේ මේ යුගය අපේ දෑතින් නිර්මාණය කරන බව කියන්නයි. එය නැවැත්විය හැකි කිසිදු බලවේගයක් නැහැ.

මාස ගණනකට කලින් ‘මහින්ද සමග නැගිටිමු’ කියලා දෙයක් දාලා බැලුවා. හරි ගියේ නැති පාර ‘නාමල් එක්ක නැගිටිමු’ කියලා දැම්මා. දැන් බැසිල් නැගිටින්න හදනවා, ඒත් බැහැ. ඔවුන්ගේ කාලය ගියා. දැන් ජනතාවගේ යුගය නිර්මාණය වෙලා තිබෙන්නේ. රට වට්ටලා ඉබාගාතයේ ඇවිදගෙන ගිය ජනතාවට, තමන්ට සිදුවුණේ මොකක්ද කියලා ආපසු හැරී බලන්න පාලකයන් විසින් බල කළා. ඒ බල කරන වෙලාවේ ජනතාවට ඇත්ත කියලා දීලා පාර පෙන්වන්න ජාතික ජන බලවේගය හිටියා. හොරාට හොරා කියලා රට හමුවේ හෙළි කළ එකම නායකයා අනුර කුමාර දිසානායක පමණයි. කාලයක් ඔවුන්ගේ අය “හොරකම් කළත් පාරවල් හැදුවනේ” වගේ මත පළකරමින් සිටියා. අද ජනතාවට ඒ පාරවල්වල යන්න වාහනවලට තෙල් ගහගන්නත් නැහැ. මේ නිසා නැවත හොරුන්ට අවස්ථාවක් නොදෙන්න ජනතාව අධිෂ්ඨානය කරගෙන ඉන්නවා. ජනතාව දිනාගැනීමේ සටනේ ලොකුම අවිය අදහස්. අපිට නිවැරදි අදහස් තිබෙනවා වගේම, අපි හැමෝටම එක මතයක් තිබෙනවා. අපි හැමෝම දරන ඒ නිවැරදි මතය අනිත් සෑම දෙයකටම වඩා බලවත්. ජාතික ජන බලවේගයේ අදහස් එක්ක සටන් කරන්න පුළුවන් කිසිම බලවේගයක් ලංකාවේ නැහැ. සංවිධාන පැත්තෙන් ගත්තත් පරාදයි. තනි නායකයෙක් පිටුපස්සේ යන පිරිසක් අපි හැදුවේ නැහැ. අනුර සහොදරයාගේ නායකත්වයෙන් අපි ඔක්කෝම එකතු වී ජය පරාජය දරාගෙන විශ්වාසයෙන් ගමන් කරන සාමූහික නායකත්වයක් හැදුවා. ඒ සාමූහිකත්වයට දිනන්න පුළුවන් බව දැන් ඔප්පු කර අවසන්.

ඔවුන්ට සාමූහිකව කළ හැකි එකම දේ හොරකම් කිරීම විතරයි. මතවාදයෙන් සහ සංවිධානමය පැත්තෙන් අපි ඔවුන්ව පරාජය කර අවසන්. ඔවුන්ට බලය තිබෙන්නේ, ව්‍යවස්ථාවේ, ජනාධිපති ධුරයේ සහ පාර්ලිමේන්තුවේ පමණයි. එයිනුත් ලබන අවුරුද්දේ ඔක්තෝබර්වල ජනාධිපතිවරණයෙන් අපේ රටේ ඉතිහාසයේ පළමුවරට පොදු ජන නායකයෙක් ජයග්‍රහණය කරවන්න සියලු දෙනාම සූදානම්. ජනාධිපතිවරණය ජයග්‍රහණය කළ වහාම මේ දුෂ්ට, දූෂිත පාර්ලිමේන්තුව විසුරුවා හැර ඒ බලය ලබාගෙන රට හැදීම ආරම්භ කරනවා. රට හදනවා වගේම හොරු අල්ලන්නත් තිබෙනවා. හොරුන්ට අධිකරණයෙන් දඬුවම් දෙන්නත් තිබෙනවා. අපි වටා විශ්වාසය තබමින් එකතු වෙන දැවැන්ත මහජන බලය අලුත් රටක් ගොඩනැගීම අනිවාර්යයෙන් කරනවා. වැඩකරන ජනතාව, ගොවි ජනතාව, ධීවර ජනතාව, කර්මාන්තකරුවන්, තරුණ පරපුර සහ යුක්තිය ඉල්ලා හඬන ගැහැනුන්ගේ බලවේග අප වටා එකතු වී සිටිනවා. මේ රට ගොඩනැගීමේ දැනුම සහ කැමැත්ත තිබෙන, ජාවාරම්කරුවන් නොවෙන සියලුම ව්‍යාපාරිකයන්ගේ එකතු වීමත් සිදුවෙනවා. පසුගිය කාලයේ අපිට අලුතින්ම එකතු වුණේ ත්‍රිවිධ හමුදාවේ විශ්‍රාම ගිය නිලධාරීන් ඇතුළු සියලුම දෙනයි. ඔවුන් මහා බලයක් ලෙස අධිෂ්ඨානයෙන් එකතු වී තිබෙනවා. මහින්ද රාජපක්ෂලා, රනිල් වික්‍රමසිංහලා එක්ක සිටින හොරු ටිකි හැර අලුත් සියලුම බලවේග ජාතික ජන බලවේගය වටා එකතු වී අවසන්. මේ වන විට ජනමත සමීක්ෂණ අනුව 50%ක් ඉක්මවූ ජයග්‍රහණයක් ජාතික ජන බලවේගයට ලැබෙන බව සනාථ වී තිබෙනවා. ආණ්ඩුවේ ප්‍රසාදය 9% දක්වා පහත වැටිලා තිබෙනවා. මේ වන විට කප්පාදු කර තිබෙන ප්‍රජාතන්ත්‍රවාදී ප්‍රවාහය ඇතුලේ ජයග්‍රහණ ලබන්න අපිට පුළුවන්. ඒ ගැන කිසිම සැකයක් නැහැ. ඒ නිසා තමන්ට කැමති පාලනයක් පත්කර ගන්න ජනතාවට තිබෙන අයිතියට අත තබන්න ලැහැස්ති වෙන්න එපා කියලා අපි රනිල්ට කියනවා. අත තිබ්බොත් එහෙම ගෝඨාභය ගිය පාරේම රනිල් වික්‍රමසිංහවත් යවන්න ජනතාව ක්‍රියා කරන බවට කිසිම සැකයක් නැහැ.

අපි කවුරුත් දැන් වගකීම් සහගතව දේශපාලනය කරන්න ඕනෑ. ගම්බිම්වලට නව නායකත්වයන් හඳුන්වා දෙමින් ජාතික ජන බලවේගය ශක්තිමත් කරන්න ඕනෑ. බෞද්ධ, කතෝලික, ඉස්ලාම්, හින්දු සියලු ආගම්වල ජනතාවන් ශ්‍රී ලාංකිකයන් හැටියට එකතු කරන්න ඕනෑ. සිංහල, දෙමළ, මුස්ලිම් අපි හැමෝම අපේ දෑතින් ශ්‍රී ලාංකීය ජාතික ගොඩනඟනවාය කියන අධිෂ්ඨානයෙන් අපි හැමෝම එක්වෙමු. කිසිවෙකුටත් පරාජය කළ නොහැකි රට හදන දැවැන්තම ජනතා බලය අපි ගොඩනඟමු. ඒ වෙනුවෙන් සාමූහිකත්වය, සහෝදරත්වය, පරාර්ථකාමිත්වය, වගේ හොඳම ගුණයන් එකට එකතු කරමු. ලැබෙන පළමු මොහොතේම රනිල් වික්‍රමසිංහලා, මහින්ද රාජපක්ෂලා පළවා හැර වට්ටපු රට ගොඩනැගීම වෙනුවෙන් බලය ගන්න අපි ලැහැස්තියි. රටේ සියලු ජනයා සතුටින් ජීවත් වන හෙටක් හදන්න අපට පුළුවන්. ඒ වෙනුවෙන් සටන් කරන්න, කැපකිරීම් කරන්න, මහන්සි වෙන්න අපි ලැහැස්තියි. අපේ දෑතින් අපේ රට ගොඩනඟනවා. අපේ පරම්පරාව අපේ රටේ ඉතිහාසය අලුතින් ලියනවා. මේ දුෂ්ට පාලනය තුළ ජීවත් වෙන අවසන් පරම්පරාව අපයි. රට හදමු. ජනතාවට ජයග්‍රහණ ගෙන එමු. සියලු දෙනාටම ජයවේවා!

-2023 නොවැ. 18 දින පැවති ජාතික ජන බලවේගයේ ජන බල විරෝධය රැලිය – නුගේගොඩ-

අද අපි දෙල්කඳ හංදියේ සිට නුගේගොඩ දක්වා දසදහස් සංඛ්‍යාත ජනතාවක් විරෝධතා පෙළපාලියකින් ආවේ ඇයි? ආණ්ඩුව අපේ රටේ වටිනා ජාතික සම්පත් විකිණීමට විරෝධය පාන්න; අසීමිත බදුබරක් පටවමින් ජනතාව මත පටවා තිබෙන පීඩනයට විරෝධය පාන්න; ජනතාවගේ අත්‍යවශ්‍ය භාණ්ඩවල මිල අසීමිතව ඉහළ දමා තිබීමට විරෝධය පාන්න. නමුත් මෙය විරෝධය පෑමෙන් පමණක් නතර වෙන්නේ නැහැ. ජාතික ජන බලවේගයේ ජනතාවාදී පාලනයක් ගොඩනැගීම සඳහා පෙළ ගැසීමේ විරෝධතා ව්‍යාපාරයක්. මේ රටේ පාලකයන් මහජන ධනය කොල්ල කනකොට රටේ ජාතික සම්පත් විකුණන කොට ප්‍රජාතන්ත්‍රවාදය හකුළනකොට දශක ගණනාවක් අපි විරෝධය දක්වා තිබෙනවා. දැන් විරෝධතා නිශ්චිත කඩඉමකට පැමිණ දූෂිත පාලකයන් පළවා හැරීම දක්වාත්, ජනතාවාදී ආණ්ඩුවක් ගොඩනැගීම දක්වාත් පෙළගැසී තිබෙනවා. අපේ රටේ දේශපාලනය ඉතාමත් නිශ්චිත තීරණාත්මක කඩඉමකට ගමන් කරමින් තිබෙනවා. ලබන අවුරුද්දේ නොවැම්බර් වනවිට අලුත් ආණ්ඩුවක්, අලුත් පාලනයක පිහිටුවන බවට අපි ඔබට සහතික වෙනවා. රනිල් වික්‍රමසිංහ පසුගියදා පාර්ලිමේන්තුවට ඉදිරිපත් කළේ මේ දුෂ්ට විනාශකාරී පාලනයේ අවසන් අයවැය බවට පත්කරන බවට සහතිකයි.

මේ අයවැය ඉදිරිපත් කරලා රනිල් වික්‍රමසිංහ කිව්වේ කොට්ටඋරයක සේ කනපිට හරවන බවයි. මීට මාස කිහිපයකට කලිනුත් රනිල් කොට්ටඋරය අනෙක් පැත්ත හැරවූ බව කිව්වා. දෙපාරක් කොට්ට උරය පැත්ත හැරෙව්වම දැන් තිබෙන්නේ තිබුණු පැත්තමයි. රටේ සම්පත් විකුණමින්, ණය ගනිමින් පැමිණි ගමනේ තවත් පියවරක් පමණයි. රටක සහ ලෝකයේ මිනිසුන්ගේ අවශ්‍යතාවලට අනුකූලවන පරිදි භාණ්ඩ හා සේවා නිෂ්පාදනය වෙනස් කරමින් ඉදිරියට ගෙන යන සැලැස්මක් මේ පාලකයන්ට නැහැ. හැමදාමත් කතා කළේ තේ, රබර්, පොල් අපනයන ආර්ථිකයක් ගැන. තේ, රබර්, පොල් තරමටම මේ නායකයන් පැරණියි. ලෝකයේ ඇතිවන වෙනස්කම්වලට අනුරූපී වන පරිදි තාක්ෂණය යොදාගෙන නව නිෂ්පාදන කිරීමට මේ පාලකයන් සමත් වුණේ නැහැ. ලෝකයේ ඇති වන වෙනස්කම්වලට අනුරූපී වන පරිදි අධ්‍යාපනය වෙනස් කිරීමට මේ පාලකයන් සමත් වූයේ නැහැ. ඒ නිසා ලෝකයෙන් කොන්වී, ආර්ථිකය කඩා වැටී, අපරාධවලින් ගහන වූ රටක් ශේෂ වී තිබෙනවා. පුරවැසියන්ට තමන්ගේ අත්‍යවශ්‍ය ආහාර සහ ඖෂධ ඇතුළු භාණ්ඩ සපයා ගැනීමට නොහැකි වූ රටක් බිහිකර තිබෙනවා. මුළුමනින්ම විනාශයට පත්වූ රටක් සහ සමාජයක් අප ඉදිරියේ තිබෙනවා. හැත්තෑ පස්වසරක සාපය මේක තමයි. රනිල් වික්‍රමසිංහ අයවැයෙන් ඉදිරිපත් කරන්නේ ඒ ශාපයේ දිගුවක්. රනිලගේ අයවැය ලේඛනයේ පළමු පරිච්ඡේදයේම හැත්තෑ පස්වසරකට සාපය නොකියා කියනවා. රනිල්ලාගේ දේශපාලන ප්‍රතිපත්තිය තමයි අයවැය ලේඛනවලින් ඉදිරිපත් කර තිබෙන්නේ. 75 වසරක විනාශය ගැන දැන් ඔවුන් අපට කියනවා. රනිල්ගෙන් හෝ මහින්දගෙන් හෝ ඒ පන්නයේම අනුප්‍රාප්තිකයෙකුගෙන් රට ගොඩනැගීම බලාපොරොත්තු වෙන්න බැහැ. සමගි ජන බලවේගයේ මහත්තුරු කියන්නේ “අපේ ප්‍රතිපත්තිම රනිල් වික්‍රමසිංහ ක්‍රියාත්මක කරන” බවයි. රට ඉදිරියට ගෙන යා හැකි විකල්ප ආර්ථික උපාය මාර්ගය තිබෙන්නේ ජාතික ජන බලවේගයට පමණයි.

දැන් රනිල් වික්‍රමසිංහ අත තියන්නේ පශු සම්පත් මණ්ඩලයට අයත් ගොවි පොළවල්වලට. අපේ රටේ කිරි කර්මාන්තයට නව තාක්ෂණය ගෙනැත් පරිවර්තනය කිරීම අත්හැර අක්කර විසිඅටදාහක ඉඩම් විකුණා දමන්න සූදානම් වෙනවා. ගොවි පොළවල් 31කට අයත් අක්කර 28000ක් ඉන්දියාවේ ‘අමූල්’ සමාගමට විකුණා දමන්න සැළසුම් කර තිබෙනවා. රනිල් වික්‍රමසිංහගේ විකිණීමේ ලැයිස්තුවේ තිබෙන්නේ පාඩු ලබන ආයතන පමණක් නොවේ. ලංකාවේ රාජ්‍ය ආයතන අතරින් විශාලතම ලාභයක් ලබන ආයතන විකුණනවා. ශ්‍රී ලංකා රක්ෂණ සංස්ථාව ගිය අවුරුද්දේ දසලක්ෂ දොළොස්දහස් හාරසිය අසූහයක ලාභයක් ලැබුවා. මේ අවුරුද්දේ සැප්තැම්බර් දක්වා දසලක්ෂ හාරදහස් නවසිය පනහක ලාභයක් තිබෙනවා. රක්ෂණ සංස්ථාවේ බදු ආදායම සහ ලාභාංශ කොටසක් මහා භාණ්ඩාගාරයට ආවා. ලංකා බැංකුවේ ගිය අවුරුද්දේ ලාභය දසලක්ෂ තිස්දහස් නවසිය හැත්තෑ හතයි. මහජන බැංකුවේ ගිය අවුරුද්දේ ලාභය දසලක්ෂ විසි එක්දාහයි. ගුවන් තොටුපළ අධිකාරිය මේ අවුරුද්දේ සැප්තැම්බර් දක්වා දසලක්ෂ විසිහයදාහක් ලාභයි. ජනතාවට අයිති විශාල ලාභ ලබන මේ ආයතන විකුණන්න රනිල් වික්‍රමසිංහට ඉඩ දෙනවාද? ජාතික ජන බලවේගය මේ රටේ වෘත්තීය සමිති ව්‍යාපාරයත් එකක් එකතුවී මේ සම්පත් අනාගතපරපුරට ආරක්ෂා කර දෙන්න ක්‍රියා කරනවා.

මේ දවස්වල පාර්ලිමේන්තුවේ දූෂණ විරෝධී නාටකයක් දියත් කර තිබෙනවා. ඒ තුළ තිබෙන්නේ දූෂිතයන් අතර ගැටුමක්. ජාතික ජන බලවේගයේ අපට අඩු දූෂිතයන් හෝ වැඩි දූෂිතයන් වශයෙන් තෝරා ගැනීමක් නැහැ. හොරා නම් හොරා, ජාතික ජන බලවේගයට තිබෙන්නේ දූෂණය නතර කිරීම සඳහා අඛණ්ඩ සටනක්. එය අපි කරනවා. මේ රට ප්‍රපාතයට වැටෙන්න බලපෑවේ වැරදි ආර්ථික ප්‍රතිපත්ති පමණක් නොවෙයි; මහජනතාවගේ ධනය කෝටි ප්‍රකෝටි ගණනක් කොල්ලකෑම ඍජුවම බලපෑවා. රනිල් වික්‍රමසිංහගේ පණ තිබෙන්නේ වංචා-දූෂණයේ කප්පිත්තන් වූ පොහොට්ටුව ළඟ. එය අවසන් කළ හැක්කේ ජාතික ජන බලවේගයේ පාලනයකට පමණයි.

ඒ වගේම සමස්ත රාජ්‍ය යාන්ත්‍රණයම දෙදරලා තිබෙන්නේ. ලංකාවේ පොලිසිය කුඩු සම්බන්ධයෙන් සියලු විස්තර දන්නා බව බස්නාහිර පළාත භාර, ජ්‍යෙෂ්ඨ නියෝජ්‍ය පොලිස්පති දේශබන්දු තෙන්නකෝන් කියනවා. නමුත් තිහක් හතළිහක් විතර වන ප්‍රධාන කුඩු ජාවාරම්කරුවන් ගැන නොදන්නා බබෙක්ද පොලීසිය. රාජ්‍ය යාන්ත්‍රණය දේශපාලන බලයෙන් දෙපලු කිරීමේ ප්‍රතිඵල තමයි මේවා. කෝප් කමිටුව ඉදිරියට විමර්ශන සඳහා ගෙන්වන චූදිතයන් එක්ක කෝප් කමිටු සභාපතිවරයා ඉඟිබිඟි පානවා. මේ කිසි ආයතනයකට අද වගකීමක් හෝ වගවීමක් නැහැ. ක්‍රිකට් ආයතනය ගැන කැබිනට් මණ්ඩලයේ එකඟත්වයක් නැහැ. පොලිස්පතිවරයෙක් පත්කර ගන්න බැහැ. ජ්‍යෙෂ්ඨ පොලිස්පතිවරු ගණනාවකට නඩු තිබෙනවා. රටකට මෙහෙම යන්න පුළුවන්ද? අල්ලස් හෝ දූෂණ විමර්ශන කොමිෂන් සභාව අධිකරණයේ නඩු ඉල්ලා අස්කර ගනිමින් යන්න පුළුවන්ද? කඩාදමා තිබෙන මුළු රාජ්‍ය දේහයම ඉහළ සිට පහළට යළි ශක්තිමත් කරන්න ඕනෑ. පොලීසිය අවටත් අපරාධ සිදුකරනවා, පාතාලයෙන් ඉඩම් අල්ලා ගන්නවා. නමුත් කිසිම වගවීමක් නැහැ. රේගුව, දේශීය ආදායම් බදු දෙපාර්තමේන්තුව, පොලිස් ස්ථානාධිපතිවරයාට, කථානායකවරයාට කිසිදු වගවීමක් නැතිව රටක් ගෙනයන්න පුළුවන්ද?

රාජ්‍ය යාන්ත්‍රණය පමණක් නොවෙයි, දේශපාලන යාන්ත්‍රණයත් කඩා වැටී තිබෙන්නේ. රනිල් වික්‍රමසිංහ ජනාධිපති වුණත්, අනුන්ගේ කැබිනට්ටුවකින් රටට යන්න බැහැ. දේශපාලන දේහය විසින් රාජ්‍ය යාන්ත්‍රණය මෙහෙයවන්න ඕනෑ. රනිල්ට දේශපාලන දේහයක් නැහැ. රනිල් වික්‍රමසිංහ කුමන කමිටුවක් පත් කළත්, ඒ කමිටුවේ සභාපති සාගල. වෙන දේශපාලන දේහයක් නැහැ. ඉස්සර තිබුණේ රාජපක්ෂලාගේ දේශපාලන දේහයක්. රාජ්‍ය දේහය නිසි පරිදි මෙහෙයවන්නේ නැති බව ශ්‍රේෂ්ඨාධිකරණයේදී පවා ඔප්පුවී ඉවරයි.

ශ්‍රේෂ්ඨාධිකරණයේ තීරණය අනුව හිටපු ජනාධිපති ගෝඨාභය, හිටපු අගමැති මහින්ද, හිටපු මුදල් ඇමති බැසිල්, හිටපු ජනාධිපති ලේකම් පී.බී. ජයසුන්දර, මුදල් අමාත්‍යාංශයේ හිටපු ලේකම් ආටිගල, මහ බැංකු හිටපු අධිපති කබ්රාල්, ඊට කලින් සිටි අධිපති ලක්ෂ්මන් වැරදිකරුවන් බව ශ්‍රේෂ්ඨාධිකරණය තීරණය කර තිබෙනවා. එදා අපරාධකරුවන් සම්බන්ධයෙන් තීරණය කරන්න ඒ ආකාරයෙන් හරි දේහයක් තිබුණත් අද තිබෙන්නේ රනිල් සහ සාගල පමණයි. රාජපක්ෂලාට අපරාධ කරන්න හරි රාජ්‍ය දේහයක් තිබුණා. හොඳට හෝ නරකට රට මෙහෙයවන්න දේහයක් නැහැ. සියල්ල ඉරිතලලා තිබෙන්නේ. තීරණාත්මක ඍජු තීරණ ගෙන මේ රට පරිවර්තනය කරන්න නම්, ශක්තිමත් රාජ්‍ය දේහයකට පණ පෙවිය හැකි දේශපාලන දේහයක් ඕනෑ. දස දහස් සංඛ්‍යාත ජනතාවක් නුගේගොඩට රැස්වී පෙන්නුම් කරන්නේ ඒ දේශපාලන දේහය තිබෙන්නේ ජාතික ජන බලවේගයට පමණක් බවයි.

රාජපක්ෂලා ආණ්ඩුවක් හැදුවා. වැරදියට හෝ නායකත්වය දෙන්න දේශපාලන දේහයක් තිබුණා. අද රනිල් වික්‍රමසිංහ ආණ්ඩුවක් හදා තිබුණත් දේශපාලන දේහයක් නැහැ. අපේ රටේ පිහිටුවිය යුත්තේ ආණ්ඩුවක් ගන්නා තීන්දු තීරණ ඈත ගම්දනව් දක්වා ගමන් කරන, ඈත ගම්දනව්වල අවශ්‍යතාවයන් කොළඹ කේන්ද්‍රීය ව්‍යුහය දක්වා ගමන් කරන නව රාජ්‍ය දේහයක්. ජාතික ජන බලවේගය පමණයි ඒ වෙනුවෙන් ක්‍රියාකරන එකම දේශපාලන දේහයක් තිබෙන ව්‍යාපාරය. අපි ආණ්ඩුවක් පිහිටුවන්නේ නිසි පරිදි දේශපාලන නායකත්වයක් සහිත ගම දක්වා නායකත්වය දියහැකි යාන්ත්‍රණයක් ගොඩනඟමින්. කඩා වැට්ටවූ රට ගොඩනැගිය හැකි වන්නේ ජාතික ජන බලවේගය ගම දක්වා ව්‍යාප්ත කිරීමෙන් පමණයි. අපි ග්‍රාම සේවා වසම් දක්වා කොට්ඨාස සභා පිහිටුවන්නේ ඡන්ද පෙට්ටියේ ඡන්ද පුරවා ගැනීම සඳහා පමණක් නොවෙයි. ගම ගොඩනැගීම දක්වා අවශ්‍යවන දේශපාලන නායකත්වය දෙන ව්‍යුහයක් හැටියටයි.

රාජ්‍ය ආදායම් ලබාදෙන ප්‍රධානතම ප්‍රභවයන් හතරක් තිබෙනවා. දේශීය ආදායම් බදු දෙපාර්තමේන්තුව, සුරාබදු දෙපාර්තමේන්තුව, රේගු දෙපාර්තමේන්තුව සහ ආගමන හා විගමන දෙපාර්තමේන්තුව ඒ හතරයි. මේ ආයතනවල සේවකයන් ගොඩනැගිය යුතු වන්නේ ඡන්දය දවසේදී ගිහින් කතිරය ගහන්න විතරක් නොවෙයි. භාණ්ඩාගාරයට ධනය කැඳවන කාර්යක්ෂම ආයතන හතරක ක්‍රියාකාරිකයින් හැටියටයි. ඉංජිනේරුවන්, අධ්‍යාපනඥයන්, සෞඛ්‍ය ක්ෂේත්‍රයේ නිපුණතාවයන් තිබෙන අය, කෘෂි විද්‍යාඥයන්, ඇතුළු පිරිස් බිහිකරන්න ඕනෑ ජාතික ජන බලවේගයේ පාලනයක් යටතේ රට හැදිය හැකි ක්‍රියාකාරිකයින් ලෙසසි. ජාතික ජන බලවේගය හැර වෙන කිසිවෙකුට ජනතාව ඉදිරියට ගිහින් කියන්න කතාවක් නැහැ. එක්සත් ජාතික පක්ෂය ඉස්සර ගමට ගිහින් කීවේ 1977දී විවෘත ආර්ථිකය ගෙන ආ බවයි. මහින්දගේ ආණ්ඩුවේ අය කිව්වේ, මහින්ද රාජපක්ෂ සිංගප්පූරුවෙ ‘ලී ක්වාන් යූ’ සහ ගෝඨාභය රාජපක්ෂ මැලේසියාවේ ‘මහතීර් මොහොමඩ්’ වගේ කියලයි. ඒ දෙන්නාම එකතු වී හදන රටක් කොයිවගේ වෙයිද කියලා අපෙන් ඇහුව්වා. ජනතාව අත්පුඩි ගැහුවා. ඔවුන් ආසියාවේ ආශ්චර්ය ගොඩනගන බව කීවා. සජිත් ප්‍රේමදාසට තාත්තා නිවාස හැදුවා කියලා අද කියන්න පුළුවන්ද? අද ඒ කිසිකෙනෙකුට කියන්න කිසිම දෙයක් නැති ‘කම්බාහොරු’ බව ඔප්පු වී තිබෙනවා.

ලෝකය සමග ඉදිරියට යන නව කථිකාවක් සමාජය සමග ගොඩනැගිය හැක්කේත් එය ක්‍රියාත්මක කළ හැක්කේත් ජාතික ජන බලවේගයට පමණයි. මේ වෙනුවෙන් ක්‍රියාකරන කොට රනිල් වික්‍රමසිංහ ඡන්දයක් දෙයිද කියලා කතිකාවක් එක පැත්තක තිබෙනවා. රනිල් වික්‍රමසිංහ දැන් අදින්නේ ගෝඨාගේ කොටයක්. රනිල් වික්‍රමසිංහගේ ගෝඨා කොටය ලබන වසරේ ඔක්තෝබර් 17ට පෙර අනිවාර්යයෙන් පැවැත්විය යුතු ජනාධිපතිවරණයෙන් නිමාවට පත්වෙනවා. නියමිත පරිදි ජනාධිපතිවරණය නැති බව ජනතාවට තහවුරු වුවහොත් ලබන සැප්තැම්බර්වලටත් පෙර රනිල් වික්‍රමසිංහ ගෙදර යවනවා. අද ජනතාව ගෝඨාභය රාජපක්ෂ පළවා හැරීමට පාරට බැස්ස ආකාරයෙන් ක්‍රියාත්මක නොවී ඉන්නේ ජනාධිපතිවරණය ඉලක්ක කරගෙනයි. ගෝඨාභය පළවා හැරීමෙන් හිස්තැන පුරවන්න, සමත් ජනතාවාදී ආණ්ඩුවක් තිබුණේ නැහැ. කඳ පාර්ලිමේන්තුවේ ඉතිරි වුණා. පාර්ලිමේන්තුවෙන් රනිල්ගේ හිස හදාගත්තා. ඒ අත්දැකීමෙන් ජනතාව දැන් දන්නවා පළවා හැරීමෙන් වැඩක් නැති බවත් පළවා හැරිය යුත්තේ ජනතා අපේක්ෂා ඉටුකරන ආණ්ඩුවක් ගොඩනැගීමෙන් පමණක් බව. රනිල් වික්‍රමසිංහට වගේ පිනා චාන්ස් ගන්න අරගලයක් අපි කරන්නේ නැහැ. අපි ආණ්ඩුව පළවා හරින්නේ ජාතික ජන බලවේගයේ ආණ්ඩුවක් ගොඩනැගීමේ සැලසුම සහිතවයි. එය ඉතාමත් වැදගත් සන්ධිසථානය ජනාධිපතිවරණයයි. විශාල ලෙස අපේක්ෂා භංගත්වයට පත්වූ ජනතාවක් අප කෙරෙහි විශාල විශ්වාසයක් තබා තිබෙනවා. ඔවුන් සමබන්ධයෙන් අපට තිබෙන්නේ ඉතාමත් බැරෑරුම් වගකීමක්.

පාරම්පරිකව මහින්දලාට, රනිල් වික්‍රමසිංහලාට විශ්වාසය තබා කටයුතු කළ මහා ජනතාවක් අප කරා එන්නේ ඔවුන් කෙරෙහි විශ්වාසය තැබුවාට වඩා දහස් ගුණයක් විශ්වාසය තැබීමෙන්. මේ එන ජනතාවට ප්‍රධාන අපේක්ෂාවන් දෙකක් තිබෙනවා. ජාතික ජන බලවේගයේ ආණ්ඩුවක් පිහිටුවීම ගැන විශ්වාසය එකක්. මේ රටේ පමණක් නොවෙයි විදේශගතව සිටින හොඳ ජීවිතයක් ගතකරන ලාංකිකයින් පවා දහස් සංඛ්‍යාත පිරිසක් අප වටා ගොනුවී සිටින බව ඇමෙරිකා එක්සත් ජනපදයෙන් තහවුරු වුණා. එළඹෙන පළමු අවස්ථාවේදී අපි ජාතික ජන බලවේගයේ ආණ්ඩුවක් පිහිටුවන්න ඕනෑ. ඒ වෙනුවෙන් ක්‍රියා කළ යුතු වැදගත්ම මාස දහයක පමණ කාලයක් එළඹී තිබෙනවා. ලංකා දේශපාලනයේත්, ලංකා ඉතිහාසයේත් අතිශය වැදගත්ම මාස දහයක පමණ කාලය ශක්තිමත්ව අත් නොහැර පොර බැදිය යුතු වෙනවා. ජාතික ජන බලවේගයේ ශක්තිමත් ආණ්ඩුවක් පිහිටුවිය යුතු වෙනවා. බදුබරට එරෙහිව, විකිණීමට එරෙහිව, මර්දනයට එරෙහිව, ප්‍රජාතන්ත්‍රවාදී හැකිළීමට එරෙහිව, ජාතික සම්පත් විකිණීමට එරෙහිව, ජනතාව පෙළ ගස්වමු. සාධාරණ, යුක්තිගරුක රටක් වෙනුවෙන් ජනතාව පෙළ ගස්වමු. ඒ වෙනුවෙන් අපි ආණ්ඩුවක් ගොඩනඟමු. අපි පිහිටුවන ආණ්ඩුව වටා ලෝකයේ නව දැනුම පෙළ ගස්වා, ලෝකය සමග තරඟ කළ හැකි ආර්ථිකයක් ගොඩනැගිය යුතුයි. සමාජ සාධාරණත්වය, යුක්තිය, කාර්යක්ෂමතාවය, සෑම පුරවැසියාගේම ගෞරවය සහතික වන රටක් අපි ගොඩනඟමු. අපි සෑම දෙනාගේම දෙවුර මත ජාතික ජන බලවේගයේ පාලනයක් ගොඩනැගීමේත් මේ රට ගොඩනැගීමේත් වගකීමක් පැටවී තිබෙනවා. සහතික වශයෙන්ම ඉදිරි කාලයේදී ජාතික ජන බලවේගයේ ආණ්ඩුවක් පිහිටුවා බිඳ වට්ටවා තිබෙන රට ගොඩනඟනවා. ඒ වෙනුවෙන් අපි සියලු දෙනාම එකාවන්ව ක්‍රියාකරමු. ඔබ සියලු දෙනාටම ජයවේවා.

-Colombo, November 18, 2023-

බදු බර, බඩු මිල, විදුලි ගාස්තු අසීමිතව ඉහළ දමන, ජාතික සම්පත් විකුණන, මර්දන අණපනත් සම්මත කරන ජන පීඩක ආණ්ඩුවට එරෙහිව නුගේගොඩදී ජාතික ජන බලවේගය විසින් පවත්වන විරෝධතා රැලිය සඳහා අති විශාල ජන සහභාගිත්වයක් දක්නට ලැබුණි.

නොවැ. 18 සවස 03.00ට දෙල්කඳ හන්දියේ සිට ඇරඹි ජන බල විරෝධතා පාගමනින් පැමිණි ජනතාව නුගේගොඩ ආනන්ද සමරකෝන් එළිමහන් රංගපීඨයේදී සංවිධානය කර තිබූ ජන රැලියට සහභාගී වුහ. බදු බර, බඩු මිල, විදුලි බිල අසීමිතව ඉහල දමන, ජාතික සම්පත් විකුණන, මර්දන අණපනත් සම්මත කරන කොල්ලකාරී ජන පීඩක ආණ්ඩුවට එරෙහිව විරෝධය ප්‍රකාශ කරමින් “74 වසරක සාපය නිමා කරමු – ජන පීඩක ආණ්ඩුව පන්නමු” යන තේමාව සහිතව මෙම විරෝධතාව පැවැත්විණි.

ජනතාව පීඩාවට පත්කරන වත්මන් ආණ්ඩුව නිසැකවම පලවා හරින බව ජාතික ජාතික ජන බලවේගයේ නායක අනුර කුමාර දිසානායක මෙහිදී රැළිය අමතමින් පැවසීය.

අන්තර් සමාගම් සේවක සංගමයේ සභාපති වසන්ත සමරසිංහ , ආචාර්ය සරෝජා සාවිත්‍රි පෝල්රාජ්, රංගන ශිල්පි සමාජ ක්‍රියාකාරී වමින්ද ජයසුරිය , ජාතික විධායක සභික ෂෙයික් මුනීර් මුලෆ්ෆර්, ජාතික විධායක සභික රාමලිංගම් චන්ද්‍ර⁣සේකර් , ජාතික විධායක සභික මහාචාර්ය සුනිල් සෙනෙවි, ජාතික විධායක සභික ආචාර්ය හරිනි අමරසූරිය, ජවිපෙ ප්‍රධාන ලේකම් ටිල්වින් සිල්වා යන අයද ජනතාව ඇමතූහ.

-2023 නොවැ. 17 දින පැවති ජාතික ජන බලවේගයේ මාධ්‍ය හමුව-

රාජපක්ෂලා රනිල් වික්‍රමසිංහට රට බාරදීමෙන් පසුව මේ දක්වා පැමිණි ගමන් මාර්ගය වෙනස් කළ යුතු බව අවස්ථා කිහිපයකදීම පෙන්වා දී තිබුණා. නමුත් කිසිම වෙනසක් නැතිව මේ දක්වා ගමන් කළ මාවතේම යමින් ජනතාවට ජීවත් විය නොහැකි තරමට පීඩනයන් එල්ල කර තිබෙනවා. ඉදිරිපත් කර තිබෙන අයවැය තුළ තිබෙන්නේ ජාත්‍යන්තර මූල්‍ය අරමුදල ඉදිරියේ දණ ගසා කීයක් හෝ ඉල්ලා ගන්න ක්‍රියාකරන අතරේ සමස්ත අර්බුදයේ බර ජනතාව මත පැටවීමයි. අයවැය තුළ හෝ ඉන් පිට පීඩාවට පත් ජනතාවට සහන දීමේ ප්‍රායෝගික කිසිම වැඩපිළිවෙළක් නැහැ. රනිල් වික්‍රමසිංහලා වගකිව යුතු අර්බුදයේ බර තව තවත් ජනතාව මත පටවමින් වසරක් ඇතුළත විදුලි බිල තෙවරකින් 400%කට වඩා වැඩි ප්‍රමාණයකින් ඉහළ දැම්මා. මේ නිසා ජනතාවට විදුලි බිල දරා ගන්න බැහැ වගේම කර්මාන්ත කඩා වැටීමට හේතු වී තිබෙනවා. විදුලි බිල වැඩිකිරීම, තෙල් මිල වැඩිකිරීම සහ ආනයන පාලනය නිසා කර්මාන්ත සහ ව්‍යාපාර 2000ක් පමණ වැසී ගොස් ඇති බව මාධ්‍ය වාර්තා කර තිබුණා. මේ නිසා පසුගිය වසර එකහමාරක වගේ කාලය තුළ ලක්ෂ පහළොවකට පමණ රැකියා අහිමි වෙලා. බැංකු ණය ගත් ව්‍යාපාර 556ක් බැංකුවලට සින්න වෙලා. රටේ ආර්ථිකය තව තවත් දුර්වල කරන ක්‍රියාවලියක ආණ්ඩුව නිරත වී සිටින බව මේ දත්ත අනුව පැහැදිලියි. රට ගොඩගන්න දැක්මක්, සැලැස්මක් හෝ ඕනෑකමක් ආණ්ඩුවට නැහැ. එදා වේල ගතකරමින් පොදු ජනතාව විශාල පීඩාවකට ලක්කරමින් යනවා.

නැවත වටයකින් විශාල වශයෙන් බදු බර වැඩිකිරීමෙන් තවත් වටයකින් භාණ්ඩ මිල ඉහළ යනවා. පොදු ජනතාව මත මේ බර පටවා ආණ්ඩුව වටේ ඉන්න හුරතලුන්ට විශාල සහන ලබාදෙමින් ශත විසිපහට තිබුණු සීනි බද්ද රුපියල් 50 දක්වා වැඩිකිරීම වගේ ක්‍රියාමාර්ග ගන්නවා. සමස්ත අර්බුදය ජනතාව මත පටවා, විනාශකාරී මාවතේම ඇදගෙන යමින් පීඩාව තවදුරටත් ජනතාව මත පටවා ආණ්ඩුව වෙනත් රඟපෑම්වල යෙදී සිටිනවා. ශ්‍රී ලංකා පොදු ජන පෙරමුණේ සහ මහින්ද රාජපක්ෂගේ මේ අයවැය සම්බන්ධ ස්ථාවරය ජනතාව හමුවේ තැබිය යුතුයි. එකිනෙකා තම තමන්ගේ ගැලවීම වෙනුවෙන් විවිධ කතා කියමින් යනවා. එවැනි විගඩම්වලින් ජනතාව තවදුරටත් රවට්ටන්න ඉඩදිය නොහැකියි. මේ අර්බුදයට මහින්ද රාජපක්ෂලා රනිල් වික්‍රමසිංහලාත් එකසේ වගකිව යුතුයි. ශ්‍රේෂ්ඨාධිකරණය පවා ඔවුන් වගකිවයුතු බවට තීරණයක් දී තිබෙනවා. අධිකරණය මොනවා කීවත් ඔවුන් වගකීම ගන්නේත් නැහැ; බලය අත්හරින්නේත් නැහැ. වඩා යහපත් ජීවිතයක් අපේක්ෂා කරමින් මේ අයට බලය දුන් පොදු ජනතාවට කිසියම් සහනයක් දෙන්න ප්‍රායෝගික කිසිවක් කරන්නේ නැහැ. රජයේ සේවකයන්ට අප්‍රේල් මාසයේ සිට රුපියල් 10,000ක් පඩි වැඩිකරන බව කීවත් ජනවාරි මාසයේ සිටම බදු වැඩිකර තිබෙනවා. මේ තත්වයන්ට එරෙහිව පාරට බහින ජනතාව මර්දනයට ත්‍රස්තවාදය වැළැක්වීමේ පනත, සමාජ මාධ්‍ය මර්දන පනත වගේ පනත් ගෙනඑමින් සිටිනවා. තම අයිතිවාසිකම් වෙනුවෙන් අධ්‍යාපන අමාත්‍යාංශය ඉදිරිපිට උද්ඝෝෂණය කළ ගුරු විදුහල්පතිවරුන්ටත් පහර දුන්නා. රටක් හදන්න තිබෙන ස්වභාවික සම්පත් සහ මානව සම්පත් විනාශ කරමින් යනවා.

ඉතිරි වී තිබුණු අවසන් සම්පත් ටිකත් විදේශ සමාගම්වලට විකුණමින් යනවා. තැපැල් කාර්යාලත් විකුණන් කන්න යනවා. රටක් ගොඩනඟන්න සිටින කර්මාන්තකරුවන් විදුලි බිල, ඉන්ධන මිල, බදු බර වැඩිකරමින් වට්ටනවා. අපනයනකරුවන් වට්ටනවා. රට ගොඩනගන්න මැදිහත් කර ගත හැකි විශ්වවිද්‍යාල ආචාර්යවරුන් ඇතුළු වෘත්තිකයන් මත විශාල බදු බරක් පටවලා රට අත්හැර යාමට සලස්වා තිබෙනවා. ජනතා විරෝධී, ජන පීඩක, ඒකාධිපතිත්වයක් කරා ගමන් කරමින් සිටින මේ දුෂ්ට පාලනය පරාජය කළ යුතුව තිබෙනවා. ලංකාවට ලෝකය හමුවේ කිසියම් හෝ ගෞරවයක් ලබාගැනීමට තිබුණු ක්ෂේත්‍ර සියල්ලම විනාශ කරමින් යනවා. ඒ වෙනුවෙන් තිබුණු ක්‍රිකට් ක්‍රීඩාවත්, අපේ සංස්කෘතියත්, කර්මාන්තත් ජනතාවගේ සංස්කෘතියත් විනාශ කරමින් රට හිස් මුඩුබිමක් බවට පත්කරමින් සිටිනවා. මේ විනාශකාරී ගමන් මාර්ගයට පැලැස්තර විසඳුම් නැහැ. රනිල් වික්‍රමසිංහලා, මේ විනාශකාරී ක්‍රමය පරාජයට පත් කර ජනතාවාදී පාලනයක් බිහිකිරීම හැර වෙන උත්තරයක් නැහැ. මේ පාලනය පරාජය කිරීමට දැවැන්ත ජනතා බලයක් නිර්මාණය කළ යුතුව තිබෙනවා. ඒ අතරම ජනතාවගේ අයිතිවාසිකම් වෙනුවෙන් සටන් කරන්නත් සිදුවී තිබෙනවා.

ජනතාවගේ වගකීම වී තිබෙන්නේ මේ පාලනය පලවා හැරීම සඳහා දැවැන්ත ජනතා බලයක් නිර්මාණය කිරීමයි. අනික් පැත්තෙන් ආණ්ඩුවට ජනතා විරෝධීව කටයුතු කරන්න එපා කියලා අනතුරු අඟවන්නත් ඕනෑ. ආණ්ඩුව කෙරෙහි තිබූ විශ්වාසය 9% දක්වා අඩුවී ඇති බව සමීක්ෂණ වාර්තාවකින් ළඟදීත් හෙළිවී තිබුණා. මේ තුළ රනිල් වික්‍රමසිංහලා ව්‍යවස්ථාවට මුවාවී බලහත්කාරයෙන් රාජ්‍ය බලය උපයෝගී කර ගනිමින් පාලනය ගෙන යනවා. ජාතික ජන බලවේගයට රට ගොඩනැගීමේ සැලැස්මක් සහ මහජන බලය එකතු කරගෙන තිබෙනවා. වඩා සංයමයක් සහිත, වඩා සංවිධානාත්මකව අරමුණක් සහිතව ආණ්ඩුවට එරෙහි විරෝධයන් එල්ල කළ යුතුව තිබෙනවා. ආණ්ඩුවේ ජනතා විරෝධී ක්‍රියාමාර්ග පරාජයට පත්කිරීමේ උද්ඝෝෂණ ව්‍යාපාරයකුත්, බලය ලබාගැනීම සඳහා ජනතාව සංවිධානය කිරීමේ ක්‍රියාමාර්ගත් ජාතික ජන බලවේගය දියත් කරමින් සිටිනවා. හුදකලා අරගල වෙනුවට සමස්ත ජනතාව එක්කර ගත් ක්‍රියාමාර්ග තුළින් මේ පාලනය අවසන් කර, ජනතාවාදී පාලනයක් පිහිටුවා ගැනීමේ ඉලක්කය සහිතව ක්‍රියාකළ යුතුයි. මේ වෙනුවෙන් ගෙන ඇති ඉදිරි ක්‍රියාමාර්ගවල එක් පියවරක් වශයෙන් නුගේගොඩදී දැවැන්ත විරෝධතා රැලියක් සංවිධානය කර තිබෙනවා. වඩා ප්‍රජාතන්ත්‍රවාදී ලෙස සංයමයකින් මේ පාලනය පෙරලා දැමීම දක්වා ඉදිරියට යා යුතුව තිබෙනවා. ජනතාව පීඩාවට පත්කිරීමට රනිල් වික්‍රමසිංහලාට ඉඩ දී බලාසිටින්න කිසිවෙකුට අයිතියක් නැහැ. සාමකාමීම උද්ඝෝෂණය කිරීමේ ජනතාවගේ අයිතිය පාවිච්චි කර, ජන පීඩක පාලනයට එරෙහිව තමන්ගේ විරෝධය පළ කිරීම නුගේගොඩින් ආරම්භ කරනවා. ජනතාවගේ ශක්තිය ආණ්ඩුවට පෙන්වන්න සියලුම දෙනා නුගේගොඩට පැමිණ ආණ්ඩුව පරාජය කිරීමේ සටනට එක්වන ලෙස ඉල්ලා සිටිනවා.

“ආණ්ඩුවේ කාලය හමාර කළ යුතු බව ජනතාව තීරණය කර අවසන්” -ජාතික ජන බලවේගයේ පාර්ලිමේන්තු මන්ත්‍රී ආචාර්ය හරිනි අමරසූරිය-

මේ පාලනය තම බල ව්‍යාපෘතිය, තමන්ගේ පැවැත්ම වෙනුවෙන් පමණක් ක්‍රියාත්මක වෙන ආණ්ඩුවක් බව ඉතාමත්ම හොඳින් තහවුරු වී තිබෙනවා. ආණ්ඩුවේ විවිධ පාර්ශ්වයන්ම ආණ්ඩුවේ ක්‍රියාමාර්ග විවේචනය කළත්, තීරණාත්මක කරුණුවලදී ආණ්ඩුව පරාජය කරන්න ක්‍රියා නොකරන බව ඉතාමත්ම පැහැදිලියි. ජනතාව පීඩාවට පත් කළ ඔවුන්ට එරෙහිව ජනතාවගෙන් පැමිණීමට නියමිත දඬුවම තවදුරටත් කල්දමා ගන්න ඔවුන් කටයුතු කරමින් සිටිනවා. රනිල් වික්‍රමසිංහ ජනාධිපති ඔහුට සුපුරුදු ඩීල් දේශපාලනයේ යෙදෙමින් ක්‍රියාකරන ආකාරය පැහැදිලියි. බුද්ධාගමත්, විවිධ සාහිත්‍ය කෘතිත් උපුටා දක්වමින් ඔහු විවිධ පාපෝච්චාරණයන් කරනවා. මහා ප්‍රබුද්ධ කතා කිවුවත් විකුණන් කෑම සහ ඩීල් දේශපාලනය හැර වෙන උත්තරයක් රනිල් වික්‍රමසිංහට නැහැ. වෙනස් වෙලා තිබෙන බවට ඉඟියක් ජනතාවට දෙන්න පාපෝච්චාරණයන් කළත් භාවිතයෙන් පැහැදිලි වෙන්නේ අබමල් රේණුවක තරමින්වත් වෙනස් වෙන්න සූදානම් නැති බවයි. අයවැය පිළිබඳ ප්‍රශ්න මතුකරන විට අයි.එම්.එෆ්. කොන්දේසි නිසා කිසිවක් කළ නොහැකි බව කියනවා. එහෙම නම් මුදල් ඇමති කෙනෙක් හෝ ආණ්ඩුවක් මොකටද? ආණ්ඩුවක්, කැබිනට් එකක් පත්කරන්නේ ජාත්‍යන්තර සංවිධාන එක්ක වැඩකරන අවස්ථාවල රටට අවශ්‍ය ජනතාවගේ පැත්තෙන් හිතන න්‍යාය පත්‍රයක් ක්‍රියාත්මක කිරීමටයි. ජාත්‍යන්තර සංවිධානවල න්‍යාය පත්‍රත් තේරුම් අරගෙන අපේ න්‍යාය පත්‍රය ජයග්‍රහණය කරවන්න කටයුතු කළ යුතුයි.

මේ ආණ්ඩුවේ කාලය ඉවර කළ යුතු බව ජනතාව තීරණය කර අවසන්. මැතිවරණයක් ලැබෙන පළමු අවස්ථාවේදීම ආණ්ඩුව පළවා හරින බව දන්නා ආණ්ඩුව ජන මතයට බයේ හැංගෙමින් ඉන්නවා. මේ තුළ පුරවැසියන් හැටියට අපිට විශල වගකීමක් තිබෙනවා. මේ රටේ අනාගතය, ප්‍රජාතන්ත්‍රවාදය, අපේ අයිතිවාසිකම් ආරක්ෂා කර ගැනීමට ඉදිරිපත් විය යුත්තේ පුරවැසියන්. පාලකයන් වගකීම් අත්හැර තිබෙන මොහොතක පුරවැසියන් වෙනදාටත් වඩා ශක්තිමත්ව එඩිතරව, අධිෂ්ඨානශීලීව, අරමුණු සහගතව ඒ වෙනුවෙන් ක්‍රියාකළ යුතු වෙනවා. ජාතික ජන බලවේගය සැමවිටම ජනතාව සමග විවිධ ක්ෂේත්‍රවල වැඩ කරන්නේ ඒ වෙනුවෙන්. පුරවැසියාගේ වගකීම ඉෂ්ට කිරීම සඳහා දේශපාලන ව්‍යාපාරයක් හැටියට පුරවැසියන්ට අවශ්‍ය සංවිධාන ශක්තිය සහ නායකත්වය දෙමින් ඉදිරියට යන්න ඉතාම අධිෂ්ඨානයෙන් කටයුතු කරනවා. වැඩිකල් නොගොස් ජනතාවාදී පාලනයක් බිහිකිරීමේ ඓතිහාසික පරිවර්තනය වෙනුවෙන් අධිෂ්ඨානශීලීව ක්‍රියාකරනවා. එතෙක් පවතින පාලනයට හිස නමාගෙන සිටිය යුතු නැහැ. අපේ අප්‍රසාදය සහ විරෝධය පළ කළ යුතු වෙනවා. අපේ අයිතිවාසිකම් වෙනුවෙන් නුගේගොඩදී පවත්වන විරෝධතාවයට සියලු දෙනාම එක්වෙන ලෙස ඉල්ලා සිටිනවා. විශේෂයෙන්ම ආරක්ෂක අංශවල මහත්ම මහත්මීන්ට අපි කියන්නේ ජනමතයක් නැති ආණ්ඩුවක් වෙනුවෙන්, රීලෝඩ් පොලිස්පතිවරයෙක් යටතේ අනීතික ක්‍රියාමාර්ගවල නොයෙදෙන ලෙසයි.

මාධ්‍යවේදීන් නැගූ ප්‍රශ්නවලට පිළිතුරු දෙමින්…

ප්‍රශ්නය:- ජනාධිපතිවරණය නියමිත පරිදි පවත්වයිද?

පිළිතුර:- ආණ්ඩුවේ කැමැත්ත අකමැත්ත අදාළ නැහැ. ව්‍යවස්ථානුකූලව ලබන අවුරුද්දේ ඔක්තෝබර් වන විට ජනාධිපතිවරණය පැවැත්විය යුතුයි. එය ජයග්‍රහණය කිරීමට ජාතික ජන බලවේගය ක්‍රියාකරමින් යනවා. පැවැත්විය යුතුව තිබුණු පළාත් පාලන මැතිවරණය නොපැවැත්වීම සම්බන්ධයෙන් අධිකරණයේ නඩුවක් විභාග වෙමින් පවතිනවා. පළාත් පාලන මැතිවරණය කල්දැමූ ආකාරයට ජනාධිපතිවරණය කල්දාන්න බැහැ. මහා මැතිවරණයක් කලින් පවත්වනවාද නැද්ද යන්න තීරණය කරන්නේ ඒ ගොල්ලන්ගේ කැමැත්ත මත. පාර්ලිමේන්තුව විසුරුවා හැර මහා මැතිවරණයක් කැඳවීම හෝ පාර්ලිමේන්තුවේ යෝජනා සම්මතයකින් ඒ සම්බන්ධයෙන් ක්‍රියා කළ හැකියි. නමුත් ලබන අවුරුද්දේ ඔක්තෝබර් මාසයේදී අනිවාර්යයෙන් ජනාධිපතිවරණය පැවැත්විය යුතුයි. අපි ඕනෑම ඡන්දයකට ලැහැස්තියි. පළාත් පාලන මැතිවරණය කල් දැම්මේ අනිවාර්යයෙන්ම ඔවුන් පරදින නිසයි. අපි අපේ නායක අනුර දිසානායක සහෝදරයා ජනාධිපති අපේක්ෂකයා ලෙස සියලු බලවේගවල විශ්වාසයෙන් යුතුව නම් කර තිබෙනවා. මේ රට වෙනස් කර, අලුත් දේශපාලන පිටුවක් පෙරළන්න අනිවාර්යයෙන් අනුර දිසානායක සහෝදරයා ජයග්‍රහණය කරවන ලෙස සමස්ත ජනතාවගෙන් ඉල්ලා සිටිනවා. එතෙක් ආණ්ඩුවට එරෙහිව විරෝධය දක්වන්න සියලු දෙනාම ඒකරාශී වෙන ලෙස ඉල්ලා සිටිනවා.

-Colombo, November 17, 2023-

අද (17) දින පස්වරුවේ ඉන්දියානු මහ කොමසාරිස් කාර්යාලයේදී ජාතික ජන බලවේගයේ නායක අනුර කුමාර දිසානායක සහෝදරයා සහ ඉන්දීය මහ කොමසාරිස් ගෝපාල් බාග්ලේ (Gopal Bagle) මහතා අතර හමුවක් සිදුවිය.

එහිදී ශ්‍රී ලංකාවේ වත්මන් දේශපාලන තත්වය පිළිබඳවත් ලංකාව මුහුණ දෙමින් සිටින ආර්ථික අර්බුදය පිළිබඳවත් දීර්ඝ ලෙස සාකච්ඡා කෙරිණි.

මෙම හමුව සඳහා ඉන්දීය මහ කොමසාරිස් කාර්යාලයේ පළමු ලේකම් එල්ඩෝස් මැතිව් (Eldos Mathew) මහතා ද ජාතික ජන බලවේගයේ ජාතික විධායක සභික විජිත හේරත් සහෝදරයා ද සහභාගි විය.

-Colombo, November 16, 2023-

ගාසා තීරයේ වහාම සටන් විරාමයක් සඳහා පියවර ගන්නා ලෙස එක්සත් ජාතීන්ගේ සංවිධානයට බලකරමින් ජාතික ජන බලවේගයේ කාන්තා නියෝජිතයින් එක්සත් ජාතීන්ගේ මානව හිමිකම් කාර්යාලයට සහ මානව හිමිකම් මහ කොමසාරිස් කාර්යාලයට (OHCHR) අද ලිපියක් ඉදිරිපත් කරන ලදී.

ජාත්‍යන්තර මානුෂීය නීතියට අනුකූලව පලස්තීනයේ කාන්තා හා ළමා අයිතිවාසිකම් කඩවීම්වලට එරෙහිව අවශ්‍ය ක්‍රියාමාර්ග ගන්නා ලෙසත්, සියලුම පාර්ශවකරුවන් සමඟ වහාම සහයෝගයෙන් කටයුතු කරන ලෙසත් එම ලිපියෙන් ඉල්ලා ඇත.

ආචාර්ය හරිනි අමරසූරිය (පාර්ලිමේන්තු මන්ත්‍රී), සමන්මලී ගුණසිංහගේ (ජාතික ජන බලවේගයේ විධායක සභික), වෛද්‍ය ස්වස්තිකා සමරදිවාකර (ජාතික ජන බලවේගයේ සාමාජිකා) විසින් එක්සත් ජාතීන්ගේ සංවිධානයේ ජ්‍යෙෂ්ඨ මානව හිමිකම් උපදේශක රඝු මෙනන් වෙත අද මෙම ලිපිය කොළඹ එක්සත් ජාතීන්ගේ කාර්යාල පරිශ්‍රයේ දී පිළිගන්වන ලදී. තවද, කාන්තාවන් සහ ළමුන් සඳහා ශ්‍රී ලංකා රජය ගෙන ඇති සුභසාධන කප්පාදු පියවරවල බලපෑම සහ කාන්තාවන් සහ ළමා සමාජ ආරක්ෂණය සඳහා අයවැය ප්‍රතිපාදන අඩු කිරීම ඇතුළු ශ්‍රී ලංකාවේ වත්මන් සමාජ-ආර්ථික හා දේශපාලන සන්දර්භය පිළිබඳ සාකච්ඡාවක් ද සිදු විය.