NPP News

(-‘රට අනුරට’ ජාතික ජන බලවේගයේ විජයග්‍රාහී රැලිය – මරදන්කඩවල – 2024.09.06-)

දැන් අපේ විරුද්ධවාදීන් සැලසුම් හදන්නේ ඒ ගොල්ලන්ගේ පරාජයෙන් ගැලවෙන්න. ඒ නිසා තමයි දැන් දෙගොල්ලෝ එකතු වෙන්න කතා කරන්නේ. ජාතික ජන බලවේගයේ නියත ජයග්‍රහණය හමුවේ ඒ ගොල්ලෝ විශාල භීතියකට පත්ව සිටිනවා. රනිල් වික්‍රමසිංහ කියනවා සජිත්ට ගහන කතිරය, අනුරට ගහන කතිරයක් කියලා. සජිත් ගාල්ලට ගිහිල්ලා කියනවා රනිල්ට ගහන කතිරය, අනුරට ගහන එකක් කියලා. අපි කියනවා, අපිට ඔය එක් එක්කෙනා හරහා කතිර එපා. 21 වැනිදා උදෙන්ම ගිහිල්ලා මාලිමාවට කෙලින් කතිරය ගහන්න. ඊයේ තැපැල් ඡන්දය තිබ්බා. රට හැම තැනින්ම එන ආරංචිය සුබයි. පොලීසියේ, හමුදාවේ, ගුරුවරු, කච්චේරිවල වැඩකරන අය ඩී.ඕ. මහත්වරු අපිට කතා කරලා කිවුවා දවල් එවපු කෙටි පණිවිඩ සියල්ලෙන්ම අපේ ජයග්‍රහණය තහවුරු කරලා හමාරයි. ජාතික ජන බලවේගයට ඉහළින්ම ජයග්‍රහණය අරන් දීලා තිබෙනවා. ඒ සියල්ලන්ටම ස්තුතියි. දැන් ඉතිරි කොටස පැවරෙන්නේ ඔබට සහ අපිට. ඒ කොටස සම්පූර්ණ කරගන්න නම් ගම්වල ඡන්ද පෙට්ටි මාලිමාවට කතිරය ගහලා පුරවන්න ඕනෑ.

මෙච්චර කල් මේ රටේ ආණ්ඩු පත් කළාට හැදුනේ රට නොවෙයි. ඒ ගොල්ලෝ. රට වැටුණා; ඒ ගොල්ලෝ හැදුණා. රටේ දරුවන්ට පාර වැහුණා. ඒ ගොල්ලන්ගේ දරුවන්ට තිර ඇරියා. 21 වැනිදා ඔබ ඔබේ වගකීම ඉටු කරන්න. දිනුවට පස්සේ අපිටත් තිබෙනවා අත්හැරිය නොහැකි වගකීමක්. ඔබ අප ගැන තැබූ විශ්වාසය, බලාපොරොත්තුව එලෙසම ඉටු කිරීමේ වගකීම අප සතුවෙනවා. එය අපි අකුරටම ඉටුකරනවා. සැප්තැම්බර් 21 අපි ජයග්‍රහණය කළාට පසුව අපි කරන වැඩවලින් ටිකක් මම දැන් කියන්නම්.

ඉස්සෙල්ලම පාර්ලිමේන්තුව විසුරවනවා. ඊළඟට ව්‍යවස්ථාවට අනුව ඉතා හොඳින්, මහ ඡන්දය එන තුරු ඒ මාස 1 1/2 – 2 තුළ අපි රට පාලනය කරනවා. ජනාධිපතිවරණය දිනලා මහ ඡන්දයට ගිය ගමන් අපිට ඡන්ද ගලාගෙන එන්නේ කලා වැවේ සොරොව්ව ඇරියා වගේ. එදාට මේ පාර්ලිමේන්තුවේ ඉන්න 150කට වඩා ගෙදර. මේ කතිරයෙන් පරදින්නේ රනිල් විතරක් නොවෙයි. එස්.එම්. චන්ද්‍රසේනලත් පරදිනවා. අපි 2/3ක බහුතරයකින් ආණ්ඩුවක් හදනවා. ඒක ස්ථිරයි. ඊට පස්සේ රජයේ ආයතනවලට ප්‍රධානීන් පත් කරනවා. මේ කතිරයෙන් දේශපාලනඥයින්ගේ දූ පුතුන්ට, ඥාතීන්ට දී තිබෙන අනවසර පත්වීම්ද අහෝසි වෙනවා. මේ සැප්තැම්බර් 21 ගහන කතිරය එතරම්ම බලවත් කතිරයක්.

දැන් ඉන්න ඇමති මණ්ඩලය දිහා බලන්නකෝ. පශු සම්පත් ඇමතියෙක් පැත්තක ඉන්නවා. ඊට අමතරව කිරි හරක් බලාගන්න ගව සම්පත් ඇමතියෙකුත් ඉන්නවා. වාරිමාර්ග ඇමතියෙක් ඉන්නවා. සුළු වාර්මාර්ග ඇමතියෙක් වෙනම ඉන්නවා. මහවැලි ඇමතියෙකුත් ඉන්නවා. පේනවනේ බෙදාගෙන කාපු විදිය. අපේ ආණ්ඩුව යටතේ මේ කෑලි කඩලා, දේශපාලන හිතවත්කමට බෙදාදී ඇති සියලු අමාත්‍යාංශ විද්‍යාත්මක ඒකාබද්ධ කිරීමකට ලක්කරලා, විද්‍යාත්මක ඇමති මණ්ඩලයක් හදනවා. අපි බලයට ඇවිත් පළමු කැබිනට් මණ්ඩලය රැස්වෙලා තීන්දු කිහිපයක් ගන්නවා. මන්ත්‍රී විශ්‍රාම වැටුප අහෝසියි. මන්ත්‍රීවරුන්ට ලබාදෙන බාර් පර්මිට් අහෝසියි. පාර්ලිමේන්තු මන්ත්‍රීන්ට දෙන කාර් පර්මිට්ද අහෝසියි. ඇමතිවරුන්ගේ ගෙවල්වල ලයිට් බිල්, වතුර බිල්, ආණ්ඩුවෙන් ගෙවන්නේ නැහැ. මැති ඇමතිලා පිටුපස ආණ්ඩුවේ වාහන හත අටක් යන්නේ නැත. කාර් එකේ දොර අරින්න පොලීසියේ මහත්තුරු දෙන්නේ නැත. හිටපු ජනාධිපතිවරුන්ට මහජන මුදලින් ලබාදී තිබෙන වරප්‍රසාද සියල්ලම අහෝසියි.

මේ ටික අපි නිසැක ලෙසම කරනවා. ඊට පස්සේ ජනතාවටත් වගකීමක් පැවරෙනවා. මේ රට ගොඩනැගීමේදී ආණ්ඩුවක් කියන්නේ මොකක්ද කියා අපි, ඔබ එකතු වී වැඩකර පෙන්නමු. ලෝකයේ හැම රටකටම ගිය මිනිස්සු හිතන්නේ ඒ රටේ නතර වෙන්න. ඔන්න රට වට්ටලා තිබෙන තැන. මේ පාලකයෝ මේ රට බාල්දු කළා. ජනාධිපතිවරු ශ්‍රේෂ්ඨාධිකරණ නියෝග පිළිගන්නේ නැහැ. ඇමතිවරු, මන්ත්‍රීවරු මිනී මරලා වරදකරුවන් වෙලා, දඬුවම් ලබලා නැවත පාර්ලිමේන්තුවට එනවා. මොකක්ද මේ පාලකයෝ කරන්නේ. අපි මේ රට ලෝකය ඉදිරිපිට කීර්තිමත් රටක් ලෙස අලුතින් ගොඩනගනවා.
අපේ පාලනයක් යටතේ මේ රටේ නිෂ්පාදනයට නව පණක් දෙනවා. සංචාරක කර්මාන්තය සඳහා සමහර වර්ගවල හාල් ටිකක් පිටරටින් ගේන්න වෙයි. ඒ හැර එක හාල් ඇටයක් පිටරටින් ගේන්නේ නැහැ. මේ පාලකයන් කංකුනුත් පිටරටින් ගේනවා. අපි ඔබලාට කියනවා බය නැතුව කුඹුරට බහින්න. බය නැතිව හේනට යන්න. අපි ඊට අදාළ සහන ටික දෙන්නම්. ඉතාම දියුණු තත්වයේ බීජ අපේ රජයක් යටතේ ඔබට ලබා දෙනවා. වගා කළ හැකි, රජය සතුව පවතින ඉඩම් වගා කරන්න කැමති තරුණයන්ට ලබා දෙන්න අපි සූදානම්. හැබැයි ඒවා නිකම් තියන් ඉන්න බැහැ. දැන් රජය සතු ඉඩම් අක්කර දහස් ගණන් බෙදාගෙන ඉන්නෙ කවුද? මැති ඇමතිලා. මේ පාලකයන් අපේ වැව් පද්ධතිය විනාශ කළා. වැව් ඉස්මත්තෙ හෝටල් හැදුවා. ගෙවල් හැදුවා. වැව් ගොඩ කළා.

අපේ පාලනයක් යටතේ පොළොවට වැටෙන සියලු වර්ෂා ජලය නාස්ති නොකර ගබඩා කළ හැකි පරිදි අපේ වැව් පද්ධතිය නැවත ගොඩ නඟනවා. කන්න තුනක් වගා කිරීමට හැකිවන පරිදි අපි ඔබට අවශ්‍ය සියලු යටිතල පහසුකම් ලබා දෙනවා. පොහොර ටික, තෙල් ටික, සහනාධාර මිලකට ඔබට ලබා දෙන්න වැඩපිළිවෙළක් අපි හදනවා. අස්වැන්නට සාධාරණ මිලක් ලබා දෙනවා. කිසිම කළුකඩකාරයෙකුට ගොවි ජනතාවගේ ගෙල මිරිකගෙන ඉන්න ඉඩ දෙන්නේ නැහැ. අස්වැන්න, ඵලදාව අපතේ නොයන අන්දමට, ඒවා ආරක්ෂිත ලෙස තබා ගැනීමට, ප්‍රවාහනය කිරීමට අපි වැඩපිළිවෙළක් හදනවා.

ලෝකයේ ගබඩාකරණය, ඇසුරුම්කරණය, ප්‍රවාහනය මේ සියල්ල කර්මාන්ත. අපේ ගොවි ජනතාවගේ අස්වැන්නෙන් 38%ක් අපතේ යනවා. මේවා වෙන්නෙ මේ කිසිදු සැලැස්මක් නැති පාලකයන් නිසා. අස්වැන්න විකුණා ගන්න බැරිව ගොවියන් මොනතරම් රස්තියාදු වෙනවාද? අස්වැන්න ටිකක් කුණු කොල්ලයට විකුණලා ඉතුරු ටික කුණුවලවල්වලට දානවා. අලින්ට කන්න දානවා. අපි ගොවි ජනතාවගේ ඵලදාව ආරක්ෂිතව වෙළඳපලට යවන වැඩපිළිවෙළක් හදනවා. අපේ රටේ ගොවි ජනතාව විශාල ණය බරකින් මිරිකිලයි ඉන්නේ. අපි ඒ ණය බරින් මේ රටේ ගොවි ජනතාව මුදා ගන්නවා.

ලෝකයේ දියුණු රටවල දෙමව්පියන් පදිංචි මාරු කළාම, ඒ දරුවන්ට ඒ පදිංචියට ආසන්නයේම හොඳ පාසලක් ලබා දෙනවා. අපේ රටේ දෙමව්පියන් ළමයව හොඳ පාසලකට දාගන්න පදිංචිය වෙනස් කරනවා. අධ්‍යාපනය මව්පියන්ට, දරුවන්ට බරක් වෙන්න අපි ඉඩ තියන්නේ නැහැ. ඉතා දියුණු අධ්‍යාපන ක්‍රමයක් අපේ රටේ දරුවන්ට අපි හඳුන්වලා දෙනවා. සෞඛ්‍යසම්පන්න ජනතාවක් සිටින රටක් අපි නිර්මාණය කරනවා. පහසු මිලට පෝෂ්‍යදායී ආහාර වේලක් ලබාගන්න පුළුවන් රටක් අපි ඔබට උරුම කර දෙනවා. නව පුනරුද යුගයකට මේ රට පරිවර්තනය කරා රැගෙන යනවා. 21 වැනිදාට ඔබ ඔබේ වගකීම ඉටු කරන්න. අපේ වගකිම අපි අකුරටම ඉටු කරන බවට සහතික වෙනවා.

“මජර දේශපාලනයේ නියැලී සිටින අයට 21 දා කතිරයෙන්ම උත්තර දෙමු”
-ප්‍රවීණ ගායක ක්‍රිශාන්ත එරන්දක-

මේ වගේ දේශපාලන වේදිකාවක කථාකරන කොට මට ටිකක් බයක් දැනෙනවා. මොකද, මම දහස් ගණන් නරඹන වේදිකාවල ඕනෑ තරම් ගීත ගයලා තිබෙනවා. එතකොට කිසිම බයක් දැනෙන්නේ නැහැ. නමුත් අද කථා කරන්නේ දේශපාලන වේදිකාවක. මාලිමාවේ වේදිකාවේ. එනිසා අපෙන් පුංචි වචනයක් වැරදුණත් සමහර මාධ්‍ය සහ සමාජ මාධ්‍යවල අය බලන් ඉන්නවා. අපිට මඩ ගහන්න. සමහර විට අපේ කථාවල එහෙන් මෙහෙන් කෑලි අහුලගෙන ඒවා විකෘති කරලා දානවා. අපිට විරුද්ධව එහෙම මඩ කෑල්ලක් දැම්ම ගමන් අපේ රටේ ජනතාව ඊට එරෙහිව ක්ෂණික ප්‍රතිචාර දක්වනවා. එහෙම වෙන්නෙ මාලිමාව ජයග්‍රහණය කරවන්න අපිට වඩා වුවමනාවක් ඔබට තිබෙන නිසා.

අපි ඉවසගෙන ඉඳලා මේ මජර දේශපාලනයේ නියැලී සිටින අයට 21 වැනිදාට අපේ කතිරයෙන්ම උත්තර දෙමු. එදාට මේ රළු, ගොරෝසු මිනිසුන්ට ජයග්‍රාහී සිනහවකින් අපි උත්තර දෙමු. 21 වැනිදා උදෙන්ම ඡන්ද පොළට ගිහිල්ලා අපි මාලිමාවට ඡන්දය දෙමු. එතකොට තමයි අපට විරුද්ධව මට අවලාද ගහන අයට හොඳටම රිදෙන්නේ. දැනට අවුරුදු 2 1/2කට පමණ ඉස්සර දවසක් මට අනුර සහෝදරයාගේ ලස්සන කතාවක් ඇහෙනවා. සමහර දේශපාලකයෝ කතාකරන දේවල්වල තිබෙන්නේ සද්දේ විතරයි. අගක් නැහැ, මුලක් නැහැ. මොනවා කියනවාද කියලා කියන කෙනාවත් දන්නේ නැහැ. දේශපාලන හරයක් නැහැ. ඒ වගේම රටට වුණේ මොකක්ද කියලා කියන්නේ නැහැ. නමුත් අනුර සහෝදරයාගේ කතා ඊට හාත්පසින්ම වෙනස්. ඒවා හරයාත්මකයි. අර අවුරුදු 2 1/2කට පෙර මට ඇහුණු අනුර සහෝදරයාගේ කතාවේ එක තැනක ඔහු මෙහෙම කියනවා. මේ රට හදන්න ආර්ථික, දේශපාලනික වැඩපිළිවෙළක් ඕනෑ. ඒකට අපි ඔක්කොම එකට එකතු වෙන්න ඕනෑ. එහෙම තමයි අපිට පුනරුද යගයක් හදන්න පුළුවන් වෙන්නේ. එහෙම කියන ගමන් ඔහු කියනවා අපි මේ මොනවා කරන්නත් රට ඇතුළෙ සංස්කෘතික මිනිහෙක් හදන්න ඕනෑ කියලා. මෙතුවක් කාලයකට ඒ වගේ කතාවක් මේ රටේ කිසිම දේශපාලකයෙක්ගෙන් මම අහලා නැහැ. රට ගොඩගැනීමට උරදෙන්න නම් රටට වැඩදායක මිනිහෙක් ඕන තමයි. නමුත් සංස්කෘතික මිනිහෙක් හදන්න ඕනෑ ඇයි? මට අනුරගේ ඒ කතාව සංවේදීව හිතට දැනුණා. මේ සමාජය මෙතනට වට්ටපු මේ රට මෙතෙක් පාලනය කළ දේශපාලනඥයින් අපි තුළ හිටපු සංස්කෘතික මිනිසා ගලවලා විසි කරලා දැම්මා. අපේ සමාජයේ මිනිස්සුන්ට සතුට බෙදා ගන්න බැරිතැනට පත් කළා. තව මිනිහෙක්ගේ කරදරයකදී ඒ මනුස්සයාගේ දුක අපට බෙදා ගන්න බැරි වුණා. මේකට වගකියන්න ඕනැ පාලකයන්. අන්න ඒ නිසා තමයි, මේ රට මනුෂ්‍ය සමාජයක් ලෙස හදන්න නම් සංස්කෘතින මිනිසෙක් හදන්න ඕන කියලා අනුර සහෝදරයා කියන්නේ.

මම කියන ගීත ඔබ අහලා අහලා ඇති. මිනිහෙක් වුණාම ගීතයක් අහන්න ඕනැ; රස විඳින්න ඕනෑ; නවකතාවක් කෙටිකතාවක් කියවන්න ඕනැ, චිත්‍රපටයක් බලන්න ඕනැ. අඩුම තරමින් කෑම කන කොටවත් ගෙදර උදවිය එක්ක සතුටින් ගත කරන්න ඕනැ. එහෙම සමාජයක් මේ පාලකයො අපිට නැති කළා. අපිව හුදකලා මිනිස්සු බවට පත් කළා. අනුර සහෝදරයා ඒ නිසා තමයි කිවුවේ මේ රට හදන්න නම් රටට වැඩදායී සංස්කෘතික මිනිසෙක් ඕනැ කියලා. මේ රටේ දේශපාලනයත් මේ රටේ ආර්ථිකයත් ගොඩනඟන්නේ ඔහු තමයි. දුවේ පුතේ මටත් ඉන්නවා දුවලා දෙන්නෙක්. මගේ ලොකු දුව මේ අවුරුද්දෙ එයාගේ පළමු ඡන්දය ප්‍රකාශ කරනවා. ඒ අලුත් පරම්පරාව හිතන පතන විදිහ හරි වෙනස්. ඒ පරම්පරාවේ තරුණ තරුණියෝ පරාජය පළමුවෙන් බාර ගන්නේ නැහැ. මම මගේ ලොකු දුවගේ දේශපාලන වටපිටාව මම පොඩ්ඩක් හොයලා බැලුවා. එයාලා මිතුරු සමාජයක් හදාගෙන ඉන්නවා. මම ඇගේ ෆෝන් එකට ටිකක් එබිලා බැලුවා. මොනවද මේ කෙටි පණිවුඩ දිදී කතා කරන්නේ කියලා. බලනකොට ඇගේ මිතුරු සමාජයේ ඔක්කොම මාලිමාවට. මේ රටේ තරුණ ඡන්ද ආසන්න වශයෙන් ලක්ෂ 12ක් පමණ තිබෙනවා. ඉන් 95%ක් මාලිමාවට, අනුරට කියලා. ඒක ස්ථිරයි. 21 වැනිදා උදෙන්ම ගිහිල්ලා අපේ යුතුකම ඉටුකරමු. මාලිමාව ඉදිරියේ කතිරය ගසා අපේ අනුර සහෝදරයාව ජයග්‍රහණය කරවමු.

“පරණ අගුපිල්වල තවත් රස්තියාදු නොවී නව පුනරුදයක දේශපාලන පෙරහැරට එකතු වෙන්න”
-ජාතික ජන බලවේගයේ ජාතික විධායක සභික වසන්ත සමරසිංහ-

ඡන්දෙට තිබෙන්නේ තවත් දවස් 14ක් පමණයි. අනුරාධපුර දිස්ත්‍රික් ජනතාවට මේ ඡන්දය විශේෂයි. අපේ එකෙක් රටේ නායකයා වෙන්න යනවා. අනුරාධපුරේ අනුර, ඉහළින්ම ඔසවා තබන්න, කැකිරාවේ, මිහින්තලේ ආසන දෙකේ ජනතාව සූදානම්. අනුර සහෝදරයා නැවත ඔබ හමුවන්න එන්නේ 14වැනිදා. ඒ තමයි අනුරාධපුරයේ ජයග්‍රාහී අවසාන රැලිය. මේ ජනාධිපතිවරණයේ කසකාරයෝ පෙරහැර එන බව කියන්න ඊයේ, පෙරේදා පටන් ගත්තා. තැපැල් ඡන්ද ප්‍රතිඵල ගැන බුද්ධි අංශ වාර්තාවල කියනවා රට හැමතැනම අනුර ඉහළින්ම එකට ඉන්න බව. මේ පණිවිඩය අම්මලා තාත්තලා, සහෝදර සහෝදරියන් ගම්වලට ගිහින් කියන්න. මීට කලින් විවිධ දේශපාලන පක්ෂවලට වැඩ කළ අය ඉන්නවා.

සමහර අයගේ පක්ෂ කාර්යාල දෙක තුනක් වහලා. රනිල් වික්‍රමසිංහ මහත්තයාගේ පක්ෂ කාර්යාලයක් කනත්තෙත් දාලා තිබෙනවා. මට හිතෙන්නේ වික්‍රමසිංහ මහත්තයාට තව තිබෙන්නේ සති දෙකයි. ඉදිරි සති දෙක ඉවර වෙනකොට රටේ මිනිසුන්ගේ සිහිනය, ජනතාවගේ සැබෑ නායකයෙක් රජරටින් එනවා. ජනතාවගේ සැබෑ නායකයා අනුර කුමාර දිසානායක ජනපති වෙනවා කියන පණිවිඩය ගමට අරගෙන යන්න අවස්ථාව උදාවෙලා තිබෙනවා. ඉදිරි දවස් 14 ගම්බිම්වල ඔබේ ඥාතීන්ට, හිතවතුන්ට, අසල්වැසියන්ට මේ පණිවිඩය අරගෙන යන්න. තැපැල් ඡන්දේ පණිවිඩය ගමට ගෙනියන්න. මේ සමාජයම වෙනසක් වෙන්න සූදානම් වෙලා තිබෙන වෙලාවක, මුළු රටම එක පෙළට පෙළගැසෙන වෙලාවක, අවුරුදු 76ක දූෂිත දේශපාලනය අවසන් කරන්න පෙළගැසෙන වෙලාවක, ලෝකයේම මිනිස්සු රොද බැඳගෙන රටට එමින් තිබෙන වෙලාවක, පරණ වලව්වල, අගුපිල්වල රස්තියාදු නොවී නව පුනරුදයක දේශපාලන පෙරහැරට එකතු වෙන්න. එළඹෙන 21 රට අනුර බාර දෙන්න පෙළගැසෙන ජයග්‍රාහී පෙරහැරේ කොටස්කරුවෙකු වෙන්න කියන පණිවිඩය ගමට අරන් යන්න.

14 වැනිදා උදේ සෑම ග්‍රාම සේවා වසමකින්ම, සල්ගාදු පිට්ටනියට එන්න සූදානම් වෙලා ඉන්නවා. ඒ පණිවිඩයත් අරගෙන ගමට යන්න. හැම කෙනෙකුටම කියන්න. මුළු රටේම බලාපොරොත්තුව අපි හැමදාම සතුට සොයපු මිනිස්සු. ජීවිත කාලයම සතුට වෙනුවෙන් දුක් විඳපු මිනිස්සු. දරුවන්ගේ සතුට වෙනුවෙන් දවස් ගණන් නිදි මරපු මිනිස්සු. හේනෙ පැළේ, වෙළේ, දොළේ සතුට සොයපු මිනිස්සු. සතුට රැගෙන එන මහා දැවැන්ත පරිවර්තනයේ ආරම්භය ලබන 21දා. සමාජ පරිවර්තනයට මුල පුරන, ජනපති අනුරට රට බාර දෙන්න අවස්ථාව අපි හැමෝටම උදාවෙලා තිබෙනවා. ඒ වෙනුවෙන් 14දා අනුරාධපුරේ සූදානම් කරන විජයග්‍රාහී රැලියට එකතු වෙන්න. අවසන් දවස වෙනකම් මහන්සි වෙමු. ගෙයක් ගෙයක් ගානේ යමු. ඥාතීන්ට හිතවතුන්ට කතා කරමු. 20 වැනිදා රෑ හොඳට නිදා ගනිමු. 21 උදේම නැගිටින්න. නැගිටපු නැති අය අවදි කරන්න. උදව් ඕන අයට උදව් වෙන්න. 21 ඡන්ද පොළට ගිහිල්ලා සියලු දෙනාගේ එකම බලාපොරොත්තුව, ඡන්ද පෙට්ටිය මාලිමාවෙන් පුරවලා නියත ජනාධිපති අනුර කුමාර දිසානායක බවට පත්කරන මෙහෙයුම සාර්ථක කරමු. ඒ වෙනුවෙන් ඉදිරි දින කිහිපයේ අපි මහන්සි වෙමු. අපේ කාර්යභාරයේ අවසාන හෝරාව එළඹිලා තිබෙනවා. අපේ ජීවිත කාලයේ බලාපොරොත්තුවේ අවසන් හෝරාවට ඇවිත් තිබෙනවා. මේ සති දෙකත් ඔබට වෙහෙස දැනෙයි. සතුට සොයපු මිනිස්සුන්ට, අපේ දරුවන්ට දෙන්න තිබෙන වඩාම හොඳ තෑග්ග, ජීවිතේ දරුවන්ට දෙන්න තිබෙන වටිනාම තැග්ග, මේ සමාජ පරිවර්තනයයි. මේ සමාජ පරිවර්තනය අත්පත් කර ගැනීම වෙනුවෙන්, ඉටුකර ගැනීම වෙනුවෙන් මේ සියලු දෙනාම එකට එකතු කරමු. රටම එක මිටට එකතු කරලා 21දා ‘රටම එකට, රට අනුරට’ බාර දෙමු. ඒ වෙනුවෙන් පෙළගැසෙමු.

(-ජාතික ජන බලවේගයේ නීතිඥයෝ – මාධ්‍ය හමුව – 2024.09.06-)

ජාතික ජන බලවේගයේ නීතිඥයෝ ලෙස සංවිධානය කරන නීතිඥ ජාතික සමුළුව හෙට (7දා) ‘ටාජ් සමුද්‍රා’ හෝටලයේ දී පවත්වන්න සියලු කටයුතු සූදානම් කර තිබෙනවා. ඉතිහාසයේ දැවැන්තම නීතිඥ එකතුව ලෙස උදේ 930ට ජාතික ජන බලවේගයේ ජනාධිපති අපේක්‍ෂක, අනුර කුමාර දිසානායක සහෝදරයාගේ ප්‍රධානත්වයෙන් පවත්වනවා.
ජාතික ජන බලවේගය ජාතික විධායක සභාව, දිස්ත්‍රික් සභාව, ආසන සභාව සහ කොට්ඨාස සභාව කියන යාන්ත්‍රණය ඉහළ සිට පහළටත්, පහළ සිට ඉහළටත් ක්‍රියාත්මක කෙරෙමින් පවතිනවා. එය ශක්තිමත් කිරීම තුළින් සමස්ත ශ්‍රී ලාංකික ජනයා මෙන්ම වෙනත් විවිධ ක්‍ෂේත්‍රවල පිරිසත් සංවිධානය කිරීමේ හැකියාවක් ලැබුණා. භික්‍ෂුන් වහන්සේලාගේ සමුළුව, කාන්තා සමුළුව, හෙද සමුළුව, ගුරු සමුළුව වැනි සමුළු අතරට හෙට දවසේ පවත්වනු ලබන නීතිඥ සමුළුවත් එක් වන බව විශ්වාසයි. විජේදාස ලියනාරච්චි සහෝදරයාගේ ඝාතනයත් එක්ක ඉතිහාසයේ දැවැන්තම නීතිඥ ප්‍රජාවක් එකතු වුණා වාගේම අගවිනිසුරු ධුරයෙන් ශිරාණි බණ්ඩාරනායක නෙරපාහැරීමට එරෙහිවත් ඔවුන් ඉදිරියට ආවා. අරගලය අවස්ථාවේදීත් නීතිඥවරුන්ගේ එවැනිම ක්‍රියාකාරිත්වයක් තිබුණා. ඊටත් වඩා එහා ගිය එකමුතුවක් ටාජ් සමුද්‍රා හෝටලයේදී පවත්වන්න සූදානම් කර තිබෙනවා.

ආණ්ඩුක්‍රම ව්‍යවස්ථාවටත්, නීතියේ ආධිපත්‍යයට සහ විධානයටත් දැවැන්තම තර්ජනයක් එල්ල කර තිබෙන අවස්ථාවක මජර දේශපාලන සංස්කෘතිය පරාජය කර පුනරුද යුගයක් ඇති කිරීමට ජාතික ජන බලවේගයේ ජයග්‍රහණය වෙනුවෙන් විශාල බහුතර ජනතාවක් එක් වී සිටිනවා. ජාතික ජන බලවේගයේ ප්‍රතිපත්ති ප්‍රකාශනය එළිදක්වා තිබෙන අතර, රනිල් වික්‍රමසිංහ මහත්මයාගේ ලියැවිල්ලෙත්, සමගි ජන බලවේගයේ සජිත් ප්‍රේමදාස මහතාගේ ලියැවිල්ලෙත් යන දෙකේම පිටු 102ක ප්‍රතිපත්ති ප්‍රකාශන එළිදක්වා තිබෙනවා. අපේ ප්‍රතිපත්ති ප්‍රකාශනයේ පිටු 231ක් තිබෙනවා. මේ පිටු අතර තිබෙන දේවල් පරිශීලනය කිරීමේ දී වැදගත් කරුණු ගණනාවක් නිරීක්‍ෂණය කළ හැකියි. මෙවර ජනාධිපතිවරණයේදී දූෂිත කඳවුර සහ එයට එරෙහි අදූෂිත කඳවුර අතර තරගයක් පවතිනවා. මෙවර ජනාධිපතිවරණයේදී දූෂිත කඳවුර පරදවා අදූෂිත කඳවුර නියත වශයෙන්ම ජයග්‍රහණය කරනවා. තැපැල් ඡන්ද ඉලක්ක කරගෙන රාජ්‍ය සේවකයන් වෙන්දේසි කිරීමට අනෙක් කණ්ඩායම් උත්සාහ කරන අතර, ජාතික ජන බලවේගය තැපැල් ඡන්දවල විශාල ජයග්‍රහණයක් අපේක්‍ෂාවෙන් සිටිනවා. ඒ හමුවේ පරාජයෙන් බියගැන් වී සිටින පිරිස් රට තුළ අනියත බියක් නිර්මාණය කිරීමට විවිධ උත්සාහයන් දරනවා. ඒ සියලු උත්සාහයන් පරාජය කිරීමට ජාතික ජන බලවේගයේ නීතිඥයෝ කණ්ඩායම කටයුතු කරන බව අවධාරණය කරනවා.

“ඡන්දයෙන් පසුව කිසිදු ක්‍රියාවක් සම්බන්ධව අනියත බියක් ඇති කර ගත යුතු නැහැ”
-ජාතික ජන බලවේගයේ නීතිඥයෝ සංවිධානයේ නීතීඥ මොහාන් වීරකෝන්-

මේ වන විට අපේ රටේ නීතියේ ආධිපත්‍යය බොහෝ දුරට ගිලිහී තිබෙනවා. ශ්‍රේෂ්ඨාධිකරණය පවා ලබා දෙන තීන්දු නොසලකා හරිමින් ආණ්ඩුව ක්‍රියා කරන අතර, මුළු රටේම නීතිඥයන් ක්‍රියා කරන්නේ ‘නීතිය ඉදිරියේ සෑම කෙනාම එක සමානයි’ කියන යථාර්ථය ඇති කිරීමටයි. නමුත්, අද වෙන කොට පොහොසත් සහ බලවත් අයට මෙන්ම සාමාන්‍ය ජනතාවට වශයෙන් නීතිය දෙ ආකාරයකට ක්‍රියාත්මක වෙනවා. නීතිය ඉදිරියේ සෑම දෙනාම එක සමාන නම්, ජනාධිපති, මැති, ඇමැතිවරුන් සහ සාමාන්‍ය ජනතාවට භේදයක් නැතිව එක ලෙස ක්‍රියාත්මක කළ යුතුයි. නීති විරෝධීව ක්‍රියා කිරීම සම්බන්ධයෙන් පොලිස් අත්අඩංගුවට ගත් පිරිසක් නිදහස් කරගෙන යන්න බදුල්ලේ රාජ්‍ය ඇමැතිවරයෙක් ක්‍රියා කර තිබුණා. මෙවැනි තත්වයන්ට ඉඩ දිය යුතු නැහැ. අපගේ ආණ්ඩුවක් යටතේ මෙවැනි ක්‍රියාවලට කිසිසේත්ම ඉඩ දෙන්නේ නැහැ. ඒ වාගේම පාතාලයේ වැනි ක්‍රියා පැවැතීමට ඉඩ දෙන්නෙත් නැහැ. කුඩු ජාවාරම් සහ පාතලය මර්දනය කරන්න ‘යුක්තිය’ මෙහෙයුම ක්‍රියාත්මක කරන බව කියූ පොලිස්පතිවරයා එම ධුරයෙන් ඉවත් කළ පසු අපරාධ අඩු වී ඇති බව පැහැදිලියි.

මෙවැනි තත්වයක් තුළ අපේ රටේ නීතියේ ස්ථාවරත්වය සහ ස්වාධීනව ක්‍රියාත්මක කිරීම සම්බන්ධයෙන් හෙට පැවැත්වෙන සමුළුවේදී විශාල ශක්තියක් ලැබෙන බව විශ්වාසයි. අපේ නීති ප්‍රතිපත්ති ප්‍රකාශනය අනුව වෙනස් කළ යුතු නීති වෙනස් කර එකතු කළ යුතු අලුත් වගන්ති එකතු කරමින්, ඉදිරි කටයුතුවලට අත්තිවාරම දමනවා. විශේෂයෙන් ම මුදල් මත පිල් පැනීමට හෝ නැවැතී සිටීමට පාර්ලිමේන්තු මන්ත්‍රීවරුන්ට තිබෙන අවස්ථාව මුළුමනින්ම අහෝසි කරනවා. පොහොසත් රටක් ලෙස සාධාරණ සමාජයක් කරා යන ගමනේ සන්ධිස්ථානයක් වී තිබෙන 21 වැනිදා ඡන්දයෙන් පසුව කිසිදු ක්‍රියාවක් සම්බන්ධයෙන් අනියත බියක් ඇති කර ගැනීමට අවශ්‍ය නොවන බව මහජනතාවට අවධාරණය කරනවා. ජනතාවගේ ආරක්‍ෂාව සියයට සියයක් තහවුරු කරන්න අපි ක්‍රියා කරන බව අවධාරණය කරනවා.

“ස්ත්‍රිය දේශපාලන ධාරාවට සම්බන්ධ කර ගෙන බලගැන්වීම ගැන නීතිඥවරියක ලෙස සතුටු වෙනවා”
-ජාතික ජන බලවේගයේ නීතිඥයෝ සංවිධානයේ නීතිඥ චමිලා ගුණසේකර-

හෙට දිනය නීතිඥයන් සම්බන්ධයෙන් අපේ රටේ ඉතිහාසයේ සුන්දරම දිනයක් වේවි. යුක්තිය සහ සාධාරණත්වය රැඳෙන්නේ කොතැනද එතැනට සමස්ත නීතිඥ ප්‍රජාවම රොදබඳින ඒ සුන්දර දිනය ලෙස සැප්තැම්බර් 07 ඉතිහාසයට එක් වේවි. ජාතික ජන බලවේගය කෙරෙහි රටේ සමස්ත නීතිඥ ප්‍රජාවම තිබෙන කැපවීම පෙන්වීමට සූදානම්. ඒ වාගේම විශේෂයෙන්ම ජාතික ජන බලවේගයේ කාන්තා සංවිධානය ස්ත්‍රියගේ ශක්තිය කොපමණ ද යන්න ලෝකයටම ඔප්පු කර තිබෙනවා. කුටුම්භයේ න්‍යෂ්ටිය වන ස්ත්‍රිය දේශපාලන ධාරාවට සම්බන්ධ කරගෙන ඉතිහාසයේ නොවූවිරූ තරම් බලගන්වා තිබෙනවා. නීතිඥවරියක ලෙස මම ඒ පිළිබඳව සතුටු වෙනවා. දේශපාලන භූමිකාවට අමතරව සංස්කෘතික, අධ්‍යාපනික මෙන්ම සමාජීය අතින් කාන්තාවන් ඉදිරියට පැමිණ සිටිනවා. ලීලාවතී ආත්තම්මා අවුරුදු 97දී මාස්ටර්ස් උපාධිය ලබා ගැනීම සම්බන්ධයෙන් අපි කවුරුත් සතුටු වෙනවා. ඒ වාගේම යුද්ධය පැවැති සමයේ මායිම් ගම්මානයක දියණියක් ජාත්‍යන්තර ක්‍රීඩා තරගවලදී පදක්කම් අටක් ගත්තා. සුසන්තිකා ජයසිංහ අපේ රටේ නාමය ඉහළින් ඔසොවා තැබුවාට පසු ඒ දියණිය ලැබූ ජයග්‍රහණයම සොඳුරු උදාහරණයක්. මේ සියල්ල එක්ක අපට පැහැදිලි වන්නේ ජාතික ජන බලවේගයේ ජනාධිපති අපේක්‍ෂක, අනුර කුමාර දිසානායක සහෝදරයාගේ ජයග්‍රහණයෙන් ‘පොහොසත් රටක් – ලස්සන ජීවිතයක්’ උදා කර ගැනීම නුදුරේ දීම සිදු වන බවයි. අපේ රට ගොඩනැගීම ගැනීම සඳහා අපි සියලුම දෙනා තවදුරටත් එකතු වෙමු.

“21 වැනිදා ඡන්දයෙන් ජනසම්මතවාදී රජයක් පිහිටුවා ගන්න පුරවැසියන් සූදානම්”
-ජාතික ජන බලවේගයේ නීතිඥයෝ සංවිධානයේ නීතිඥ ජේ. එම්. විජේබණ්ඩාර-

ජාතික ජන බලවේගය පිහිටු වූ දා සිටම මේ රටේ බුර බුරා නැඟ එන ජනතා අවශ්‍යතාව වෙනුවෙන් ඉතාමත් පුළුල්ම මට්ටමකින් ලංකාව පුරා විහිදී විවිධ ක්‍ෂේත්‍රවල සංවිධානය වෙමින්, මෙවර ජනාධිපතිවරණයට මුහුණ දෙනවා. 2024 සැප්තැම්බර් 07 වැනි දින ජාතික ජන බලවේගයේ අපේක්‍ෂක, අනුර දිසානායක සහෝදරයා නීති වෘත්තිකයන් ආමන්ත්‍රණය කිරීම ඓතිහාසික සිදුවීමක් වේවි. රට පුරා නීතිඥයෝ ජාතික ජන බලවේගය සමඟ සංවිධානය වෙමින්, සංවාද කරමින්, නැවත නැවත ප්‍රශ්න කරමින් රට හදන ජාතික ජන බලවේගයේ ප්‍රතිපත්තිය බුද්ධියෙන් අනුමත කර තිබෙනවා. දහස් ගණනක් ඒ බව පැහැදිලිවම රටට කියන්න සූදානම්. තමන්ට කිසිදු මැතිවරණ සටන් පාඨයක් ගොඩනඟා ගන්න බැරි තරමට පිරිහුණු දේශපාලන පක්‍ෂ ජනාධිපතිවරණයට ඉදිරිපත් වී විවිධ අසත්‍ය ප්‍රචාර අපේ ප්‍රතිපත්ති ප්‍රකාශනය සම්බන්ධයෙන් ගෙන යනවා. ඔවුන් කොච්චර අසාර්ථකද කියනවා නම්, තමන්ගේ පක්‍ෂය අත්හැර ස්වාධීන යැයි කියමින් යන අතර, තව අපේක්‍ෂකයෙක් පසුගිය වර ඔහුගේ ප්‍රතිවාදී වූ සියලු දෙනා එක් කර ගනිමින්, ‘සලාද සන්ධානයක්’ ගොඩනඟමින් යනවා. මෙතෙක් රටේ ආණ්ඩු කළ පිරිස් සමඟ එක්ව කටයුතු කළ දේශපාලනඥයන් පිළිබඳව ජනතාව හොඳින්ම දන්නවා. ඇමැතිකමක් හෝ නියෝජ්‍ය ඇමැතිකමක් වෙනුවෙන් පිල් මාරු කළ කුප්‍රකට දේශපාලනය පිළිබඳව ජනතාව හොඳින්ම දන්නවා. ඒ කුප්‍රකට, ප්‍රතිපත්ති විරහිත ජනතා නියෝජිතයා ගැන පැහැදිලි අවබෝධයක් අපේ සමාජයට ඇති වී තිබෙනවා.

මේ නිසා ඔවුන් ඔළුවෙන් හිටගෙන ජාතික ජන බලවේගය සම්බන්ධයෙන් ජනතාව බියගන්වන ප්‍රකාශ සිදු කරමින් සිටිනවා. බැංකු ගිණුම් තහනම් කිරීම ගැන, වෙනත් දේපොළ අත්පත් කර ගැනීම ගැන ව්‍යාජ ප්‍රචාර කරමින් සිටිනවා. මෙම මස 22 වැනිදා ජාතික ජන බලවේගයේ රජයක් පිහිටුවන්නේ ජනතාව හම්බ කර ගත් දේපොළ, යාන-වාහන රජයට අත්පත් කර ගන්න නොවන බව ස්ථිර ලෙසම ප්‍රකාශ කරනවා. සමාජ මාධ්‍යවල මේ සම්බන්ධයෙන් පළ කෙරෙන ව්‍යාජ මත ජාතික ජන බලවේගයේ ඒවා නොවන බව අවධාරණය කරනවා. කුඩා වීඩියෝ පට මාර්ගයෙන් විවිධ සාවද්‍ය මත ජාතික ජන බලවේගය සම්බන්ධයෙන් ප්‍රචාරය කරමින් පවතිනවා. අපට ප්‍රකාශ කරන්න ප්‍රතිපත්ති තිබෙනවා. ඒ ප්‍රතිපත්ති ගැන ජනතාව සමඟ සංවාදයේ යෙදෙනවා. ප්‍රතිපත්ති ක්‍රියාත්මක කරන ආකාරය ගැන පැහැදිලි කිරීම් කරනවා. අපේ ප්‍රතිපත්ති ගැන ඕනෑම බුද්ධිමය සංවාදයකට අපි සූදානම්.

බුද්ධාගමට ප්‍රමුඛත්වය දෙන බව ආණ්ඩුක්‍රම ව්‍යවස්ථවේ නව වැනි වගන්තියේ සඳහන් වෙනවා. ඒ වගන්තිය අනෙකුත් ආගම් අදහන අයටවත්, මේ රටටවත් කිසිම ප්‍රශ්නයක් වී නැහැ. එනිසා ඒ සම්බන්ධයෙන් යවන ප්‍රචාර හුදු මඩ ප්‍රචාර විතරයි. ජනතාව තුළ අවිනිශ්චිතතාවක් ඇති කරන්න දරන උත්සාහයන් විතරයි. පශ්චාත් මැතිවරණ ප්‍රචණ්ඩ ක්‍රියා සම්බන්ධයෙන් යවන ප්‍රචාරත් ඒ වාගේමයි. ජාතික ජන බලවේගයත් එයට පෙර ජනතා විමුක්ති පෙරමුණත් මන්ත්‍රීවරුන් ලෙස පාර්ලිමේන්තුවේ අත උස්සා තිබෙන්නේ ජනතාවගේ යහපත වෙනුවෙන් වූ යෝජනාවලට පමණයි. විරුද්ධ වී තිබෙන්නේ ජනතාවගේ යහපතට එරෙහි වූ යෝජනාවලට පමණයි. ඒ බව මේ රටේ හෘදය සාක්‍ෂියක් තිබෙන ඕනෑම පුරවැසියෙක් දන්නවා. සැප්තැම්බර් 21 වැනිදා ඡන්දයෙන් ජනසම්මතවාදී රජයක් පිහිටුවා ගන්න පුරවැසියන් සූදානමින් සිටිනවා. ඒ වාගේම ජනසම්මතවාදී ජනාධිපතිවරයෙක් පත් කර ගන්නත් සූදානම්. මැතිවරණයෙන් පසු ඒ ජයග්‍රහණය රටේ සියලුම දෙනා සමඟ ප්‍රීතියෙන් භුක්ති විඳිනවා හැර දශමයකින් හෝ කිසිවෙකුට පීඩාවක් නොකෙරෙන බව පැහැදිලිව ප්‍රකාශ කර සිටිනවා. ජාතික ජන බලවේගය සම්බන්ධයෙන් යම් පැහැදිලි කිරීමක් අවශ්‍ය නම්, රට පුරා සිටින ක්‍රියාකාරිකයන්ගෙන් වාගේම සංවිධානවලින් පැහැදිලි කර ගන්නා ලෙස ජනතාවගෙන් ඉතාමත් ඕනෑකමින් ඉල්ලා සිටිනවා.

“නීතිඥයෝ කියන්නේ ජනතාවට සංවේදී වාගේම ඉතා හොඳ දේශපාලන ඉවක් තිබෙන පිරිසක්”
-ජාතික ජන බලවේගයේ නීතිඥයෝ සංවිධානයේ ජනාධිපති නීතිඥ උපුල් කුමරප්පෙරුම-

හෙට පැවැත්වෙන නීතිඥ සමුළුවට අපි අපේක්‍ෂා කළේ 1,500ක පමණ පිරිසක් සහභාගි කර ගන්නයි. නමුත්, දැන් ලැබෙන තොරතුරු අනුව 2,500කට වැඩි පිරිසක් සහභාගි වන බව තහවුරු වී තිබෙනවා. නීතිඥයෝ කියන්නේ ජනතාවට සංවේදී වාගේම ඉතා හොඳ දේශපාලන ඉවක් තිබෙන පිරිසක්. රජයක් පිස්සු නටනවා නම්, කළ යුත්තේ කුමක්ද යන්න නීතිඥ ප්‍රජාවට ඉතා හොඳින් තේරුම් ගන්න පුළුවන්. මෙරට ඉතිහාසයේ එක් එක් යුගවල දී රටට සහ ජනතාවට එරෙහිව රජයන් ක්‍රියා කළ අවස්ථාවල නීතිඥ ප්‍රජාව ඉදිරියට ආවා. විජේදාස ලියනාරච්චි සිද්ධිය, ශිරාණි බණ්ඩාරනායක සිද්ධිය පමණක් නොවෙයි ආර්ථික අවපාතයත් සමඟ ඇති වුණු මහජන උද්ඝෝෂණවලදී පවා ඒ බව තහවුරු කර තිබෙනවා. මේ රට මේ තැනට පත් කළ දේශපාලනඥයන්ට විරුද්ධව එකතු වන නීතීඥ බලවේගය හෙට දිනයේ දකින්න පුළුවන්. මෙම අවස්ථාවට ප්‍රධාන ශාලාව ඉඩ මඳි වුවහොත්, විකල්ප සංවිධානය කර තිබෙනවා. ඔබේ පැමිණීම කියන්නේ මේ රට වෙනස් මාවතකට ගෙන යන්න දරන උත්සාහයේ විශාලම කොටසක් වෙනවා.

මාධ්‍යවේදීන් නැඟූ ප්‍රශ්නවලට පිළිතුරු දෙමින්:

ප්‍රශ්නය: ජනාධිපතිවරයා පසුගිය දිනක කියා තිබුණා, සජිත් ප්‍රේමදාසට වඩා අනුර දිසානායක ඉදිරියෙන් සිටින බව. ඒ කියන්නේ, ඔබලා ආණ්ඩුවත් සමඟ කටයුතු කරන්න සූදානම් කියන එක ද?

පිළිතුරු: ජාතික ජන බලවේගයේ ආණ්ඩුවක නියෝජිතයන් ඒ ආණ්ඩුවත් එක්ක වැඩ කරනවා මිස රනිල් වික්‍රමසිංහගේ බංකොලොත්භාවයේ අවසානම තැන සිටීම පිළිබඳව කල්පනා කරන්නේ නැහැ. ඔහු ඔය උත්සාහ කරන්නේ සමාජය තුළ යම් ව්‍යාකූල මතයක් නිර්මාණය කර එහි වාසිය ලබා ගන්නයි. නමුත්, ජනතාව ඔහුට වඩා ඉදිරියෙන් සිටිනවා. මම තව උදාහරණයක් කියන්නම්. ජාතික ජන බලවේගයේ රජයක් යටතේ ලංකාවේ ආර්ථිකය කඩාවැටෙන බවට ඔහු පසුගිය කාලයේ ප්‍රකාශයක් කරමින් සිටියා. ඒ වාගේම කොටස් වෙළෙඳපොළේ කඩාවැටීමක් තිබෙන බව සමාජගත කරමින් සිටියා. නමුත්, ජාතික ජන බලවේගයේ ව්‍යාපාරික හමුව පැවැති අවස්ථාවට ලංකාවේ විදේශ තානාපති කාර්යාලවල නියෝජිතයන් පැමිණ සිටියා. ලංකාවේ සිටින ඉහළම මට්ටමේ ව්‍යාපාරිකයන් පැමිණ සිටියා. එම සමුළුවේදී අනුර දිසානායක සහෝදරයා පැහැදිලිව ප්‍රකාශ කළේ රනිල් වික්‍රමසිංහ ගෙන යන ප්‍රචාරවලට හසු වෙන්න එපා කියලා. පසු දා ඉඳලාම කොටස් වෙළෙඳපොළ ඉහළ යන්න පටන් ගත්තා. මෙයින් පෙනෙන්නේ රනිල් වික්‍රමසිංහලාට ඕනෑ ඕනෑ දේ කරන්න බැරි තරමට ජනතාව විසින් ඔවුන් ප්‍රතික්‍ෂේප කර ඇති බවයි.

ඒ වාගේම විශාල මඩ අවලාද කැම්පේන් එකක් දියත් කර තිබෙනවා. එය පොදුජන පෙරමුණ, යූ.එන්.පී. ය, ස.ජ.බ. කරනවාද කියලා වෙන් කර හඳුනා ගන්න බැහැ. තුන්ගොල්ලොම එකතු වී පොදු මධ්‍යස්ථානයකින් කරනවාද කියන ප්‍රශ්නය ඇති වී තිබෙනවා. මෑතක දී ජාතික ජන බලවේගයේ ලිපි ශීර්ෂයක ජාතික ආරක්‍ෂක කමිටු පිහිටුවන බවට අනුර කුමාර සහෝදරයාගේ අත්සන යොදන ලද ව්‍යාජ ලිපියක් මුදාහැර තිබුණා. මඩ ප්‍රචාර එකතු කරන මධ්‍යස්ථානයක් ලෙස සඳහන් දුරකථන අංකයක් විශ්‍රාමික ත්‍රිවිධ හමුදා සාමුහිකයේ ප්‍රධානී, අරුණ ජයසේකර මහත්මයාගේ අත්සන ව්‍යාජ ලෙස නිකුත් කර තිබුණා. ඒ වාගේම අපි නිර්මාණය කළ දැන්වීමක් විකෘති කරමින්, ප්‍රචාරය කරමින් තිබෙනවා. හඳුන්නෙත්ති සහෝදරයා සම්බන්ධයෙනුත් එවැනිම මඩ ප්‍රචාර යවනවා. මෙවැනි කැත ප්‍රචාර දිගින් දිගටම යවන්නේ අපේ ජයග්‍රහණය ස්ථිර නිසයි.

පාහියන්ගල ආනන්ද සාගර කියන හාමුදුරුවෝ හරිම කැත වැඩක් කළා. අපේ ප්‍රතිපත්ති ප්‍රකාශනය යනුවෙන් හඳුන්වමින්, සිදු කළ ප්‍රකාශයකට අධිකරණය ඉදිරියේ උත්තර දෙන්න උන්වහන්සේට සිදු වෙනවා. මේ වාගේ කැත, නින්දිත, වෛරී ප්‍රචාර යවමින්, ජාතික ජන බලවේගය සම්බන්ධ ජනමතය වෙනස් කරන්නට උත්සාහ කරනවා. නමුත්, මේ වන විටත් තහවුරු වී තිබෙන්නේ ඒ කිසිවකින් ජාතික ජන බලවේගයේ ජයග්‍රහණය දශමයකින්වත් අඩු කළ නොහැකි බවයි. 22 වැනිදාට පසු නීතිය සැමට සාධාරණ ලෙස ක්‍රියාත්මක වීම යටතේ ඔවුන්ට අධිකරණය ඉදිරියේ පෙනීසිටින්න සිදු වේවි. ජාතික ජන බලවේගයට විරුද්ධව මඩ ප්‍රචාර ගෙන යන්නේ මේ සියල්ලන්ගේ එකතුවකින් බව පැහැදිලියි.

(-‘රට අනුරට’ ජාතික ජන බලවේගයේ විජයග්‍රාහී රැලිය – කිලිනොච්චිය – 2024.09.05 – සමුපකාර සංස්කෘතික ශාලාව-)

දීර්ඝ කාලයක් තිස්සේ මේ රටේ ජනතාව ඡන්දය පාවිච්චි කර තිබෙනවා. ඔබත් විවිධ කාලවල විවිධ පක්ෂවලට ඡන්දය දී තිබෙනවා. සමහර අවස්ථාවල ඡන්දය වර්ජනය කරලත් තිබෙනවා. අපේ රටේ ජනතාව විවිධ ආණ්ඩු හදලා තිබෙනවා. ආපසු හැරිලා බලන කොට එම ආණ්ඩු අපේ රට විශාල විනාශයකට ඇද දමා තිබෙනවා. ජාතිවාදය ඇති කළා. ආගම්වාදය නිර්මාණය කර රට වැට්ටුවා. ආර්ථික වශයෙන් වැට්ටුවා. ජනතාව දුප්පත් කළා. රටේ යුද්ධ ඇති කළා. අධ්‍යාපනය, සෞඛ්‍යය කඩා වැට්ටුවා. ඒවා ජනතාවට අවශ්‍ය දේ නොකරපු ආණ්ඩු. නමුත් ඒ ගොල්ලෝ දියුණු වුණා. පොහොසත් වුණා. අපි ඔබ හමුවීමට ආවේ ඒ පරණ විධියට ඡන්දය පාවිච්චි නොකර අලුත් විධියට ඡන්ද පාවිච්චි කරන්න කියලා ඉල්ලන්න.

ඒ විශේෂයෙන්ම අපි දන්නවා උතුර පළාතේ ජීවත් වෙලා ඉන්න තරුණ තරුණියන්ගේ විශාල වෙනසක් ඇති වී තිබෙනවා. අලුත් පරම්පරාව පැරණි දේශපාලනයෙන් මිදී තිබෙනවා. ඉතිහාසයේ පළමු වතාවට අපේ රටේ පහළ පංතියේ මිනිසුන්ට බලය ලබා ගැනීමේ අවස්ථාව උදාවෙලා තිබෙනවා. මේ සැප්තැම්බර් 21 පැවැත්වෙන මැතිවරණයේදී ජාතික ජන බලවේගයට ජයග්‍රහණය කරන්න පුළුවන්. රජයේ කාර්යාලවල, හමුදා කඳවුරුවල, පොලිස් ස්ථානවල, තැපැල් ඡන්දය පාවිච්චි වූ අන්දම ඔබ දන්න අයගෙන් සොයලා බලන්න. ඒ හැමතැනම ජාතික ජන බලවේගය වෙනුවෙන් ඡන්ද පාවිච්චිය 75% – 80% පැනලා තිබෙනවා. ඒ නිසා අපිට ජයග්‍රහණය පිළිබඳ සැකයක් නැහැ. නමුත් අපිට දකුණේ ජනතාවගේ ඡන්දයෙන් විතරක් ජයග්‍රහණය කරලා ප්‍රමාණවත් නැහැ. උතුරේ ජනතාවගේ ඡන්දයද අපිට අවශ්‍යයි.

මීට කලින් රටේ හැදුණේ උතුරේ ජනතාව විසින් ප්‍රතික්ෂේප කරපු ආණ්ඩු. 2005 ඡන්දයේදී උතුරේ ජනතාව වැඩි ප්‍රමාණයක් ඡන්දය වර්ජනය කළා. 2010 ඡන්දයේදී ෆොන්සේකාට ඡන්දය දුන්නා. ඔබ පැරදුණා. 2019 ගේඨාභයට විරුද්ධව ඡන්දය දුන්නා. ඒත් පැරදුණා. හැබැයි මේ සැරේ මාලිමාවට ඡන්දය දෙන්න. උතුරේ දකුණේ අපි හැමෝටම එකට එකතු වෙලා දිනන්න පුළුවන්. අපි ආණ්ඩුව හදන්නේ මැති ඇමතිවරුන්ට, ජනාධිපතිවරුන්ට මහජනයාගේ ධනය නාස්ති කරමින් සුඛෝපභෝගී ජීවිත ගෙවන්න දෙන්න නොවෙයි. අපි ආණ්ඩුව හදන්නේ උතුරු නැගෙනහිර ඇතුළු රටේ ජීවත්වෙන සියලු ජනතාවට හොඳ ජීවිතයක් ලබා දෙන්නයි. මේ කඩා වැටී තිබෙන රට දියුණු කරන්නයි. අපි ආණ්ඩුව හදපු දවසේ සිට ජනතාවගේ ජීවිත දියුණු කරන්න. රට පොහොසත් කරන්න වැඩ කරනවා. අපි දැනට අලුත් ආණ්ඩුක්‍රම ව්‍යවස්ථාවක් ගේන්න සැලසුම් කර තිබෙනවා. සියලු ජනතාවගේ අයිතීන් තහවුරු කරන එම ආණ්ඩුක්‍රම ව්‍යවස්ථාව හා එහි නීතිවලින් පමණක් ජනතාවගේ ප්‍රශ්න විසඳන්න බැහැ.

මේ ගම්වල ප්‍රශ්න විසඳීමට නම් කරුණු කිහිපයක් සම්පූර්ණ කළ යුතුයි. දරුවන්ට හොඳ අධ්‍යාපනයක් ලබා දිය යුතුයි. අපි ඉතාම ශක්තිමත් වැඩපිළිවෙළක් හදා තිබෙනවා. ගම්වල ඉන්න දරුවන්ගේ අධ්‍යාපනය දියුණු කරන්න. පාසල්වල ගුරු පුරප්පාඩු පුරවන්න. ඒවායේ පහසුකම් වැඩි කරන්න. දරුවන්ට, මව්පියන්ට, බරක් වූ මේ අධ්‍යාපන ක්‍රමය වෙනස් කර රටේ අධ්‍යාපනය හොඳ තැනකට ගේන්න. ඉගෙන ගත් දරුවන්ට හොඳ අනාගතයක් හදන්න. කොච්චර මහන්සි වුණත් දරුවන්ට අද හොඳ අධ්‍යාපනයක් දෙන්න අපේ මව්පියන්ට නොහැකි වී තිබෙනවා. ජාතික ජන බලවේගය හදන්නේ ඔබේ දරුවන්ට හොඳ අධ්‍යාපනයක් ලබාදෙන ආණ්ඩුවක් බව අපි ඔබට සහතික වෙනවා. මේ කිලිනොච්චි ප්‍රදේශයේ විශාල ජනතාවක් ජීවත් වන්නේ කෘෂිකර්මාන්තයෙන්. මේ පළාත්වල ජනතාව දුප්පත්භාවයෙන් මුදා ගන්න නම් කෘෂිකර්මාන්තය සංවර්ධනය කළ යුතුයි. අද අපේ රටේ කෘෂිකර්මාන්තය බිඳ වැටිලා. හොඳ බීජ ලබා ගැනීමට අපහසුයි. ඒ නිසා බීජ පර්යේෂණ ආයතන දියුණු කරලා ගොවි ජනතාවට හොඳ වර්ගයේ බීජ ලබා දෙන්න අපි වැඩපිළිවෙළක් හදලා තිබෙනවා. ඒ වගේම මේ පළාත්වල තිබෙන ඉඩම් මේ පළාත්වල ජනතාවට කෘෂිකර්මාන්තය සඳහා ලබා දිය යුතුයි. එනිසා ඊට අදාළ ඉඩම් ජනතාවට නොමැති නම් අපි ඉඩම් ලබාදීමේ වැඩපිළිවෙළක් හදනවා. ඊළඟට කෘෂිකර්මාන්තය සඳහා තිබෙන ප්‍රධාන ගැටලුව තමයි ඒ සඳහා අවශ්‍ය ජලය හිඟවීම. දැන් ගොවි මහතෙකු මට ලිපියක් ලබා දුන්නා. මේ පළාතේ සුළු හා මධ්‍ය පරිමාණයේ වැව් 126ක් ඇතුළු වැව් 400කට වඩා තිබෙනවා කියලා. අපි අවුරුද්දක් ඇතුළත මේ සියලු වැව් ප්‍රතිසංස්කරණය කරලා දෙනවා. එතකොට බීජ තිබෙනවා. ජලය තිබෙනවා. ඉඩම් තිබෙනවා. ඔබට එවිට වගා කරන්න පුළුවන්. ඒ සඳහා අවශ්‍ය වන පොහොර සහ අනෙකුත් යෙදවුම්වලට සහනාධාරයක් දෙන්න අපි සැලසුම් කර තිබෙනවා. ඒ වගේම ඔබගේ නිෂ්පාදනවලට හොඳ මිලක් ලබාදෙන්න අපි කටයුතු කරනවා. එහෙම වුණාම ගොවි ජනතාවගේ ආදායම වැඩිවෙන්න පටන් ගන්නවා.

මේ පළාත්වලත් දැන් මත්ද්‍රව්‍ය, මත් කුඩු උවදුර විශාල ලෙස පැතිරෙමින් යනවා. මේ මත්ද්‍රව්‍ය ජාවාරම් පසුපස ඉන්නේ දේශපාලකයනුයි. කිලිනොච්චියේ හෝ ලංකාවේ කුඩු හදන්නේ නැහැ. මේ ඔක්කොම එන්නේ පිටරටින්. දේශපාලනික ඇඟිලි ගැසීම් නැතිනම් නීතිය හරියට ක්‍රියාත්මක වෙනවා නම් මේ උවදුර මර්දනය කළ හැකියි. අපි ඉතා කෙටි කාලයක් ඇතුළත මේ මත්ද්‍රව්‍ය උවදුරෙන් ලංකාව බේරා ගන්නවා. හැම දෙනාටම සමානව නීතිය ක්‍රියාත්මක වෙන අපි රටක් හදන්න ඕනෑ. කතාකරන භාෂාව, අදහන ආගම, තම තමන්ගේ සංස්කෘතියට අනුව නීතිය එක එක විධිහට ක්‍රියාත්මක වෙන්න බැහැ. හැමෝටම සමානව නීතිය ක්‍රියාත්මක වෙන රටක් අපි ගොඩනඟනවා. අපේ දේශපාලකයෝ නීතියට යටත් නැහැ. නීතියට වඩා උඩින් ඉන්නේ. ඒ නිසා අපි දේශපාලකයාවද නීතියට යටත් වෙන රටක් හදනවා.

මේ රට මෙච්චර දුප්පත් වෙන්න දේශපාලකයන් කරන හොරකම්, නාස්තිය හේතුවෙලා තිබෙනවා. අපි හොරකමෙන්, නාස්තියෙන් තොර රටක් හදනවා. අපේ ආණ්ඩුවක මම හෝ අපේ කිසිම මන්ත්‍රීවරයෙකු හෝ ඇමතිවරයෙකු හොරකම් නොකරන බවට ඔබට සහතික වෙනවා. ඒ විතරක් නොවෙයි, මහජනයාගේ දේපොළ හොරකම් කරපු, නාස්ති කරපු සියලු දෙනාවම අධිකරණයට ගෙන යනවා. අධිකරණය මගින් ඔවුන්ට දඬුවම් ලබා දෙනවා. ඒ විතරක් නොවෙයි, හොරකම් කරපු දේපොළත් අපි ආපසු ගන්නවා. මේ රටට මේ විනාශය ඇති වූයේ මේ හොරු නිසා. මේ අය ආණ්ඩු හදාගන්නේ මහජන ධනය සොරකම් කරන්න. නාස්ති කරන්න. එය නතර කළ යුතු නොවේද? මේ රටේ මහජන ධනය හොරකම් නොකරන ආණ්ඩුවක් අවශ්‍ය නම්, නාස්තිය නතර කරන ආණ්ඩුවක් ඕනෑ නම් ඒක තමයි ජාතික ජන බලවේගයේ ආණ්ඩුව.

අපි දන්නවා පසුගිය යුද්ධය හේතුවෙන් ස්වාමියා අහිමි වූ, දරුවන් අහිමි වූ පවුල් විශාල ප්‍රමාණයක් අපේ රටේ ඉන්නවා. ජනතාවට ජීවත් වෙන්න හරිහමන් ආදායමක් නැහැ. ඒ නිසා අපි ඉගෙන ගන්න අපහසු, ආහාර ගන්න බැරි, බෙහෙත් ටික ගන්න බැරි ජීවත් වෙන්න බැරි හැම පවුලකටම රුපියල් දසදහසක අවමයකට යටත්ව මාසික දීමනාවක් ලබා දෙන්න අපි සැලසුම් කොට තිබෙනවා. කෙටි කාලයක් ඇතුළත විදුලි බිල අඩු කරන්න සැලසුම්කොට තිබෙනවා. ඒක අපි කරනවා. අධ්‍යාපනය, සෞඛ්‍යය, ආහාර සඳහා ගසා තිබෙන වැට් බදු අපි මුළුමනින්ම ඉවත් කරනවා. ජනතාවට ජීවත් වෙන්න පුළුවන් පරිසරයක් අපි ගොඩනඟනවා. මේ පළාත්වල බාගෙට හදපු ගෙවල් විශාල ප්‍රමාණයක් තිබෙනවා. ඒ ගෙවල් සම්පූර්ණ කර ගැනීම සඳහා අපි ඒ අයට ආධාර දෙන්න සූදානම් කර තිබෙනවා. එවිට ඔබට ආදායම් මාර්ගයක් තිබෙනවා. දරුවන්ට උගන්වන්න පුළුවන්. හොඳ නිරොගී සම්පන්න ජීවිතයක් හදා ගන්න පුළුවන්. හොඳ වාතාශ්‍රයක් සහිත නිවසක් හදා ගන්න පුළුවන්. ඔබට සතුටින් ඉන්න පුළුවන් ජීවිතයක් සහිත රටක් අපි ගොඩනඟනවා. අපේ රට හැම පැත්තෙන්ම හොඳ පිහිටීමක් තිබෙන, පරිසරයක් තිබෙන රටක්. මෙච්චර හොඳ රටකට මේ විනාශය ගෙනාවේ මෙතෙක් රට පාලනය කළ දේශපාලකයෝ සහ ඔවුන් හදපු ආණ්ඩු විසිනුයි. ඒ නිසා අපි රටත් ජනතාවත් ජීවත් කරවන ආණ්ඩුවක් හදාගමු.

දකුණෙන් ලැබෙන ආරංචි අනුව ජාතික ජන බලවේගය ඉහළින්ම සිටින බව ඔබට තේරෙනවා ඇති. අපි ඔබෙන් ඉල්ලා සිටින්නේ ඒ ජයග්‍රහණයේ කොටස්කරුවන් බවට කිලිනොච්චියේ ජනතාව වන ඔබත් දායක වෙන්න කියලා. ඒ සඳහා මෙහි සිටින අපේ සහෝදර සහොදරියන් විශාල වෙහෙසක් දරා වැඩකරනවා. තව සති දෙකයි තිබෙන්නේ. මේ සති දෙක අපේ රටේ අනාගතය තීරණය කරනවා. පැරණි අසාර්ථක පාරෙම අපේ රට ගෙනියන්න ඉඩ දෙනවාද? නැතිනම් මේක වෙනස් කරන්න තීරණයක් ගන්නවාද? අපි ඔබගෙන් ඉල්ලා සිටින්නේ පැරණි පාරෙන් මිදිලා අපෙ රට අලුත් පාරකට ගෙනියන්න, රට අලුත් පරිවර්තන යුගයකට ගෙනියන්න පෙරට එමු. ඒ සඳහා මේ 21 වැනිදා ජාතික ජන බලවේගය දිනවන්න වැඩ කරමු, ඡන්ද පෙට්ටියේ ඡන්ද පිරවීම තිබෙන්නේ ඔබ අතේ. ඒ කාර්යය ඔබ බාර ගන්න. තමන්ගෙ ගමේ අනෙක් පවුල් සමග ගතා කරන්න; ඥාතීන් හමුවන්න; යාළුවන් හමුවන්න. මේ රට වෙනස් කරන්න ජාතික ජන බලවේගයට ඡන්දය දෙන්න කියලා කතා කරන්න. මෙච්චර කල් අපේ රටේ තිබුණේ රැවටීමේ දේශපාලනය. අපි කරන්නේ ඒ දේශපාලනය නොවෙයි. අපි කිසිදිනෙක අපේ පක්ෂය ජාතිවාදයට වැටෙන්නේ නැහැ. සිංහල, දෙමළ, මුස්ලිම් අපි ඔක්කෝම එකතු වෙලා සමගි සම්පන්න රටක් හැම අතින්ම දියුණු රටක්, ලෝකය ඉදිරියේ අභිමානයෙන් ජීවත් වෙන්න පුළුවන් රටක් ගොඩනගමු.

(-NPP මැතිවරණ නිරීක්ෂණ මධ්‍යස්ථානයේ මාධ්‍ය හමුව – 2024.09.05-)

ජාතික ජන බලවේගයේ මැතිවරණ නිරීක්ෂණ මධ්‍යස්ථානයට සමස්ත පැමිණිලි 295ක් ලැබී තිබෙනවා. නිීති විරෝධී ප්‍රචාරණ කටයුතු 159ක්, නීත්‍යානුකූල මැතිවරණ ව්‍යාපාරයට බාධා කිරීම් 06ක්, ප්‍රචණ්ඩ ක්‍රියා 20ක්, මහජන මතයට අනිසි බලපෑම් කිරීම් 73ක්, රාජ්‍ය සම්පත් අවභාවිතා කිරීම් 54ක්, රාජ්‍ය නිලධාරීන් මැතිවරණ ව්‍යාපාරයට යොදා ගැනීම් 25ක් වාර්තා වෙනවා. මේ ආකාරයට අපි වර්ගීකරණය කර තිබෙන නීති විරෝධී ක්‍රියා සමහර අවස්ථාවල එකම සිදුවීම අංශ දෙකකට ඇතුළත් වෙනවා. මේ නිසා සමස්ත පැමිණිලි සංඛ්‍යාව වන 295ට වඩා එක් එක් පැමිණිලි වර්ගීකරණවල එකතුව ඉහළ අගයක් ගත හැකියි.

සමගි ජන බලවේගයේ රැස්වීම්වලදී ආහාරපාන බෙදාදීම් දිගින් දිගටම වාර්තා වෙනවා. ඒ සම්බන්ධයෙන් මැතිවරණ කොමිසම දැනුවත් කරමින් සහ පැමිණිලි කරමින් කරුණු ඉදිරිපත් කරනවා. සමගි ජන බලවේගයේ කාර්යාලයක් රත්මලාන දුම්රිය නිල නිවාසයක පවත්වාගෙන යනවා. විපක්ෂ නායකයෙක් වශයෙන් සජිත් ප්‍රේමදාස අපේක්ෂකයා රාජ්‍ය දේපළ අවභාවිතා කිරීමක්, ඒ වගේම අපේක්ෂකයන්ගේ පුවරු ප්‍රදර්ශනය කිරීමට අමතරව වෙනත් අයගේ ඡායාරූප ඔවුන්ගේ මැතිවරණ කාර්යාලවල ප්‍රදර්ශනය කරනවා. නීති ගරුක රටක් හදන බව ප්‍රකාශ කිරීම භාවිතයෙන්ම ඔප්පු කරන්න තමන්ගේ මැතිවරණ ව්‍යාපාරය තුළත් ඒ ආකාරයෙන් කටයුතු කරන ලෙස අවධාරණය කරනවා. මැතිවරණ කාලයේවත් නීතිය අනුව කටයුතු කරන්න බැරි නම්, එයින්ම ඔවුන්ගේ විනය සම්බන්ධයෙන් තක්සේරු කරන්න පුළුවන්.

ඒ වගේම ස්වාධීන අපේක්ෂකයෙක් ලෙස ඉදිරිපත් වෙන බව කියන රනිල් වික්‍රමසිංහ මහතා ඔහුගේ මැතිවරණ ප්‍රචාරක කටයුතු තුළ මැතිවරණ නීති උල්ලංඝනය කරමින් ජාතික කොඩිය භාවිතා කරනවා. අධිකරණ දඬුවමක් ලෙස මන්ත්‍රී ධුරය අහිමි වූ මනුෂ නානායක්කාර විදේශ රැකියා නියුක්ති කාර්යාංශයේ වාහන මැතිවරණ ප්‍රචාරක කටයුතුවලට භාවිතා කරනවා. පාර්ලිමේන්තු මන්ත්‍රි ධුරයෙන් නෙරපා හැරි පසු ඔහු විදේශ රැකියා අමාත්‍යාංශයේ ජනාධිපති උපදේශක ලෙස පත් කළේ මෙවැනි වැඩ කර ගන්නයි. රනිල් වික්‍රමසිංහ මහතාට මෙන්ම මනුෂ ඇතුළු පිරිසට අපි අවධාරණය කරන්නේ මහජන මුදල් අවභාවිතා නොකරන ලෙසයි. රනිල් වික්‍රමසිංහගේ වේදිකා හැදීමට හමුදාව, පොලීසිය සහ සිවිල් ආරක්ෂක අංශයේ සාමාජිකයන් හම්බන්තොට, මොනරාගල, ජාඇල යන ස්ථානවලදී යොදගෙන තිබෙනවා. නිල ඇඳුමෙන් බැහැරව එම පිරිස් යොදා ගැනීම පිළිබඳව විස්තර අපි සතුව තිබෙනවා. මීගමුවේ මැතිවරණ කාර්යාලයක් ඉදිකිරීමට එම නගර සභා සේවකයන් යොදාගෙන තිබෙනවා. ඊට අමතරව ගුවන්තොටුපළ නිලධාරීන් සියයක් හදිසියේ බඳවාගෙන ඔවුන්ට රාජකාරි නිවාඩු ලබාදී සැප්තැම්බර් 02වැනිදා සිට මැතිවරණ කටයුතු වෙනුවෙන් යොදා ගනිමින් සිටිනවා. ත්‍රීවිල් රථ සංගම්වල නිලධාරීන් ජනාධිපති ලේකම් කාර්යාලයට ගෙන්වාගෙන ඔවුන්ට මුදල් ලබාදී ත්‍රීවීල්වල “පුළුවන් ශ්‍රී ලංකා” ස්ටිකර් එක අලවන්න බලපෑම් කර තිබෙනවා. අපි ඒ සම්බන්ධ පැමිණිලි කිරීමෙන් පසු පොලීසිය මැදිහත්වී එය නැවැත්වූවා. නමුත් පසුව එය යළි ක්‍රියාත්මක කර තිබෙනවා. මේ සම්බන්ධ වීඩියෝ සාක්ෂි සහ වෙනත් ලිඛිත සාක්ෂි අපට තිබෙනවා.

ස්වාධීන කොමිෂන් සභාවල නිලධාරීන්ට බලපෑම් කිරීම ඇතුළු නීති උල්ලංඝනය කරන්න පමණක් රනිල් වික්‍රමසිංහට පුළුවන්. ලංකාව ගොඩනඟන්න බැරි වුණාට ඔහුට රටේ නීතිය කඩන්න පුළුවන්. තැපැල් ඡන්ද ප්‍රකාශ කිරීම ආරම්භ කළ 04 වැනිදා ඡන්ද ප්‍රතිඵලය ලෙස අරෝෂ් ප්‍රනාන්දු කියන පුද්ගලයා ඔහුගේ සමාජ මාධ්‍යවලින් ව්‍යාජ ප්‍රචාරයක් පටන් ගත්තා. ඔහු ගැන්ස්ට රත්නේ කියන ව්‍යාජ ගිණුමෙන් ගෙන යන ප්‍රචාරයන් සොයා බැලීමේදී හෙළි වූයේ ජනාධිපති මාධ්‍ය අංශයේ කරුණු පරීක්ෂා කිරීමේ නියෝජ්‍ය අධ්‍යක්ෂ අරෝෂ් ප්‍රනාන්දු එම ව්‍යාජ තොාරතුරු ප්‍රචාරය කරන බව හෙළිවෙනවා. ‘ෆැක්ට් චෙක්’ ‘සිටිසන් ෆැක්ට් චෙක්’ කියන ආයතනවල ප්‍රධානියා ලෙස සිටිමින් ඔහු මෙම ව්‍යාජ තොරතුරු බෙදා හරිමින් සිටිනවා. තැපැල් ඡන්ද ආරම්භ කිරීමත් සමග එම ඡන්ද සීල් තබා ආරක්ෂිතව තැන්පත් කර තිබෙනවා. එසේ තිබියදී අරෝෂ් ප්‍රනාන්දු ගෙන යන මේ ව්‍යාජ ප්‍රචාරයන්ට විරුද්ධව ඉහළම ක්‍රියාමාර්ග ගන්නා බවත් අපි අවධාරණය කරනවා.

සජබ අපේක්ෂක සහ ස්වාධීන බව කියන අපේක්ෂක යන දෙදෙනාටම රටේ පොදු නීතියට ගරු කරන ලෙස අවධාරණය කරනවා. පසුගිය වසරේ පළාත් පාලන මැතිවරණය කුමන්ත්‍රණකාරී ලෙස නොපැවැත්වීමෙන් රනිල් වික්‍රමසිංහ ස්වාධීන මැතිවරණ කොමිසමට බලපෑම් කර තිබුණා. නමුත් දැන් ජනාධිපතිවරණය පැවැත්වෙනවා. එයින් ඔහුට සිදුවන බලපෑම මඟහරවා ගන්න ගෙනයන විවිධ උපක්‍රම නවත්වන ලෙස අවධාරණය කරනවා. ඔබ සිදුකරමින් සිටින ක්‍රියාමාර්ග සම්බන්ධයෙන් මේ මොහොතේ අදාළ ආයතන කෙසේ ක්‍රියාකළත් නිසි ආකාරයේ අධිකරණ ක්‍රියාමාර්ග අප අනුගමනය කරන බව අවධාරණය කරනවා. ජනතාව ලබන 21 වැනිදා ස්වාධීනව තමන්ගේ කැමැත්ත ඉදිරිපත් කරන්න සූදානමින් සිටින ඡන්දයටයි මේ බාධා කරන්නේ. ජාතික ජන බලවේගයේ ජයග්‍රහණයට මෙවැනි දේවලින් බාධා පැමිණ විය නොහැකියි. මැතිවරණය සමය තුළ නීති විරෝධී ලෙස කටයුතු කරමින් සිටින පිරිස් කිසි ලෙසකින්වත් නීතියේ ආධිපත්‍යය පිහිටුවන්නේ නැති බව අවධාරණය කරනවා.

“ස්වාධීන අපේක්ෂක බව කියමින් ජාතික කොඩිය මැතිවරණ වැඩට භාවිතා කිරීම නීති විරෝධීයි”
-NPP මැතිවරණ නිරීක්ෂණ මධ්‍යස්ථානයේ සාමාජික, හිටපු අමාත්‍යාංශ ලේකම් තිස්ස වර්ණසූරිය-

සමගි ජන බලවේගය කියන්නේ නීති කඩන ඕනෑම කෙනෙක් එක්ක සමගි වීම බව ඔවුන්ගේ ක්‍රියාවෙන් අර්ථකථනය කෙරෙනවා. අනෙක් පැත්තෙන් ස්වාධීන යැයි පෙනී සිටියාම ඕනෑම දෙයක් කළ හැකි බව කල්පනා කරනවා. ඔවුන් නීති කඩමින් ක්‍රියා කරන්නේ පරදින බව දන්න නිසයි. ඒ බව දන්නා නිසාම ඕනෑම දෙයක් කළ හැකි යැයි කල්පනා කරනවා. 1948 සිට මේ දක්වා ලංකාව ක්‍රියා කරන ආකාරය මේ යැයි ඔවුන් පෙන්වමින් සිටිනවා. මැතිවරණය කියන්නේ අපේ සංස්කෘතිය, ශීලාචාර බව, ලෝකයට පෙන්විය හැකි අවස්ථාවක්. වෙනත් රටවල්වල මැතිවරණය පවත්වන අවස්ථාවල පෞද්ගලිකව මම අත්දැකීම් ලබා තිබෙනවා. සාමකාමීව සද්ද බද්දයක් නැතිව ඔවුන් ඡන්ද ව්‍යාපාර පවත්වනවා. ජාතික ජන බලවේගය නීතිය සැමට සමානයි කියන මූල ධර්මයේ පිහිටා රජයේ දේපළ භාවිතා කිරීම හෝ මැතිවරණ අල්ලස් හෝ දූෂණය සිදුකරන පිරිස් එක්ක සම්බන්ධ නැති බව හොඳින්ම ඔප්පු කරමින් සිටිනවා. නමුත් අනිත් පාර්ශ්ව දෙක පාලන බලය ගන්න නීතිය කඩ කිරීම් ගෙන යන ක්‍රියාමාර්ග පිළිබඳව දැඩි අවධානයක් යොමුකරන ලෙස ජනතාවගෙන් ඉල්ලා සිටිනවා.

ජනාධිපතිවරණ අපේක්ෂකයාගේ ඡායාරූපයට අමතරව කාර්යාලවල නීති විරෝධීව අනෙකුත් අයගේ ඡායාරූප ප්‍රදර්ශනය කරන්නේ ඔවුන් ගම පාලනය කරන බව හැඟවීමටයි. ඒ වගේම රජයේ දේපළ දේශපාලන වැඩකටයුතුවලට භාවිතා කිරීම සම්පූර්ණයෙන්ම නීති විරෝධීයි. එසේ භාවිත කරන දේපළ සහ වාහනවල විස්තර අප සතුව තිබෙනවා. ඒ වගේම ඡායාරූප අප සතුව තිබෙනවා. මේ නිසා අදාළ රාජ්‍ය නිලධාරීන් ඉතාමත් පරිස්සමෙන් කටයුතු කළ යුතු බව අවධාරණය කරනවා. ජනාධිපති උපදේශකලා රජයේ දේපළ පරිහරණයට ගැනීම සම්බන්ධයෙන් නිහඬව සිටීම වගකිව යුතු රාජ්‍ය නිලධාරීන්ගේ රාජකාරිය නෙමෙයි. ස්වාධීනයි කියලා නම්කර ගත් පමණින් ජාතික කොඩිය තමන්ගේ දේශපාලන කටයුතුවලට භාවිත කළ නොහැකියි. ජාතික කොඩියට තිබෙන ගරුත්වය අහිමි වෙනවා. මේ ක්‍රියාව වහාම නවත්වන්න ඕනෑ. මෙවැනි කටයුතු සම්බන්ධයෙන් මැතිවරණ කොමිසම, අල්ලස් කොමිසම සහ පොලීසිය යන අදාළ නිල ආයතනවලට අපි පැමිණිලි කරනවා. නීතිය ආරක්ෂා කිරීම සියලුම දෙනාගේ වගකීමක් බව අපි අවධාරණය කරනවා.

“සමාජයේ දුප්පත්කම මැතිවරණයේදී උපරිම ලෙස ප්‍රයෝජනයට ගැනෙමින් තිබෙනවා”
-NPP මැතිවරණ නිරීක්ෂණ මධ්‍යස්ථානයේ සාමාජික, විශ්‍රාමික නියෝජ්‍ය පොලිස්පති ජේ.ඒ. මාර්ක්-

අපට මේ දක්වා ලැබී තිබෙන පැමිණිලි අනුව මැතිවරණ ප්‍රචණ්ඩ ක්‍රියා සහ රාජ්‍ය දේපළ අවභාවිතා කිරීම සම්බන්ධයෙන් වැඩිම දත්ත ප්‍රමාණයක් වාර්තා වෙනවා. ජනාධිපතිවරණයට ඉදිරිපත් වී සිටින අපේක්ෂකයන් සියලු දෙනාම ඉදිරිපත් වී සිටින්නේ නීතිය ආරක්ෂා කරමින් රට සංවර්ධනය කරන්නයි. ඒ නිසා තමන් ආදර්ශමත්ව ක්‍රියාකිරීම ඉතාම වැදගත්. නිදහස් හා සාධාරණ මැතිවරණයක් පැවැත්වීම සම්බන්ධයෙන් මූලිකම වගකීම පැවරී තිබෙන්නේ පොලිස් දෙපාර්තමේන්තුවටයි. නීතියේ විධානය සහ ආධිපත්‍යය පවත්වාගෙන යන්න පොලීසිය ක්ෂණිකව ක්‍රියාත්මක වෙන්න ඕනෑ. රාජ්‍ය දේපළ මැතිවරණ ප්‍රචාරක කටයුතුවලට යොදා ගැනීම පිළිබඳව වැටහීමක් නැත්නම් ඔහු මෙවැනි අපේක්ෂකත්වයකට සුදුසු නැහැ. අනෙක් පැත්තෙන් එවැනි අනීතික ක්‍රියා සම්බන්ධයෙන් පොලීසිය වහාම ක්‍රියාත්මක වෙන්න ඕනෑ. අපට වාර්තාවී තිබෙන ආකාරයට බදුල්ලෙන් සියයක පිරිසක් ගුවන් තොටුපළ සඳහා බඳවාගෙන මැතිවරණ රාජකාරිවලට මුදා හැර තිබෙනවා. ඒ වගේම කෑම බීම, ආහාර මලු බෙදාදීම වැනි කරුණුවලින් පැහැදිලි වන්නේ සමාජයේ පවතින දුප්පත්කම උපරිම ලෙස මැතිවරණයේදී ප්‍රයෝජනයට ගන්නා බවයි. මෙවැනි තත්වයන් පිළිබඳව ජනතාව විශේෂ අවධානයකින් තමන්ගේ ඡන්ද අයිතිය භාවිත කරන ලෙස ඉල්ලා සිටිනවා.

මාධ්‍යවේදීන් නැගූ ප්‍රශ්නවලට පිළිතුරු දෙමින්…

අපිට ලැබෙන පැමිණිලි අදාළ ආයතනවලට ක්ෂණිකව යොමු කරනවා. ඒ අනුව බොහෝ ආයතන ක්ෂණිකව ක්‍රියාත්මක වී තිබෙනවා. අපට ලැබෙන පැමිණිලිවල සත්‍ය අසත්‍යභාවය සොයා බලලයි නියමිත රාජ්‍ය ආයතනවලට දැනුම් දෙන්නේ. ඒ වගේම අපරාධ නඩු විධාන සංග්‍රහයට අදාළ දේවල් නම්, ගරු අධිකරණයට පවා යාමට අප සූදානම්. ත්‍රීවිල් රථ සංගම්වල සිද්ධිය සම්බන්ධයෙන් අප කළ පැමිණිලි අනුව මැතිවරණ කොමිසම පොලීසිය යොදවා වහාම එය නතර කළා. නමුත් ඉන් පැය කිහිපයකට පසුව නැවත එම ක්‍රියාවම සිදුකරනවා කියන්නේ රටේ ඒ සම්බන්ධයෙන් ජනාධිපතිගේ තිබෙන ආකල්පයයි. ජනතාවගෙන් බලය ඉල්ලන්න ඉස්සෙල්ලා රටේ පාලකයන් ආදර්ශමත් වී ඉන්න ඕනෑ.

ආහාර පාන දීම මනුෂ්‍යයෙකුගේ බඩගිනි නිවන්න යොදා ගැනීම සහ දේශපාලනය ප්‍රචාරය වෙනුවෙන් යොදා ගැනීම කියන්නේ පැහැදිලි චේතනාවන් දෙකක්. විශේෂයෙන්ම ජාතික කොඩිය පාවිච්චි කිරීම සම්බන්ධයෙන් එක්සත් ජාතික පක්ෂයේ සභාපති විවෘතවම පෙනී සිටිනවා. මැතිවරණ කොමිසම එය නීති විරෝධී බව පැවසුවාම කොහෙවත් ඉන්න මන්ත්‍රීවරයෙක් එය නීති විරෝධී නොවන බව ප්‍රකාශ කිරීමෙන් පවතින තත්වය මොකක්ද කියලා ජනතාව තේරුම් ගන්න ඕනෑ.

වැඩබලන පොලිස්පතිවරයෙකු පත්කරන ලෙස ශ්‍රේෂ්ඨාධිකරණය ජනාධිපතිට නියෝග කළ වහාම ඔහු ස්වාධීන අපේක්ෂකයෙකු ලෙස ඉදිරිපත් වීමට ඇප තැන්පත් කළා. ඇප තැන්පත් කිරීමෙන් පසුව ප්‍රකාශ කළේ, වැඩබලන පොලිස්පති පත් කළ නොහැකි බවයි. නීතිඥයෙක් බව කියන ඔහු ඇප තැන්පත් කළ පමණින් අපේක්ෂකයෙකු නොවන බවත් ඒ සඳහා නාම යෝජනා බාරදී තිබිය යුතු බවවත් තේරුම් ගෙන සිටියේ නැහැ. එසේ කියූ රනිල් වික්‍රමසිංහ අධිකරණයෙන් මන්ත්‍රී ධුරය අහෝසි කළ හරීන් ප්‍රනාන්දුලා ඒ අමාත්‍යාංශයේම උපදේශකවරු බවට පත් කළා. මැතිවරණය කඩාකප්පල් කිරීමේ චේතනාවෙන් හිතාමතා පොලීසිය අකර්මණ්‍ය කිරීම සඳහා වැඩ බලන පොලිස්පතිවරයෙකු පත් කළේ නැහැ. අධිකරණයෙන් එළවූ තමන්ට අවශ්‍ය සහචරයන් අමාත්‍යාංශවල උපදේශකයන් ලෙස පත්කර ප්‍රචාරක කටයුතුවලට යොදා ගන්නවා. ගුරුවරුන්ගේ වැටුප් වැඩි කළ නොහැකි බව පවසා ජල ප්‍රහාර එල්ල කළ ආකාරය අපි දැක්කා. රජයේ සේවකයන්ගේ වැටුප රුපියල් 10,000කින් වැඩි කරන්න අමතර රුපියල් බිලියන 140ක මුදලක් අවශ්‍ය බව අමාත්‍යාංශ ලේකම්වරයා දැන්වූවා. නමුත් රජය එකතු කර ගත යුතු වුවත් එකතු කර නොගත් රුපියල් බිලියන 1173ක් අයකර නොගෙන තිබෙනවා. එදා පඩි වැඩි කරන්න රුපියල් බිලියන 140ක් නැති බව කීවත් මේ තැපැල් ඡන්ද හමුවේ පොරොන්දු දෙන්න එවැනි තර්ක ගේන්නේ නැහැ. එළියට එකක් ඇතුළට එකක් වශයෙන් දෙබිඩි ක්‍රියාකාරකමක් තිබෙන රනිල් වික්‍රමසිංහ සම්බන්ධයෙන් ඇත්ත තත්වය මේ උදාහරණයෙන්ම තේරුම් ගන්න පුළුවන්.

මැතිවරණ කොමිසමේ ක්‍රියාවලිය සංකීර්ණ එකක් නොවෙයි. කොමිසමට ලැබෙන පැමිණිලි අනුව පොලීසිය යොදවා එම අවස්ථාවේම නීතිය ක්‍රියාත්මක කළ හැකියි. උදාහරණයක් ලෙස නීති විරෝධී පොස්ටර් අලවන අවස්ථාවේම පොලීසියෙන් අත්අඩංගුවට ගෙන අධිකරණයට ඉදිරිපත් කිරීම දක්වන්න පුළුවන්. වරද පිළිගත්තොත් දඩයකට යටත් වෙනවා. අධිකරණයත් තම නීතිය ක්‍රියාත්මක කිරීමේ කටයුතුවලට සූදානමින් සිටිනවා. පොලීසිය ක්‍රියාත්මක වෙන්නේ අපරාධ නඩු විධාන සංග්‍රහය යටතේ. ඒ නීතියේ තිබෙන්නේ කිසිදු ප්‍රමාදයකින් තොරව අදාළ ගත යුතු නීතිමය ක්‍රියාමාර්ග ගත යුතු බවයි.

(-‘රට අනුරට’ ජාතික ජන බලවේගයේ විජයග්‍රාහී රැලිය – ජාඇල – 2024.09.04-)

පසුගිය කාලයේ ජාතික ජන බලවේගයේ ජයග්‍රහණය පිළිබඳව කරුණු ඉදිරිපත් කළේ අපයි. දැන් අපේ ජයග්‍රහණය සහතික කරන්නේ ඔවුන් විසින්මයි. සතියකට කලින් සජබයෙන් ඉල්ලා අස්වූ තලතා අතුකෝරාළ සජිත්-රනිල් එකතු නොවුනොත් ඒ ගොල්ලෝ පරාදයි කියලා කිවුවා. අද (04) අරුන්දික ප්‍රනාන්දු පාර්ලිමේන්තුවේ කෑ ගහලා කියනවා එකතු වුණේ නැතිනම් පරාදයි කියලා. ඒ නිසා ඊට විරෝධය පා අද සිට ඔහු පාර්ලිමේන්තුවේ ස්වාධීන මන්ත්‍රිවරයෙක් වෙන බව කියනවා. ඊළඟට ජාතික ජන බලවේගයේ ජයග්‍රහණය වළක්වන්න බැහැ කියලා රනිල් කියනවා. ඒ නිසා ‘සජිත්ට ඡන්දය නොදී තමන්ට ඡන්දය දෙන්න’ කියලා එයා කියනවා. ‘රනිල් කොහොමත් පරදිනවා. ජාතික ජන බලවේගය දිනන එක වළක්වන්න නම් සජිත්ට ඡන්දය දෙන්න’ කියලා සජිත්ගේ කට්ටිය කියනවා. දැන් මේ සියල්ලෙන් පෙනෙන්නේ කුමක්ද? දැන් ඒ ගොල්ලෝ පරාජය බාරගෙන ඉවරයි කියන එකයි. ඒ නිසා අපිට විරුද්ධව කතා ගොතන්න, අවලාද නගන්න, අසත්‍ය චෝදනා කරන තත්වයකට ඒ ගොල්ලෝ පත්වී තිබෙනවා. ඒ මොනවා කළත් ජාතික ජන බලවේගය මේ අත්පත් කරගෙන තිබෙන ජයග්‍රහණය මොන ජගතෙකුටවත් ආපසු හරවන්න බැහැ.

අද අපේ ඡන්ද ව්‍යාපාරය කරන එක පොදු ජනතාව බාරගෙන ඉවරයි. කලින් ඒ ගොල්ලෝ කිය කියා හිටියා ‘අයියෝ ජාතික ජන බලවේගය 3%යි නේ. ඒක කොහොමද 51% වෙන්නේ’ කියලා. දැන් රනිල් කියන්න පටන් අරන් අපි දිනුවොත් රට අනතුරේ කියලා. කුරුණෑගල පැත්තේ මන්ත්‍රීවරයෙක් කියනවා ජාතික ජන බලවේගය දිනුවොත් 22දාට රටේ මහා කලබලයක් ඇති කරන්න සැලසුම් කර තිබෙනවා කියලා. සජබෙ තව කාන්තාවක් කියනවා, අපි දින්නොත් මාස 6ක්වත් ආණ්ඩුව දුවන්නේ නැහැ කියලා. දිනන්න තියා හිතන්නවත් බැහැ කියලා ඔවුන් කලින් කිවුවා. දැන් කියනවා ‘දිනුවොත්’ කියලා. ‘ජාතික ජන බලවේගය දිනුවොත් ඔබගේ ඌරු කොටුව නැතිවෙනවා’ කියනවා. ඒ කියන්නේ කොටුවට ඒ ගොල්ලෝ එනවා කියලා හිතලාද දන්නේ නැහැ. ජාඇල තිබෙන ඌරුකොටු වහලා ඒ ගොල්ලෝ ඌරු කොටුවල ගැටගහයි කියලා බයද දන්නේ නැහැ. ඡන්ද ව්‍යාපාරය ආරම්භයේදී ඔවුන් කිවුවා, අපට දිනන්න බැහැ කියලා. මැදදි කියනවා දිනුවොත් කියලා. 22දාට කියයි ‘අපෝ අප්පච්චියේ ඒ ගොල්ලෝ දිනන්නේ’ කියලා. මේ ජයග්‍රහණය දැන් කාටවත් ආපසු හරවන්න බැහැ. ඒ නිසා ජයග්‍රහණයෙන් පස්සේ අපි යන මාවත ගැන අපි පොඩ්ඩක් කථා කරමු.

අපි ජයග්‍රහණය කළාට පස්සේ අපේ ජනවරමයි, පාර්ලිමේන්තුවේ ජනවරමයි අතර ක්ෂණික විකෘතියක් නිර්මාණය වෙනවා. පොහොට්ටුවට කතිරේ ගහලා නාලක ගොඩහේවාට මනාපෙ ගැහැව්වා. දැන් එයා සජිත් ළඟ. දැන් එතකොට 2020 ජනවරම කෝ. ඒක අහෝසියි. ඒ නිසා ජාතික ජන බලවේගයේ ආණ්ඩුව ආරම්භයේදීම මේ පාර්ලිමේන්තුව විසුරුවා හරිනවා. එතකොට කට්ටිය අහනවා එහෙම කරලා ඊළඟ පාර්ලිමේන්තුව පත්වන තුරු කැබිනට් මණ්ඩලයට මොකද වෙන්නේ කියලා. කලබල වෙන්න එපා. ව්‍යවස්ථානුකූලව අපි ඒ අන්තර් කාලයේ රට පාලනය කරනවා. කොහොමද? එකක් තිබෙනවා. අපි දිනුවම පාර්ලිමේන්තුවේ මන්ත්‍රි ධුරය හිස්වෙනවා. තව කෙනෙකුට එතනට පත්වෙන්න පුළුවනි. හතර දෙනාගෙන් කැබිනට් මණ්ඩලය හදනවා. ඒක ව්‍යවස්ථාවට එකඟයි. එහෙම නැතිනම් ව්‍යවස්ථානුකූලව ජනාධිපතිවරයාට පුළුවනි සියලුම විෂයයන් තමන්ගේ යටතට ගන්න. එහෙමත් නැතිනම් භාරකාර ආණ්ඩුවක් හදන්නත් පුළුවන්. කළ හැකි ආකාර තුනක් තිබෙනවා. ඒ නිසා පාර්ලිමේන්තුව විසුරුවලා අලුත් පාර්ලිමේන්තුවක් පත්කර ගන්නා තුරු ව්‍යවස්ථානුකූලව අපි රට පාලනය කරනවා.

ඊළඟට පාර්ලිමේන්තු ඡන්දය එනවා. දැන් රටේ විශාල කථාබහක් තිබෙනවා. මේ පාර්ලිමේන්තුවේ ඉන්න මන්ත්‍රීවරුන්ගෙන් විශාල ප්‍රමාණයක් ගෙදර යවන්න ඕනෑ කියලා. දැන් ඉන්න අයගෙන් 2/3ක් ඊළඟ පාර්ලිමේන්තුවේ නැති බව අපි දන්නවා. අද පාර්ලිමේන්තුව රැස්වෙලා ආයි කල්තිබ්බෙ ඔක්තෝබර් මාසෙ පළමු වැනිදාට. ඒ අනුව අර 2/3 අයගෙ අන්තිම පාර්ලිමේන්තු දවස අද. ඊට පස්සේ පාර්ලිමේන්තු මැතිවරණයේදී විශාල බහුතරයක් ජාතික ජන බලවේගයෙන් පාර්ලිමේන්තුවට එනවා. ඊළඟට උපරිම 25ක් වූ ශක්තිමත් කැබිනට් මණ්ඩලයක් අපි හදනවා. ඊට විද්‍යාත්මකව විෂයයන් බෙදනවා. මෙතෙක් කල් අමාත්‍යාංශ බෙදුවේ රට ගොඩනගන්න නොවෙයි. තම තමන්ට බෙදා ගන්නයි. අපි ඒ ඒ විෂයන්ට ගැලපෙන ඒකාබද්ධ කිරීම් කරලා අමාත්‍යාංශ බෙදනවා.

අපි මැති ඇමතිවරුන්ට දෙන කාර් පර්මිට් අහෝසි කරනවා. ‘මරික් කාර් පර්මිට්’ද අහෝසි කරනවා. මේ සැරේ කතිරය හරියට ගහන්න. ගෙදර යැවිය යුතු අය ගෙදර යවන්න පුළුවන් එවිටයි. මේ 21 වැනිදා ගහන කතිරයෙන් ගෙදර යන්නේ රනිල් විතරක් නොවෙයි. මේක හරි බලවත් කතිරයක්. අපි දීර්ඝ කාලයක් මේ දේශපාලනයේ යෙදිලා තිබෙනවා. දුෂ්කරතාවලට මුහුණ දී තිබෙනවා. අවලාදවලට ලක්වෙලා තිබෙනවා. මාස 06න් ගෙදර යන්න අපි ආණ්ඩු හදනවාද? නැහැ. මතක තියා ගන්න අපි මේ රටේ ස්ථාවරම ආණ්ඩුව හදනවා. අපේ ජයග්‍රහණය ස්ථිරයි. ඒ ස්ථිරභාවය දැනටම මේ රටේ ජනතාව තහවුරු කරලා ඉවරයි.

“පාලකයෝ විහිළු සපයනකොට කලාකරුවො වුණු අපිට සිද්ධ වුණා දේශපාලනය කරන්න”
-ප්‍රවීණ රංගන ශිල්පී මහින්ද පතිරගේ-

ඔයගොල්ලෝ කවුරුත් දන්නවා මම රාජ සභාවේ පුරෝහිත. හැබැයි අද මම ආවේ විහිළු කරන්න නොවෙයි. දැන් දවස ගානෙ පාලකයෝ විහිළු සපයමින් යනවා. ඒ නිසා දැන් අපේ ජොබ් එක කැන්සල්. ඉතිං ඒ ගොල්ලෝ විහිළු කරන කොට කලාකාරයෝ වුණු අපිට සිද්ධ වෙලා තිබෙනවා දේශපාලනය කරන්න. අතීතයත්, වර්තමානයත්, අනාගත වුවමනාවත් විසින් නිවැරදි වේදිකාවක් තෝරා ගන්න කියලා අපට බලකර සිටියා. හොඳ තැනක් තෝරා ගන්න අපට ඕනෑ වුණා. අන්න ඒ නිසයි ජාතික ජන බලවේගයේ, මාලිමාවේ වේදිකාව අපි තෝරා ගත්තේ. ජන නියමු කලාකරුවන් හැටිය අපි හැමෝම දැන් මේ වේදිකාවට එකතු වෙලා අවසානයි.

මේ එන සැප්තැම්බර් 08 වැනිදා කලාකරුවන්ගේ රැස්වීමක් පැවැත්වෙනවා. එදාට කලාව ගැන අපේ ප්‍රතිපත්තිය එළි දක්වනවා. එදාට ජාඇල ප්‍රදේශයේ කලාකරුවන්ටත් මම ආරාධනය කරනවා එයට සහභාගි වෙන්න කියලා. එළඹෙන 08 වැනිදා සවස 7.00ට කොළඹ තැප්‍රොබේන් හෝටලයට එන්න, කලාකරු ප්‍රඥප්තිය එළිදක්වන උත්සවයට සහභාගි වෙන්න. අප සමග අදහස් හුවමාරු කරගන්න. මම මගේ කථාව රාජ සභාවෙන්ම කියන්නම්. 2003 වර්ෂයේදී තමයි අපි රාජ සභාව පටන් ගත්තේ. ඒ, දැනට අවුරුදු 21කට පෙරයි. රට යන අත වැරදියි කියලා එදා අපිට කලාකාරයෝ හැටියට තේරුණා. අන්න ඒ නිසා තමයි අපි මාලිමාවේ වේදිකාව තෝරා ගත්තේ. මේ වන විට අපේ “ජන නියමු කලාකරුවෝ ” ව්‍යාපාරය වටා මේ රටේ කලාකරුවන්ගෙන් බහුතරයක් එකතු වී හමාරයි.

අපි රාජ සභාවෙන් කියන්න හැදුවේ කුමක්ද? පාලකයෝ අපිව රවටපු හැටි. අපි රැවටුණු හැටි, රැවටෙන හැටි හා ඉදිරියටත් එය සිදුවිය හැකි බවට අපි ඒ ප්‍රහසනය හරහා මේ රටේ ජනතාවට අනතුරු අඟවා සිටියා. එදා ඒ ප්‍රහසනය බලලා ඔබ යම් වින්දනයක් ලැබුවාට ඒ පිටුපස තිබුණු දේශපාලන පණිවුඩය ගැන ඔබ එතරම් උනන්දු වුණේ නැහැ. කියන්න සතුටුයි අද අපේ රටේ ජනතාව ඒ පණිවුඩය හොඳින්ම තේරුම් අරන් ඉන්නවා. ඒ ජනතාව මේ දූෂිත පාලකයෝ පන්නා දමන්න දැන් ජාතික ජන බලවේගය වටා රොද බඳිමින් ඉන්නවා. මෙතෙක් රට පාලනය කළ පාලකයෝ ඉන්දියාවේ යාචකයෝ හිඟා කාලා ආධාර පිණිස සල්ලි එවන රටක් බවට අපේ රට පත් කළා. ඒ ඔබ මෙතෙක් කල් ආදරයට කතිරේ ගහපු පාලකයෝ අපිට උරුමකර දුන් රටයි. ඒ කරුමක්කාර උරුමය වෙනස් කරලා ලබන 21 වැනිදාට මේ රට නව පුනරුද යුගයකට රැගෙන යන ගමන අරඹන්න දැන් මේ රටේ මහ ජනතාව තීරණය කර හමාරයි.

“නව පරිවර්තනයකට ජනතාව හදවතින්ම සූදානම්ව සිටිනවා”
-විශ්‍රාමික පොලිස් සාමූහිකයේ හිටපු නියෝජ්‍ය පොලිස්පති ජේ.එම්.කේ. මාර්ක්-

මා අවුරුදු 40ක පමණ පොලිස් සේවයේ නියුතු වුණා. මා රටේ සෑම පළාතකම වාගේ සේවය කළා. හොඳ සමාජ, දේශපාලන අත්දැකීම් සම්භාරයක් මට එහිදී ලබා ගන්න පුළුවන් වුණා. අපේ ප්‍රමුඛ රාජකාරිය වුණේ මහජනතාව වෙනුවෙන් නීතිය හා සාමය රැකීම. ඒත් අද නීතිය කඩා වැටෙන තත්වයක් උදාවෙලා. ඒ පිළිබඳව ජනතාවගේ විශ්වාසය බිඳ වැටිලා. සෑම තැනම අපරාධ සිදුවෙනවා. මහ දවාලේ ස්වයංක්‍රීය අවි භාවිතා කරලා අමු අමුවේ මිනිසුන් මරා දමනවා. මේ සත්තු නොවෙයි මිනිස්සු. ඔබට මතක ඇති කටාන සහ මීගමුව ප්‍රදේශවල සිදුවූ ම්ලේච්ඡ පාස්කු ප්‍රහාරය. ඒක ඉබේ ඇති වූ එකක් නොවෙයි. ඒක පිටුපස දේශපාලන කුමන්ත්‍රණයක් තිබුණා. බලයට ගිජු, ජරාජීර්ණ වූ මනස් ඇති දේශපාලනඥයන් තමයි පිටුපස සිට එය මෙහෙය වූයේ. සමස්ත ලෝකෙම එය දැන සිටියා.

සැප්තැම්බර් 21න් පස්සේ බිහිවෙන ජාතික ජන බලවේගයේ රජය මගින් ඒ විෂය පිළිබඳ අත්දැකීම් ඇති විශේෂඥ නිලධාරීන් යොදවලා එම ම්ලේච්ඡ සිදුවීම පිටුපස සිටි සියලු දෙනාටම දැඩි ලෙස නීතිය ක්‍රියාත්මක කරන බවට මම මේ වේදිකාවේ ඉඳන් අද පොරොන්දු වෙනවා. මේ ජාඇල ඉන්න ක්‍රිස්තියානි ආගම අදහන ජනතාවට අපි මේ බව පොරොන්දු වෙනවා. මේක දේශපාලන වේදිකාවක ඡන්දය බලාගෙන දෙන ප්‍රතිඥාවක් නොවෙයි. සත්‍ය වශයෙන්ම හදවතට එකඟව දෙන ප්‍රතිඥාවක්.

අද මෙම ජන රැලියට සහභාගි වී සිටින අති විශාල ජන ගඟ දුටුවහම මට ඇති වෙන්නේ විශාල සතුටක්. මේකෙන් ප්‍රකාශ වෙන්නේ නව පරිවර්තනයකට ජනතාව හදවතින්ම සූදානම්ව සිටින බවයි. අර කන්න බොන්න දීලා ගෙන්නපු ජන කොටසක් නොවෙයි මෙතන ඉන්නේ ඉතාම සංවර ජනතාවක්. මීට වසර දහස් ගණනකට පෙර අපේ රටට කිවුවේ වැව් බැඳි රාජ්‍යය කියලා. වී ගොවිතැන අතින් බව භෝග අතින් රට සශ්‍රීක වුණා. හොඳ ජල කළමනාකරණයක් එදා අපේ රට තුළ තිබුණා. අපේ රටේ සමස්ත භූමියම ගත්තහම අපේ රට සතුවෙලා තිබෙන්නේ ඕනෑම බීජයකට පණ දෙන්න පුළුවන් භූමි ප්‍රමාණයක්. මේ තත්වයට අද මේ පාලකයෝ පත් කරලා තිබෙන්නේ එවැනි සශ්‍රීක රාජ්‍යයක්.

තමන් තමයි මේ රටට යමක් කළේ කියලා මේ පාලකයෝ කියනවා. මොනවාද එයාලා කළේ? දෙගොල්ලක් එකතු වෙලා තට්ටු මාරු ක්‍රමයට බලය බෙදාගෙන මේ රටේ සම්පත්, මහජන ධනය කොල්ලකාලා රට වනසපු එක පමණයි. අපිට මැජික් පෙන්නුවා; ගොනාට ඇන්දුවා. අද අපේ රටේ මහා මාර්ග පද්ධතිය ත්‍රාසජනක අත්දැකීම්වලින් පිරිලා. ගමනක් ගියොත් ගෙදර එනකම් ෂුවර් නැහැ. ආරෝග්‍ය ශාලාවල දෙන බෙහෙත් ගැන ජනතාවට තිබූ විශ්වාසය නැති වෙලා. අද හිටපු සෞඛ්‍ය ඇමති යකඩ කූරු ගණිනවා. මේ මහ හොර කණ්ඩායම් එකතු වෙලා අපිව විකුණනවා. අපේ රටේ දේපොළ විකුණන් කනවා.

අද තැපැල් ඡන්දය ආරම්භ වුණා. පොලීසියෙන් අපට ලැබුණු විශ්වාසනීයම ආරංචිය අනුව අද පොලීසිවල වැඩි ඡන්ද ප්‍රතිශතයක් අනුර කුමාර දිසානායක සහෝදරයා වෙනුවෙන් පාවිච්චි කර තිබෙනවා. දැන් අපිට නිවැරදි දිසාව පෙන්වන මානයක් ලැබී තිබෙනවා. ඒ ලාංඡනය තමයි මාලිමාව. මේ 21 වැනිදාට මේ රටේ සාතිශය බහුතරයක් ජනතාවගේ කතිරය මාලිමාව ඉදිරියේ වදින බව අද මම සහතික කර ප්‍රකාශ කරනවා.

(-ජාතික ජන බලවේගයේ ජාතික ව්‍යාපාරික සමුළුව – 2024.09.03 – මොනාක් ඉම්පීරියල් – ශ්‍රී ජයවර්ධනපුර-)

දේශපාලන පොරපිටිය සැලකිය යුතු ප්‍රමාණයකින් උණුසුම් වෙමින් තිබෙන වෙලාවක්. මෙයට පෙර පැවති සෑම මැතිවරණයකදීම ලංකාවේ තීරණාත්මක වූයේ ආර්ථික සාධකය නොවෙයි. එක කාලයක දී යුද්ධය, ජාතිය බේරා ගැනීම, රට අනතුරේ ආදී සටන් පාඨ මැතිවරණ වේදිකාවේ මූලික කරුණු බවට පත් කරගෙන සිටියා. මෑත ඉතිහාසයේ පළමු වතාවට ආර්ථිකය ප්‍රමුඛ කර ගත් සාකච්ඡාවක් දේශපාලන කරළියේ මතු වෙමින් තිබෙනවා. 2021-2022 වකවානුවේ ආර්ථිකය විශාල වශයෙන් බිඳවැටීමකට ලක් නොවෙන්න මේ මැතිවරණයේදීත් වෙනත් සාධක මූලික කර ගන්නවා. සමහර සාධක ඔවුන් විසින්ම නිර්මාණය කර ගන්නා ලද ඒවා. නමුත්, ආර්ථිකය බිඳවැටීමෙන් පසුව පුරවැසියන්ටත්, දේශපාලන ව්‍යාපාරවලටත් ආර්ථිකය පිළිබඳව යම් විධිමත් සාකච්ඡාවකට ප්‍රවේශ වෙන්න බල කෙරී තිබෙනවා. මෙවර මැතිවරණ වේදිකාවේ මේ මාතෘකාව ඉදිරියට පැමිණ තිබෙන්නේ මේ පසුබිම නිසයි. ජාතික ජන බලවේගය හැටියට අපේ ආර්ථික දිශානතිය මූලික වශයෙන් සම්පිණ්ඩනය කර ඔබ සැම සමඟ බෙදාගත යුතු බවට අපි කල්පනා කළා. අපේ මූලික හරය අද දවසේ ඉදිරිපත් කරන්නේ ඒ අනුවයි.

දේශපාලන වේදිකාව තුළ නැවත වරක් ‘බිය’ කියන සාධකය ඉදිරියට ගෙන එන්න විශාල උත්සාහයක් තිබෙනවා. මෙයට පෙර මෙම සාධකය වෙනස් ආකාරයකින් ඉදිරියට ගෙනැවිත් තිබුණා. “මේ අපේක්‍ෂකයා තෝරා ගත්තේ නැත්නම්, ජාතිය අනතුරේ වැටෙනවා, මේ අපේක්‍ෂකයාට ඡන්දය දුන්නේ නැත්නම්, රට අනතුරේ වැටෙනවා” ආදී වශයෙන් විවිධ විදිහට බිය සමාජගත කළා. ඒකම දැන් වෙනස් මුහුණුවරකින් “මෙම අපේක්‍ෂකයා තෝරා ගත්තේ නැත්නම්, ගෑස් සිලින්ඩර පිපිරෙනවා” යනුවෙන් බියක් නිර්මාණය කරමින් යනවා. තව පැත්තකින් ජාතික ජන බලවේගය බලය ලබාගතහොත්, ආර්ථිකය විශාල වශයෙන් කඩාවැටෙන බවට ප්‍රචාර ගෙන යනවා. කොටස් වෙළෙඳපොළේ මේ දිනවල ඇති බිඳවැටීම පවා ජාතික ජන බලවේගයේ වර්ධනය නිසා සිදුවන බවට ප්‍රචාර ගෙන යනවා. ඒ බිඳවැටීම පිළිබඳ සත්‍ය කතාව මොකක් ද? අප දේශපාලන ව්‍යාපාරයක් ලෙස දීර්ඝ කාලයක් දේශපාලනය කළත්, රාජ්‍ය බලය ලබා ගන්න ආසන්න අවස්ථාවට පැමිණ සිටින්නේ පළමු වතාවටයි. ඒ දීර්ඝ කාලය තුළ දියත් කළ විශාල දේශපාලන මෙහෙයුමක ප්‍රතිඵලයක් හැටියටයි. ආර්ථික බිඳවැටීමකදී ජනතාව දක්වන ප්‍රතිචාර 2022දී අපි දැක්කා. බලයට පත් වූ ජනාධිපතිවරයාට අවුරුදු දෙකකින් පලා යන්න සිදු වුණා. දීර්ඝ කාලයක් දේශපාලන අරමුණකින් ක්‍රියා කළ අපි මාස හයකින් පලා යාමට සිදු වන වාතාවරණයක් හදනවාද? ආර්ථිකයේ බිඳවැටීමට ජනාධිපතිවරයා, අගමැතිවරයා, මුදල් ඇමැතිවරයා, මුදල් අමාත්‍යාංශ ලේකම්වරයා වාගේම ඒ මොහොතේ සිටි මහ බැංකු අධිපතිවරයා වැරැදිකරුවන් බවට ශ්‍රේෂ්ඨාධිකරණය විසින් තීන්දු කර තිබෙනවා. ජනාධිපතිට පවා එරෙහිව එවැනි තීන්දුවක් ලබා දී තිබියෙදී, අපත් ශ්‍රේෂ්ඨාධිකරණයේ වැරැදිකරුවන් බවට පත් කෙරෙන ක්‍රියාමාර්ග අනුගමනය කරනවාද? නැහැ. කිසිසේත්ම නැහැ. ඒ නිසා අපි ඔබට මුලින්ම දෙන සහතිකය තමයි, දැනට තිබෙන ආර්ථිකය කිසිදු ආකාරයකින් බිඳවැටීමකට ඉඩ නොදෙන බව. ඒ වගේම ආර්ථිකය තවත් ස්ථාවර කර ශක්තිමත් කරමින්, ඉදිරියට ගෙන යාම ජනතාව සහ අප අතර තිබෙන සම්මුතිය බව.

ජනප්‍රිය සටන් පාඨවලින් බලය ලබා ගැනීමේ අරමුණක් අපට නැහැ. අපට ලැබෙන්නේ මොන වාගේ ආර්ථිකයක්ද යන්න අපි හොඳින් තේරුම්ගෙන සිටිනවා. තැපැල් ඡන්දය ආසන්නයට පැමිණ තිබෙද්දී, රාජ්‍ය සේවකයන්ට බෝනස් ලැබෙනවා. එක් අයෙක් 24%ක් වැඩි කරන බව කීවාම, අනෙක් කෙනා කලින්ම කීවේ මා බව කියනවා. එක් අයෙක් වැටුප් වැඩි කිරීම 25,000ක් බව කීවාම, අනෙක් කෙනා අවම වැටුප රුපියල් 57,500ක් කරන බව කියනවා. අපි ඒ ලාභ තරගයේ නැහැ. ආර්ථිකය කඩාවැටෙමින් තිබෙන බරපතළකම අපි ගැඹුරින් තේරුම්ගෙන සිටිනවා. ක්‍ෂණික හැරවුම්, ක්‍ෂණික වෙනස්කම් ඇති කර ගන්න හැකියාවක් මේ ආර්ථිකයේ කිසිසේත්ම නැහැ. ඉතා සිහින් නූලකින් ගැටගැසී තිබෙන මේ ආර්ථිකයට ඇති කරන ඉතා කුඩා වෙනසක් පවා මාරාන්තික විය හැකියි. ඒ නිසා ජාතික ජන බලවේගයේ අපි ආර්ථිකයේ ඇති කරන සියුම් වෙනසක් පවා ඉතා හොඳින් කවර ආකාරයේ ප්‍රතිවිපාක ගෙනැවිත් දේ දැයි කල්පනා කර බලා කටයුතු කරනවා. අපි මේ රටේ ජනතාවට වගකියන, වග වෙන ව්‍යාපාරයක්. අපේ සමස්ත ජාත්‍යන්තර ආර්ථික සම්බන්ධතා ජාත්‍යන්තර මූල්‍ය අරමුදල කියන බාස්කට් එක තුළ තිබෙන්නේ. ද්විපාර්ශ්වීය ණය ගනුදෙනු, බහුපාර්ශ්වීය ණය ගනුදෙනු, ස්වෛරීත්ව බැඳුම්කර ඇතුළු සියල්ල මූල්‍ය අරමුදලත් සමඟ ගැටගසා තිබෙනවා. ඒ නිසා කිසිවකු හෝ ඒකපාර්ශ්විකව එම වැඩසටහනෙන් ඉවත් වීම පිළිබඳව කල්පනා කරනවා නම්, ඔහු රට හෝ රටවැසියන් පිළිබඳව වගවීම අත්හැරීමක් වනවා. අපි ඒකපාර්ශ්වීයව කිසිසේත්ම ජාත්‍යන්තර මූල්‍ය අරමුදලෙන් ඉවත් වෙන්නේ නැති බවට සහතිකයක් දෙනවා. මූල්‍ය අරමුදලෙන් සපයා තිබෙන රටට අහිතකර නොවන පැරාමිතීන් පවත්වාගෙන යමින්, වඩා සුදුසු මාවත පිළිබඳව අපි සලකා බලනවා. ඒ කිසිසේත් රට බිඳවැට්ටීමේ දිශාවට නොවෙයි. ඒ නිසා ජනාධිපතිවරයාට අපි අවධාරණය කරන්නේ, අනියත බියක් සමාජගත නොකරන ලෙසයි. කොටස් වෙළෙඳපොළ බිඳවැටීමේ ප්‍රධාන වගඋත්තරකරුවා ඔහුයි. රටේ මුදල් ඇමැති ලෙස, ජනාධිපති ලෙස ආර්ථිකය බිඳවැටීම පිළිබඳ අනියත බියක් නිරන්තරයෙන් හිතාමතාම ඇති කරමින් සිටිනවා. ඒ නිසා ආර්ථික අර්බුදයක් ඇති කර ගැනීමේ සැලැසුම්සහගත පරමාර්ථයකින් ඔහු කටයුතු කරනවා දැයි බරපතළ සැකයක් ඇති වෙනවා. ආර්ථිකය කඩාවැටීමට ඉඩ නොදෙන බවට අපි සාකච්ඡා කරන කොට ඔහු පමණක් අපි ඇවිත් ආර්ථිකය වට්ටන බව කියනවා. ජාතික ජන බලවේගයේ අපි ජනාධිපතිගේ අපේක්‍ෂාවේ ගොදුරක් බවට කිසිසේත්ම පත් වෙන්නේ නැහැ.

මහ බැංකුවේ කාර්යභාරය පිළිබඳ විවාදයක් තිබෙනවා. අපේ රටේ මූල්‍ය වෙළෙඳපොළේ, උද්ධමනයේ, පොලී අනුපාතිකයේ සහ විනිමය අනුපාතිකයේ ස්ථාවරයන් සහ පුරෝකථනයන් පිළිබඳව පැහැදිලි අදහසක් තිබිය යුතුයි. පසුගිය කාලයේ එක රාත්‍රියෙන් විනිමය අනුපාතික විශාල වශයෙන් වෙනස් කිරීමෙන් ආර්ථිකය තුළ විකෘතියක් නිර්මාණය කළා. ඒ නිසා අපට පුරෝකථනය කළ හැකි වන පරිදි විනිමය අනුපාතිකයක් පවත්වා ගැනීම, පොලී අනුපාතික පවත්වා ගැනීම, උද්ධමන අනුපාතික පවත්වා ගැනීම අතිශයින්ම ආර්ථිකයේ ස්ථාවරත්වයට වැදගත්. මේ කටයුතු සඳහා මහ බැංකුවේ ස්වාධීනත්වය අතිශයින්ම වැදගත්. දේශපාලන වුවමනාවන් සඳහා මහ බැංකුව මෙහෙයවීමෙන් එහි ස්වාධීනත්වය බිඳවැටුණා. ඒ වාගේම ආර්ථිකයක් මෙහෙයවීමට ජනතාව විසින් ලබා දී තිබෙන ජනවරම කවුරුත් පිළිගත යුතුයි. ඒ වෙනුවෙන් මහ බැංකුවේ සහයෝගය අපේක්‍ෂා කිරීම හැරුණුකොට අපගේ දේශපාලන අරමුණු සාක්‍ෂාත් කර ගැනීම සඳහා අප කිසිසේත්ම මහ බැංකුව උපයෝගී කර ගන්නේ නැහැ. ඒ වාගේම රාජ්‍ය ව්‍යවසායයන් මෙහෙයවීම පිළිබඳව විශාල කතිකාවක් ගොඩනැඟී තිබෙනවා. ආර්ථිකයේ සියලු අංශවලට ඉතා සංවේදී බලශක්තිය, මූල්‍ය වෙළෙඳපොළ සහ ජාතික ආරක්‍ෂාවට සෘජු ලෙස සම්බන්ධ සමහර ක්‍ෂේත්‍රවල රජයේ ප්‍රධාන පංගුවක් තිබිය යුතුයි. ඒ හැර ලාභ ලැබීම අරමුණු කර ගත් ව්‍යාපාර රජය විසින් මෙහෙයවන්නේ නැහැ. තවදුරටත් පවත්වාගෙන යා යුතු සහ අත්හැරිය යුතු ක්‍ෂේත්‍ර අප විසින් හඳුනාගෙන තිබෙනවා. ඒ වගේම පුරවැසියන්ට අත්‍යවශ්‍ය භාණ්ඩ හා සේවා අඛණ්ඩව, සාධාරණ මිලකට සහ නියමිත ප්‍රමිතියෙන් යුතුව ලබා දීම වෙනුවෙන් ශක්තිමත් නියාමන අධිකාරියක් අවශ්‍ය බව අප කල්පනා කරනවා. එවැනි ආයතන ව්‍යුහයක් ශක්තිමත් කිරීමට රජය කටයුතු කරනවා.

ධනය තිබෙන අයගෙන් ධනය, ව්‍යාපාර තිබෙන අයගෙන් ව්‍යාපාර, නිවාස තිබෙන අයගෙන් නිවාස ආදී වශයෙන් වන දේපළ අපේ පාලනයක් යටතේ පවරා ගන්නා බවට තවත් ප්‍රචාරයක් ගෙන යනවා. අපි සරදියෙල්ගෙන් ඉගෙන ගත් අය නොවෙයි. අපි මහජනයාගේ ජීවන අත්දැකීම්වලින් ඉගෙන ගත් මිනිසුන්. ඔවුන් ගෙන යන අවලාද 21වැනි සියවසට වලංගු නැති බවයි අපට කියන්න තියෙන්නේ. ඒ වාගේම රාජ්‍යය සහ පෞද්ගලික අංශය අතර තිබෙන සබඳතාව ‘සීසර්ට අයිති දේ සීසර්ටත්, දෙවියන් වහන්සේට අයිති දේ දෙවියන් වහන්සේටත්’ වශයෙන් අපි ඉතා හොඳින් තේරුම්ගෙන සිටිනවා. අපි මේ දෙක කිසිසේත්ම පටළවා ගන්නේ නැහැ. දේශපාලකයන් හැටියට අපට පැවරී තිබෙන වැඩ කොටසත්, ව්‍යාපාරිකයන් හැටියට ඔබට පැවරී තිබෙන වැඩ කොටසත් අපි ඉතා හොඳින් තෝරා බේරාගෙන තිබෙනවා. අපේ ආර්ථිකයේ ‘එන්ජින්’ එක බවට පත් වෙන්නේ පෞද්ගලික ව්‍යවසායකයා සහ කර්මාන්තකරුවායි. අපේ රටේ රාජ්‍ය ව්‍යුහයේ ස්වභාවය, අණපනත්වල ස්වභාවය, දේශපාලන අධිකාරියේ ස්වභාවය වැනි කරුණු නිසා අපේ ආර්ථිකය හිර කර තිබෙනවා. මෙය නිදහස් බව කීවත්, කිසිම නිදහසක් නැහැ. අවශ්‍යතා අනුව චලනය වන ආර්ථිකයක් තිබුණා නම්, 1950දී අපේ අපනයන ආදායම ඩොලර් මිලියන 316ක තිබූ අතර, කොරියාවේ එය ඩොලර් මිලියන 25යි. එදා කොරියාවට වඩා දොළොස් ගුණයකට වඩා අපනයන ආදායමක් අප ලබා ගත්තා. නමුත්, අද අපේ රටේ අපනයන ආදායම ඩොලර් බිලියන 12ක් වන විට දකුණු කොරියාවේ ඩොලර් බිලියන 685යි. අපි වාගේ 50 ගුණයකටත් වඩා විශාල අපනයන ආදායමක් උපයා ගන්නවා. ඒ වාගේම ඩොලර් 3,800ක වාගේ ඒකපුද්ගල ආදායමක අපි හිරවුණේ ඇයි? ඒක දශක ගණනාවක් පුරා හිර වීමේ ප්‍රතිඵලයක්. අල්ලස සහ දූෂණය, ජාතික සැලැස්මකට අනුරූප වන පරිදි ආර්ථිකය මෙහෙයවීම නොකිරීම වැනි කරුණු නිසා හිර වී තිබෙනවා. අයවැය ලේඛනයක් එන කොට ආයෝජකයන් සිටින්නේ අවිනිශ්චිතතාවකයි. ව්‍යවසායකයන් තමන්ගේ ආර්ථික තීරණ ආර්ථිකමය පුරෝකථන මත ගත යුතු වුවත්, අපේ ව්‍යවසායකයන්ට සිදු වී තිබෙන්නේ ඥානක්කා වැනි ශාස්තර කියන්නියන්ගේ උපදෙස් අනුවයි. අද අපේ රටේ ව්‍යවසායකයින් කුමක් වේ දැයි බියකින් ඉන්නවා.

නමුත්, ලෝකය ඉදිරියට යන්නේ දත්ත එක්රැස් කිරීම, දත්ත විශ්ලේෂණය කිරීම වැනි කරුණු මූලික කරගෙනයි. ජාතික අරමුණු මත ඔබ යෙදිය යුතු ක්‍ෂේත්‍ර මොනවාද? එම ක්‍ෂේත්‍රවලට රජයෙන් සපයන යටිතල පහසුකම් මොනවාද? රාජ්‍ය සේවයෙන් ඉටු කර දිය යුතු කාර්යයන් මොනවාද යන්න අපි නිසි ලෙස තේරුම්ගෙන සිටිනවා. විශේෂයෙන්ම රාජ්‍ය සේවය දේශපාලනික අරමුණු වෙනුවෙන් යොදවා ගන්නේ නැහැ. අධ්‍යාපනය, සෞඛ්‍යය වැනි අත්‍යවශ්‍ය සේවාවන්ගේ අත්‍යවශ්‍යම පුරප්පාඩුවක් හැර රාජ්‍ය සේවය පුරවන්නේ නැහැ. රජයෙන් ලබාගත යුතු සේවාවන් විසිරී තිබීම වෙනුවට ඒකාබද්ධ කොට කාර්යක්‍ෂමව ලබා දීමට අවශ්‍ය යාන්ත්‍රණය සකස් කරනවා. සමහර යල්පැනගිය නීති වෙනස් කර ආර්ථිකය වේගයෙන් ඉදිරියට ගෙන යාමේ පසුබිම සකස් කර දෙනවා. ආර්ථිකයේ සැලකිය යුතු වර්ධනයක් අත්පත් කර ගත්තේ නැතිනම්, රට ඉදිරියට ගෙන යාම සම්බන්ධයෙන් කොතරම් සද් වුවමනාවක් තිබුණත් අපට එය කළ නොහැකියි. එහි නියමු කාර්යභාරය පැවරී තිබෙන්නේ ඔබ අතේ. ඔබ ආයෝජනය කරන්න, අපි එහි සුරක්‍ෂිතභාවය තහවුරු කර දෙනවා. පසුගිය කාලයේ සුළු හා මධ්‍ය පරිමාණ කර්මාන්ත විශාල ප්‍රමාණයක් බිඳවැටුණා. ඒ බිඳවැටුණේ ඔබ ගනු ලැබූ තීන්දු තීරණවල වරදක් නිසා නෙමෙයි; ආර්ථිකයේ මහා කඩාවැටීම නිසයි. අලුත් ව්‍යවසායන් ඇති කර ගැනීම ටිකක් දුෂ්කර කාර්යයක්. අත්දැකීම් තිබෙන ඒ තුළින් ඥානය ලබා ගත්, කළමනාකරණ හැකියාවක් තිබෙන අයගේ ව්‍යාපාර නැවත ප්‍රතිස්ථාපනය කිරීම ඉතාම වැදගත්. ඒ නිසා ඔබ සිර වී සිටින පරාටේ නීතිය වැනි නීතිවලින් තිබෙන පීඩනය අවම කර ගැනීමට සියලු පසුබිම සකසා දෙනවා. අපි කැමැති වුණත්, අකැමැති වුණත් නව තාක්‍ෂණය සහ දැනුම නිර්මාණය වෙන්නේ බටහිරයි. ඒ දැනුම ඉතා ඉක්මනින් උකහා ගන්න සමත් වෙන්නේ නැතිනම්, අපේ කර්මාන්තකරුවාට සහ ආයෝජකයාට අවශ්‍ය දියුණු මානව සම්පත සපයා ගන්න නොහැකි වෙනවා. ආර්ථික ඉලක්ක වෙනුවෙන් අවශ්‍ය මානව සම්පත අපේ අධ්‍යාපනයෙන් ගොඩනඟා ගන්න අපි බලාපොරොත්තු වෙනවා. ඒ වෙනුවෙන් ලෝකයේ දියුණුම විශ්වවිද්‍යාලවලට යවා මුවහත් කර ගත් ඥානය ලංකාවට ගෙන එනවා. ඒ වාගේම ලෝකයේ ශ්‍රම වෙළෙඳපොළෙන් දියුණුම කොටසක් අත්පත් කර ගන්නත් සුදුසු ආකාරයට අධ්‍යාපනයේ වේගවත් ප්‍රතිසංස්කරණ ඇති කරනවා.

අනාගත ලෝකයේ බලවත් වෙන්නේ වැඩිම තාක්‍ෂණික හිමිකාරීත්වය තිබෙන රටයි. ලෝකයේ ඇති වුණු මහා තාක්‍ෂණික වෙනස්කම් අපේ අධ්‍යාපනයට ඇතුළත් කරගෙන ඉදිරියට යාම සඳහා අපි පර්යේෂණ සහ සංවර්ධන ප්‍රතිපත්ති ප්‍රකාශනයක් වෙනමම සකස් කර තිබෙනවා. පර්යේෂණ සිදු කරමින්, නව සොයාගැනීම් සහ නව නිර්මාණකරුවන් බිහි කර ගන්නා අතර, අපට අනන්‍ය වූ ක්‍ෂේත්‍ර හඳුනා ගැනීමත් සිදු කරනවා. ඒ වාගේම අපට තිබෙන කුඩා වෙළෙඳපොළ වෙනුවට රාජ්‍ය දැක්මක් සහ අනුග්‍රහය මත විදේශ වෙළෙඳපොළවල් අත්පත් කර ගැනීමේ වෙළෙඳ තානාපති සේවයක් ඇති කරනවා. අපේ ව්‍යවසායකත්වයන් රට තුළ පවතින මිලියන 22ක වෙළඳපොළෙන් එළියට ගෙන යන්නේ නැත් නම්, අපේ භාණ්ඩවල ගුණාත්මකභාවය රැකගෙන පිරිවැය අඩු කර ගන්න හැකියාවක් ලැබෙන්නේ නැහැ. නිෂ්පාදන පිරිවැය අඩු කර ගැනීම සඳහා අවුරුදු දෙකක් ඇතුළත විදුලි බිල තුනෙන් එකකින් අඩු කර ගැනීමේ අරමුණක් තිබෙනවා. ඒ වාගේම 2030දී පොසිල ඉන්ධන සඳහා ඉල්ලුම අවම මට්ටමකට පත් වී 2050දී පුනර්ජනනීය බලශක්තිය ප්‍රමුඛත්වයට පත් වෙනවා. අපට අවශ්‍ය ආර්ථික වර්ධනය අත්පත් කර ගන්න විදෙස් ආයෝජන අත්‍යවශ්‍යයි. 1978 සිට 2022 දක්වා රට තුළට පැමිණ තිබෙන්නේ ඩොලර් බිලියන 22ක ආයෝජන පමණයි. වියට්නාමයට ගිය අවුරුද්දේ විතරක් ඩොලර් බිලියන 23ක ආයෝජන ලැබී තිබෙනවා. ‘ජාත්‍යන්තර සබඳතා තිබෙන අය’, ‘විදේශ යහළුවන් සිටින අය’ අවුරුදු 42කට ලබාගෙන තිබෙන්නේ ඩොලර් බිලියන 22ක ආයෝජන පමණයි. ප්‍රාග්ධන අවශ්‍යතාව, තාක්‍ෂණික අවශ්‍යතාව සහ ලෝක වෙළෙඳ දාමයට ඇතුළු වීමේ අරමුණින් විදෙස් ආයෝජනවලට ඉඩ සලසා දෙනවා. ඒ වාගේම ඔවුන්ට ලබා දෙන සහන හා සමානම සහන අප දේශීය ආයෝජකයන් වන ඔබටත් ලබා දෙනවා.

ඔබෙන් අපට ඇල්වතුර වීදුරුවක්වත් එපා. දේශපාලකයන් හැටියට අපගේ වුවමනාවක් තිබෙනවා වාගේම ව්‍යවසායකයන් හැටියට ඔබටත් එවැනි වුවමනාවන්ම තිබෙනවා. මෙරට ඉතිහාසයේ පළමු වරට දේශපාලකයන්ගේත්, ව්‍යවසායකයන්ගේත් අරමුණු එකට සමපාත වුණු ආණ්ඩුවක් ගොඩනඟමු. ජාතික ජන බලවේගයේ පාලනයක් යනු ඔබ, අප සියලු දෙනා මේ රට ගොඩනැඟීම වෙනුවෙන් එකට වෙහෙස වන එකම බලවේගයක් වෙමු.

ආරාධිත සහභාගිත්වයෙන් කොටසක්

ලංකා වාණිජ මණ්ඩලයේ සභාපති දුමින්ද හුලන්ගමුව, ජාතික වාණිජ මණ්ඩලයේ සභාපති දීපාල් නෙල්සන්, තරුණ ශ්‍රී ලාංකික ව්‍යවසායකයින්ගේ මණ්ඩලයේ (COYLE) සභාපති තුෂිර රද්දැල්ල, CIB අධ්‍යක්ෂ ධම්මිකා මුනිවංශ, කැන්ඩි ෆැෂන් කළමනාකාර අධ්‍යක්ෂ අජිත් රත්නසේකර, ශ්‍රියානි ඩ්‍රෙස් පොයින්ට් සභාපති මරියදාස් සෙල්වරාජ්, තේම්ස් රිසෝට් සභාපති චන්ද්‍රා වික්‍රමසිංහ, ජෙට්වින් සමූහයේ සභාපති හිරාන් කුරේ, වාසනා බේකර්ස් සභාපති දයානන්ද බෝඹුවල, දඹුලු ලී බඩු සභාපති එච්. සෝමරත්න, ට්‍රයිකෝ කළමනාකර අධ්‍යක්ෂ ගාමිණී කන්නංගර, සුභාෂ් ජෙම්ස් සභාපති සුභාෂ් කරුණාරත්න, සුසර ප්‍රකාශන කළමනාකාර අධ්‍යක්ෂ කපිල වික්‍රමසිංහ, ඩී.එස්.අයි. සමූහයේ සභාපති නන්දදාස රාජපක්ෂ, ජොන් කීල්ස් සමූහයේ සභාපති ක්‍රිෂාන් බාලේන්ද්‍රන්, සීඅයිසී හෝල්ඩිං සභාපති සෝලි කැප්ටන්

ආර්ථික හා ව්‍යාපාරික කවුන්සල සාමාජිකත්වය

ශ්‍රී ජයවර්ධනපුර විශ්වවිද්‍යාලයේ මහාචාර්ය අනිල් ජයන්ත, ආචාර්ය හර්ෂණ සූරියප්පෙරුම, සමාගම් මෙහෙයුම් විශේෂඥ මංගල විජේසිංහ, නිෂ්පාදන කර්මාන්ත ප්‍රධාන විධායක නිලධාරි චන්න ගුණවර්ධන, එමරල්ඩ් ඉන්ටනැෂනල් කළමනාකාර අධ්‍යක්ෂ මොහොමඩ් ඉක්රම්, වෛද්‍ය රිස්වි සාලි, කැලණිය විශ්වවිද්‍යාලයේ මහාචාර්ය සීතා බණ්ඩාර, වසන්ත සමරසිංහ, චතුරංග අබේසිංහ, සත්කාරක වෘත්තික නිහාල් මුහන්දිරම්, සමාගම් අධ්‍යක්ෂ චමිල් උඩවත්ත, ලංකා මිනරල්ස් ඇන්ඩ් කෙමිකල්ස් සභාපති එම්.යූ. බෝපිටිය, සුනිල් හඳුන්නෙත්ති, ව්‍යවසායක ශර්වින් අර්සකුලරත්න, ශ්‍රී ජයවර්ධනපුර විශ්වවිද්‍යාලයේ මහාචාර්ය ජනක් කුමාරසිංහ, රුහුණු විශ්වවිද්‍යාලයේ ජ්‍යෙෂ්ඨ කථිකාචාර්ය ආචාර්ය නන්දසිරි කිහිඹියහෙට්ටි, ප්‍රධාන විධායක නිලධාරි එස්.එම්.ඩී. සූරියකුමාර, සිලෝන් බිස්කට්ස් සාමාන්‍යාධිකාරි නිශාන් නානායක්කාර, හෙගා ටයිල් සභාපති ගාමිණී කුමාර, කන්ඩූරි රෙස්ටුරන්ට්ස් සභාපති ලෆ්රාන් ෂොයිබ්, බෙලොස් ලංකා සභාපති චතුර ක්‍රිෂාන්ත පෙරේරා, ක්‍රිස්ටික් ලංකා පොලිමර්ස් කළමනාකාර අධ්‍යක්ෂ ශ්‍රීමත් ඩයස් පෙරේරා, රිචී සමූහයේ සභාපති විරන්ත එච්. හෙට්ටිආරච්චි, හිටපු නියෝජ්‍ය සාමාන්‍යාධිකාරී සුනිල් කුමාර ගමගේ, මා බිම සමූහ ව්‍යාපාරයේ සභාපති සුජිත් පෙරේරා, නිෂ්පාදන සමාගම් උප සභාපති තුෂාර හෙට්ටිතන්ත්‍රිගේ, සෙන්ට් තෙරේසා ඉන්ඩස්ට්‍රීස් සභාපති කොලින් ෆනෑන්ඩු, ආර්ථික විශේෂඥ ගාමිණී වරුෂමාන, ලංකා මිනරල්ස් ඇන්ඩ් කෙමිකල්ස් කළමනාකාර අධ්‍යක්ෂ නොඑල් නෙරිස්, කළමනාකාර අධ්‍යක්ෂ ලසන්ත ද ෆොන්සේකා, ශ්‍රී ලංකා සංචාරක සහ හෝටල් කළමනාකරණ ආයතනයේ අධ්‍යක්ෂ ජනරාල් බුද්ධික හේවාවසම්