(-ජාතික ජන බලවේගයේ මැතිවරණ නිරීක්‍ෂණ මධ්‍යස්ථානයේ මාධ්‍ය හමුව – 2024.09.11-) ජනාධිපතිවරණයක් ප්‍රකාශයට පත් කර තිබෙන අවස්ථාවක කළ යුතු ක්‍රියා සහ නොකළ යුතු ක්‍රියා 1981 අංක 15 දරන ජනාධිපතිවරයා තෝරා පත් කර ගැනීමේ පනතේ පැහැදිලිව සඳහන් වෙනවා. රජය නියෝජනය කරන අපේක්‍ෂකයා සහ තවත් පිරිස් විසින් මේ පනත දිගින්දිගටම උල්ලංඝනය කිරීම පිළිබඳව මුළු පැමිණිලි 358ක් ලැබී තිබෙනවා. […]
(-ජාතික ජන බලවේගයේ මැතිවරණ නිරීක්‍ෂණ මධ්‍යස්ථානයේ මාධ්‍ය හමුව – 2024.09.11-)
ජනාධිපතිවරණයක් ප්‍රකාශයට පත් කර තිබෙන අවස්ථාවක කළ යුතු ක්‍රියා සහ නොකළ යුතු ක්‍රියා 1981 අංක 15 දරන ජනාධිපතිවරයා තෝරා පත් කර ගැනීමේ පනතේ පැහැදිලිව සඳහන් වෙනවා. රජය නියෝජනය කරන අපේක්‍ෂකයා සහ තවත් පිරිස් විසින් මේ පනත දිගින්දිගටම උල්ලංඝනය කිරීම පිළිබඳව මුළු පැමිණිලි 358ක් ලැබී තිබෙනවා. නීති විරෝධී ප්‍රචාරක කටයුතු පැමිණිලි 178ක්, නීත්‍යනුකූල මැතිවරණ ව්‍යාපාරවලට බාධා කිරීම් සම්බන්ධ පැමිණිලි 6ක්, ප්‍රචණ්ඩ ක්‍රියා සම්බන්ධයෙන් 26ක්, මහජන මතයට අනිසි බලපෑම් කිරීම් සම්බන්ධයෙන් පැමිණිලි 104ක්, රාජ්‍ය සම්පත් අවභාවිත කිරීම සම්බන්ධයෙන් පැමිණිලි 62ක්, රාජ්‍ය නිලධාරීන් මැතිවරණ ව්‍යාපාරයට අනිසි ලෙස යොදා ගැනීම් සම්බන්ධ පැමිණිලි 33ක් ආදී වශයෙන් ලැබී තිබෙනවා.
මේ සියලු පැමිණිලි සම්බන්ධයෙන් මැතිවරණ කොමිෂන් සභාව පොලිසියට පැමිණිලි කර තිබෙනවා. ඒ සම්බන්ධයෙන් යහපත් ප්‍රතිචාර ලැබී, නීති විරෝධී ක්‍රියා මැඩපැවැත්වීමට මැතිවරණ කොමිසම කටයුතු කරගෙන යනවා. රාජ්‍ය දේපොළ යන්නට මැතිවරණ පනත අනුව නිලධාරීනුත් අයිති වෙනවා. රනිල් වික්‍රමසිංහ මහතාගේ මැතිවරණ ව්‍යාපාරයේ ප්‍රවර්ධන කටයුතු සඳහා රාජ්‍ය සේවකයන් යොදා ගැනීම කැපීපෙනෙන දෙයක් වී තිබෙනවා. රණවිරු සේවා අධිකාරිය මඟින් රණවිරුවන් කැඳවා ඔහුගේ ප්‍රචාරක කටයුතු සඳහා යොදා ගැනීමට සූදානම් වන බව තහවුරු වී තිබෙනවා. හෙට (12දා) දින රණවිරු සේවා අධිකාරියේ සභාපති විසින් රනිල් වික්‍රමසිංහගේ ප්‍රචාරක කටයුතු ප්‍රවර්ධනය සඳහා සමුළුවක් පැවැත්වීමට යොදාගෙන තිබෙනවා. රජයේ වාහන, නිලධාරීන් යොදාගෙන තිබෙනවා. මෙය සංවිධානය කරන්නේ රණවිරු සේවා අධිකාරියේ සභාපතිවරයා. ඒ වාගේම රජයට අයත් නිවාස සහ නගර සංවර්ධන අමාත්‍යාංශයේ එල්.ආර්.ඩී.සී. ආරක්‍ෂක සමාගමේ සේවකයන් සේවයට වාර්තා කිරීමෙන් පසුව මේ සමුළුවට සහභාගි වන ලෙසත්, ප්‍රවාහන පහසුකම් සපයන බවත් දන්වා තිබෙනවා.
“කූට ලේඛන සකස් කළ අයට පමණක් නොව, ප්‍රචාරණය කළ සමාජ මාධ්‍යවලටත් වගකියන්න වෙනවා”
-ජාතික ජන බලවේගයේ මැතිවරණ නිරීක්‍ෂණ සංවිධානයේ මාධ්‍ය ප්‍රකාශක නීතිඥ අකලංක උක්වත්ත-
රනිල් වික්‍රමසිංහ ජනාධිපති ස්වාධීන අපේක්‍ෂකයකු ලෙස මැතිවරණයට ඉදිරිපත් වී සිටියත්, ස්වාධීනත්වයක් පිළිබිඹු නොකරමින්, රාජ්‍ය සම්පත්, දේපොළ, රාජ්‍ය නිලධාරීන්, හමුදා නිලධාරීන්, ගුවන්තොටුපොළ නිලධාරීන් දිගින්දිගටම යොදා ගනිමින් සිටිනවා. අදාළ කරුණු මැතිවරණ කොමිසමට සහ පොලිස් මූලස්ථානයට අප දිගින්දිගටම පැමිණිලි කරමින් පවතිනවා. නමුත්, ඒ ක්‍රියා නැවැත්වීමට සාධනීය ප්‍රතිචාරයක් පෙනෙන්නේ නැහැ. සමඟි ජන බලවේගය මෙන්ම ස්වාධීන අපේක්ෂක යන දෙදෙනාම සමාජ මාධ්‍ය යොදා ගනිමින්, දිගින්දිගටම අසත්‍ය කරුණු සහ මඩ ප්‍රහාර එල්ල කරමින් පවතිනවා. එවැනි ක්‍රියා ඡන්දය ආරම්භ කළ මුල් කාලයේ ඉඳහිට වාර්තා වුවත්, මේ වන විට දිනපතා කිහිපයක් ගැන වාර්තා වෙනවා. ප්‍රචාරක කටයුතු වෙනුවෙන් ඉතිරි වී තිබෙන සතියක කාලය තුළ මෙම තත්වය තවදුරටත් වර්ධනය කිරීම සඳහා ක්‍රියා කරමින් සිටින බවට අපට වාර්තා වී තිබෙනවා.
අපට තිබෙන්නේ එම කරුණු සම්බන්ධයෙන් පැමිණිලි කිරීමයි. විමර්ශනය කිරීම මැතිවරණ කොමිසමට සහ පොලිසියට භාරයි. මේ සම්බන්ධයෙන් නීතිමය පියවර කඩිනමින් නොගන්නේ නම්, 22 වැනිදාට පසුව හෝ ලබා ගැනීමට සිදු වෙනවා. කූට ලේඛන ප්‍රචාරය කිරීම් දැඩිව සිදු වනවා. මේවා දණ්ඩනීති සංග්‍රහයේ 154 සිට 159 දක්වා වගන්තිවලින් ආවරණය වන බරපතළ කරුණු. මැතිවරණ කාලයෙන් පසුව මේ සම්බන්ධයෙන් ගැටලුවක් නොවන බව සමාජ මාධ්‍ය භාවිත කරමින්, මේ අනීතික ක්‍රියා කරන අය සිතාගෙන ඉන්නවා නම්, ඒක එහෙම නොවෙයි. කූට ලේඛන සකස් කළ අය පමණක් නොවෙයි, ඒවා ප්‍රචාරණය කළ සමාජ මාධ්‍යවලටත් වගකියන්න වෙනවා. දණ්ඩ නීති සංග්‍රහය ක්‍රියාත්මක වෙමින් පවතිනවා.
ශ්‍රී ලංකා ගුවන්විදුලි සංස්ථාවේ උදෑසන වැඩසටහන ගැනත් විශේෂ අවධානය දීර්ඝ කාලයක් සමාජය දුර්ගන්ධ හමන ක්‍රියාවක් ලෙස හඳුනාගෙන තිබුණා. දැන් එය ඉතාමත් පිළිකුල්සහගත ආකාරයකට ගුවන්විදුලි සංස්ථාවේ සභාපතිවරයා විසින් ජාතික ජන බලවේගයේ නායකයා සහ දේශපාලන ව්‍යාපාරය පාදක කරගෙන අසත්‍ය කරුණු සහ මැතිවරණය පදනම් කරගෙන ජන මනස විකෘති කිරීමට ක්‍රියා කරනවා. මේ සම්බන්ධයෙන් සුවිශේෂී පැමිණිල්ලක් හෙට දිනයේ දී සිදු කරනවා. ඔහුට සභාපති භූමිකාව මැතිවරණ සමයේදී නිසි පරිදි කළ නොහැකි නම්, නිසි බලධාරියකු යටතට පත් කරන ලෙස ඉල්ලීම් කරන්න සිදු වෙනවා. මේ දුර්ගන්ධය සමාජයට දරා ගන්න අමාරුයි. එය ඉවත් කරන්න ඕනෑ. රාජ්‍ය ආයතනයක් වන ගුවන්විදුලි සංස්ථාවේ මේ ක්‍රියාකාරීත්වය සම්බන්ධයෙන් දැනටමත් අවවාද කර ඇති බව අපට දැනගන්නට ලැබෙනවා. මැතිවරණ නීතිය පමණක් නොවෙයි, අපරාධ නීතියත් උල්ලංඝනය කරමින්, ගුවන්විදුලියේ සභාපතිවරයා කරන මේ ක්‍රියාමාර්ග නිදහස් හා සාධාරණ ඡන්දය භාවිත කිරීමට බාධාවක් වී තිබෙනවා.
“මහජනතාව බලාපොරොත්තු වෙන්නේ නිදහස්, සාධාරණ හා සාමකාමී මැතිවරණයක්”
-ජාතික ජන බලවේගයේ විශ්‍රාමික පොලිස් සාමුහිකයේ ප්‍රධානී, විශ්‍රාමික ජ්‍යෙෂ්ඨ නියෝජ්‍ය පොලිස්පති රවී සෙනෙවිරත්න-
පසුගිය 30 වැනිදා තෙක් අපට වාර්තා වූ මැතිවරණ ප්‍රචණ්ඩ ක්‍රියා සහ නීතිය උල්ලංඝනය කිරීම් සම්බන්ධයෙන් පොලිස් මූලස්ථානයේ මැතිවරණ මෙහෙයුම් කාර්යාංශයට පැමිණිලි කළා. ඒ පැමිණිලි පිළිබඳව සාධනීය පියවරක් ගනීවි යැයි අප බලාපොරොත්තු වෙනවා. මහජනතාව බලාපොරොත්තු වෙන්නේ නිදහස් හා සාධාරණ, සාමකාමී මැතිවරණයක්. දේශපාලන ව්‍යාපාරයක් හැටියට අපත් නිදහස්, සාධාරණ, සාමකාමී මැතිවරණ ව්‍යාපාරයක් සඳහා පූර්ණව කැප වී සිටිනවා. නමුත්, සමහර අවස්ථාවල දී ජාතික ජන බලවේගය ඉලක්ක කරගෙන ප්‍රචණ්ඩ ක්‍රියා සිදු වන බවට වාර්තා වී තිබෙනවා. ගල්කිස්ස ප්‍රදේශයේ නිවසකට ගොස් මේ විදියට තර්ජනය කර තිබුණා. රාජගිරියේ සහ මරදාන මුද්‍රණාල දෙකක ජාතික ජන බලවේගයේ අපේක්‍ෂකයා ඉලක්ක කර ගනිමින්, මඩ පෝස්ටර් මුද්‍රණය වන බව අද උදයේ වාර්තා වුණා. ඒ සම්බන්ධයෙන් නීතිමය ක්‍රියාමාර්ග ගැනීමට අප සූදානමින් සිටිනවා.
ඒ වාගේම ගෙවී ගිය අවසන් දින හත තුළ සිදු වූ නීති විරෝධී ක්‍රියා පිළිබඳ විස්තරයක් ඉදිරිපත් කරන්නම්. සැප්තැම්බර් 3 වැනිදා මහඔය ප්‍රාදේශීය ලේකම් කොට්ඨාසයේ පොල්ලබැද්ද කොට්ඨාසයේ තිබූ මැතිවරණ කාර්යාලයට ගිනි තබා, අලාභහානි සිදු කර තිබෙනවා. එදිනම නෝනාගම, උහපිටගොඩ ජාතික ජන බලවේගයේ කාර්යාලයේ ඉදිරිපිට තිබූ පතාකය කඩා රැගෙන ගොස් තිබෙනවා. සැප්තැම්බර් 07 වැනි දින හාරිස්පත්තුව, උගුරැස්සපිටිය කාර්යාලයටත්, ගම්පොළ, දැල්පිටිය කාර්යාලයටත් අලාභහානි සිදු කර තිබෙනවා. එදිනම බිබිල පොලිස් වසමේ ‘අදිටන’ විශ්‍රාමික ත්‍රිවිධ හමුදා සාමාජිකයකුගේ නිවසට ගල් ගසා අලාභහානි සිදු කර තිබෙනවා. ඒ වාගේම සැප්තැම්බර් 08 වැනි දින නාත්තණ්ඩිය, ඉරණවිල ප්‍රදේශයේ කාර්යාලයට පහර දී තිබෙනවා. සැප්තැම්බර් 10 වැනි දින ගම්පොළ, අටබාගේ කාර්යාලයට පහර දී තිබෙනවා. එදිනම තිස්සමහාරාම, රන්මිණිතැන්න ප්‍රදේශයේ දී සමඟි ජන බලවේගයේ ආධාරකරුවන් විසින් ජාතික ජන බලවේගයේ ආධාරකරුවන්ට පහර දී තිබෙනවා.
මේ පැමිණිලි දෙස බැලූ විට අපට පැහැදිලි වන්නේ මැතිවරණය හා සම්බන්ධ ප්‍රචණ්ඩ ක්‍රියාවල පැහැදිලි වර්ධනයක් තිබෙන බවයි. විශේෂයෙන් ම ජාතික ජන බලවේගය ඉලක්ක කරගෙන දියත් කරන ප්‍රචණ්ඩ ක්‍රියාවල වර්ධනයක් තිබෙනවා. ජාතික ජන බලවේගයේ සිටින අපගේ සම්පූර්ණ සහයෝගය මැතිවරණ ලේකම් කාර්යාලයටත්, පොලිසියටත් ලබා දෙනවා. නිදහස් සහ සාධාරණ වාගේම සාමකාමී මැතිවරණයක් පැවැත්වීම අප කාගේත් බලාපොරොත්තුවයි. මැතිවරණ කොමිෂන් සභාව ඒ බලාපොරොත්තුව ඉටු කරාවි යැයි අපේක්‍ෂා කරනවා.
(-ජාතික ජන බලවේගයේ මාධ්‍ය හමුව – 2024.09.11-) ජනාධිපතිවරණයට තව දින කිහිපයක් තිබියෙදී, මුළු රටෙන්ම තොරතුරු වාර්තා වෙන්නේ ජාතික ජන බලවේගයේ අපේක්ෂක, අනුර කුමාර දිසානායක සහෝදරයා ජයග්‍රහණය කරන බවයි. ඒ ජයග්‍රහණය අපට කිට්ටු වෙමින් තිබියෙදී, විරුද්ධ දේශපාලන කණ්ඩායම් ඔවුන්ගේ ප්‍රතිපත්ති පැහැදිලි කරනවා වෙනුවට රට බියවද්දන්න විවිධ උපක්‍රම යොදමින් සිටිනවා. ඉතාමත් අශික්‍ෂිත, පට්ටපල් බොරු කියමින්, ප්‍රචාරක කටයුතුවල […]
(-ජාතික ජන බලවේගයේ මාධ්‍ය හමුව – 2024.09.11-)
ජනාධිපතිවරණයට තව දින කිහිපයක් තිබියෙදී, මුළු රටෙන්ම තොරතුරු වාර්තා වෙන්නේ ජාතික ජන බලවේගයේ අපේක්ෂක, අනුර කුමාර දිසානායක සහෝදරයා ජයග්‍රහණය කරන බවයි. ඒ ජයග්‍රහණය අපට කිට්ටු වෙමින් තිබියෙදී, විරුද්ධ දේශපාලන කණ්ඩායම් ඔවුන්ගේ ප්‍රතිපත්ති පැහැදිලි කරනවා වෙනුවට රට බියවද්දන්න විවිධ උපක්‍රම යොදමින් සිටිනවා. ඉතාමත් අශික්‍ෂිත, පට්ටපල් බොරු කියමින්, ප්‍රචාරක කටයුතුවල අවසන් දිනවලදී මේ තත්ත්වය වඩාත් වර්ධනය කිරීමට සැලැසුම් කර තිබෙනවා. ඔවුන් ප්‍රචාරය කරන අවලාදවලට පිළිතුරු දෙන අතර, සමහර අවස්ථාවල අධිකරණ ක්‍රියාමාර්ග පවා අනුගමනය කළා.
මේ දිනවල සමාජගත කරන්නට උත්සාහ කරන බොරු විශාල ප්‍රමාණයක් අතුරින් කිහිපයක් ගැන අවධානය යොමු කරන්නම්. ජාතික ජන බලවේගයේ අනුර සහෝදරයා ජයග්‍රහණය කළ පසු මාස හයක්වත් රට ගෙන යන්න බැරි බවත්, විශාල ලේ වැගිරීම් සිදු වන බවත් කියනවා. මෙයට කලින් සියයට තුන ගත් අයට දිනන්න බැහැ කියමින් ඉඳලා දැන් දිනන බව පිළිගනිමින්, ගෝඨාභය රාජපක්‍ෂගේ කාලයේ දේවල් සිහිගන්වමින්, මඩ, අවලාද ප්‍රචාරය කරනවා. අපි දිනන්නේ මාස හයෙන් රට වට්ටාගන්න නොවෙයි. අපට ප්‍රතිපත්ති සහ සැලසුම් තිබෙනවා. ඒ සැලසුම් ක්‍රියාත්මක කරන්න විශාල මහජන බලයක් අප වටා ගොනු වී තිබෙනවා. ඒ නිසා අපේ ආණ්ඩුව හදන්න මහජනතාව ඉන්නවා වාගේම ඒ ආණ්ඩුව රකින්න මෙන්ම රට ගොඩනඟන්නත් විශාල ජන පවුරක් එකතු වී සිටිනවා. අනුර දිසානායක සහෝදරයා කියන්නේ ගෝඨාභය රාජපක්‍ෂ වාගේ බොල් චරිතයක් නොවෙයි. අවුරුදු විසිහතරකට වැඩි කාලයක් පාර්ලිමේන්තුවේ හිඳිමින්, තම හැකියාව සහ දක්‍ෂතාව පෙන්වූ අයෙක්. ඒ වාගේම විවිධ වගකීම් දරා තිබෙනවා. තව පැත්තකින් ඔහු තනි, හුදෙකලා චරිතයක් නොවෙයි. ඔහු වටා විශාල සංවිධානාත්මක බලවේගයක් තිබෙනවා. ඒ මඟින් දැන් වට්ටා තිබෙන රට ගොඩ ගන්න ශක්තිමත්, ස්ථාවර ආණ්ඩුවක් පිහිටුවනවා. ඒ නිසා කවුරුවත් මාස හයක් සම්බන්ධයෙන් බිය පැතිරවීම් ගැන බිය විය යුතු නැහැ.
රටේ පෝලිම් යුගයක් ඇති කළේ 2015-2019 කාලයේ රනිල් වික්‍රමසිංහ විසින් විශාල ලෙස විදේශ ණය ගැනීමෙනුයි. අනෙක් පැත්තෙන් පෝලිම් නිර්මාණය කළ මූලික වගකිවයුත්තන් මහින්ද රාජපක්‍ෂගේ ආණ්ඩුවේ හිටියා. දැන් ඔවුන් කොහෙද ඉන්නේ? කොටසක් සජිත් ළඟත්, අතිවිශාල පිරිසක් රනිල් ළඟත් සිටිනවා. ඒ අතරේ අනුර දිසානායක සහෝදරයා වටා ජනතාව විශාල වශයෙන් එක් වී අවසන්. පසුගිය මැතිවරණයෙන් සියයට තුනට වැටුණත්, අවුරුදු පහක් යන්නත් පෙර මැතිවරණයෙන් ජයග්‍රහණය කළ හැකි ආකාරයට කලබල නොවී සංවිධානය කරමින් ආවා. අපේ ජනාධිපතිවරණ ජයග්‍රහණය කිළිටි කර ගන්න, අවලස්සන කර ගන්න, කළු පැල්ලම් ඇති කර ගන්න අප කිසිසේත් සූදානම් නැහැ. ඡන්දයෙන් පසුව මාලිමාවට ඡන්දය දුන් අයත්, අනෙක් පක්ෂවලට ඡන්දය දුන් අයත් අපි ඔක්කොම එකතු වී රට ගොඩනඟනවා. මෑත කාලයේ පශ්චාත් මැතිවරණ ප්‍රචණ්ඩ ක්‍රියා ඉතා අවම වී තිබෙනවා. එහෙට මෙහෙට පනින ගෙඹි මන්ත්‍රීවරුන් අරගෙන ආණ්ඩු පිහිටුවන කැත දේශපාලනය අවසන් කරන්න යන ගමනේ මැතිවරණ ජයග්‍රහණයෙන් පසුව කිසිදු ප්‍රචණ්ඩ ක්‍රියාවකට ඉඩ නොමැති බව අපි සහතික කරනවා.
ඒ වාගේම සන්නද්ධ සේවා ආරක්‍ෂක අංශවලට අපි අවධාරණය කරන්නේ ඔබ ඔබේ රාජකාරිය නිසි පරිදි ඉටු කරන්න. පොලිසියට ඇඟිලි ගහන්නේ නැති, බලපෑම් නොකරන ආණ්ඩුවක් හැදෙනවා. අපි අමාරුවෙන් දිනා ගන්නා ජයග්‍රහණය කැත කරන්න අපට ඕනෑ නැහැ. නමුත්, සතුරන් දිගින්දිගටම ප්‍රචාරය ගෙන යන ගැටුම් ඇති වෙනවා යැයි කියන තත්වය ගැන අපි අවධානය යොමු කරනවා. ඔවුන්ම රටේ කලබල ඇති කර යම් ප්‍රචාරයක් කරාවිද කියන සැකය අපට තිබෙනවා. මේ වර වලව්වල දූෂිත කණ්ඩායම්වලට වෙනුවට අදූෂිත මහජනතාවට බලය ලැබෙනවා. මේ දූෂිතයන් ගැටුම් නිර්මාණය වන බවට මත ගෙන යනවා. යම් කෙනකු පශ්චාත් මැතිවරණ ප්‍රචණ්ඩ ක්‍රියා ගැන මතයක් ප්‍රචාරය කරනවා නම්, ඔහුගෙන් ප්‍රශ්න කරන ලෙස අපි පොලිසියට අවධාරණය කරනවා. අප දැනටමත් මෙවැනි සිදුවීම් සම්බන්ධයෙන් පැමිණිලි කර තිබෙනවා. බියවැද්දීම් සම්බන්ධයෙන් පූර්ණ පරීක්‍ෂණයක් පවත්වන ලෙස අවධාරණය කරනවා.
බුද්ධාගමට තියෙන තැන නැති කරන්න යනවා කියලාත් පට්ටපල් බොරුවක් කියනවා. අපේ රටේ ජනතාව අතර ආගම් කිහිපයක් තිබෙනවා. හින්දු, ඉස්ලාම්, කතෝලික, ක්‍රිස්තියානි යන ආගම් අතර බෞද්ධාගම ප්‍රමුඛස්ථානයේ තිබෙන එක කිසිවකුටත් ප්‍රශ්නයක් නැහැ. අපේ පාලනයක් යටතේ පෙරහැර නවත්වන බවට තිස්ස අත්තනායක කළ ප්‍රකාශය සම්බන්ධයෙන් දැනටමත් අපි නඩු පවරා තිබෙනවා. ජාතිවාදී නඩයට ආණ්ඩුවලින් ලැබෙන මුදල් නැතිව ජීවත් වෙන්න බැහැ. තෙල් පෝලිම්, ගෑස් පෝලිම්, කොරෝනා හැදිලා ජනතාව දුක් විඳින කොට ජාතිවාදී කණ්ඩායම් කවුරුවත් ජනතාව වෙනුවෙන් ඉදිරිපත් වුණේ නැහැ. ඡන්දයක් ළං වෙලා තියෙද්දී, ඔවුන් නොයෙක් අවලාද නඟන්නට පටන්ගෙන තිබෙනවා. නමුත්, මහරගම දී අපි පැවැත්වූ ජාතික සංඝ සම්මේලනයට භික්‍ෂුන් වහන්සේලා දහස් ගණනක් වැඩමකොට අපට ආශීර්වාද කළා. ඒ වාගේම අස්ගිරි, මල්වතු, රාමඤ්ඤ යන නිකායවල මහානායක හිමිවරුන් අපට ආශීර්වාද කර තිබෙනවා. මල්වතු පාර්ශ්වයේ මහානායක හාමුදුරුවෝ ඉතා පැහැදිලිව අපට කීවේ, රටට වෙනසක් කරන්න ඕනෑ කියලා. හැමදාමත් බුද්ධාගමට හානි කළ අයගෙන් තමයි, බුද්ධාගම රැකගන්න වෙලා තියෙන්නේ. දළදා මාලිගාව වටේ වැලි කොට්ට ගහලා, අඩ නිරුවතින් නටන රුසියානු කාන්තාවන් ගෙනැවිත්, කාර් රේස් පැවැත්වූ මහත්වරුන් අද අපට අවලාද නඟනවා. ඒ වාගේම ගැටඹේ පන්සල වටා කටුකම්බි ගැසූ අය, බෞද්ධාගමට ලෝකය ඉදිරියේ කළු පැල්ලම් ඇති කළ අය දැන් කිඹුල් කඳුළු හෙළනවා. අපි එන්නේ බෞද්ධයකු ලෙස ජීවත් විය හැකි වාගේම අනෙකුත් ආගම් අනුව ජීවත් විය හැකි සාමය, සතුට පිරි රටක් හදන්නයි. හැම දෙනාගේම හෘදය සාක්‍ෂියට අනුව ක්‍රියා කළ හැකි රටක් හදන්නයි අපි එන්නේ.
ඒ වාගේම උතුරු, නැඟෙනහිර සහ කඳුකර ප්‍රදේශවලට ගොස් 83 කළු ජූලිය වැනි තත්වයක් මාලිමාවේ රජයක් යටතේ ඇති වන බවට දෙමළ ජනතාව බියවද්දනවා. එක්සත් ජාතික පක්ෂය කළු ජූලිය නිර්මාණය කරලා රට පුරාම සිටි දෙමළ ජනයාට පහර දීලා, ඝාතනය කර දේපළ විනාශ කළ ආණ්ඩුවේ ප්‍රබලයෙක් තමයි, රනිල් වික්‍රමසිංහ. ඒ වාගේම එදා හිටපු අගමැති තමයි, පුතාණෝගේ පියාණෝ. 1981 සංවර්ධන සභා ඡන්දයේ දී යාපනයේ පුස්තකාලයටත් ගිනි තබා ඡන්දය කොල්ලකෑවේ ඒ ගොල්ලෝ. එවැනි ජාතිවාදී අපරාධ කළ අය දැන් බොරුවට කිඹුල් කඳුළු හෙළන්න පටන්ගෙන තිබෙනවා. දෙමළ ජනයාට, බෞද්ධ ජනතාවට වෙන් වෙන්ව බොරු කියමින්, යන කුඩා බංකොළොත් කණ්ඩායමක් ඉන්නේ. අපේ ජයග්‍රහණයට සිංහල, දෙමළ, මුස්ලිම් රටේම ජනතාව එකතු වන්න ඕනෑ බව අනුර සහෝදරයා යාපනයට ගිහින් කීවා. රනිල් වික්‍රමසිංහ යාපනයට ගිහින් කියනවා, අනුර සහෝදරයා දෙමළ ජනතාවට තර්ජනය කළා කියලා. එයට උතුරේ ජනතාව නියෝජනය කරන සුමන්තිරන් මන්ත්‍රීවරයා පිළිතුරක් ලබා දෙමින්, අනුර සහෝදරයා ජාතිවාදී නොවන බව කීවා. දැන් දෙපැත්තට බෙදිලා ඉන්නේ හැමදාම ජාතිවාදය නිර්මාණය කර විනාශයන් සිදු කළ පිරිසයි. ගෝඨාභය රාජපක්‍ෂ මහත්තයා ගෙන එන්නත් මේ වාගේම ජාතිවාදී ප්‍රචාර යැව්වා. වෛද්‍ය සාෆි වඳ සැත්කම් කරන බව ප්‍රචාරය කළ අයම දැන් සමාව ගන්නේවත් නැතිව අපට විරුද්ධව බොරු කියනවා. ඔවුන් තමයි, පාස්කු ප්‍රහාරය එල්ල කළේ. ඒ වාගේම එක පැත්තකින් දිළිඳු ජනතාවට ලබා දෙන සහන අපේ පාලනයක් යටතේ කපන බව කියනවා. අනෙක් පැත්තෙන් මධ්‍යම පන්තියේ ජනතාවගේ දේපොළ පවරා ගන්නා බව කියනවා. අද ඇත්තටම සිදු වී තිබෙන්නේ තිබෙන වාහනයත් ගෙදර තියලා, බස් එකේ වැඩට යන්නයි.
අපේ ආර්ථික ප්‍රතිපත්ති පවතින්නේ ව්‍යවසායකයන් නඟාසිටුවමින්, ජාතික ආර්ථිකය ගොඩනැඟීමයි. නමුත් තව පිරිසක් ජනතාවගේ ස්ථාවර තැන්පතු රජයට පවරා ගන්නා බවත් කියනවා. අපට කිසිසේත්ම එවැනි පවරා ගැනීමක් අවශ්‍ය වන්නේ නැහැ. හිතුවක්කාරී ලෙස අයි.එම්.එෆ්. ගිවිසුමෙන් ඉවත් වීමක් සිදුවෙන්නේත් නැහැ. මූල්‍ය අරමුදල ලබා දුන් නියෝග බව කියමින්, ජනතාව පටවා තිබෙන විශාල බදු බර සංශෝධනය කරන්න සාකච්ඡා කරනවා. අපි බලයට එන්නේ වට්ටපු රට ගොඩගෙන ජනතාවගේ ජීවිත යහපත් කරන්නයි. ‘පුළුවන්’ කියන රනිල් වික්‍රමසිංහට අපේ රටේ ජනතාවට පාස්පෝට් එක දී ගන්නත් නොහැකි වී තිබෙනවා. ඒ නිසා අපි ජනතාවට කියන්නේ, අපේ ප්‍රතිපත්ති ගැන අපෙන් අහන්න කියලයි. ඒ නිසා අපේ සතුරන් ප්‍රචාරය කරන බොරු, අවලාදවලට හසු නොවන ලෙස ජනතාවගෙන් ඉල්ලා සිටිනවා. දහඅට වැනිදා රාත්‍රියේ ප්‍රචාරක කටයුතු අවසන් කළ පසු ඉතිරි දවස් දෙක තුළ ඔවුන්ගේ කුමන්ත්‍රණකාරී කණ්ඩායම් යොදවා ගැටුම් හැදීමේ හැකියාවක් තිබේ දැයි අපට සැකයක් තිබෙනවා. ඔවුන් දිගින්දිගටම ගෙන යන ප්‍රචාර හමුවේ අපට එවැනි සැකයක් ඇති වෙන්නේ ගෝඨාභය රාජපක්‍ෂ ගෙන එන්න පාස්කු කුමන්ත්‍රණ සිදු කළා නම්, මේ වැනි දේවල් කිරීමේ හැකියාව ඔවුන්ට තිබෙන නිසයි. ආරක්‍ෂක අංශවලට අපි අවධාරණය කරන්නේ වැරැදි කරන ඕනෑම කණ්ඩායමක් නීතිය හමුවට ගෙනැවිත්, ක්‍රියා කරන ලෙසයි. පරාජිතයන් ගෙන යන බියවැද්දීමේ ප්‍රචාරවලට කිසිසේත් හසු නොවන ලෙස අපි ජනතාවට අවධාරණය කරනවා.
“මැතිවරණය ආසන්නයේ බොරු ප්‍රචාර සහ මඩ ප්‍රචාරවලට එරෙහිව උපරිම ක්‍රියාමාර්ග ගන්නවා”
-‘ජාතික ජන බලවේගයේ නීතිඥයෝ’ සංවිධානයේ නීතිඥ සුනිල් වටගල-
ජාතික ජන බලවේගයේ ජනාධිපති අපේක්ෂක මෙන්ම එහි නායකත්ව මණ්ඩලය ඉලක්ක කරමින්, ගෙන යන මඩ ප්‍රහාර සම්බන්ධයෙන් නීතිමය පියවර ගෙන තිබෙනවා. ජාතික ජන බලවේගයේ ව්‍යාජ ලිපි ශීර්ෂයක යොදාගෙන අනුර දිසානායක සහෝදරයාගේ අත්සනත් ව්‍යාජව යොදාගෙන ප්‍රචාරය කරන ලිපි තිබෙනවා. ‘සියලු ආගම් සමානයි’ කියලා එවැනි ලිපියක් ප්‍රචාරය කර තිබුණා. ඒ සම්බන්ධයෙන් අපරාධ පරීක්ෂණ දෙපාර්තමේන්තුවට පැමිණිලි කිරීමෙන් පසු පරීක්ෂණ පැවැත්වෙනවා. දැනට හෙළි වී තිබෙන්නේ සමඟි ජන බලවේගයට සම්බන්ධ ‘ෆේස්බුක්’ ගිණුමකින් මෙය ප්‍රචාරය කර ඇති බවයි. ඒ වාගේම වසන්ත සමරසිංහ සහෝදරයාව අත්අඩංගුවට ගන්න කියලා අධිකරණය නියෝග කළ බවටත් ප්‍රචාරය කර තිබුණා. මෙම ප්‍රචාරයට දයාසිරි ජයසේකර ඇතුළු නීතිඥයන් තුන්දෙනකු හවුල් වී තිබුණා. ආචාරධර්ම කඩ කිරීමට අදාළව මේ නීතිඥවරු තුන්දෙනා ගැන ක්‍රියාමාර්ග ගන්නා ලෙස අගවිනිසුරුතුමාට පැමිණිලි කර තිබෙනවා. ඒ වාගේම නීතිඥ සංගමයටත් විනය ක්‍රියාමාර්ග ගන්නා ලෙස දැනුම් දී තිබෙනවා. ඊට අමතරව ගල්කිස්ස මහෙස්ත්‍රාත්තුමිය ඉදිරියේ 2024 අංක 8 දරන අධිකරණයට අපහාස කිරීමේ පනත යටතේ වෙනම නඩුකරයක් පවරනවා. ඊයේ (10දා) මගේ අත්සන ව්‍යාජව යොදාගෙන වෛද්‍ය ආචාරධර්ම කඩ කිරීම සම්බන්ධව යැයි කියමින්, ලිපියක් සමාජ මාධ්‍යයට මුදාහැර තිබුණා. හරිනි අමරසූරිය මන්ත්‍රීවරිය ප්‍රකාශ කළ බව කියමින්, දළදා මාලිගාවේ පෙරහැර නතර කරනවා යැයි කියූ බවට තිස්ස අත්තනායක කළ ප්‍රකාශයට විරුද්ධව එන්තරවාසියක් යැව්වා. ඊට අමතරව හරිනි අමරසූරිය මන්ත්‍රීවරිය විසින් කොළඹ දිසා අධිකරණයේ නඩු පැවරුවා. පැය විසිහතරක් පවතින බොරුවක් සමාජගත කර ගන්න ඔවුන්ට හැකි වී නැහැ. මෙවැනි ප්‍රචාරවලට එරෙහිව අපරාධ පරීක්ෂණ දෙපාර්තමේන්තුවේ පරිගණක අපරාධ මෙහෙයුම් අංශයට පැමිණිලි කරමින්, ඉදිරි කටයුතු ගෙන යනවා.
මාධ්‍යවේදීන් නැඟූ ප්‍රශ්නවලට පිළිතුරු දෙමින්
ජාතික ජන බලවේගය ගැටුම් නිර්මාණය කිරීමට සූදානම් වන බවට ගෙන යන ප්‍රචාර සම්බන්ධයෙන් ආරක්‍ෂක අංශ ක්‍රියා කරන අතර, ඔබේ පක්ෂ යාන්ත්‍රණය මගින් සාමාජිකයන් දැනුවත් කර තිබෙනවාද?
අපි උපදෙස් දීලා තියෙන්නේ, ගැටුම් නිර්මාණය කර ගන්න යන්නත් එපා. ගැටුම් පවතින තැන්වලට යන්නත් එපා කියලා. අපි පවත්වන රැලිවලට සහභාගී වන දසදහස් ගණන් ජනතාව මේ සම්බන්ධයෙන් දැනුවත් කරමින් යනවා. අපේ අයට කොතරම් දැනුවත් කර තිබුණත්, මෙවැනි ක්‍රියා කිරීමට විරුද්ධවාදීන් යොදා ගන්නා කුඩා කණ්ඩායම් යම් අනතුරක් කිරීමේ හැකියාව තිබෙනවා. එවැනි නිශ්චිත තොරතුරු ලැබුණහොත්, වහාම පොලිසියට පැමිණිලි කරනවා. ඒ වාගේම ජනතාව දැනුවත් කරමින්, අවධානයෙන් සිටින ලෙසත් දන්වනවා.
ජාතික ජන බලවේගයේ සාමාජිකත්වය ලබාගෙන සිටින පුද්ගලයෙක් මෙවැනි ගැටුම්වලට මුලපිරුවහොත්, ඒ සම්බන්ධයෙන් පැහැදිලි ක්‍රියාමාර්ග ගන්නවා ද?
අපි ආරක්‍ෂක අංශවලට අවධාරණය කර තිබෙන්නේ, ජාතික ජන බලවේගයේ පුද්ගලයකු සම්බන්ධයෙන් වුවත්, ඕනෑම පුද්ගලයකු සම්බන්ධයෙන් නීතිය හරියටම ක්‍රියාත්මක කරන ලෙසයි. යම් හුදෙකලා සිදුවීමක් වුවහොත්, පොලිසිය නිසි ක්‍රියාමාර්ග අනුගමනය කරාවි. අප විශාල කාලයක් මහන්සි වී, කැප වීමෙන් ලබා ගන්නා ජයග්‍රහණය බොඳ කරන්න කිසිවකුටත් ඉඩ දෙන්න බැහැ. අපේ පාක්‍ෂිකයා, සාමාජිකයා, හිතවතා යන කිසිවකුටවත් මෙවැනි දෙයක් කිරීමේ අවශ්‍යතාවක් නැහැ. කුඩා කණ්ඩායම් එවැනි ගැටුම් නිර්මාණය කිරීමට තිබෙන ඉඩකඩ ගැන හැම දෙනා ම අවදියෙන් ඉන්න. එවැනි තත්වයන් පරාජය කරන්න නීතිය හමුවට යන්න කියන පණිවුඩය අපි ලබා දෙනවා.
(-‘රට අනුරට’ ජාතික ජන බලවේගයේ විජයග්‍රාහී රැලිය – කෑගල්ල – 2024.09.10-) සැප්තැම්බර් 21 ඡන්දය එනතෙක් ඔබ ඇඟිලි ගනිමින් බලා සිටින බව මම දන්නවා. හෙට ඡන්දෙ තිබ්බා නම් තවත් හොඳයි කියලා මේ රටේ ජනතාව දැන් හිතනවා. අනෙක් දේශපාලන කඳවුරු සියල්ල දැන් කඩා වැටිලා. අපිට එරෙහිව අවලාද, අසත්‍ය තොරතුරු කරුණු විකෘති කිරීම් හැර දැන් ඔවුන්ට කිසිවක් ඉතිරි […]
(-‘රට අනුරට’ ජාතික ජන බලවේගයේ විජයග්‍රාහී රැලිය – කෑගල්ල – 2024.09.10-)
සැප්තැම්බර් 21 ඡන්දය එනතෙක් ඔබ ඇඟිලි ගනිමින් බලා සිටින බව මම දන්නවා. හෙට ඡන්දෙ තිබ්බා නම් තවත් හොඳයි කියලා මේ රටේ ජනතාව දැන් හිතනවා. අනෙක් දේශපාලන කඳවුරු සියල්ල දැන් කඩා වැටිලා. අපිට එරෙහිව අවලාද, අසත්‍ය තොරතුරු කරුණු විකෘති කිරීම් හැර දැන් ඔවුන්ට කිසිවක් ඉතිරි වෙලා නැහැ. අද අනාගත සැලැස්මක් සහිත ශක්තිමත්ම දේශපාලන ව්‍යාපාරය බවට ජාතික ජන බලවේගය පත්ව තිබෙනවා. ඒ වගේම ඉදිරි ජයග්‍රහණය ඉක්මනින්ම උදාකර ගැනීමේ දැඩි වුවමනාවක් අද ජනතාවට තිබෙනවා. තව දින කිහිපයයි ඡන්දයට තිබෙන්නේ. ඒ දින කිහිපය තුළ කැපවෙලා මහන්සි වෙලා වැඩිම ජයග්‍රහණයක් මේ කෑගල්ල දිස්ත්‍රික්කයෙන් අරන් දෙන්න කියලා අපි ඔබෙන් ඉල්ලනවා.
දැන් රාත්‍රි 8.00ටත් කිට්ටුයි. ඔබේ දැස් බලාපොරොත්තුවලින් බරවෙලා බලාගෙන සිටිනවා. ඔබ දශක ගණනාවකට පසු ලංකාවේ අලුත් දේශපාලන පෙරළියක් පිළිබඳව අපේක්ෂාවෙන් බලා සිටිනවා. මේ රටේ ජනතාව අවස්ථා ගණනාවකදීම ආණ්ඩු හදලා, ආණ්ඩු පෙරළලා ඇති තරම් හෙම්බත් වෙලා සිටිනවා. මේ සැප්තැම්බර් 21 මේ රටේ ජනතාව ගන්නේ රට අලුත්ම මාවතකට හරවන තින්දුවක්. අපි ඔබට එකක් කියනවා. ඔබේ බලාපොරොත්තු බිඳකින්වත් බිඳවැටෙන්න අපි ඉඩ තියන්නේ නැහැ. ඒ බලාපොරොත්තු ජයග්‍රාහී ලෙස කෙළවර කිරීම සඳහා අපි මැදිහත් වෙනවා. මේ විනාශකාරී දේශපාලනයේ විපාක අපි දශක ගණනාවක් තිස්සේ දැක්කා. මන්ත්‍රීවරු ඇමතිලා වෙනවා. ගල් කොරි දාගන්නවා. පාරට පස් දාගන්නවා. තේ වතු ගන්නවා. පුතාලට අනාගතය සඳහා පාර හදාගන්නවා. රටේ ජනාධිපති පුටුවේ වාඩි කරන්නේ කොහොමද කියලා සැලසුම් හදනවා. මේක තමයි දිගටම වුණේ.
කෑගල්ලෙන් ඡන්දෙ කරන්න ගෙවල් තියා ගන්නවා. කොළඹින් ඉන්න ගෙවල් තියා ගන්නවා. නුවරඑළියට ගිහිල්ලා හුළං වදින්න ගෙවල් ගන්නවා. වෙරළ තීරයට ගිහිල්ලා හුළං වදින ගෙවල් ගන්නවා. දරුවන්ට උගන්වන්න එංගලන්තේ ගෙවල් ගන්නවා. ඒ විදිහට තමයි ඒ ගොල්ලෝ දේශපාලනය කළේ. ඒ නිසා දීර්ඝ කාලයක් මේ පාලක කණ්ඩායම් ජනතාවගේ සතුරන් බවට පත්වෙලා මහජනයාගේ ධනය කෝටි ප්‍රකෝටි ගණන් එක්රැස්කරමින් මේ රටත් ජනතාවත් විපතට පත්කළා. ඒ ගොල්ලෝ සැපත උරුම කර ගන්න රට වැට්ටුවා. ජනතාව දුප්පත් වුණා. ඒ ගොල්ලෝ පොහොසත් වුණා. මෙය වෙනස් කළ යුතුයැයි ස්ථිර අධිෂ්ඨානයෙන් යුතුව අපි කාලාන්තරයක් තිස්සේ දේශපාලනය කරමින් ඉන්නවා. මේ ඉතාමත් දූෂිත පවුල් කිහිපයක් අතේ, පරම්පරා කිහිපයක් අතේ ගොනු කරගෙන තිබෙන දේශපාලනය, අතිශය දූෂිත මේ පාලකයන්ගෙන් මේ රටත් ජනතාවත් මුදා ගැනීමේ ස්ථිර අධිෂ්ඨානයෙන් අපි දේශපාලනය කළා. එහි ජයග්‍රහණය මේ සැප්තැම්බර 21 වැනිදාට නියතයි; සහතිකයි.
අපි ඉතාමත් සැලසුම් සහගතව මේ මැතිවරණ ව්‍යාපාරයට අවතීර්ණ වෙලා තිබෙනවා. ඒ පිටුපස්සේ සජිත් ප්‍රේමදාස ගාට ගාට එනවා. රට ගොඩගැනීම පිළිබඳව නොවෙයි. අඩුම තරමේ තමන්ට අනන්‍ය වූ ඡන්ද ව්‍යාපාරයක්වත් ඔවුන්ට කර ගන්න බැහැ. අපි එකක් කළොත් ඒක එයත් කරනවා. අපි වැඩේ මෙගා සයිස් එකට කරනවා. එයා මයික්‍රෝ සයිස් එකට කරනවා. මැතිවණ ව්‍යාපාරයකදි ජනතාව ඉතා හොඳින් සංවිධානය කරන්න ඕනෑ. ඉන් පස්සේ රට හදන බලවේග එකතු කරන්න ඕනෑ. ඒ බලවේග අතරට තමයි මේ බලය මාරු වෙන්නේ. රට හදන්න දැනුම, ඥානය තිබෙන කණ්ඩායම් අවශ්‍යයි. ඒ නිසා ඒ සඳහා රටේ විවිධ ක්ෂේත්රවල සංවිධාන අපි ගොඩනැගුවා. විවිධ කෂේත්‍රවලට සම්බන්ධ විද්වතුන්, අත්දැකීම්, දැනුම පලපුරුද්ද තිබෙන අය අපි එකතු කළා. මේ රට බාරගන්න සූදානම්, බාරගත් පසු රට ගොඩනගන්න සමත් දැනුම තිබෙන කණ්ඩායම් අපි එකතු කළා. ඒ වගේම අපි වෘත්තිය සමිති ගොඩනගලා ආයතන බිඳවට්ටන වැඩ නොකර අනාගතයේ එම ආයතන හා වෘත්තිය සමිති ව්‍යාපාරය එක්ව නිෂ්පාදනය වැඩි දියුණු කර, රට ගොඩනඟන්න හැකිවන ආකාරයේ වෘත්තිය සමිති ව්‍යාපාර හාවිතයක අපි නිරත වී සිටිනවා. ගොවි ජනතාව එකතු කරලා දැවැන්ත ගොවි ව්‍යාපාරයක් ගොඩනැගුවා. ව්‍යාපාර හා කර්මාන්තකරුවන්ගේ ව්‍යාපාර ගොඩනැගුවා. ඒ නිසාමේ මැතිවරණය අපි ගෙනියන්නේ මැතිවරණයෙන් පසු රට ගොඩනැගීම සඳහා අවශ්‍ය වන ශකිත්මත්ම බලවේගය ඒකරාශී කරගෙනයි.
ජාතික ජන බලවේගය මේ ඡන්දයට අවතීර්ණ වෙලා තිබෙන්නේ එය ජයග්‍රහණය කරන්නයි. මෙතෙක් මේ රටේ දියත් වුණු කැත පන්නයේ දේශපාලනය අපි නතර කරන්න ඕනෑ. ඡන්දයක් එනකොට එහෙට පනිනවා. මෙහෙට පනිනවා. එහෙන් ගාණ ගන්නවා. මෙහෙන් ගාණ ගන්නවා. ලංකාවේ තිබෙන්නේ මොන තුට්ටු දෙකේ දේශපාලනයක්ද? ලෝකයේ කොහෙවත් මේ වගේ කැත ලැජ්ජාසහගත දේශපාලනයක් නැහැ. මේ දවස්වල රනිල්ගේ වේදිකාවේ, සජිත්ගේ වේදිකාවේ සිද්ධ වෙන දේවල් දිහා බලන්න. සජිත් ප්‍රේමදාස කියන්නේ මෙලෝ දේශපාලන විග්‍රහයක් නැති හාදයෙක්. සමාජයටම දැන් මේ එහෙන් මෙහෙන් ගන්න එක එපාවෙලා තිබෙන්නේ. ඒක තිත්තවෙලා තිබෙන්නේ. ඒක වත් සජිත්ට තේරෙන්නේ නැහැ. අද පොහොට්ටු දේශපාලනයෙන් කොටසක් රනිල් ළඟ. කොටසක් නාමල් ළඟ. පොහොට්ටුවේ සභාපති ජී.එල්. පීරිස් 1994 ඉඳලා ඇමති, චන්ද්‍රිකාගෙ ආණ්ඩුවෙත් ඇමති, රනිල්ගේ ආණ්ඩුවෙත් ඇමති, මහින්දගේ ආණ්ඩුවෙත් ඇමති. ගෝඨාභයගේ ආණ්ඩුවෙත් ඇමති. දැන් ඔන්න සජිත්ගේ වේදිකාවේ. මොන තුට්ටුදෙකේ දේශපාලනයක්ද, නාලක ගොඩහේවා ගෝඨාභයගේ ආණ්ඩුවේ රාජ්‍ය අමාත්‍ය ධුර දරපු, කොටස් වෙළඳපොළ භාරව ඉන්න කොට ඒකෙ සල්ලි හොරකම් කරපු, රිමාන්ඩ් වෙලා හිටපු කෙනෙක්. එයා දැන් සජිත්ගේ ගාව. මේ මොන දේශපාලනයක්ද?. ගීතා කුමාරසිංහ ගිය සතියේ එකක් කියනවා. මේ සතියේ තව එකක් කියනවා. ගිය සතියේ කියනවා රනිල් තමයි උතුමා කියලා. මේ සතියේ කියනවා සජිත් තමයි උතුම් කියලා. මේ වගේ දේශපාලනයක් මේ රටට ඕනැද?
ආනමඩුවේ ගුරුවරියක් දණ ගස්සලා ගුරු පරපුරට නින්දා කරපු මිනිහෙක්, දැන් සජිත්ගේ වේදිකාවේ. ක්‍රිකට් කෑව කියලා සජිත්ට කෑගහපු තිලංග සුමතිපාලත් දැන් සජිත්ගේ වේදිකාවේ. පසුගිය කාලේ මහා පරිසර විනාශයක්, කැලෑ විනාශයක් කළැයි කියපු සජිත්ම කිවුව රිෂාද් බදියුද්දීනුත් දැන් සජිත්ගේ වේදිකාවේ. රිෂාද් බදියුද්දීන්ට විරුද්ධව සී.අයි.ඩී.යට ගිහිල්ලා පැමිණිලි කරපු පොඩි හාමුදුරු කෙනෙක් ඉන්නවා. උන්වහන්සේත් අද සජිත් ගාව. ගස් කපපු කෙනත් එතන. ගස් රකින්න ගිය කෙනෙත් එතන. මොන නිර්ලජ්ජිත දේශපාලනයක්ද මේ? අර්ජුන රණතුංග ක්‍රිකට්වල ආරක්ෂකයා හැටියට පෙනී සිටියා. තිලංග සුමතිපාල ක්‍රිකට් විනාශ කළා කියලා ඔහු කිවුවා. දැන් දෙන්නම එකට සජිත්ගේ වේදිකාවේ. දැන් මාසෙකට විතර කලින් චම්පික රණවක කිවුවේ මොකක්ද? සජිත්ට තිබෙන්නේ ලාමක ටිං ටිං අදහස් කිවුවා. දැන් ඒ චම්පික රණවක අන්න සජිත්ගේ වේදිකාවේ. රිෂාද්ට එරෙහිව ජාතිවාදී වේදිකාවල නැග්ග චම්පික දැන් රිෂාද්ලා සමග එකම වේදිකාවේ.
සජිත් මාතර රැස්වීමක් කර තිබ්බා. සජිත් මාතර රැස්වීම්වලට යනකොට රිෂාද් බදියුද්දීන්ව හංගලා චම්පික අරගෙන යනවා. නැගෙනහිර රැස්විම්වලට යනකොට චම්පිකව හංගලා රිෂාද්ව අරගෙන යනවා. මේ ප්‍රතිපත්තිගරුක දේශපාලනයද? ඒ නිසා මේ ඡන්ද කාලෙ බැලුවත් ප්‍රතිපත්තිගරුක දේශපාලනයක් තිබෙන්නේ ජාතික ජන බලවේගයට විතරයි. අපි ඔය පාර්ලිමේන්තුවේ අපරාධවලට හවුල් වුණු, වංචාවලට හවුල් වුණු එහෙට මෙහෙට පැනපු, ජාතිවාදය අවුස්සපු ඒ කිසිවෙකු ජාතික ජන බලවේගයේ වේදිකාවට අපි ගන්නෙත් නැහැ.
ඒ නිසා මේ ටිකම ඇති කවුද හොඳ, කවුද නරක කියලා තෝරා ගන්න. සැප්තැම්බර් 21 අපි දිනමු. ඊළඟට පාර්ලිමේන්තු ඡන්දයෙත් දිනමු. අපි ආණ්ඩුක්‍රම ව්‍යවස්ථාවට බලවත් සංශෝධනයක් ගේනවා. පැන්නොත් මන්ත්‍රීකම ඉවරයි. මේ විකිණෙන, විකුණන දේශපාලනය නතර කරන්න ඕනෑ. දැන් රනිල් කියනවා අනුර යාළුවා මගේ මිත්‍රයා. ඔය එන්නේ ෂේප් එකක් දාගන්න. එයා දන්නවා අපි දිනන බව. හැබැයි ඔයා දීපු ගේම් ගැන අපි පරීක්ෂණ තියනවා. යාළුවාගේ තරම 21 වැනිදායින් පස්සේ ඔයාට බලාගන්න පුවළුන්. ඔයාට ගැලවෙන්න අපි කිසිසේත්ම ඉඩ තියන්නේ නැහැ. ගත හැකි සියලුම නීතිමය ක්‍රියාමාර්ග අපි අනිවාර්යයෙන්ම ගන්නවා. අපිට අවලාද ගහන්න කියන ඩීල් කතාව ඇත්තටම තියෙන්නේ රනිල්ලා, සජිත්ලා අතර, කබීර් හෂීම් ඔයා මීට සති දෙකකට කලින් රනිල්ව හම්බ වුණේ නැද්ද? තලතත් එක්ක ගිහිල්ලා හම්බ වුණේ. මේගොල්ලෝ එකට එකතු වෙලා ඉන්නේ. රෑට රෑට හමුවෙන අය. එල්.ආර්.සී. එකේ ඉඩම් ගත්ත අය. බාර් ලයිසන් ගත්ත අය. කාර් පර්මිට්, පෙට්්‍රල් ෂෙඩ් බෙදා ගත්ත අය.
මහජනයාගේ ධනය නාස්ති කරමින් එකට රට ගිය අය. එකට තියල පරාජය කරන්න සැප්තැම්බර් 21 වැනිදා රටේ මහජනතාව එකට එකතුවෙලා තීන්දු කර හමාරයි. ඉන්පසු මේ කැත මජර දේශපාලන පොරපිටිය, මේ ජරා ජීර්ණ දේශපාලන සංස්කෘතිය අපි ශුද්ධ කර දානවා. ඊට පස්සේ පියවරෙන් පියවර මේ රට ගොඩනගන්න ජාතික ජන බලවේගයේ පාලනයක් යටතේ අපි සැලසුම් කර තිබෙනවා.
“ජාතික ජන බලවේගයේ රාජ්‍ය පාලනයක් ඔබේ ජීවිත ලස්සන කරන බවට සහතිකයි”
-ජාතික ජන බලවේගයේ ජාතික විධායක සභික වෛද්‍ය ධම්මික පටබැඳි-
පක්ෂ දෙකක් මේ රට මෙතෙක් පාලනය කර රට බංකොලොත්භාවයට පත් කළාට පසුව පැවැත්වෙන ජනාධිපතිවරණය තමයි මේක. ඒ වගේම මේ රට බංකොලොත්භාවයෙන් මුදාගන්නා නායකයෙකු එනම් අපේ අනුර කුමාර දිසානායක සහෝදරයා ජනාධිපතිවරයා වෙන ජනාධිපතිවරණයත් මේක. මේ ජනාධිපතිවරණයේදී මෙරට ජනතාව ඡන්දය පාවිච්චි කරන්නේ මෙතෙක් කල් ඡන්දය පාවිච්චි කරපු විධියට නොවෙයි. ජනතාව විශාල ලෙස දේශපාලන ක්‍රියාකාරිත්වයට පැමිණ තිබෙනවා. අවුරුදු 76ක් මේ රට පාලනය කරපු මේ විනාශකාරී පාලකයන් පලවා හැර අනුර සහෝදරයාගේ ජයග්‍රහණය තහවුරු කිරීම වෙනුවෙන් මේ රැස්වීම් භූමිය එකම හිස්ගොඩක් බවට පත්වී තිබෙනවා. ඔබ මේ ලබාදී තිබෙන්නේ, කෑගල්ල ජනතාව එක සිතින් අනුර සහෝදරයාව දිනවනවා කියන පණිවුඩය හා සහතිකයයි. සැප්තැම්බර් 21 වැනිදාට මේ රටේ මෙතෙක් පැවැති ඛේදවාචකය අවසන් කර ‘පොහොසත් රටක්, ලස්සන රටක්’ කරන ගමන අපි ආරම්භ කරනවා. ඒ පණිවුඩය අපි අද කෑගල්ල ජනතාව හැටියටත් ලබා දෙනවා.
මේ ජනාධිපතිවරණය අපේ රටට සුවිශේෂී මැතිවරණයක්. අපේ රටේ ඉතිහාසයේ දැවැන්ත ජන අරගලයකින් පසුව පැවැත්වෙන පළමු මැතිවරණය තමයි මෙය. පසුගියදා අපේ රටේ ඇතිවූ අරගලය කියන්නේ මේ රටේ ලක්ෂ සංඛ්‍යාත ජනතාවක් සහභාගිවූ අරගලයක්. නමුත් ඒ අරගලය අවසන් වුණේ එහි අරමුණු සාක්ෂාත් කරගෙන නොවෙයි. මේ රට වංචාවෙන්, දූෂණයෙන් විනාශ කළ මේ පාලක කල්ලි පලවා හරින එකයි; ඔවුන් කළ මහා අපරාධවලට නීත්‍යානුකූලව දඬුවම් දෙන එකයි; මේ හොර පාලක කල්ලි මේ රටෙන් කොල්ල කාපු මහජන මුදල් හා දේපොළ ආපසු පවරා ගන්න එකයි අරගලයේ ප්‍රධාන අරමුණු අතර වුණා. නමුත් ඒ අරගලය මගින් ඒවා ඉටුකර ගන්න අපිට නොහැකි වුණා. ඒ නිසා ඒ අරමුණු සාක්ෂාත් කර ගැනීම සඳහා අද මේ රටේ ජනතාව මේ සැප්තැම්බර් 21 වැනිදාට අනුර කුමාර දිසානායක සහෝදරයාව ජනාධිපති කරවන්න එකා වගේ පෙළගැහිලා ඉන්නවා.
මේ මැතිවරණය තමයි ප්‍රතිඵල එන්නත් කලින් ජයග්‍රාහකයා තීරණය කරපු මැතිවරණය. තැපැල් ඡන්දවලින්ම මේ රටේ වැඩකරන ජනතාව එය ඔප්පු කර හමාරයි. මේ මැතිවරණයේ ජයග්‍රාහකයා අනුර කුමාර දිසානායක සහෝදරයා බව දැනටමත් තීරණය වී හමාරයි. නමුත් අපේ කාර්යභාරය මෙතනින් අවසන් නැහැ. මේ 21 වැනිදා දක්වා වෙහෙස නොබලා වැඩ කරලා අනුර කුමාර දිසානායක සහෝදරයා විජයග්‍රහණයක් දක්වා රැගෙන යා යුතුයි. අපේ රටේ ජනාධිපතිවරණයක වැඩිම ඡන්ද ප්‍රතිශතයකින් ජනාධිපතිවරයෙකු ජයග්‍රහණය කරන මැතිවරණයත් මෙය වෙනවාට සැකයක් නැහැ. වැඩිම ඡන්ද ප්‍රතිශතයකින් ජයග්‍රහණය කරලා ජනාධිපති වෙලා වාර්තාවක් තියනවා සහතිකයි. ඒ වගේම මේ මැතිවරණය පශ්චාත් මැතිවරණ ප්‍රචණ්ඩ ක්‍රියා ශූන්‍ය වූ මැතිවරණයක් බවට පත්වෙන බවත් සහතිකයි.
මට මේ ළඟදි තරුණයෙක් හමුවුණා. ඔහු දැන් නීති විද්‍යාලයේ විභායට සූදානම් වෙමින් ඉන්නේ. මම ඇහුවා ‘කොහොමද’ කියලා. ඔහු කිවුවා ‘හොඳයි’ කියලා. මම ඇහුවා ‘කොහොමද හොඳ වුණේ’ කියලා. ‘මාලිමාවට හොඳයි. ඒ නිසා මටත් හොඳයි’ කිවුවා. ‘මමත් මගේ යාළුවොත් ඡන්දය දෙන්නේ මාලිමාවට තමයි’ කිවුවා. මම ඇහැව්වා මාලිමාවට ඡන්දය දෙන ප්‍රධාන හේතු මොකක්ද කියලා. ඔහු කිවුව දේ තමයි, ‘අපි මාලිමාවට ඡන්දය දෙන්නේ මාලිමාව විතරයි එහෙට මෙහෙට පනින එවුන් තමන්ගේ තුරුළට ගත්ත නැති එකම පක්ෂය. ඒ නිසා තමයි අපි මාලිමාවට ඡන්දය දෙන්නේ’ කියලා.
මාලිමාව කියන්නේ අනෙකුත් පක්ෂවලට සම කළ හැකි පක්ෂයක් නොවෙයි. වෙනස් දේශපාලන සංස්කෘතියක් සහිත දේශපාලන ව්‍යාපාරයක්. මේ රට හදන්න පුළුවන් වැඩපිළිවෙළක් තිබෙන, එය ක්‍රියාවට නගන්න පුළුවන් නිශ්චිත බලවේගයක් සිටින දේශපාලන ව්‍යාපාරයක්. මේ රටේ විද්වතුන් ඇතුළු සියලුම ක්ෂේත්රවල ජනතාව විවිධ බලවේග අපේ අනුර කුමාර දිසානායක සහෝදරයා පිටුපස ඉන්නවා. ජාතික ජන බලවේගයේ රාජ්‍ය පාලනයක් තුළ අපි මේ රට පොහොසත් කරනවා, ඔබේ ජීවිත ලස්සන කරනවා කියලා අපි ස්ථිර ලෙසම ඔබට සහතික වෙනවා.
(-මාලිමාවේ ජය වෙනුවෙන් විශ්වවිද්‍යාල ආචාර්යවරුන් විසින් පවත් වන ලද මාධ්‍ය හමුව – 2024.09.10-) ලාංකේය සමාජය ඓතිහාසික පරිවර්තනයක් අභියස සිටිනවා. මේක දේශපාලනය, ආර්ථිකය, සංස්කෘතිය, නීතියේ ආධිපත්‍යය සහ සමාජය වශයෙන් වැටෙන්න පුළුවන් පතුලටම වැටී තිබෙන මොහොතක්. ජනතාව රවටමින් පැමිණි යුගයක් නිමාවට පත් කරන්න අපි ජාතික ජන බලවේගය වටා නව බලාපොරොත්තුවක් සමඟින් එකතු වී සිටිනවා. ජනාධිපතිවරණයෙන් අපි බලාපොරොත්තු […]
(-මාලිමාවේ ජය වෙනුවෙන් විශ්වවිද්‍යාල ආචාර්යවරුන් විසින් පවත් වන ලද මාධ්‍ය හමුව – 2024.09.10-)
ලාංකේය සමාජය ඓතිහාසික පරිවර්තනයක් අභියස සිටිනවා. මේක දේශපාලනය, ආර්ථිකය, සංස්කෘතිය, නීතියේ ආධිපත්‍යය සහ සමාජය වශයෙන් වැටෙන්න පුළුවන් පතුලටම වැටී තිබෙන මොහොතක්. ජනතාව රවටමින් පැමිණි යුගයක් නිමාවට පත් කරන්න අපි ජාතික ජන බලවේගය වටා නව බලාපොරොත්තුවක් සමඟින් එකතු වී සිටිනවා. ජනාධිපතිවරණයෙන් අපි බලාපොරොත්තු වන්නේ එක්තරා ආකාරයකට ජරාජීර්ණ වී තිබෙන සමාජය ශුද්ධ කිරීමක්. ඒ වාගේම සංවර්ධිත ලංකාවක් ගැන තිබෙන බලාපොරොත්තුව ඉෂ්ට කර ගැනීමේ මුල් පියවර ලෙසත් හඳුන්වන්න පුළුවන්. මාලිමාව වෙනුවෙන් රටේ ලොකු පිබිදීමක් තිබෙනවා. නිදර්ශනයක් කීවොත්, සරසවි ආචාර්යවරුන්ගෙන් අති බහුතරයක් මාලිමාව වෙනුවෙන් ක්‍රියා කිරීමට තීරණය කර අවසන්. ප්‍රතිපත්ති සැකැසීමේ සිට කැන්වසින් යාම දක්වා විවිධ ආකාරයෙන් ඉතිහාසයේ නොවූ විරූ ආකාරයට මහා පරිමාණයෙන් අපි ක්‍රියාත්මක වෙමින් සිටිනවා. අපි පසුගිය දිනක විශ්වවිද්‍යාල ආචාර්යවරුන් ලෙස කැන්වසින් ගියාම අපට ලැබුණු ප්‍රතිචාරය තමයි ජනතාව විශාල උනන්දුවකින් අපව කැන්වස් කරන්න ඉදිරිපත් වෙනවා. කෙතරම් තීරණාත්මක පරිවර්තනයකට රට සූදානම්ද කියන දේ එයින් පැහැදිලි වෙනවා. එක්තරා ආකාරයකට කොළඹ නගරය පැවැතුණේ කොළ පාටට අයිති බලකොටුවක් හැටියට. නමුත්, මෙවර කොළඹ නගරය පවා ඛණ්ඩනයකට ලක් වී තිබෙනවා. විශේෂයෙන් මුස්ලිම් ප්‍රජාව මාලිමාව වෙනුවෙන් අපට හිතාගන්නවත් බැරි තරම් ප්‍රතිචාර දැක්වූවා.
මාලිමාවේ ජයග්‍රහණය තුළින් පොදුවේ සිදු වන පරිවර්තනය පිළිබඳව කෙටියෙන් පැහැදිලි කරන්නම්. අපි එළැඹෙන්නේ මුළු සමාජයම පරිවර්තනය කරවමින් යන පුනරුද යුගයකටයි. සෞඛ්‍ය ක්‍ෂේත්‍රයේ, අධ්‍යාපන ක්‍ෂේත්‍රයේ, ගමනාගමන ක්‍ෂේත්‍රයේ, සංස්කෘතික ජීවිතයේ සහ තිරසර සංවර්ධනයක් ආදී වශයෙන් සියලුම ක්‍ෂේත්‍ර ආවරණය කරමින්, පොදු ජනයාගේ පාලනයක් මෙම මැතිවරණයෙන් පසුව බිහි වෙනවා. නිදහසින් පසුව එක්තරා ප්‍රභූ කල්ලි ටිකක් ගෙන ගිය පාලනයෙන් නිදහස් වී සාමාන්‍ය ජනයා අතට බලය මාරු වෙනවා. අපි අධ්‍යාපන ක්‍ෂේත්‍රයේ නිසා සහ පුනරුදයේ තීරණාත්මක කාර්යභාරයක් අධ්‍යාපන ක්‍ෂේත්‍රයට පැවරී තිබෙන නිසා කෙටියෙන් අධ්‍යාපනය පිළිබඳව අදහස් දක්වන්නම්. මෙපමණ කලක් අධ්‍යාපනය වෙනුවෙන් රාජ්‍ය අංශයෙන් යෙදවූ මුදල් ක්‍රමානුකූලව කප්පාදු කරගෙන ගියා. ඇත්තටම ගත්තොත්, සම්පූර්ණයෙන් ම ඉවත් වූ මට්ටමකට පැමිණ තිබෙනවා. මුදල්මය වශයෙන් පමණක් නොවෙයි, දෙමවුපියන්ගේ කාලය සහ ශ්‍රමය පැත්තෙන් ගත්තත්, දරුවන්ගේ අධ්‍යාපනය මුළුමනින්ම ඔවුන් මත පටවා තිබෙනවා. විශේෂයෙන්ම පාසල් පද්ධතියේදී මේ බව දකින්න පුළුවන්.
නමුත්, මාලිමාවේ පාලනයක් යටතේ ඉතාමත්ම තීරණාත්මක ලෙස බලයට පත් වන මුල් වර්ෂයේදීම අධ්‍යාපනය වෙනුවෙන් විශාල මුදලක් වෙන් කරන්න තීරණය කර තිබෙනවා. මේ තුළින් පාසල් මෙන්ම විශ්වවිද්‍යාලවල පවා තිබෙන විෂමතාවන් ඉවත් කෙරෙනවා. විශේෂයෙන්ම පාසල් අධ්‍යාපනයේදී දෙමවුපියන්ගේ නිවසේ සිට හෝ පදිංචි ස්ථානයේ සිට කිලෝමීටර් තුනක් ඇතුළත දරුවන්ට අංගසම්පූර්ණ පාසලක් ලබා දීම ප්‍රධානම ඉලක්කයක්. තව පැත්තකින් 10 වැනි ශ්‍රේණියේ සිට වෘත්තීය පුහුණු අධ්‍යාපනයක් හඳුන්වා දීමත් තිබෙනවා. නිෂ්පාදන ආර්ථිකයක් වෙනුවෙන් එය ඉතාමත් අත්‍යවශ්‍යයි. ඒ වාගේම සමාජ ක්‍රියාකාරීත්වය වෙනුවෙනුත් එම වෘත්තීය පුහුණුව අත්‍යවශ්‍යයි. පළමුවැනි වසරට ඇතුළත් වන සිසු දරුවන් සියලු දෙනාටම තමන්ගේ කැමැත්ත අනුව ඉහළටම අධ්‍යාපනයේ යෙදීමේ අවස්ථාව හඳුන්වා දෙනවා. මම මේ පැහැදිලි කළේ අධ්‍යාපන ක්‍ෂේත්‍රයේ මාලිමාවේ පාලනයක් යටතේ ඇති කරන පුනරුදය ගැනයි. අනෙකුත් ක්‍ෂේත්‍රත් මේ වාගේම සමස්ත පරිවර්තනයකට ලක් කරනවා.
“අපට ඇති එකම විකල්පය ජන අභිලාෂය නියෝජනය කරන අනුර සහෝදරයායි”
-කොළඹ විශ්වවිද්‍යාලයේ මහාචාර්ය නිර්මාල් රංජිත් දේවසිරි-
ජාතික ජන බලවේගය වෙනුවෙන් පෙනීසිටීමේ සහ ක්‍රියා කිරීමේ වැදගත්කම කුමක්ද යන්න මේ ජනාධිපතිවරණය අභියස සලකා බැලීම වැදගත්. අපේක්‍ෂකයන් 38ක් සිටියත්, ජනාධිපතිවරණ ව්‍යාපාරය තුළ ඉදිරියෙන් සිටින බව පෙනෙන්නේ අපේක්‍ෂකයන් තුන්දෙනයි. අනුර කුමාර දිසානායක, සජිත් ප්‍රේමදාස සහ රනිල් වික්‍රමසිංහ යන තිදෙනා මේ අතර සිටියත්, රනිල් වික්‍රමසිංහට ඉදිරි පෙළ පෙනීමක් තිබෙන්නේ ඔහු දැනටත් ඉන්න ජනාධිපතිවරයා වන නිසයි. මේ අපේක්‍ෂකයන් තිදෙනෙක් බව පෙනුණත්, පැහැදිලිවම පාර්ශ්ව දෙකයි තිබෙන්නේ. ජනාධිපතිවරණ ප්‍රචාරක ව්‍යාපාරයේ මාලිමාව සහ එයට විරුද්ධ පාර්ශ්ව වශයෙන් මේ බෙදීම පවතිනවා. ප්‍රධාන මාධ්‍යවල ප්‍රවෘත්ති, විවාදවල වාගේම සමාජ මාධ්‍ය අවකාශයේත් පවතින්නේ ඒ ආකාරයෙන්මයි. මාලිමා විරෝධීන් රනිල්ගේ පාර්ශ්වය, සජිත්ගේ පාර්ශ්වය, නාමල්ගේ පාර්ශ්වය, දිලිත්ගේ පාර්ශ්වය විතරක් නොවෙයි, ජන අරගල ව්‍යාපාරය කියන නුවන් බෝපගේගේ පාර්ශ්වය යන සියලු දෙනාගේ ප්‍රචාරක ව්‍යාපාරය යොමු වී තිබෙන්නේ මාලිමා විරෝධයකටයි. මාලිමාව සහ සෙසු පිරිස් අතර ජනාධිපතිවරණ තරගය පවතින බව මූලික ලක්‍ෂණයක්. අපේ පක්‍ෂපාතීත්වය නිසා කියනවා නොවෙයි, සැබැවින්ම ජනාධිපතිවරණ ව්‍යාපාරයේ ඉදිරියෙන්ම සිටින්නේ අනුර කුමාර දිසානායක සහෝදරයායි. ඔහුට ආසන්න තරගයක් තිබෙන්නේ සජිත් ප්‍රේමදාස සමඟ බව පේනවා.
සජිත් ප්‍රේමදාස පාර්ශ්වය ගැන සැලකිල්ලෙන් බැලුවාම මාලිමාව නියෝජනය කරන ප්‍රතිසංස්කරණවාදී ඉලක්ක සහිත අපේක්‍ෂකයෙක් ලෙස සමාජයේ පහළම තීරුවේ ජනතාව සම්බන්ධයෙන් පෙනීසිටින්න උත්සාහ කරනවා. නමුත්, සජිත්ගේ පාර්ශ්වය සහ මාලිමාව අතර වෙනස තේරුම් ගන්න නම්, සංසන්දනය කළ යුත්තේ, හර්ෂ ද සිල්වා සහ මාලිමාවයි. ඒ කියන්නේ හර්ෂ ද සිල්වාගේ පෙනීසිටීම සහ සජිත් ප්‍රේමදාසගේ පෙනීසිටීම අතර මූලික වෙනසක් තිබෙනවා. සජිත් පාර්ශ්වයේ ප්‍රධාන ආර්ථික චින්තකයා හර්ෂ ද සිල්වා. ඔහුගේ ප්‍රතිපත්තිමය නැඹුරුව රනිල් වික්‍රමසිංහයි. පදනමින් ගත්තාම වෙනසක් නැහැ. ඔහු ප්‍රකාශ කරන්නේ, “මාලිමාව ආවොත්, අයි.එම්.එෆ්. ව්‍යාපෘතිය සම්පූර්ණයෙන්ම කඩාකප්පල් වෙනවා” කියලා. ඔහු පුන පුනා කියන්නේ අයි.එම්.එෆ්. ප්‍රවේශය නියෝජනය කරන්නේ සමඟි ජන බලවේගය බවයි. රනිල් වික්‍රමසිංහගේ පාර්ශ්වයෙන් කියන්නෙත් ඒකයි. ඒ අනුව මාලිමාවේ ආර්ථික චින්තනය සහ හර්ෂ ද සිල්වාගේ ආර්ථික චින්තනය අතර වෙනසක් මිස එළිපිට පෙනෙන ආකාරයෙන් සජිත් සහ අනුර අතර තරගයක් නැහැ. මෙතෙක් කල් ලංකාව අනුගමනය කළ ආර්ථික සහ දේශපාලන ක්‍රමය අධිපති ක්‍රමය බව අපි දන්නවා. එහි දිගුවක් රනිල් වික්‍රමසිංහ පැහැදිලිව නියෝජනය කරන අතර, විකල්පයක් ලෙස පෙනීසිටින්න උත්සාහ කළත්, සජිත් ප්‍රේමදාස පාර්ශ්වය නියෝජනය කරන්නෙත් එයමයි. පසුගිය කාලයේ අන්ත දූෂිත දේශපාලනය නියෝජනය කළ පිරිස රනිල් සහ සජිත් අතර බෙදී ගොස් සිටිනවා.
මේ තත්ත්වය තුළ ජනතා කේන්ද්‍රීයව සලකා බැලුවාම 2022 අරගලයෙන් ඉල්ලා සිටි ක්‍රම වෙනස නියෝජනය කළ විශාල ජනතාවක් ඉන්නවා. ක්‍රම වෙනස කියන්නේ මූලික වශයෙන් ගත්තාම ජනතාව බලාපොරොත්තු වන්නේ දූෂිත ක්‍රමය අවසන් කර දූෂිත දේශපාලනයෙන් බැහැර වීමයි. ඒ ක්‍රම වෙනස සාක්ෂාත් කර ගැනීම සඳහා තෝරාගෙන තිබෙන දේශපාලන බලවේගය වී තිබෙන්නේ ජාතික ජන බලවේගයයි. ජනයාගේ අභිලාෂය නියෝජනය කරනවා නම්, අපට තිබෙන එකම විකල්පය වන ජාතික ජන බලවේගයේ අනුර කුමාර දිසානායක සහෝදරයාගේ අපේක්‍ෂකත්වය වෙනුවෙන් පෙනීසිටිය යුතු බව සෘජුවම ප්‍රකාශ කරනවා. එයින් නියෝජනය කරන්නේ මාලිමාවේ සමස්ත බහුජන ව්‍යාපාරයයි. මම ඒ මතය නියෝජනය කරන සහ ක්‍රියාකාරීව මැදිහත් වන පුද්ගලයෙක්.
“අපේ ආර්ථිකය ගොඩනඟා ගැනීම සඳහා විශ්වවිද්‍යාල ප්‍රජාව ලෙස විශාල වගකීමක් අපට තිබෙනවා”
-මොරටුව විශ්වවිද්‍යාලයේ මහාචාර්ය කිත්සිරි දිසානායක-
මම විශේෂයෙන්ම අපේ ආර්ථිකය පිළිබඳව කෙටි පැහැදිලි කිරීමක් කරන්නම්. වසරක අපේ ආර්ථිකයේ සමස්ත වටිනාකම ඇමෙරිකානු ඩොලර් බිලියන 84ක් පමණ වෙනවා. මහ බැංකු වාර්තා අනුව එහි වෙනස්කමක් තිබෙන්නත් පුළුවන්. මේ ආර්ථිකයෙන් සාමාන්‍යයෙන් ඩොලර් බිලියන 20ක පමණ ආනයනයක් පවතින අතර, ඩොලර් බිලියන 12ක පමණ අපනයනයක් පවතිනවා. විදේශ වෙළෙඳාමේ හිඟය ඩොලර් බිලියන 08ක් වීමේ වෙනස පියවා ගන්න විදේශ ශ්‍රමික ප්‍රජාවගෙන් ලැබෙන ආදායම ප්‍රධාන වශයෙන් යොදා ගන්නවා. අපේ අනෙකුත් අපනයනවල ආදායම් ඒ හිඟය පියවා ගන්න ප්‍රමාණවත් නැහැ. මොරටුව විශ්වවිද්‍යාලය තාක්‍ෂණ ක්‍ෂේත්‍රයේ ඉදිරියෙන්ම සිටිමින්, ඉංජිනේරු විෂය ක්‍ෂේත්‍ර 12ක පමණ උපාධි පාඨමාලා පවත්වාගෙන යනවා. ආර්ථිකය ගොඩනැඟීමට මෙයින් ලබා දෙන දායකත්වය පිළිබඳව පුළුල් අවධානයක් යොමු කළ යුතුයි. අපේ ආනයන වියදමෙන් සියයට 25ක් පමණ වැය වන්නේ පොසිල ඉන්ධන ආනයනය කිරීමට. අපේ විදුලිය නිෂ්පාදනයෙන් සියයට 60ක් පමණ ආනයනික තෙල් සහ ගල්අඟුරු මත පදනම් වෙනවා. වාර්ෂිකව විදුලිය ගිගා වොට් පැය 16,000ක් පමණ පාවිච්චි කරනවා. එයින් සියයට 60ක් පමණ ගල්අඟුරුවලින් සහ තෙල්වලින් නිෂ්පාදනය වන අතර, ඒ වෙනුවෙන් ඩොලර් බිලියන 7.5ක් පමණ වැය වෙනවා. මේ වියදම ඉතිරි කර ගැනීමේ ක්‍රමවේද තිබෙනවා. සුළඟ සහ සූර්යාලෝකය යොදා ගනිමින්, විශාල විදුලි ජනනයක් සිදු කළ හැකියි. සාමාන්‍ය ජනතාවට වුවත්, පුනර්ජනනීය බලශක්තියට යොමු වී කටයුතු කරන්න පුළුවන්. අනුර කුමාර සහෝදරයාගේ නව රජය යටතේ මේ කෙරෙහි විශේෂ අවධානයක් යොමු කර රජයෙන් සහන ලබා දී පුනර්ජනනීය විදුලි උත්පාදනයට ප්‍රමුඛත්වයක් ලබා දෙනවා.
ඊට අමතරව රට තුළ විශාල ඛනිජ සම්පත් ප්‍රමාණයක් පවතිනවා. මුහුදට අපි තවම අත තියලාවත් නැහැ. පුල්මුඩෙයි ඛනිජවැලි, පරන්තන් රසායනික ද්‍රව්‍ය කම්හල වැනි ප්‍රභවයන් මුල් කරගෙන අපේ ආර්ථිකයට තවත් සියයට 10ක පමණ දායකත්වයක් ලබාගත හැකියි. ජාතික ජන බලවේගයේ ප්‍රතිපත්ති මාලාවේ මේ සම්බන්ධයෙන් කරුණු දැක්වෙනවා. අනාගතයේ ඉතාමත් පැහැදිලි ආර්ථික වර්ධනයකට යාමේ හැකියාව තිබෙනවා. පසුගිය රජයවල් යටතේ මම ආයතන ගණනාවක සේවය කර තිබෙනවා. පෙර සිටි ජනාධිපතිවරුන් දෙදෙනකුට මේ සම්බන්ධයෙන් මම පැහැදිලි කිරීම් කළත්, අදාළ කිසිම ක්‍රියාමාර්ගයකට යොමු වුණේ නැහැ. විශ්වවිද්‍යාල ප්‍රජාව විදියට අපේ ආර්ථිකය ගොඩනඟා ගැනීම සඳහා විශාල වගකීමක් තියෙනවා. ඒ අතුරින් මොරටුව විශ්වවිද්‍යාලය හැටියට අපි අනුර කුමාර සහෝදරයාගේ රජයට ඇප-කැප වී සහයෝගය ලබා දීමට, ක්‍රියාකාරී දායකත්වය ලබා දීමට සූදානම් බව ප්‍රකාශ කරනවා.
“ඡන්ද 3% දක්වා වැටෙද්දී අධිෂ්ඨානශීලීව ගමන් කළ යුත්තේ කෙසේ දැයි අනුර පෙන්වා දී තිබෙනවා”
-කැලණිය විශ්වවිද්‍යාලයේ ජ්‍යෙෂ්ඨ කථිකාචාර්ය ප්‍රියන්ත ප්‍රනාන්දු-
අපි මේ අවස්ථාවේ සූදානම් වන්නේ දේශපාලන වශයෙන් රට ගෙන යන්න නායකයෙක් තෝරා ගන්න. එවැනි නායකයකුගේ තිබිය යුතු ගුණාංග, දක්‍ෂතා සහ හැකියාවන්, කුසලතාවන්, උපායශීලී කළමනාකාරීත්වය, පෞරුෂය වාගේ ගුණාංග මේ නායකයන්ගේ තිබෙන්නේ කොහොම ද කියලා සලකා බැලීම ඉතාම අවශ්‍යයි. මෙතැනට රැස් වී ඉන්නේ අවුරුදු ගණනක් විශ්වවිද්‍යාලවල ඉගෙනගෙන, උපාධිය ලබාගෙන ඉන්පසුව ආචාර්යවරුන් ලෙස දැනුම සොයා ගැනීමට සහ බෙදාහැරීමට විවිධ රට රටවලට පවා ගොස් තිබෙන අයයි. එවැනි රටක් බවට මේ රට පරිවර්තනය කරමින්, ජීවත් වීමේ අපේක්‍ෂාවක් අපට තිබෙනවා. අපේ විෂයය පැත්තෙන් අපි ඉහළට ගියත්, මේ රට ඉහළට ගෙන යන්න දේශපාලනඥයන් ක්‍රියා කර නැහැ. ඒ නිසාම අපටත් මේ දේශපාලනය වෙනුවෙන් ක්‍රියාකාරීව මැදිහත් වන්න සිදු වී තිබෙනවා.
ජනාධිපතිවරණයට ඉදිරිපත් වී සිටින අපේක්‍ෂකයන් පසුගිය කාලය පුරා කතා කළ සහ ක්‍රියා කර ඇති ආකාරය සම්බන්ධයෙන් විමසා බැලුවාම මේ රටේ සමස්ත ජනතාවගේ සිහිනය සැබෑ කිරීමේ හැකියාව සම්බන්ධයෙන් විශ්ලේෂණාත්මකව තක්සේරු කිරීම අවශ්‍යයි. ඒ අතුරින් රනිල් වික්‍රමසිංහ කතා කරන දේවල් බැලුවාම මට නම් හිතෙන්නේ ඔහු තවමත් අතීතයේ ඉන්න බවයි. පෝලිම් යුගයක් තිබුණු 1977 කාලයට පෙර තිබුණු තත්වය නැති කර ඇට රාත්තල් අටක් දෙන බව කියලා ජේ. ආර්. ජයවර්ධන හයෙන් පහක බලයක් ගත්තා. ඉන් පසුව ජේ. ආර්. ජයවර්ධන විධායක ජනාධිපති වී රනිල් වික්‍රමසිංහ එදා ඉඳලා ම අවුරුදු 47ක් පාර්ලිමේන්තුවේ ඉන්නවා. ඔහු අද කියන්නේ රටක් ගොඩනඟනවා කියලා නොවෙයි. පෝලිම් යුගය නැති කරනවා; ගෑස් දෙනවා; තෙල් දෙනවා කියන කතාවයි. එහෙම නම්, ඔහු නායකයෙක් නොවෙයි.
තව දෙන්නෙක් තමන්ගේ පිය උරුමයෙන් අපේක්ෂකත්වයට ඇවිත් ඉන්නවා. තමන්ගේ හැකියාව, දක්‍ෂතාව, කුසලතාව පෙන්වා නැහැ. ඔවුන්ගේ අධ්‍යාපනය පිළිබඳවත් ගැටලු තිබෙනවා. ඔවුන් කියන්නේ තමන්ගේ පියවරුන් ගෙන ආ දේවල් ඉදිරියට ගෙන යන බවයි. මෙවැනි පසුබිමක තමයි, ජාතික ජන බලවේගයේ නායක, අනුර කුමාර දිසානායක සහෝදරයා ගැන අපි කතා කරන්නේ. ඔහු ඈත ගමක ඉපදී, දුෂ්කරතා විඳගනිමින්, දක්‍ෂතාව සහ කුසලතාව නිසාම කැලණිය විශ්වවිද්‍යාලයට පැමිණ ශිෂ්‍ය සංගමයට නායකත්වය දී ජනතා විමුක්ති පෙරමුණේ ශිෂ්‍ය අංශයේ නායකයා ලෙස පත් වෙනවා. ඉන් පසුව ජනතා විමුක්ති පෙරමුණේ නායකත්වයට පත් වෙනවා ය කියන්නේ දක්‍ෂතාව සහ කුසලතාව කොපමණ තිබෙන්න ඕනෑද යන්න පැහැදිලියි. පාර්ලිමේන්තු මැතිවරණයේදී ලැබුණු ඡන්ද ප්‍රමාණය 3% දක්වා පහත වැටුණත්, ඔහුගේ කළමනාකාරීත්වය තුළින් අධිෂ්ඨානශීලීව ගමන් කළ යුත්තේ කෙසේදැයි පෙන්වා දී තිබෙනවා.
වෙනම බලවේගයක් නිර්මාණය කර ගනිමින්, මේ මහා ජනතා ප්‍රසාදය ලබාගෙන තිබෙන්නේ මුලින්ම ජාතික විද්වත් සංවිධානය ගොඩනඟා, එයින් ආරම්භ කළ ගමනින්. ලංකාවේ විවිධ ක්ෂේත්රවල පිරිස් සංවිධානය කරමින්, විදේශගත ශ්‍රී ලාංකිකයන් පවා දහස් ගණන් එකතු කර තිබෙනවා. ‘අදිටන’ විශ්‍රාමික ත්‍රිවිධ හමුදා සාමුහිකය ගොඩනැඟුවා. ‘ගැහැනු එකමිටට’ සංවිධානය ගොඩනැඟුවා. මේ විදියට විවිධ ක්ෂේත්රවල සංවිධාන පිහිටුවා, සාමුහික සංවිධාන සහ ක්‍රියාකාරකම් දේශපාලනයට ඇතුළත් කර ගත්තා. එහි අවසානය ලෙස ‘පොහොසත් රටක් – ලස්සන ජීවිතයක්’ කියන ප්‍රතිපත්ති ප්‍රකාශනය එළිදක්වා සාමුහිකව රට ගොඩනඟන ආකාරය පෙන්වා දී තිබෙනවා. මේ ප්‍රතිපත්ති ප්‍රකාශනය අනුව රට ගොඩනඟන්න සියලු දෙනා එක් වන ලෙස අපි ජනතාවට ආරාධනා කරනවා.
“අනාගතය ගැන හීන දකින දරුවන් තරගකාරී අධ්‍යාපනය නිසා විභාගවලදී හීන නැති වී එළියට ඇදවැටෙනවා”
-ශ්‍රී ජයවර්ධනපුර විශ්වවිද්‍යාලයේ ජ්‍යෙෂ්ඨ කථිකාචාරිනී සකුරා බෝගොඩ-
අපි නිදහස ගත් කාලයේ ඉඳලා මේ දක්වා ගත කළ දුර්දාන්ත යුගය නිමා කර නව පුනරුද යුගයක් කරා පියමනින්න එළැඹෙන ජනාධිපතිවරණයෙන් පසුව සූදානමින් සිටිනවා. රටක ජීවනාලිය අධ්‍යාපනය වුවත්, රට පාලනය කළ ආණ්ඩු ඒ වෙනුවෙන් වෙන් කළ මුදල් දිගින් දිගටම කප්පාදු කර තිබෙනවා. පාසල් අධ්‍යාපනයෙන් තේරීපත් වී විශ්වවිද්‍යාලවලට එන සියයට අටක් පමණ පිරිසට ලබා දෙන අධ්‍යාපන පාඨමාලා ලෝකය හා සම්බන්ධ වනවා වාගේම අපේ රටට ගැළපෙනවාද කියන ප්‍රශ්නය පවතිනවා. රැකියා විරහිත උපාධිධාරීන් ලෙස විරෝධතා ව්‍යාපාරවල නියැළී සිටින්න ඔවුන්ට සිදු වී තිබෙනවා. විශ්වවිද්‍යාලය කියන්නේ අධ්‍යාපනය ලබා දෙන තැනක් පමණක් නොවෙයි, ආර්ථිකය හා සම්බන්ධ ආයතනයක්. මේ ගුණාංගය ගැන පාලකයන් කිසිම අවධානයක් යොමු කර නැහැ. පර්යේෂණ සහ සංවර්ධනය ගැන අවධානයක් විශ්වවිද්‍යාල තුළ යොමු කර ඇත්තේම නැහැ. රටේ අවශ්‍යතාව සම්බන්ධයෙන් කිසිම අවධානයක් යොමු කර නොතිබුණත්, ජාතික ජන බලවේගය විශ්වවිද්‍යාල තුළින් රටේ අවශ්‍යතා සම්බන්ධව පර්යේෂණ සිදු කිරීම, සම්පත් කළමනාකරණය, සම්පත්වල තිරසර පැවැත්ම යන අංශ සියල්ල සලකා බලනවා.
පාසලේ ඉඳලාම අනාගතය ගැන හීන දකින දරුවන් තරගකාරී අධ්‍යාපනය නිසා සාමාන්‍යපෙළ සහ උසස්පෙළ විභාගවලදී හීනයක්වත් නැති කර එළියට ඇදදැමෙනවා. අධ්‍යාපනය කියන්නේ රටක අවශ්‍යතාව අනුව ශ්‍රම බළකායක් නිර්මාණය කිරීම නම්, මේ දක්වා ඒ සම්බන්ධයෙන් කිසිදු දැක්මක් සහිත ක්‍රියාමාර්ගයක් අනුගමනය කර නැහැ. පවතින පාසල් සහ විශ්වවිද්‍යාල අධ්‍යාපනයත් ප්‍රායෝගික ක්‍රියාකාරකම්වලට ඉඩක් ලබා දී නැහැ. අද ලෝකය න්‍යායික සහ ප්‍රායෝගික යන දෙඅංශයේම සමබරතාවෙන් යුතුව නවීන අධ්‍යාපනයක් ඉල්ලා සිටිනවා. ජාතික ජන බලවේගය නවය වසරේදී දරුවාගේ හැකියාව සහ දක්‍ෂතාව අනුව අධ්‍යාපනය වෙනුවෙන් දරුවන් යොමු කිරීමේ කඩඉමක් ලෙස යොදා ගන්නවා. ප්‍රායෝගික අංශයෙන් ඉදිරියට ගිය දරුවකුට වුවත්, උසස්පෙළ සමත් වී විශ්වවිද්‍යාලයකට යනවාද, නැත්නම්, ශ්‍රම බළකායට එක් වනවාද යන්න තෝරා ගන්න පුළුවන්. අද වන විට ලංකා ඉතිහාසයේ කවරදාකවත් නොදැක්ක තරම් බුද්ධි ගලනයක් සිදු වෙනවා. අවුරුදු හැත්තෑහයකට පස්සේ අපි අත්දකින්නේ මෙවැනි දෙයක් නම්, රට වැටී තිබෙන අගාධයෙන් ගොඩගෙන දරුවන්ට අනාගතයක් ගොඩනැගිය යුතුයි. ඒ වෙනුවෙන් ජාතික ජන බලවේගය කෙරෙහි විශ්වාසය තබා විශ්වවිද්‍යාල ආචාර්යවරුන් ලෙස මේ ආකාරයෙන් ඒකරාශී වී සිටිනවා.
මාධ්‍යවේදීන් නැඟූ ප්‍රශ්නවලට පිළිතුරු දෙමින්:
විශ්වවිද්‍යාල ආචාර්යවරු මේ ආකාරයෙන් ඒකරාශී වී ජාතික ජන බලවේගය සම්බන්ධයෙන් කතා කළත්, අපි විශ්වාසයක් තබා ගන්නේ කොහොමද?
ජාතික ජන බලවේගයට ඉතිහාසයක් තිබෙනවා. ඒ ඉතිහාසය තුළ ක්‍රියා කර ඇත්තේ, කවර ආකාරයෙන්ද යන්න අධ්‍යයනය කිරීමෙන් ඒ විශ්වාසය ඇති කරගත හැකියි. ඒ වාගේම ජාතික ජන බලවේගය ඉදිරිපත් කර තිබෙන ප්‍රතිපත්ති ප්‍රකාශනය අධ්‍යයනය කරන්න පුළුවන්. අපි සහ ජනතාව දෙගොල්ලොම එක් වී මේ ප්‍රතිපත්ති ප්‍රකාශනය ඉදිරිපත් කර තිබෙන්නේ මේ සමාජය දැවැන්ත පරිවර්තනයකට ලක් කිරීම සඳහායි. ජනාධිපති අපේක්ෂක අනුර කුමාර සහෝදරයා ක්‍රියා කර තිබෙන ආකාරයත් මෙහිද වැදගත් වෙනවා. පවතින ජරාජීර්ණ වූ දේශපාලනය සමඟ සංසන්දනය කළාම ජාතික ජන බලවේගය හැර වෙනත් දේශපාලන ව්‍යාපාරයක් අපට නැහැ.
ආර්ථිකය කඩාවැටෙන කොටත් ඔබලා මේ රටේ ජීවත් වුණා. දැන් රට ගොඩනඟන බව කියන්නේ කොහොම ද?
රට කඩාවැටෙන කොටත්, ජනතාව වාගේම අපටත් මේ රටේ ජීවත් වීම හැර වෙනත් ජීවත් වෙන්න තැනක් අපට නැහැ. දේශපාලන පරිවර්තනයක් සිදු කරනවා කියන්නේ පිටින් පිරිසක් ඇවිල්ලා කරන දෙයක් නොවෙයි. පවතින අයහපත් තත්වය අභ්‍යන්තරයෙන්ම ඇවිත් සිදු කරන දෙයක්. අවුරුදු 48ක් නොවෙයි, 76ක් පුරා හෝ අපේ ජීවිත කාලය තුළ අපි මේ රටේ සිටි අය. අපි හැමෝම අත්දැකීම් ලබලා, තේරුම් ගනිමින්, සාකච්ඡා කරමින්, යම් ක්‍රියාවලියක් තුළ යෙදී සිටියා. මේ රටේ ගැඹුරු දේශපාලන පරිවර්තනයක් සිදු කළ යුතුයි කියන සාකච්ඡාව දිගු කාලයක් පැවැතුණා. ඒ වාගේම විවිධ ආකාරයේ අත්හදා බැලීම්, ප්‍රවේශයන් ගෙන තිබුණා.
නමුත්, පසුගිය කාලයේ අපේ රට තීරණාත්මක සන්ධිස්ථානයකට ආවා. ස්වේච්ඡා ජනතා නැඟිටීමක් සිදු වුණා. විශාල බලයක් සහිතව පත් කර ගත් ජනාධිපතිවරයකුට බලය අත්හැර යන්න සිදු වුණා. ඒ වාගේම ප්‍රධාන දේශපාලන බලකඳවුරු බිඳවැටී තිබෙනවා. ප්‍රධාන දේශපාලන පක්ෂවල ආධිපත්‍යය ජනතාව විසින් ප්‍රතික්‍ෂේප කර තිබෙනවා. මේ සියල්ල අප කාටත් දැනෙන ප්‍රවණතා. නව දේශපාලන පරිවර්තනයක් පිළිබඳ අදහස සමාජයේ ගැඹුරින් මතු වනවා මිස ජාතික ජන බලවේගය හෝ විශ්වවිද්‍යාල ආචාර්යවරුන් පිරිසක් එකතු වී කියන දෙයක් නොවෙයි. සමාජයෙන් පැනනඟින දෙයක්. විධිමත් සමීක්‍ෂණ දෙස බැලුවාම, පැහැදිලි වන දෙයක්. තවමත් ඡන්දය දෙන්නේ කාට ද කියලා මතය ප්‍රකාශ නොකළ අය වුණත්, පවතින සමාජය පිළිබඳව දැඩි ප්‍රතික්‍ෂේප කිරීමක් සහ කලකිරීමක් ප්‍රකාශ කර තිබෙනවා. ජාතික ජන බලවේගයට සහයෝගය නොදෙන හිටපු ජනාධිපතිවරිය පවා ප්‍රකාශ කර තිබුණේ, ඉදිරියේදී ඡන්දය දීමේදී පසුගිය ජනතා අරගලයෙන් මතු වූ අදහස් පිළිබඳව සැලකිලිමත් වන ලෙසයි. එයින් කියවෙන්නෙත්, පවතින ක්‍රමයේ වෙනස් කිරීමක් පිළිබඳ මූලික අවශ්‍යතාවයි. සමාජයෙන් ලැබෙන මේ සංඥාව පිළිබඳව අර්ථකථනය කර ගැනීමේ හැකියාවක් තිබිය යුතුයි. අපි මතු කරන ප්‍රධාන අදහස ඒකයි.
වංචා, දූෂණ පිළිබඳව ෆයිල් පෙන්වමින්, කරුණු හෙළි කළත්, මේ වන තුරුත් ඒ සම්බන්ධයෙන් කිසිවකුත් අධිකරණයට ඉදිරිපත් කර දඬුවම් ලබා දී නැහැ. ඉතින්, කොහොම ද දැන් කියන දේවල් විශ්වාස කරන්නේ ?
විශ්වාස කරන්න මෙතැන තිබෙන්නේ ආගමික කටයුත්තක් නොවෙයි. ප්‍රජාතන්ත්‍රවාදී මැතිවරණයක්. ප්‍රජාතන්ත්‍රවාදයේ දී සිදු වන්නේ මේ ලබා දී තිබෙන ප්‍රතිපත්ති ප්‍රකාශනය අනුව ක්‍රියා කර නැත්නම්, ජනතාවට නැවතත් තීරණයක් ගන්න අවස්ථාව උදා වෙනවා. අපි හැමෝම පිළිගන්න දේ තමයි, මේ රටේ ප්‍රජාතන්ත්‍රවාදී ආණ්ඩුකරණයක් තිබෙන බව. එම ආණ්ඩුකරණය තීරණය වන්නේ වරින්වර පවත්වන මැතිවරණවලින්. ප්‍රතිපත්ති ප්‍රකාශනයක් කියන්නේ නීතිමය ලියැවිල්ලක් නොවුණත්, එය ජනතාව සමඟ තිබෙන සම්මුතියක්. ජනතා නියෝජිතයන් වීම සඳහා ඉදිරිපත් වන අපේක්‍ෂකයන් සහ ජනතාව අතර ඇති වන සම්මුතිය තමයි, ප්‍රතිපත්ති ප්‍රකාශනය කියන්නේ. ප්‍රතිපත්ති ප්‍රකාශනයේ මූලික කරුණු ක්‍රියාත්මක කිරීමට බැඳී සිටිනවා. එය විශ්වාසය පිළිබඳ ප්‍රශ්නයක් නොවෙයි. මූලික බැඳීමක්. ඒ බැඳීම ඉෂ්ට කරන්නේ නැත් නම්, එම බැඳීම කඩනවා නම්, ජනතාව එක්කෝ ඊළඟ මැතිවරණයේ දී එහෙමත් නැත්නම්, 2022දී සිදු වුණා වාගේ ජනතා නැඟිටීමකින් ඉවත් කරනවා. එය ප්‍රජාතන්ත්‍රවාදී ක්‍රමයක මූලික ලක්‍ෂණයක්.
අපට ඔය ප්‍රශ්නය මතු වන්නේම අවුරුදු හැත්තෑහයක් සිටි පාලක කල්ලි දෙක රට ගෙනැවිත් තිබෙන තැන නිසයි. එය නැවත කියවා ගැනීමට අවශ්‍ය නම්, 2022 අරගලයේ දී මතු වූ සටන් පාඨ පිළිබඳව අවධානය යොමු කරන්න ඕනෑ, රටේ සමස්ත ජනයා නැඟීසිටිමින්, ගෙන ආ සටන් පාඨ තිබෙනවා. මේ දෙගොල්ලන්ම එක් පාර්ශ්වයක් බවත්, විනාශයට ඔවුන් වගකිව යුතු බවත්, ඒ සටන් පාඨවල තිබුණා. ඒ වාගේම එම පාර්ශ්ව විසින් ගෙනැවිත් තිබෙන්නේ මේ මොහොතේ ඡන්දය ලබා ගැනීමේ අරමුණ සහිත යම් රැවටිලිකාරී පොරොන්දු මාලාවක්. නමුත්, ජාතික ජන බලවේගයේ තිබෙන්නේ ක්‍රියාත්මක කළ හැකි ප්‍රතිපත්ති මාලාවක්.
සහභාගිත්වය
(-‘රට අනුරට’ ජාතික ජන බලවේගයේ ජයග්‍රාහී රැලිය – තඹුත්තේගම – 2024.09.09-) මීට කලින් මේ මැතිවරණ පොරය තිබුණේ ඒ අයගෙ පවුල් කිහිපයක් අතරමයි. අද 2024දී එය වලව් කිහිපයක් සහ පොදු ජනතාව අතර සටනක් බවට පත්වෙලා. ජාතික තලයේ සිට ගම දක්වා මේ සටන විහිදිලා තිබෙනවා. මෙතෙක් මේ රට පාලනය කළේ පවුල් කිහිපයක් විසින්. ඒත් කමක් නැහැ. රටට […]
(-‘රට අනුරට’ ජාතික ජන බලවේගයේ ජයග්‍රාහී රැලිය – තඹුත්තේගම – 2024.09.09-)
මීට කලින් මේ මැතිවරණ පොරය තිබුණේ ඒ අයගෙ පවුල් කිහිපයක් අතරමයි. අද 2024දී එය වලව් කිහිපයක් සහ පොදු ජනතාව අතර සටනක් බවට පත්වෙලා. ජාතික තලයේ සිට ගම දක්වා මේ සටන විහිදිලා තිබෙනවා. මෙතෙක් මේ රට පාලනය කළේ පවුල් කිහිපයක් විසින්. ඒත් කමක් නැහැ. රටට යමක් කළා නම්. ජනතාව දුක් පීඩාවෙන් මුදා ගත්තා නම්. දශක ගණනාවක් මාත් ඇතුළු ඔබ මේ ව්‍යසනය දිහා බලන් හිටියා. අපි පොඩි මිනිස්සු. හැබැයි අධිෂ්ඨානශීලී මිනිස්සු. අරමුණ අත්නොහරින මිනිස්සු.
මම මේ දේශපාලන ගමන පටන් ගත්තේ 1988දී තඹුත්තේගම මධ්‍ය මහා විද්‍යාලයේ ඉගෙන ගන්න කාලයේ සිටයි. එතැන් සිට දැන් අවුරුදු 36ක් ගත වී තිබෙනවා. අපි විවිධ මර්දනයන්ට මුහුණ දුන්නා. අපේ ඇස් ඉදිරිපිට අපේ යහළුවන් මිය ගිය හැටි අපි දැක්කා. මරණය අපේ එළිපත්තට ආවා. එහෙත් මේ රටත්, ජනතාවත් මේ ව්‍යසනයෙන් මුදාගැනීමේ අධිෂ්ඨානය අපි අත්හැරියේ නැහැ. 1994දී නැවත යාන්තම් අපි නැගිටින්න පටන් ගත්තා. ජයග්‍රහණ ආවා. පසුබෑම් ආවා. සමහරු අත්හැරලා ගියා. අවලාද ආවා. අසත්‍ය තොරතුරු එන්න පටන් ගත්තා. කුමන්ත්‍රණ කරන්න පටන් ගත්තා. එහෙත් මේ ව්‍යායාමය කවදා කොතැනක හෝ ජයග්‍රහණය කරනවා කියන දැඩි අධිෂ්ඨානය අපි අතහැරියේ නැහැ. මේ අවුරුදු 36 ඇතුළත අවුරුදු 24ක් මම පාර්ලිමේන්තුව නියෝජනය කරනවා.
අපි මේ දේශපාලනයෙන් සතයක් උපයාගෙන නැති පිරිසක්. මහජනයාගේ ධනය අපි සතයක් නාස්ති කරලා නැහැ. අපි කිසිවෙක් තමන්ට පෞද්ගලිකව යමක් උපයා ගැනීමේ චේතනාවෙන් දේශපාලනය කරන මිනින්සු නොවෙයි. අපිත් විශ්වවිද්‍යාලවල ගිහිල්ලා උපාධි ලබනවා. රැකියාවක් කරලා පෞද්ගලිකව යම් ජීවන තත්වයක් අනුව ජීවිතය ගෙනයන්න පුළුවන් මිනිස්සු. මේ වේදිකාවේ ඉන්න වසන්ත සමරසිංහ සහෝදරයාටත් එහෙමයි. අපිට අපේ පෞද්ගලික ජීවිත සුඛිත කර ගන්න අධ්‍යාපනය පැත්තෙනුත් පාරවල් තිබුණා. දේශපාලන පැත්තෙනුත් පාරවල් තිබුණා. නමුත් මේ රටත් ජනතාවත් මේ ව්‍යසනයන් ගලවා ගැනීමේ සද්කාර්ය ඉවත දමන්න අපිට යුක්තිසහගත අයිතියක් නැහැ. මේ ඈත ගම්වල මිනිස්සු කොතරම් පිරිසක් දුප්පත්භාවයෙන් පෙළෙනවාද? අපේ ඥාතීන්, මිතුරන් මේ දුප්පත්භාවයේ ගිලිලා ජීවිත නැතිකරගත් අවස්ථා අපි දැක තිබෙනවා. මහා විශාල බලාපොරොත්තු සහිතව හදන වඩන තමන්ගේ දරුවා නිසි අධ්‍යාපනයක් ලබාදීමට නොහැකිව තමන්ගේ දෑස් ඉදිරිපිටම විනාශ වෙන හැටි බලාගෙන හූල්ල හූල්ල ඉන්න, දෙමව්පියන්ට සිදුවෙලා. මේ ගම්වල පවුල්වල තම දරුවන් දාලා, ස්වාමි පුරුෂයන් දාලා, මොනතරම් අපේ අම්මලා, අපේ සහෝදරියෝ මැදපෙරදිග ගෘහ සේවිකා රැකියාවලට ගිහිල්ලා තිබෙනවාද? ඒ පවුල්වලින් කොච්චර ප්‍රමාණයක් විනාශ වෙලා තිබෙනවාද? මැදපෙරදිග ගිය අපේ අම්මලා අක්කලා අනේකවිධ දුක්ඛ දෝමනස්සයන්ට මුහුණ දෙනවා. අපි එවැනි දේ දැක තිබෙනවා.
අපේ ගම්වල මිනිසුන්ගේ ජීවිතය මොකක්ද? ඉපදෙනවා. මොනවා හරි කරනවා. ඔහේ මිය යනවා. අපිට උරුම විය යුත්තේ එහෙම ජීවිතද? නැහැ. අපේ ජනතාවට තම ජීවිත කාලය තුළ සතුටින් හොඳ ආහාර වේලක්, නිරෝගී සම්පන්න ජීවිතයක්, විනෝදයක්, සතුටක් ඕනෑ නැද්ද? ඒ ජීවිතය උරුම ඒ පැළැන්තියට විතරද? අපේ ගම්වල මිනිසුන්ට ඒ ජීවිතය උරුම නැද්ද? ඔබ ඇතිවෙනකල් මේ මහ පොළොව සමග පොරබදනවා. අස්වැන්න විකුණ ගන්න කොච්චර දුක්විඳිනවාද? නමුත් ඒ ගොල්ලෝ උඩ ඉඳගෙන මහා භාණ්ඩාගාරයේ ධනය, හොරකම් කරන්නේ කොහොමද, කියලා සැලසුම් කරනවා. ඔබ ගෙයක් හදා ගන්න කොච්චර වද විඳිනවාද? ඒ ගොල්ලෝ එක ඩීල් එකෙන් කොළඹ අතිසුඛෝපභොගී, එපාර්ට්මන්ට් ගන්නවා. එක ගනුදෙනුවෙන් ඩුබායිවලින්, එංගලන්තෙන්, ඕස්ලියාවෙන් ගෙවල් ගන්නවා. ඇමෙරිකාවේ ගෙවල් ගන්නවා. ඔබ ඒ ගොල්ලන්ට බලය දෙනවා. ඔබලා පීඩනයට පත් කරනවා. ඒ ගොල්ලෝ රටේ ධනය පොදිගහගන්නවා. ඒකයි මේ ක්‍රමය. මේක අපි කුඩා කාලයේදී මේ තරම් ගැඹුරෙන් දැක්කේ නැහැ. නමුත් අපිට ආසාවක් තිබුණා, මේ දේශපාලනය වෙනස් කරන්න ඕන කියලා. එවැනි දේශපාලනයේ දිගටම නියැලිලා ඉන්න කොට අපි දැක්කා මේ මිනිස්සු මොනතරම් ලැජ්ජා නැති අයද කියලා. මම පාර්ලිමේන්තුවේ අවුරුදු 24ක් ඉන්නවා. ඔය හැමෝගේම පැටිකිරිය මම හොඳින්ම දන්නවා. ඔවුන් නිතරම තමන්ට, තමන්ගේ පවුලට පාර කපා ගන්නේ කොහොමද කියලා බලනවා. ජනතාවට වළ කපමින් ඒ ගොල්ලෝ අනාගතයට පාර කපා ගන්නවා. එදා තැපැල් නයින්ටියෙන් ගිය අය, අද මහා මන්දිර හදා ගන්නවා. වාහන හත අට ගන්නවා. අපේ ඇස් දෙකෙන් අපි දැක තිබෙනවා. රියදුරු රැකියාව කරපු සමහරු දේශපාලනයට ඇවිල්ලා කලා වැවේ, කොළඹ, නුවරඑළියේ විශාල පරිමාණ ඉඩම් ගත්තේ කොහොමද කියලා අපි දන්නවා. තේ දළු ප්‍රවාහනය කරපු උදවිය, දේශපාලනයට ඇවිල්ලා තේ වතු හිමියන් බවට පත් වුණේ කොහොමද කියලා අපි දන්නවා.
රනිල් වික්‍රමසිංහ 2015 ජනවාරි 08 වැනිදා බලයට ආවේ වංචා, දූෂණ නැති කරන්න කියලා. පෙබරවාරි මස 28 වැනිදා මහ බැංකුව කොල්ල කෑවා. බලය ගත්තෙම හොරකම් කරන්න. නාස්තිය සඳහාමයි. ඉන් පස්සේ මොකද වුණේ. රට කඩාගෙන වැටුණා. දරුවාට අධ්‍යාපනය අහිමි වුණා. රෝහල්වල බෙහෙත් නැති වුණා. චිත්‍රපට ශාලා වැහුණා. පොදු ජනතාවට විනෝදය අහිමි වුණා. මේවා අපි ඇස් ඉදිරිපිට දැකපු දේවල්. අපිත් සමග හිටපු යාළුවන්ගේ ජීවිත කෙළවර වූ හැටි අපි අපේ ඇස් ඉදිරිපිටම දැකපු මිනිස්සු. අපිට තේරෙනවා නම්, දැනෙනවා නම්, අපිට මනුෂ්‍යත්වය තිබෙනවා නම්, හෘදය සාක්ෂියක් තිබෙනවා නම්, මෙය වෙනස් කිරීම සඳහා ජීවිතය පරදුවට තබා සටන් වදින්න, දේශපාලන ව්‍යාපාරයක කොටස්කරුවන් වෙන්න අපිට අයිතියක් නැද්ද? මම එහෙම සටන් වදින දේශපාලන ව්‍යාපාරයක කොටස්කරුවක්. මේ රට පොහොසත් රටක් බවට පත් කරන්න අපිට අයිතියක් නැද්ද? අසල්වැසි ඉන්දියාව පරණ කෝච්චි එන්ජින් ගලවා විදුලි දුම්රිය ව්‍යාපෘති ක්‍රියාවට නගනවා. මේ පාලකයන් ගිහිල්ලා ඒ පරණ එන්ජින් තෑගි හැටියට එකතු කරගෙන එනවා.
ලෝකය දියුණුවෙනවා. අපි හිඟාකනවා. අඩුම තරමේ 60 – 70 දශකයේ පොඩි කර්මාන්ත පද්ධතියක් ගොඩනැගෙමින් ආවා. ඒ ඔක්කොම මේ පාලකයෝ විනාශ කරලා දැම්මා. ඔක්කොම දේවල් පිටරටින් ගේන්න පටන් ගත්තා. ඉන්දියාව කර්මාන්ත ඇති කරලා හදනවා. අපි කර්මාන්ත වහනවා. මේ පාලකයන්ට අපේ රටේ නිෂ්පාදනය වැඩිකරන්න කවදාවත් ඕනෑ වුණේ නැහැ. වසා දමනවා විතරක් නොවෙයි තිබෙන ඒවත් විකුණනවා. හදන්නෙම විකුණන්න. හදනකොටත් ගහනවා. විකුණනකොටත් ගහනවා. නඩු තීන්දුවට මුවාවෙලා පොස්පේට් නිධියේ පස් ඉන්දියාවට පටවනවා. ඉන්දියාව පොහොර හදනවා. අපි පස් පටවනවා.
මාවිල්ආරුසොරොව්ව වහපු වෙලාවේ කුඹුරු පාළු වුණා. ආණ්ඩුව තීරණය කළා වන්දි ගෙවන්න. වැඩියෙන්ම වන්දි ගත්තේ එස්.එම්. චන්ද්‍රසේන. මා ගාව තිබෙනවා සියලු විස්තර කොළඹ තිඹිරිගස්යායේ කොමර්ෂල් බැංකු ශාඛාවෙන් සල්ලි දැම්මා අනුරාධපුර ශාඛාවට. එස්.එම්. චන්ද්‍රසේනගෙයි, නෝනාගෙයි ජොයින්ට් එකවුන්ට් එකට. චෙක්පත්වල පිටපත් මා ගාව තිබෙනවා.
අපේ ගම්වල ජනතාව සමග අපිට ඇත්ත බැඳීමක් තිබෙනවා නම්, සැබෑ ලෙන්ගතුකමක් තිබෙනවා නම්, මේ තත්වය වෙනස් කරන්න අපි පොරබැදිය යුතු නැද්ද? අද අපිට තීරණාත්මක අවස්ථාවක් ඇවිල්ලා තිබෙනවා. මේ රටට වින කටිපු, මේ රට විනාශ කරපු, මේ පාලක කණ්ඩායම් නිශ්චිත වශයෙන්ම පලවා හැරලා පොදු ජනතාවගේ ආණ්ඩුවක් හදන්න ඕනෑ. අපි අනිවාර්යයෙන්ම එවැනි පන්නයේ ආණ්ඩුවක් හදනවා. මේ සෑම පැත්තෙන්ම දහස් ගණනාවක ජනතාවක් මෙතනට ඇවිල්ලා තිබෙන්නේ මොකටද? ඔබ අප කෙරෙහි විශ්වාසය තිබෙනවා. ලෙන්ගතුකම අප කෙරෙහි ඇතිවෙලා තිබෙනවා. අපි සමග බැඳීමක් ඇති වෙලා තිබෙනවා. මම ඔබට සහතිකයක් දෙනවා. ඔබ අප කෙරෙහි තබා තිබෙන විශ්වාසය හා ලෙන්ගතුකම අබමල් රොනකින්වත් නැතිවෙන්න අපි ඉඩ තබන්නේ නැහැ.
“රට වනසපු නිල්, කොළ පාලකයෝ ගෙදර යවන්න ජනතාව පුල පුලා බලා ඉන්නවා”
-ජාතික ජන බලවේගයේ ජාතික විධායක සභික වසන්ත සමරසිංහ-
අද මෙතන එකතුවෙලා ඉන්න මේ දහස් සංඛ්‍යාත ජනතාව මීට පෙර විවිධ පක්ෂවලට සහාය දීලා, ඡන්ද දීලා වැඩකරපු අය. ඒ ඔක්කොම එකට එකතු වෙලා අද රටට දෙන පණිවුඩය මොකක්ද? ඒ, 21 වැනිදාට නියත වශයෙන්ම අනුර කුමාර සහෝදරයා ජනාධිපති ලෙස තෝරා පත් කරන්න ඔක්කොම එකතු වෙලා රොද බැඳගෙන ඡන්දය දෙන්න සූදානම් බවයි.
අද මේ රටේ මහා සංඝරත්නයේ ආශීර්වාදය අනුර කුමාර සහෝදරයාට ලබාදී තිබෙනවා. ඉතිහාසයේ විශාලම සංඝ සම්මේලනය පවත්වලා ඒ පණිවිඩය උන්වහන්සේලා මුළු රටටම එක හඬින් ප්‍රකාශ කර සිටියා. මේ 21 වැනිදාට අපේ රටේ 09 වැනි ජනාධිපතිවරයා තෝරන්න යනවා. ඒ නිකම්ම නිකම් ඉතුරු කොට අදින ජනාධිපතිවරයෙක් නොවෙයි. මේ රටේ මහජනතාවගේ ඡන්දයෙන් තෝරා ගන්නා කෙනෙක්. මේ රටේ මහා සංඝරත්නයේත්, අනෙකුත් ආගමික පූජකතුමන්ලාගේත් ආශිර්වාදය එක ලෙස ලබන එකම ජනාධිපති ජාතික ජන බලවේගයේ නායක අනුර කුමාර දිසානායක සහෝදරයායි. සැප්තැම්බර් 21දා ඔහු නියත ලෙස මේ රටේ ජනාධිපති වෙනවා.
අනුර කුමාර සහෝදරයාගේ නායකත්වයෙන් යුත් ජාතික ජන බලවේගයේත්, මේ රටේ මිනිසුන්ගේත් ඒකායන අරමුණ පොහොසත් රටක් – ලස්සන ජීවිතයක් යන්න මේ මහ පොළොවේ යථාර්ථයක් කිරීමයි. උතුර, දකුණ, නැගෙනහිර, බටහිර, කඳුරට ඇතුළු මුළු රටම එකතු කරගෙන මේ රට ගොඩනඟන අපේ ඉතිහාසයේ එකම නායකයා අපේ අනුර කුමාර දිසානායක සහෝදරයායි. ලබන 21 වැනිදාට මුළු රටේම ජනතාවගේ අපේක්ෂාව අනුර කුමාර සහෝදරයාගේ ජයග්‍රහණයයි. ඒ සඳහා ගෞරවණීය ජයග්‍රහණයක් මේ ප්‍රදේශයෙනුත් එකතු කරන්න තමයි අද ඔබ මෙතනට රොද බැඳගෙන ඉන්නේ. මේ වන විට අනෙක් පක්ෂවල නායකයෝ ඡන්ද වැඩ පැත්තක තියලා අපිට එරෙහිව මඩ වැඩ පටන් අරන් තියෙනවා. නමුත් මේ කෙටිකාලය තුළ හැකි තරම් ජනතාව අතරට ගිහිල්ලා මාලිමාව දිනවන්න වැඩ කරන්න කියලා අපි ඉල්ලා සිටිනවා.
දැන් රනිල් සජිත්ලා ප්‍රතිපත්ති කතා කරන්නේ නැහැ. සජිත් දැන් රූපවාහිනී සාකච්ඡාවලට එන්නෙත් නැහැ. පැනලා දුවනවා. අපිට මඩ ගහනවා ඇරෙන්න, කියන්න දෙයක් ඒ ගොල්ලන්ට නැහැ. මේ රටේ අනාගත නායකයා වීමට සුදුසු එකම නායකයා තමා බව පාර්ලිමේන්තුව තුළත්, ඉන් පිටතත් තම භාවිතයෙන්ම අද ඔප්පු කර තිබෙන්නේ අපේ අනුර සහෝදරයා පමණයි. රනිල් දන්නවා මේ ජනාධිපතිවරණයෙන් රනිල් පරදිනවා කියලා. ඒ නිසා තමයි ඔහු කියන්නේ, අනුර කුමාරව පරද්දන්න සජිත්ට බැහැ කියලා. අපි කියනවා අනුරව පරදවන්න සජිත්ටත් බැහැ. රනිල් ඔයාටත් බැහැ. රනිල්ලා එක පැත්තකින් මේ රටේ ජාතික ධනය ශුද්ධ කරන ගමන් රට විකුණමින් ඉන්නවා. අපේ රටේ ජනතාවට විදෙස් ගමන් බලපත්‍රයක්වත් ගන්න තිබෙන අවස්ථාව නැති කරලා. අද අයිඩෙන්ටි කාඩ් එක වෙනුවට හම්බවෙන්නේ කොල කෑල්ලක්. ලයිසන් එක වෙනුවට දෙන්නෙත් කොල කෑල්ලක්. මේ රට වනසපු නිල්, කොළ පාලකයෝ ඉක්මනින්ම ගෙදර යවන්න මේ රටේ ජනතාව 21වැනිදා උදා වෙනකල් දැන් පුල පුලා බලා ඉන්නවා.
අද අනුර සහෝදරයා ප්‍රමුඛව ජාතික ජන බලවේගයේ ජයග්‍රහණය කරවීම සඳහා මේ රටේ එකතු විය යුතු සියලු බලවේග එකතු වෙලා එකා වන්ව සැදී පැහැදී සිටිනවා. මේ සැප්තැම්බර්21 වැනිදාට අනුර කුමාර සහෝදරයා මේ රටේ ජනාධිපතිවරයා බවට පත්වෙන බව සහතිකයි. ඉන්පසු ජාතික ජන බලවේගයේ ආණ්ඩුවක් මේ රට තුළ පිහිටුවනවා ඒකාන්තයි.
(-Colombo, Sept. 11, 2024-) සමන්විත සමස්ත ලංකා ලොතරැයි අලෙවි නියෝජිතයන්ගේ සංගමය ඉදිර ජනාධිපතිවරණයේදි ජාතික ජන බලවේගයේ නායක අනුර කුමාර දිසානායකගේ ජයග්‍රහණයට සහාය ලබා දීමට තීරණය කර තිබේ. අද (10) පස්වරුවේ ඔවුන් ජනතා විමුක්ති පෙරමුණේ ප්‍රධාන කාර්යාලයේදී ජාතික ජන බලවේගයේ ජාතික විධායක සභික චතුරංග අබේමසිංහ හමු වී එම තීරණය ලිඛිතව ලබා දී තිබේ. එහිදී සමස්ත ලංකා […]
(-Colombo, Sept. 11, 2024-)
සමන්විත සමස්ත ලංකා ලොතරැයි අලෙවි නියෝජිතයන්ගේ සංගමය ඉදිර ජනාධිපතිවරණයේදි ජාතික ජන බලවේගයේ නායක අනුර කුමාර දිසානායකගේ ජයග්‍රහණයට සහාය ලබා දීමට තීරණය කර තිබේ. අද (10) පස්වරුවේ ඔවුන් ජනතා විමුක්ති පෙරමුණේ ප්‍රධාන කාර්යාලයේදී ජාතික ජන බලවේගයේ ජාතික විධායක සභික චතුරංග අබේමසිංහ හමු වී එම තීරණය ලිඛිතව ලබා දී තිබේ. එහිදී සමස්ත ලංකා ලොතරැයි අලෙවි නියෝජිතයන්ගේ සංගමයේ සභාපති ක්‍රිෂාන් මාරඹ සහ භාණ්ඩාගාරික ආර්.එෆ්.ඒ ඇලෙක්සැන්ඩර් ප්‍රනාන්දු යන අයගේ අත්සනින් නිකුත් කර ඇති එම ලිපිය මෙසේය,
අනුර කුමාර දිසානායක සහෝදරයා, ජාතික ජනබලවේගය – නායක
ප්‍රධාන කාර්යාලය,
බත්තරමුල්ල.
2024-09-10
සංවර්ධන ලොතරැයි මණ්ඩලය හා ජාතික ලොතරැයි මණ්ඩලයට අනුබද්ධිත ලොතරැයි අලෙවි නියෝජිතයන් වන අප දිවයින පුරා අලෙවි නියෝජිතයන් 4,800ක් අලෙවි සහායකයින් 25,000ක් ඉක්මවා ගිය සංගමයක් වන අප සංගමය මෙවර ජනාධිපතිවරණයේ දී ඔබතුමාට සහය දක්වන්නට තීරණය කර ඇත්තෙමු.
මෙම ආයතන දෙකේ තිබෙන අඩුපාඩු සම්බන්ධව මීට ඉහතදී හිටපු පාර්ලිමේන්තු මන්ත්‍රී වෛද්‍ය නලින්ද ජයතිස්ස සහෝදරයා සමග හා අන්තර් සමාගම් සේවක සංගමයේ ප්‍රධාන ලේකම් වසන්ත සමරසිංහ සහෝදරයා සමග සාකච්ඡා කොට ඇති බවත් සඳහන් කරමු.
ඔබතුමාගේ ජයග්‍රහණයෙන් පසුව ජාතික ලොතරැයි මණ්ඩලය හා සංවර්ධන ලොතරැයි මණ්ඩලයේ පරිපාලන රැසක් වෙනස්කම් කල යුතුව ඇත. රජයට මසකට කෝටි ගණනින් මුදල් උපයා දෙන මෙම ව්‍යාපෘතියේ දියුණුව වෙනුවෙන් එහි ඇති සියලු කරුණු සම්බන්ධව දීර්ඝ ලෙස සාකච්ඡා කිරීමට ඔබතුමාගේ ජයග්‍රහණයෙන් පසුව බලාපොරොත්තු වෙමි.
ඔබතුමාට ජය වේවා….
මෙයට,
සමස්ත ලංකා ලොතරැයි අලෙවි නියෝජිතයන්ගේ සංගමයේ සභාපති ක්‍රිෂාන් මාරඹගේ,
භාණ්ඩාගාරික ආර්.එෆ්.ඒ ඇලෙක්සැන්ඩර් ප්‍රනාන්දු
