අපගේ මෙහෙවරේ ප්‍රමුඛතාවය වන්නේ සමාජ සාධාරණත්වය තහවුරු කිරීමයි. සෑම පුරවැසියෙකුටම සමාන අවස්ථා පමණක් නොව සාධාරණ ප්‍රතිලාභ භුක්ති විඳිය හැකි විනයගරුක සමාජයක් නිර්මාණය කිරීම අපගේ අපේක්ෂාවයි. ඒ අනුව යමින් පන්ති, වාර්ගික, ආගම්, භාෂා, කුල, ප්‍රදේශ, හෝ ලිංග භේදයකින් තොරව සෑම පුද්ගලයෙකුටම තෘප්තිමත් ජීවිතයක් ගත කළ හැකි සාධාරණ සහ යුක්තිගරුක සමාජයක් නිර්මාණය කිරීමට අපි කැප වී සිටින්නෙමු.
වර්තමාන සංකීර්ණ ලෝකයේ මිනිසුන්ට මූලික අවශ්‍යතා සේම, නව තාක්ෂණයට ප්‍රවේශය සහ විවේකය අත්‍යාවශ්‍ය බව අපි දනිමු. අපි සමෘද්ධිය මැනීමට ආර්ථික වර්ධනයට අමතරව පුරවැසියාගේ ජීවන තත්ත්වයේ ඇති වන ගුණාත්මක වර්ධනයද සැලකිල්ලට ගන්නෙමු. ආර්ථික ප්‍රජාතන්ත්‍රවාදය හා සමපාත වන ආර්ථික වර්ධනය හා තිරසාර සංවර්ධනය තුළින් නොසැලෙන ආර්ථිකයක් ගොඩ නැගීමට අපි කැප වන්නෙමු.
පුද්ගලයන් එකිනෙකා තම අයිතිවාසිකම් සහ වගකීම් පිළිගන්නා විට සමාජයක් දියුණු වන බව අපි විශ්වාස කරන්නෙමු. ඒ අනුව, අපගේ දැක්ම වන්නේ එකි නෙකා කෙරෙහි වන සෙනෙහස, දයාව, සංවේදනය, සහයෝගීතාවය සහ අන්‍යෝන්‍ය ගෞරවය මත පදනම් වූ විනයගරුක සමාජයක් ගොඩ නැගීමයි. එවැනි සමාජයක පුරවැසියාගේ ආරක්ෂාව සහ පිළිගැනීම පිළිබඳ සහරක්ෂිත හැඟීමක් දැනවෙන බව අපගේ විශ්වාසයයි.
අනාගත පරපුරට අපට වඩා යහපත් ලෝකයක් උරුම කර දෙන සමාජයක් ගොඩනැගීමට අපි කැප වන්නෙමු. එම කැපවීම දිගුකාලීනව අපගේ පරිසරය හා ස්වභාවික සම්පත් ආරක්ෂා කිරීම දක්වා විහිදේ. අපි ස්වභාවික හා මානව පරිසරය අතර සුහද සහජීවනයක් වෙනුවෙන් පෙනී සිටින්නෙමු. කෙටි කාලීන වාසි සඳහා සම්පත් සූරාකෑමට ඉඩ නොදෙන, අනාගත පරම්පරාවේ යහපැවැත්ම කෙරෙහි අවධානය යොමු කරමින් වගකිවයුතු සම්පත් භාවිතය අපි ජය ගන්නෙමු.
බලයට පත් සෑම ආණ්ඩුවක් තුළම පැවති දූෂණ සංස්කෘතිය විසින් ආර්ථික, දේශපාලන සහ සංස්කෘතික අංග විකෘති කර, ආණ්ඩුව හා රාජ්‍ය ආයතන කෙරෙහි මහජන විශ්වාසය පලුදු කර ඇත. පුරවැසියාට සෑම කටයුත්තක් කර ගැනීම සඳහාම නීතියෙන් රිංගා යෑමට බල කෙරී ඇත. ඒ සියල්ල සැලකිල්ලට ගෙන, දූෂණය, ගජමිතුරුවාදය හා ඥාති සංග්‍රහය මුලිනුපුටා දමා, පාලනයේ සෑම තරාතිරමකම විනිවිදභාවය තහවුරු කිරීමට අපි කැපවී සිටින්නෙමු.
දේශපාලන පක්ෂ, තරුණ සංවිධාන, කාන්තා කණ්ඩායම්, වෘත්තීය සමිති සහ සිවිල් සමාජ සංවිධාන ඇතුළු විවිධ දේශපාලන පක්ෂ හා කණ්ඩායම් 21කින් සමන්විත ගතික දේශපාලන ව්‍යාපාරයක් වන ජාතික ජන බලවේගය (NPP) වෙත අප ඔබව සාදරයෙන් පිළිගන්නෙමු.
2019 දී පිහිටුවන ලද NPP වඩාත් ප්‍රගතිශීලී ශ්‍රී ලංකාවක් නිර්මාණය කිරීමේ සාමුහික දැක්මක් මගින් මෙහෙයවනු ලබයි.
වැඩිදුර කියවන්න
සෑම පුරවැසියෙකුගේම අදහස් හා යෝජනා සඳහා වැදගත්කමක් ලබා දීම හා ඒවා ප්‍රකාශ කිරීමට ඇති අයිතිය රටේ අභිවෘද්ධිය උදෙසා බෙහෙවින් ඉවහල් වේ.
