NPP News

-Colombo, December 31, 2023-

දෙදහස් විසිතුන වසර නිමාකරලා දෙදහස් විසිතරට පය තබන්න තව දවසක් විතර තිබෙන්නේ. හැබැයි 2024 නව අවුරුදු උදාව වේලාසනින්ම මාතරට ඇවිල්ලා. මේ අපේක්ෂා සහගත බලාපොරොත්තු සහගත සතුට පිරුණු මුහුණුවල තිබෙන්නේ 2024 ජයග්‍රාහී වසරක් බවට පත්කර ගැනීමයි. භූ කම්පනයක් හේතුකොට ගෙන ලංකාවට සුනාමි අනතුරක් ඇති බව අද පාන්දර ප්‍රවෘත්තියකින් කියවුනා. පසුව දවල් එම තත්වය පහව ගියා කියලා නැවත ප්‍රවෘත්තියක් පළවුනා. නමුත් මාතරට ගැහැනු සුනාමියක් ඇවිත් කියලා මේ පිටිය දැක්කම පේනවා.

ගෙවී යන අවුරුද්දේ ජනවාරි මාසය ආරම්භ වුණේ මැතිවරණ උණුසුමත් එක්ක. ජනවාරි 05දා පළාත් පාලන මැතිවරණය ප්‍රකාශයට පත්කරන අවස්ථාවේ පාලක කණ්ඩායම අපේක්ෂා නොකළ බලයක්, මැතිවරණ ව්‍යාපාරය තුළ ජාතික ජන බලවේගයට ගොනඟන්න අපි සමත් වුණා. ඡන්දවලට ඇති වන රැලි ඡන්ද කල්දැමීමෙන් නතර කරන්න පාලකයන් කල්පනා කළා. ඒ නිසා මාර්තු 09දා පැවැත්විය යුතුව තිබුණු පළාත් පාලන මැතිවරණය අප්‍රේල් 25ට කල් දැම්මා. නැවත දින නියමයක් නොමැතිව කල්දැම්මා. අදටත් ඒ ඡන්දයට දිනයක් නියම කර නැහැ. මැයි, ජූනි මාසවන විට සමහර අය තුළ යම් අපේක්ෂා භංගත්වයක් තිබුණා. නමුත් අපට අත්හැරුණු තැන්, සාර්ථක කර ගත නොහැකිව තිබූ තැන්, සියල්ල සම්පූර්ණ කර ගනිමින්, අපි ඉදිරියට ආවා. විශ්‍රාමික ත්‍රිවිධ හමුදා සාමූහිකය පිහිටුවීම නිසා ආණ්ඩුව ඇතුලේ විශාල බියක් සහ කැළඹිල්ලක් ඇති කරමින් එය වර්ධනය වෙනවා. ඒ වගේම වෘත්තියවේදීන්ගේ සංවිධාන, ධීවර සමුළු, කාන්තා සමුළු පවත්වමින් දැවැන්ත ව්‍යාපාරයක් හැටියට ඉදිරියට ඇවිත් 2023 අභිබවා යන මහා බලගතු ව්‍යාපාරයක් හැටියටයි 2024ට අපි පා තබන්නේ.

තවත් අලුත් පියවරකින් 2024ට පා නගන්න අපි තීරණය කළා. චාටුබස්වලින්, බොරුවෙන්, කුඩා කුඩා මෙවලම් බෙදීමෙන් ගැහැනුන්ව රවටා ගන්න විශේෂයෙන්ම මහින්ද රාජපක්ෂ සමත් වුණා. ඔහු ගොඩනැගූ දේශපාලන සංස්කෘතිය අපේ ගමේ ගැහැනුන්ව ඉලක්ක කර ගත් සංස්කෘතියක්. දැනුත් විවිධ අවස්ථාවලදී ඔහු එවැනි ප්‍රකාශ කළත්, අද ජාතික ජන බලවේගයේ මැදිහත් වීමෙන් හුදු ඡන්දයක් ලබාගැනීමේ ගැහැනිය වෙනුවට සමාජය පරිවර්තනය කිරීම සඳහා අත්වැල් බැඳගන්නා ගැහැනුන් බවට ඔසවා තබා තිබෙනවා. 2024 ජයග්‍රහණය ගැන අපටත් කුකුසක් තිබුණා නම්, අද එය මුළුමනින්ම ඉවරයි. අන් කවරදාටත් වඩා වැඩියෙන් අවදියෙන් සිටිය යුතු, කල්පනා කළ යුතු, ක්‍රියාකාරී විය යුතු, වෙලාවක් මේක. ඔබට දැන් මොනවාද ඉතිරි වී තිබෙන්නේ. අවුරුදු 13, 14 වයසේ දැරිවියන් පවා උපදේශන සේවාවන් ලබාගත යුතු තත්වයට සමාජය බිඳ වට්ටවා අවසන්. අපේ රටේ සංස්කෘතිය, බැඳීම, මානව සම්බන්ධතා එක්ක අම්මා සහ දරුවන් අතර බැඳීම කොතරම් ප්‍රබලද? දැන් ඔබට ඔබේ දරුවා පිළිබඳව බලාපොරොත්තු තැබිය නොහැකි මේ සමාජය වෙනස් කිරීමට පෙළ ගැසිය යුතුයි. සමහර දරුවන් විශාල වශයෙන් මත්ද්‍රව්‍ය උවදුරේ ගොදුර බවට පත්වීමෙන් මව්වරුන් සහ සොහොයුරියන් විශාලතම කම්පනයකට පත්වී සිටිනවා. ඔබගේ දරුවා එවැනි ඛේදනීය ඉරණමකට ගොදුරු නොවේ යැයි ඔබට කිව හැකිද? සමාජය කඩා වැටීමේ මහා ව්‍යසනයේ ගොදුර අපේ රටේ ගැහැනිය සහ දරුවන්.

නිල වාර්තාවලට අනුව පවුල්වලින් 20% ගැහැනුන් ගෘහස්ත හිංසනයට ගොදුරුවන බව හෙළිකර තිබෙනවා. සතුට, විනෝදය, ජීවිතය නැති මිරිකුණු ගැහැනුන් සමුදායක් අප ඉදිරිපිට ඉන්නවා. මෙය අපි වෙනස් කළ යුතුයි. ඊයේ නිකුත් වුණු වාර්තාවක් අනුව අවුරුදු 3ත් 16ත් අතර පාසල් යන දරුවන්ගෙන් 55%කගේ වියදම් කපා හැරලා. පොත් සහ පාසල් උපකරණ මිලදී ගන්න බැහැ. තවත් සියයට හතළිස් ගණනක් බාහිර ටියුෂන් පන්ති යාම අත්හැරලා. ජනවාරි පළවැනිදා සිට අත්‍යවශ්‍ය භාණ්ඩ හා සේවා විශාල ප්‍රමාණයකට වැට් බදු ගහන්නේ, මේ පසුබිමේ සිටයි. ආර්ථිකයේ වැදගත් සාධකවලට, ආර්ථිකය ඉදිරියට යාම සඳහා බාධාවන භාණ්ඩ හා සේවාවවලට මෙයට පෙර වැට් බද්ද ගැහුවේ නැහැ. ඒ වගේම ජීවිතයේ අත්‍යවශ්‍යදේවලට ගෑස්, කිරි නිෂ්පාදන, පාසල් උපකරණ, මත පවා ජනවාරි පළවැනිදා සිට වැට් බදු ගහනවා. 2023දී දැනුණු ආර්ථික පීඩාවට වඩා වැඩි පීඩාවක් ජනවාරි පළවැනිදා සිට ඇති වෙනවා. වැඩකිරීමේදී පවුලේ ප්‍රමුඛයා වී සිටි ගැහැනුන් ජීවිතයේදී අන්තිමයා බවට පත්කර සිටින ජීවිතය ඕනෑද? ඒ වගේම මාතරින් කොළඹ යන සහොදරියන් නැවත ගෙදර එන තුරු වතුර උගුරක් නොබී සිටීමට තරම් ප්‍රවේශම් වෙනවා. තමන්ගේ අවශ්‍යතා සපුරා ගැනීමට පහසුකම් සලසා නැති මෙහෙම ජීවිතයක් තවදුරටත් ඕනෑද? මේ රටේ පාලකයන් 75වසරක් අපේ රට හපයක් බවට පත්කළා හා සමානවම කාන්තාවන් හපයක් බවට පතකර තිබෙනවා.

ගැහැනියක් හැටියට ඉපදී ගැහැනියක් හැටියට මිය යන විට තමන්ගේ ජීවිතයේ අත්පත කර ගත යුතු අවම උවමනාවන් වත් ඉටුකර ගත නොහැකි වු ගැහැනියක් හැටියට මිය යාමට සලසා තිබෙන ක්‍රමය අපි වෙනස් කරන්න ඕනෑ. රූපවාහිනී නාලිකාවල උදේ හතහමාරෙන් පස්සේ සාස්තර කියන අය ගෙන්වා ගන්නවා. මිථ්‍ය මතවලින් කාන්තාවන් රවටන්න විවිධ වැඩසටහන් උපයෝගී කර ගන්නවා. සමහර සාස්තරකාරයෝ රූපවාහිනි නාලිකාවලට ගෙවීමක් කර, කාලය ලබා ගන්නවා. ඉන්පසු ප්‍රචාරය කරන වෙළඳ වැඩසටහන් පවා එහෙමයි. හැබැයි ජාතික ජන බලවේගය අද ගැහැනුන්ගේ ශක්තිමත් කර තිබෙන්නේ එවැනි විෂබීජවලට හැරවිය නොහැකි ආකාරයටයි. දේශපාලනය වෙනස් කිරීමෙන් තොරව ඛේදවාචකයන්ගෙන් මිදී ජීවත්වීම ආරම්භ කරන්න බැහැ. ඒවගේම දේශපාලනයෙන් පමණක් මේ වෙනස් සිදුකරන්න බැහැ. මේ කඩා වැටුණු ආර්ථිකය ප්‍රකෘතිමත්භාවයට පත්කරන්න බිඳ වැටුණු සමාජය කාන්තාවන් ලෙස තමනගේ මව, සොහොයුරිය වශයෙන් බලන සමාජයක් ගොඩනැගිය යුතුයි. ගැහිනිය තවදුරටත් කෙළිබඩුවක් වෙනවා වෙනුවට යුක්තිය, සාධාරණත්වය, සමානත්වය පදනම් කර ගත් ආධ්‍යාත්මයට යළි පණ දිය යුතුයි. ඒ සියල්ල කළ හැකි වන්නේ දේශපාලන පරිවර්තනයකින් ආරම්භය ගැනීමෙන් පමණයි. නව පුනරුද ව්‍යාපාරයක් නවජාතික ව්‍යාපාරයක් ඔස්සේ දැවැන්ත සමාජ පරිවර්තනයක් සිදුකළ යුතුයි. ජාතික ජන බලවේගයේ ගැහැනු ව්‍යාපාරය කියන්නේ මේ රට පුනරුදය කරා ගෙනයන ප්‍රධානම බලවේගය වන පංගුකාරියන්ගේ සංවිධානයයි.

රනිල් වික්‍රමසිංහ අර්බුදය තේරුම් ගත්තේ ඩොලරය ඉහළ පහළ යාමෙන්, අයවැය හිඟය අඩුවැඩි වීමෙන්, වියදමට භාණ්ඩාගාරයේ මුදල් තිබෙනවාද නැද්ද කියන කාරණය අනුවයි. රනිල් වික්‍රමසිංහ ඇතුළු නඩයට අර්බුදය පෙනෙන්නේ ගිණුම්වලින් සහ සංඛ්‍යා දත්තවලින්. අපි සහ ඔබට මේ අර්බුදය පෙනෙන්නේ ජීවිතවලින්. ජීවිතවල තත්වය දත්තවලින් කියාපෑම ගැන ජාතික ජන බලවේගය අවධානය යොමු කරනවා. තමන්ගේ ජීවිත කාලයේ අසීරුම අවස්ථාව ගතකරමින් සිටින ජනතාවට ජනාධිපති මාධ්‍ය ඒකකයෙන් කියනවා අවුරුදු 25කට පසුව 2023 වියදම් මේ වර්ෂය මුලදීම පියවා අවසන් බව. ආර්ථිකය කඩා වට්ටවා, සමාජය පතුළටම බිඳ දමා, අපරාධ වර්ධනය කර, අයුක්තිය තහවුරු කළ අසාධාරණය කෙළ පැමිණි අපරාධකාරයින් පාලනය කරන රටක් නිර්මාණය කර, ඔවුන් ගිණුම්කරන දත්තවලින් ජයග්‍රහණ ගැන උදම් අනනවා. කඩා වැටුණු රට ගොඩගත හැකි වන්නේ නව ජාතික පිබිදීමකින්. අපි සියලු දෙනා ක්‍රියාකළ හොත් පමණයි. එළඹෙන වසරේ දේශපාලන වෙනස සිදු නොකරන්නේ නම්, ගැහැනු ඔබට තව තවත් අවමානයට ලක්වෙන්න පුළුවන්. මේ පීඩනයේ ගොදුරු බවට තව තවත් පත්වෙන්න පුළුවන්. තව තවත් හූල්ලමින් දරුවන් සම්බන්ධයෙන් අපේක්ෂා භංගත්වයට පත්වෙන්න පුළුවන්. අපි ඔබට යෝජනා කරන්නේ හූල්ලමින් සිටින ජීවිතයක් නොවෙයි.ශක්තිසම්පන්නව ඉදිරියට පැමිණ මෙය වෙනස් කිරීමට සංවිධානය වන ලෙයසි.

දශක ගණනාවක් මාතර දිස්ත්‍රික්කය තුළ දේශපාලන ක්‍රියාකාරකම් කර තිබුණත් ඒ හැම එකකටම වඩා වැදගත්ම අවස්ථාවටයි, අද මා මේ සම්බන්ධවී සිටින්නේ. මෙතෙක් සහෝදරියන් තුළ තිබූ නිහඬතාවය, නිද්‍රාශීලිත්වය, මුළුමනින්ම ඉවත් කර, දිස්ත්‍රික් සමුළුවක් ලෙස පවත්වන, දැවැන්තම කාන්තා බලවේගය එකතු කොට තිබෙනවා. අපේ රටේ තිබුණු පිරිමි කේන්ද්‍රගත කොට ගත් දේශපාලනය වෙනුවට ඉතාම ශක්තිමත් ක්‍රියාකාරී මැදිහත්වීමකට ගැහැනුන් ඉදිරියට පැමිණ සිටිනවා. රැවටිලිවලට මුලාවන, ගෙදර මුල්ලකට කර තිබූ කාන්තාව තුළ සැඟවුණු විශාල ශක්තිය මුදාහරිමින් අද පෙරමුණට ඇවිත් සිටිනවා. ලංකාවට විදේශ විනිමය වැඩිපුරම උපයාගෙන විදෙස්ගත ශ්‍රමිකයන් හැටියට විශාල ගැහැනුන් පිරිසක් ක්‍රියාකරනවා. ඊළඟට ආසන්න වශයෙන් ඩොලර් බිලියන පහක වැඩිම විදේශ විනිමය උපයා දෙන ඇඟලුම් කර්මාන්තයේ නියැලී සිටින විශාලතම පිරිස ගැහැනුන්. තුන්වන වැඩිම විදේශ විනිමය ප්‍රමාණය උපයාදෙන තේ කර්මාන්තයේ විශාලතම පංගුව දරන්නෙත් ගැහැනුන්. තව පැත්තකින් පාසල් අධ්‍යාපනයේ 70%ක් පමණ සිටින්නේ ගුරුවරියන්. සෞඛ්‍ය සේවයේ වැඩි පංගුවක් තිබෙන්නේත් ගැහැනුන් අතේ. ඒ නිසාම පවතින ක්‍රමය වෙනස් කිරීමේ වැඩිම දේශපාලන සක්‍යතාවය තිබෙන්නේත් ගැහැනුන් අතේ.

මේ රට ගොඩගන්නා ප්‍රධානම බලවේගය බවට ගැහැනිය පරිවර්තනය කළ යුතුයි. පැරණි කියමන් පැරණි යථාර්ථයන් සියල්ල පැත්තකින් තබා නව රටක්, නව ලෝකයක්, ගොඩනැගීමේ පුරෝගාමී වැඩකොටස කරන ගැහැනුන් බවට පත්වීමේ ස්ථිර අධිෂ්ඨානය ඇතිකර ගන්න ඕනෑ. ලංකාව පුරා මෙවැනි සමුළු පවත්වා ගැහැනුන් ප්‍රබල ලෙසම බල ගන්වනවා. මේ රට නැවත ජාතික පිබිදීමේ මාවතකට ගෙන එන්න ඕනෑ. ඉන්දියාවේ බි්‍රතාන්‍ය අධිරාජ්‍යවාදීන්ට එරෙහිව දැවැන්ත ජාතික ව්‍යාපාරයක් තිබුණා. නේරු, ගාන්ධි, චන්ද්‍රබෝස්, පාතෙල්, ඇති කළ ජාතික ව්‍යාපාරයේ පිබිදීම නිසා අද ඉන්දියාව සඳ තරණය කරන මට්ටමට පැමිණ සිටිනවා. දෙවන ලෝක යුද්ධයේදී ඇමෙරිකානු පරමාණු බෝම්බ හෙළීමෙන් සමතලා වුණු ජපානය අධිෂ්ඨානයෙන් නැවත නැගී සිටියා. චීනය, වියට්නාමය වගේ රටවල් ගත්තත් නව ලෝකයේ තාක්ෂණික ජයග්‍රහණයන් යොදාගෙන ආර්ථික, බලවතුන් වී සිටිනවා. එක්සත් ජනපදය බි්‍රතාන්‍ය ආධිපත්‍යයට එරෙහිව ගෙන ආ ජාතික පිබිදීම තුළින මූලාරම්භය ගත්තා. අපිට එහෙම ජාතික පිබිදීමක් තිබුණේ නැහැ. තාමත් කතා කරන්න තිබෙන්නේ 1818, 1848 නැගී සිටින් මුතුන් මිතතන් ගැන. 1848 සිට 1948 දක්වා කතා කරන්න මුතුන්මිත්තන් අපිට නැහැ. ඉන්දියාවේ ගාන්ධිලා, නේරුලා, පාතෙල්ලා බිහිවන විට අපිට හැදුණේ ස්ටීවන්ලා, ජූනියස් රිචඩලා, රිජ්වේලා, සොලමන් ඩයස්ලා වගේ අය. ජාතිය අවධිකරන සටනක් අපට තිබුණේ නැහැ. ජාතික හැඟීමකින් රට නැගිට්ටවනවා වෙනුවට සිංහලයාට විරුද්ධව දෙමළාත්, දෙමළාට විරුද්ධව මුස්ලිම් කෙනාත් නැගිට්ටවන දේශපාලන සංස්කෘතියක් බිහිකර මහා ඛේදවාචකවලින් කෙළවර වුණා. මේ රටට නැවත පණ දෙන, කඩා වැටුණු රාජ්‍යය ගොඩනඟන, සුණු විසුණුකර තිබෙන සමාජය ඒකාග්‍රතාවයකට ගේන පොදු ජනයා අතට යුක්තිය සාධාරණය ගලාඑන නව සමාජ ක්‍රමයක් අවධි කරන්න ඕනෑ. ඒ සඳහා සිංහල, දෙමළ, මුස්ලිම් ජාතික ඒකාග්‍රතාවය ගොඩනඟන්න ඕනෑ. එය ගොඩනැගිය යුත්තේ බලය ලබා ගැනීම සඳහා පමණක් නොවෙයි. බලය ලබාගෙන රට ගොඩනැගීම සඳහායි. එහෙම නැතිව මාතෘ භූමියත් එහි වෙසෙන ජනයාත් මේ ඛේදනීය තත්වයෙන් ගොඩගන්න බැහැ. කඳුළු හෙළමින්, සෝ සුසුම් හෙළමින් තිබෙන මාතෘ භූමියටත් එහි වෙසෙන ජනයාටත් නිදහස් ජීවිතයක් ලබාදෙන නව පුනරුද යුගයක් කරා ගෙනයමු. දේශපාලන බලය අත්පත් කර ගැනීම ආරම්භය පමණයි. ඉන්පසුව වෙහෙස නොබලා වැඩකරන ඕනෑම කැපකිරීමක් කළ හැකි ජාතික ව්‍යාපාරයක් ගොඩනඟමු. ඒ වෙනුවෙන් මාතරින් ඉතාම ධෛර්යවන්ත, යෝධ පියවරක තබා තිබෙනවා. වැනෙන්නේ නැති, ධෛර්ය සමපන්න, රට ගොඩනඟන ගැහැනුන් නිර්මාණය කර තිබෙනවා. අපි සියලු දෙනා නොනැවතී ඉදිරියට යමු.

ජාතික ජන බලවේගයේ ජාතික විධායක සභික, අයිතීන් උදෙසා කාන්තා සංවිධානයේ සභාපති සරෝජා පෝල්රාජ්

මුහුදු සුනාමි අනතුරු ඇඟවිමකින් වත් නවතන්න බැරි වූ ජාතික ජන බලවේගයේ ජන සුනාමිය තමයි මේ ඉන්නේ. මේ රටේ බලය ඉල්ලපු සහ බලය අල්ලපු දේශපාලන පක්ෂ මේ රටේ කාන්තාවන්ව කතිර ගහන යන්ත්‍ර බවට පත් කළා පමණයි. පුරවැසි හිමිකම්, මානව අයිතිවාසිකම් අහිමිකර මිනිසුන්ව පාගා දමමින් මර්දනය කරමින් තිබෙනවා. ඉතාමත් ඛේදනීය ආර්ථික වටපිටාවක සමාජ හා සංස්කෘතික ජීවිතය අහිමි කළ මෑනිවරු, සහෝදරියෝ, දූවරු, වෘත්තීය ජීවිත ඇතුලේ ජීවිතයේ වටිනාකම් සියල්ල බිලිදෙමින් දැඩි වේදනාවකින් ගතකරන කාලයක් මේක. ඒ නිසා ජාතික ජන බලවේගය හැටියට අපි 52%ක් වූ රටේ කාන්තා බලය, 56%ක් වූ ඡන්ද දායක බලය නියෝජනය කරන කාන්තාවන්ගේ බලය ආර්ථික සූරාකෑමට හා සමාජ සංස්කෘතික ගිල ගැනීමට එරෙහිව තර්ජනාංගුලියක් බවට පත්කරන්න තීරණය කළා. මේ දුර්දාන්ත පාලනයට එරෙහිව, කොල්ලකාරී ආර්ථික ක්‍රමයට සහ දූෂිත දේශපාලන සංස්කෘතියට එරෙහිව කුළුගෙඩි පහර එල්ල කරන්න ගැහැනු අපි එක මිටට මාලිමාවට එකතුවී සිටින බව ආඩම්බරයෙන් ප්‍රකාශ කරනවා.

මාතර ග්‍රාම සේවා වසම් 650ටම කාන්තා සමිතියක් මාස දෙකක් වැනි කාලසීමාවක් තුළ පිහිටුවා හැකියාවෙන් පිරුණු කාන්තාවන්, අලුත් සංවිධායිකාවන්, ධෛර්යමත් ගැහැනුන් ගම්දනව්වලදී අපට හමුවුණා. නිවෙස්වල මුළු ගැන්වී සිටි අපේ කාන්තා විභවය සමාජ ශ්‍රමය බවට පත්කරන්න හැකිවීම අපේ විශාලතම ජයග්‍රහණය බව මේ අවස්ථාවේ ප්‍රකාශ කරනවා. මේ රට ගොඩනැගීමේ සමාජ, ආර්ථික, සංස්කෘතික වැඩපිළිවෙළට නිසි දැක්මක් සහ නායකත්වයක් ඔස්සේ පෙරමුණ ගන්න සියලුම කාන්තාවන් සූදානම් බව මේ මාතර සමුළුවේදී තහවුරුකර තිබෙනවා.

ජාතික ජන බලවේගයේ ජාතික විධායක සභික, අයිතීන් උදෙසා කාන්තා සංවිධානයේ ලේකම් සමන්මලී ගුණසිංහ

“අරගල නොකරන්නන් තමන් බැඳි යදම් නොදකී” කියලා රෝසා ලක්සම්බර්ග් සහෝදරිය මෙසේ තිබෙනවා. සාම්ප්‍රදායික දේශපාලනය තුළ මෙපමණ කල් ගැහැනු අපට අරගල කරන්න ඉගැන්නුවේ නිවෙස් ඇතුලේ සහ කුස්සිය ඇතුලේ. අපේ පුංචි පැටව් තුරුල් කරගෙන නොකා නොබී අපි ඒ අරගලය කුස්සියේ සහ තමන්ගේ ගේ ඇතුලේ කළා. ජාතික ජන බලවේගයේ සහෝදරියන් ගෙයක් ගානේ ගිහින් කුස්සිය ඇතුලේ අරගලය පාරට ගෙනත් දේශපාලන අර්ථයක් දීලා ගැහැනියට නිදහස් ලෝකයක් ගොඩනගන්න සූදානම කියන පණිවිඩය ඉතා ඉහළින් ලබාදී තිබෙනවා.

ප්‍රභූ දේශපාලනයේ සිටි අය එදා කීවේ ගැහැනුන්ට ඡන්ද අයිතිය දෙන්න එපා කියලා. නමුත් 1931 සිට ඡන්ද අයිතිය අපි පාවිච්චි කළත් අපේ දරුවන්ට නිසි ලෝකයක් ගොඩනඟන්න අපිට බැරිවුණා. නිදහස, ආදරය, මනුස්සකම තිබෙන ලෝකයක් ගොඩනගන්න අපට බැරිවුණා. නමුත් අද වෙනකොට ඡන්ද අයිතියට දේශපාලන වටිනාකමක් දී කුස්සියට සිරකර සිටි නිර්මාණශීලී, ධෛර්යවන්ත, දේශපාලන ගැහැනිය එළියට ඇවිත් මුළු රටම අවදිකරන පණිවිඩය අද මාතරින ගත්තා. එයට මේ රටේ සාම්ප්‍රදායික දේශපාලනඥයෝ බයවී සිටිනවා. ඔවුන් බයවිය යුතුයි තමයි. ඉදිරියේ එන ඕනෑම මැතිවරණයකදී එකට අත්වැල් බැඳගෙන සාම්ප්‍රදායික දේශපාලන පක්ෂ එකට තබා පරාද කොට අපේ ලෝකය දිනාගන්න අපි සූදානම්. එය කළ හැකි වන්නේ නිෂ්පාදනයට මුල්තැන දෙන ජාතික ආර්ථිකයක් ගොඩනැගීමෙන් පමණයි. අවශ්‍ය වෙනස දේශපාලනිකව අවබෝධ කරගෙන එයට නායකත්වය දෙන්න කිසිම සුනාමියකට ගහගෙන යන්න බැරි යෝධ පවුරක් ගොඩනඟා ඒ පවුරෙන් අපි මේ රට වෙනස් කරමු.
සමාජවාදී තරුණ සංගමයේ මාතර දිස්ත්‍රික් කමිටු සාමාජිකා මල්ෂා අමාෂා
තරුණ තරුණියන් කියන්නේ ඉතාමත් උද්යෝගයෙන් ජීවිතය ගත කරන්න කැමති පිරිසක්. ඔවුන් ලස්සට අඳින්න, ඇවිදින්න යන්න, ආසා වුණත්, අවම ආශාවන් පවා හීනයක් වෙලා තිබෙන්නේ. උගත් නුගත්, වයස් භේදයකින් තොරව, සියලු දෙනාම ඉන්නේ අර්බුදයක. සිහින අත්හැරදමා අද දවසේ පමණක් ජීවත් වෙනවා කියන ඉතාමත ඛේදජනක සිතුවිල්ලක ඉන්නේ. මීට හේතුව හැටියට දකින්නේ වසර 75ක් පුරා අපේ වැඩිහිටි පරම්පරාව පාලකයින් හා ආණ්ඩු පත්කරගෙන තිබුණත්, තරුණ පරම්පරාව වෙනුවෙන් ඉදිරි ගමනක් නිර්මාණය කළේ නැහැ. වෙන රටවල තරුණයන් හඳට යන්න සිහින දකිද්දී, අපේ රටේ තරුණයන් ගෙයක් හදා ගන්න හෝ වාහනයක් ගන්න හීන දැක්කා. ඒ හීන පවා අත්හැර දමන්න දැන් සිදුවෙලා. වැඩිහිටියන් වෙත තරුණයන්ගෙන් එල්ලවී තිබෙන චෝදනා බොරු බවට පත්කරන්න අපේ මව්වරු සහ පියවරු රොද බැඳගෙන ඉන්නවා. ඒ ඔබ සියලු දෙනාට ඉතා ආදරයෙන් ස්තුති කරනවා. තරුණයන් ලෙස අපි සියලු දෙනා ඔබත් සමග එක්වී මේ රට වෙනස් කරන බව ප්‍රකාශ කරනවා.

ජාතික ජන බලවේගයේ ජාතික විධායක සභික සුනිල් හඳුන්නෙත්ති

මාතරදී අද සාර්ථක කාන්තා සමුළුවක් පවත්වන්නේ මාස හතරක පමණ කාලයක් පුරා ඇදහැලුණු වර්ෂාවෙන් ගම්බිම් යටවී සමහර නිවාස පවා අලාභහානිවලට පත්ව තිබුණු පසුබිමක. මේ සහෝදරියන් ගෙයක් ගෙයක් ගානේ ගිහින් ගැහැනු එක මිටට එකතු කළේ විශේෂ තත්වයක් යටතේ. ලංකාවේ කාන්තාවන් එක මිටට එකතු කරන පළවෙනි සමුළුව මාතර පවත්වමින් සුවිශාල ජයග්‍රහණයක් එක්ක සියලුම දෙනාට මගේ ප්‍රණාමය පුදකරනවා. ආණ්ඩුව වැට් ගහනකොට, ලයිට් බිල වැඩිකරන කොට, ජල බිල වැඩිකරන කොට, කුසගින්නේ බර වැඩිකරන කොට ඒ සියල්ල ගෘහය තුළදී දරාගන්න සිදුවී තිබෙන්නේ ආදරණීය අම්මලාට, ආදරණීය කාන්තාවන්ට. පසුගිය කාලය පුරාම රනිල් වික්‍රමසිංහ පොහොට්ටු මහ පාලනයෙන් අපේ ගෘහ පාලනය අවුල් කළා. අයහපත් දේශගුණතත්වයන්ටත් මුහුණ දෙමින් ආණ්ඩුවේ සියලු පීඩාවන් දරාගෙන මේ සංවිධාන කටයුත්තට ඔබ සියලුදෙනාම ධෛර්යයෙන් කර ගැහුවා.

ගැහැනු එක මිටට කීවාම, මිටක් එක්ක සම්බන්ධ කතාවක් අපේ ජන වහරේ තිබෙනවා. ගැහැනුන්ගේ නුවණ හැඳිමිටේ තරමට කියලා කියන ජන වහරට සීමා කළ ලංකාවේ සංස්කෘතිය ලෝකයේ ගැහැනුන්ට අදාළ වෙන්නේ නැහැ. ලෝකයට විශාල දේශපාලන නායකත්වයක් දුන්, ලෝකයේ බොහෝ දේවල් අභිබවා ගිය කාන්තාවන් ඉන්නවා. ගැහැනු හැඳිමිටට කියන සාම්ප්‍රදායික මතය වෙනස් කර, ගැහැනු එක මිටට කියන සංකල්පය වටා එක්වී දේශපාලන, ආර්ථික, සමාජ සංස්කෘතික පරිවර්තනයක් වෙනුවෙන් අද ඔබ සියලු දෙනා පෙළ ගැසී සිටිනවා.

අභ්‍යවකාශය තරණය කළ, පළමු කාන්තාව වැලෙන්ටිනා තෙරෙස්කෝවා. කාන්තාවන්ට තිබෙන දරාගැනීමේ ශක්තිය පිරිමින්ට නැහැ කියලා ජීව විද්‍යාත්මකය ඔප්පු වී තිබෙනවා. ඒ දරාගැනීමේ ශක්තිය දේශපාලනයෙන ඉවත් කර, කුස්සයට සීමා කරන්න හැඳිමිටේ කතාව ගෙනත් තිබෙනවා. නමුත් මැතිවරණ කාලයේදී ඡන්ද ටික ගන්න ගැහැනුන් එකතු කර, විවිධ සමිති ගොඩනඟනවා. සුභසාධක සමිතිය, ණය දෙන සමිතිය, සමෘද්ධි සමිතිය, දහම් පාසල් සමිතිය, ගුරුදෙගුරු සමිතිය වගේ හැම එකකටම යන්නේ කාන්තාවන්. නමුත් දේශපාලන සමිතියට ගියේ පිරිමි. කාන්තාවන් ගෙන්වා ගත්තේ ඡන්ද කාලයට කොසු, ඉදල් පවා බෙදනා ඡන්ද ටික ලබාගන්න. නොයෙක් දේවල් බෙදලා කාන්තාවන්ගේ ඡන්ද ටික උදුරා ගත්ත දේශපාලන සංස්කෘතියට නැවත ඉඩ නොදෙන සැබෑ කාන්තා බලය තමයි මේ තිබෙන්නේ. අද ශ්‍රී ලංකාවේ ආර්ථිකයේ වැඩිම පංගුවක් තිබෙන්නේ කාන්තාවන්ගේ දායකත්වය. ඈත දෙනියායේ තේ දළු කඩන කාන්තාවන්ගේ සිට දික්වැල්ලේ උම්බලකඩ හදන කාන්තාවන් දක්වා වගේම, සංචාරක කර්මාන්තයේ රෑ එළිවෙන තුරු දහදුක් විඳින කාන්තාවන් දක්වා ආර්ථික බර දරන්නේ කාන්තාවන්. විදේශගත වී අති දුෂ්කරම රැකියාවල යෙදෙමින් විදේශ විනිමය උපයන්නෙත් කාන්තාවන්. ඒ කාන්තාවන්ට නිදහසේ ඉන්න අවස්ථාවක් නැහැ. පවුලේ ජීවන බර වැඩිවෙන්න වැඩිවෙන්න වැඩිපුරම බඩගින්නේ ඉන්නේ අම්මා. ඒ නිසා මේ තිබෙන අසාධාරණ ආර්ථික, දේශපාලන, සංස්කාතිය වෙනස් කරන්න කාන්තාවන්ට දැවැන්ත කාර්යභාරයක් පැවරී තිබෙනවා. ජාතිවාදී බෙදීම්වලින්, මිථ්‍යා මතවලින් අන්ධ කළ මේ සමාජය නැවත ප්‍රකෘති තත්වයට ගැනීමේ දැවැන්ත කාර්යභාරයක් කාන්තාවන්ට තිබෙනවා. එය කළ හැකි වන්නේ දැවැන්ත සංවිධානයකට විතරයි. දැවැන්ත විනයකට විතරයි. අයිතිවාසිකම් නැති කාන්තාවන්ට මාතර ඔබ හැමදෙනා දැවැන්ත පුරෝගාමි ශක්තියක් වී තිබෙනවා විනයක් සහිතව තනිවම මේ වැනි කාන්තා සංවිධානයක පිහිටුවීම ලෝකයටම අලුත් ආදර්ශයක්.
ඇමෙරිකා එක්සත් ජනපදයේ ජනාධිපතිවරයාට පමණක් දෙවැනි වෙන රාජ්‍ය ලේකම සිටින්නේ කාන්තාවක්. කමලා හැරිස්, හිලරි ක්ලින්ට, කොන්ඩලීසා රයිස්, මැන්ඩලයින් පෝල්රයිස්, වගේ ආරක්ෂක මණ්ඩලයේ තීරණ ගන්න ප්‍රධානියා හැමතිස්සේම කාන්තාවක්. යුරෝපා සංගමයේ ජර්මනිය ඉටු කළ සුවිශේෂ කාර්යබාරයට උර දැරුවේ ඇන්ජලා මර්කර්. නව ලිබරල්වාදී ආර්ථික ක්‍රමය ක්‍රියාත්මක කරන්න මාග්‍රට් තැචර් දැවැන්ත කාර්යභාරයක් කළා. ඒ වගේ නරක පැත්තට නායක්තවය දුන්නා වගේම මාරි කියුරි, රෝසා ලක්ෂම්බර්ග්, ලංකාවේ කුමාරි ජයවර්ධන, ඉන්දියාවේ මන්දනා සිවා, වැනි දැවැන්ත ක්‍රියාධරයින් සිහිපත් වෙනවා. අපේ දේශපාලන ව්‍යාපාරයේ ජීවිත කැපකළ ප්‍රේමවතී මනම්පේරී සහෝදරිය වැනි කාන්තාවන් ඉන්නවා. ඒ අයගේ හුස්ම, ජීවනාලිය, ශ්‍රී ලංකාව වෙනස් කිරීම වෙනුවෙන් අපි එකතු කර ගන්න ඕනෑ. 2024 අවුරුද්ද අන්ධකාරයේ අවුරුද්දද, අපේක්ෂාවේ අවුරුද්ද ද යන්න තීරණය කරන මොහොත අභියස අපි ඉන්නේ. අපිත් 2024 අවුරුද්ද බාර ගන්න ඕනෑ දැවැන්තයින් හැටියටයි. ඒ සඳහා මාතරින් ආරම්භ කළ කාන්තා සංවිධානයට ශක්තිය සහ ධෛර්යය ලැබේවා.

ජාතික ජන බලවේගයේ පාර්ලිමේන්තු මන්ත්‍රී ආචාර්ය හරිනි අමරසූරිය

අද අපි එකතුවී සිටින 2023 දෙසැම්බර් 30 දිනය අමතක කරන්න එපා. අද අපි ලකුණු කරන මේ දිනය ලාංකික ඉතිහාසයේ පමණක් නොවෙයි, ගෝලීයව පවා ස්ත්‍රී දේශපාලනයේ හැරවුම් දිනයක් වෙන බව මම තදින් විශ්වාස කරනවා. මේ දිනය ඔබේ හදවතේ තියාගන්න. 2024දී අපේ රට පරිවර්තනය කරන පෙරළිකාර යුගයේ පළමු වෙඩි මුරය මාතර දිස්ත්‍රික්කයේ කාන්තා සමුළුවෙන් අපි ආරම්භ කර තිබෙනවා. අපි මේ ගමන ජයග්‍රහණයෙන් තොරව නතර කරන්නේ නැහැ. අපේ ඉතිහාසයේ සෑම තීරණාත්මක මොහොතකදීම ගැහැනුන් එළියට බැහැලා තිබෙනවා. මෑත ඉතිහාසයේ වුණත් නිර්භීත, එඩිතර ශක්තිමත් ගැහැණුන් එළියට බැස්ස නිසයි සමාජ පෙරළිවල ආරම්භය ඇතිවී තිබෙන්නේ. අසූ ගණන්වල භීෂණයට එරෙහිව මනෝරානී සරවණමුත්තු වැනි අම්මාවරුන්, කුමාරි ජයවර්ධන, සුනිලා අබේසේකර, උතුරේ රාජනී තිරානගම වැනි ශ්‍රේෂ්ඨ නායිකාවන් හමුවෙනවා. අපිට මතක තිබෙන ප්‍රසිද්ධ ඒ නම්වලට අමතරව මේ රටේ ගැහැනුන් දහස් ගණනක් තම ජීවිත පුදකර තිබෙනවා. ගැහැනුන් මේ රට ගොඩනගන්න තමන්ගේ ශ්‍රමය දී තිබෙනවා. නමුත් ඔවුන් ගැන ඉතිහාසය ලිීවේ අපි නොවෙයි. 2024 ඇති කරන පෙරළිය තුළින් අපේ ඉතිහාසය අපි ලියන්න ඕනෑ. ඉතිහාසය ලිවීමේ බලය අපි අතට ගත යුතුයි. අපි මේ ආරම්භ කර තිබෙන්නේ එම තීරණාත්මක ගමනයි.

අපි මේ ගත කරන්නේ තවත් එක් දේශපාලන මොහොතක් නොවෙයි. සමාජ පෙරළියක් කරන්න යන මොහොතක්. මෙතෙක් කල් ඡන්දදායකයින් හැටියට පාවිච්චි කළ ගැහැනුන් මේ සමාජය වෙනුවෙන් විශාල දායකත්වයක් දරා තිබෙනවා. ශ්‍රී ලාංකික ගැහැනිය මේ රටේ ආර්ථිකය ශක්තිමත් කරන්න වැඩිම පංගුව දරා තිබෙනවා. අපේ රටට ඩොලර් උපයන ප්‍රධානම මාර්ගවල වැඩිම පංගුව දරන්නේ කාන්තාවන්. ගැහැනුන් අමාරුවෙන් හම්බකළ ඩොලර් පාලකයන් නාස්තිකාරී ලෙස විනාශ කළා. ආර්ථිකයට අමතරව ගෘහය තුළ ඇය ඉටුකරන කාර්යභාරයෙන් තමයි මානව සම්පත රැකෙන්නේ. අම්මාගේ කාර්යභාරය කියන්නේ ඒ මානව සම්පතට ලබාදෙන ගොඩනැගීම සහ රැකබලා ගැනීමයි. ඒ ගැහැනියට මේ රටේ පාලකයන් දී තිබෙන ගෞරවය මොකක්ද? ගෙදර ඉන්නත් බැරි අනාරක්ෂිත තත්වයට පත්කර තිබෙන්නේ. මැතිවරණ කාලයේදී පොරොන්දු දී රවටා ගත හැකි පිරිසක් ලෙසයි, ගැහැනුන්ව හඳුනාගෙන තිබෙන්නේ. මේ සමාජයට ලබාදී තිබෙන දායකත්වය සහ කැපවීම වෙනුවෙන් ගෞරවයවත් මේ පාලකයින් ලබාදී නැහැ. ජාතික ජන බලවේගය මේ ගමන පටන් ගත්තේ ඒ තත්වය වෙනස් කරන්නයි. අපට ඔබේ ඡන්දය පමණක් නොවෙයි, ඔබේ නායකත්වය, සමාජ පෙරළියේ කොටස්කාරියක් බවට පත්වීම, සමාජ පෙරළියේ අයිතිකාරියන් බවට පත්වීම, ඔබට අවශ්‍ය ප්‍රතිපත්ති සකස් කර ගැනීම, සහ තීන්දු තීරණ ගැනීමේදී දායකවීමේ අවස්ථාව ලබාදීම යන සියල්ල තුළින් රටේ නායකත්වයත් අපට අවශ්‍යයි.

මේ වන විට අපට මැතිවරණ නොවෙයි අභියෝගය, අපි මැතිවරණ දිනලා ඉවරයි. අපට තිබෙන අභියෝගය මැතිවරණ දිනලා අපි හදන පාලනය තුළ මොනවගේ පරිවර්තනයක් ද කරන්නේ? කියන අභියෝගයට මුහුණ දෙන්නයි, අපි ඔබ සියලු දෙනා එකතු කරන්නේ. ඒ පාලනයේ ශක්තිමත් කොටස්කරුවන් ඔබයි. මෙපමණ කල් වැඩ තුළ හිරකර අපේ සමාජමය කාර්යය අසුරාදමා තිබුණා. නමුත් ජාතික ජන බලවේගයේ සියලු දෙනා ක්‍රියාකරන්නේ ඒ වෙනුවෙන්.

අවුරුදු තුනකට ඉස්සර ජාතික ජන බලවේගයට ලැබුණු එකම ජාතික ලැයිස්තු මන්ත්‍රී ධුරය ලබාදුන්නේ පෞද්ගලිකවම මට නොවෙයි. අපේ රටේ ගැහැනුන්නටයි. මේ ජාතික ලැයිස්තු මන්ත්‍රී ධුරය දෙන්න සුදුසු පිරිමි ඕනෑ තරම් මේ ව්‍යාපාරය තුළ ඉන්නවා. නමුත් මම වැනි කිසිම දේශපාලන අත්දැකීමක් නැති කෙනෙකු තේරුවේ මේ රටේ ගැහැනුන්ට දුන්න තැන සහ පිළිගැනීම ගැන කියන්නයි. අමාරුම අවස්ථාවකයි මේ දේ කළේ. 3%ට වට්ටවා කිසිම පිළිගැනීමක් නොතිබුණු දේශපාලන මොහොතක අපිට ලැබුණු අවස්ථාව තුළින් මේ දේශපාලන වේදිකාව මොකක්දැයි මනාව පැහැදිලි වෙනවා. මට ඒ ශක්තිය ලැබුණේ මගේ පිටුපසින් සිටි සමන්මලී සහෝදරිය ඇතුළු සහෝදරියන් නිසයි. කිසිම දේශපාලන අත්දැකීමක් නැති මට මන්ත්‍රී ධුරය බාරගෙන ඔබව නියෝජනය කරන්න හැකියාව ලැබුණේ නම් ගම් කිව නොහැකි අසීමිත සහෝදරියන් නිසයි. ආණ්ඩුව පැනලා ගිය පළාත් පාලන මැතිවරණයට නායිකාවන් හැටියට පත්කර ගන්න විශාල කාන්තාවන් පිරිසක් මේ ව්‍යාපාරය තුළ සිටියා. එහි ප්‍රතිඵල තමයි අද මෙතනදී පෙන්න තිබෙන්නේ. සෑම දිස්ත්‍රික්කයක් තුළම මේ ආකාරයෙන් ගැහැනු බලය ගොඩනඟන්න අපිට පුළුවන්. ගැහැනු අපට ආදරය කරන්න පුළුවන්. මෙතන ආදරයෙන් පිරිලා. ආදරය වෙනුවෙන් ඕනෑම දෙයක් කැපකරන්න ගැහැනුන්ට පුළුවන්. අපේ පවුලට, ළඟම අයට මෙපමණ කල් සීමාකර තිබුණු ඒ ආදරය මුළු මහත් සමාජය වෙනුවෙන්ම කැපකළ යුතු ඓතිහාසික මොහොතක් මේක. ස්ත්‍රී දේශපාලනය තුළින්, මේ සමාජයට අවශ්‍ය ආදරය, සුවපත් කිරීම, රැකබලා ගැනීම සහ වෙනස් දේශපාලන සංස්කෘතියක් ගොඩනැගීම වෙනුවෙන් අපි සියලු දෙනා කැපවෙමු. මේ ආරම්භ කළ ගමන ජයග්‍රහණයෙන් තොරව නතර කරන්නේ නැහැ කියන අධිෂ්ඨානය ඇති කර ගනිමු.

-Colombo, December 30, 2023-

ජාතික ජන බලවේගය වටා කාන්තාවන් ඒකාරාශී කර සංවිධානය කිරීමේ “ගැහැනු අපි එක මිටට මාලිමාවට” යන තේමාවෙන් රට පුරා පවත්වන දිස්ත්‍රික් සමුළු ආරම්භ කරමින් මාතර දිස්ත්‍රික්කයේ සමුළුව දහස් සංඛ්‍යාත කාන්තා සහභාගීත්වයකින් යුතුව දෙසැම්බර් 28 දා සවස මාතරදී පැවැත්වුණි.

විශ්වවිද්‍යාල ආචාර්යවරියන්, ප්‍රවීන කලාකාරිණියන්, ව්‍යවසායිකාවන් සහ විවිධ වෘත්තීයමය ක්ෂේත්‍රවල නියැලී සිටින්නියන් පෙරටුකොට ගනිමින් සමුළුව මාතර කොටුව මහජන ක්‍රීඩාංගනයේදී පැවැත්වුණි.

මෙම සමුළුවට ජාතික ජන බලවේගයේ නායක අනුර දිසානායක, ජාතික ජන බලවේගයේ පාර්ලිමේන්තු මන්ත්‍රී ආචාර්ය හරිනි අමරසූරීය, අයිතීන් උදෙසා කාන්තාවෝ සංවිධානයේ සභාපති සමන්මලී ගුණසිංහ සහ එම සංවිධානයයේ ලේකම් සරෝජා සාවිත්‍රී පෝල්රාජ්, ප්‍රවීන රංගන ශිල්පිනියන් වන දිල්හානී ඒකනායක, දීපානි සිල්වා, නයනී මහේෂිකා සහභාගී වී සිටි අතර ජාතික ජන බලවේගයේ විධායක කමිටු සාමාජික සුනිල් හඳුන්නෙත්තිද මෙම අවස්ථාවට සහභාගී වී සිටියේය. මාතර දිස්ත්‍රික්කයේ ජාතික ජන බලවේගයේ කාන්තා කොට්ඨාස සභා නියෝජනය කරමින් සමුළුවට පැමිණ සිටි දහස් ගණනක කාන්තාවන් ලාංකීය කාන්තාවගේ අයිතිවාසිකම් වෙනුවෙන් වු “සාධාරණ සමාජයක්, නිවහල් රටක්, නිදහස් ස්ත්‍රියක් ” තේමාවෙන් යුත් විශේෂ ස්ත්‍රී ප්‍රඥප්තියක් සම්මත කළහ.

එම උත්සව අවස්ථාවේ ශිල්පිනියන් පිරිසක් විසින් බෙර වාදනයකින් සමුළුව විචිත්‍රවත් කළහ. මෙවැනි දැවැන්ත සභාභාගීත්වයක් සහිත කාන්තා සමුළුවක් මින් පෙර ලාංකීය ඉතිහාසයේ දැක නොතිබූ බව දේශපාලන විචාරකයෝ පවසති.

-Colombo, December 25, 2023-

ජේසුස් ක්‍රිස්තුස් වහන්සේගේ උපත නිමිති කරගනිමින් දෙසැ. 25 දිනයේ ලොව පුරා කිතුනු භක්තිකයින් විසින් මහත් භක්තියෙන් සමරනු ලබන අසිරිමත් නත්තල වෙනුවෙන් සුබපතනු කැමැත්තෙමු.

ලෝකයට සාමයේ පණිවිඩය රැගෙන ආ දිනය ලෙස පොදුවේ හඳුන්වනු ලබන නත්තලෙහි වැදගත්කම වනුයේ ජේසුස් ක්‍රිස්තුස් වහන්සේගේ ධර්මයේ වැදගත් කොටසක් වන සහෝදරත්වය හා සහජීවනය මිනිස් සිත් තුළ වගා කර ගැනීම සඳහා වූ ප්‍රධානතම ආගමික නිමිත්ත එය වීමය. එසේම නත්තල් දිනය සාමයේ හා සහෝදරත්වයේ පණිවිඩය සමාජයට බෙදාහැරීමේ අවශ්‍යතාව අවධාරණය කර ගැනීමට අගනා අවස්ථාවකි.

ජනගහනයෙන් අඩකට වැඩි ප්‍රමාණයකට කුසගින්නේ නින්දට යාමට සිදු වී ඇති රටක නත්තල උත්සවාකාරයෙන් සැමරීමට හැකියාවක් නැත. එහෙත් නත්තල විසින් ප්‍රකට කරන ප්‍රේමය, සහෝදරත්වය, සහජීවනය වැනි මානව ගුණාංගවලින් යුතුව අසල්වැසියා දෙස බැලීමට එම තත්වය බාධාවක් නොවේ.

ජනතාව පීඩනයට පත් කරන පාලනයට එරෙහිව ජනතාවගේ පාර්ශ්වයේ සිට සටන් වැදුණු ආගමික නායකයෙක් වන ක්‍රිස්තුස් වහන්සේ විසින් ප්‍රකට කළ මානව ගුණයන්ගෙන් පිරිපුන්, පවතින අසාධාරණය ප්‍රශ්න කරන හා කැපකිරීම්වලට ඉදිරිපත් වන මිනිසුන් වඩ වඩාත් අපට අවැසිය; එවැනි මිනිසුන්ගෙන් සමන්විත සමාජයක්ද අපට අවැසිය. ඒ වෙනුවෙන් වූ අදිටන ශක්තිමත් කර ගන්නා දිනය බවටද නත්තල් දිනය පත් කර ගන්නා මෙන් සියලු ලාංකේය කිතුනු බැතිමතුන්ගෙන් අපි ඉල්ලා සිටිමු.

අනුර කුමාර දිසානායක

නායක

ජනතා විමුක්ති පෙරමුණ/ ජාතික ජන බලවේගය

-Colombo, December 19, 2023-

බදුල්ල දිස්ත්‍රික්කයේ මේ වන විට නායයෑම් හේතුවෙන් අනාථ වූ පිරිස් රඳවා සිටින කඳවුරු ගණන 12 ක් දක්වා ඉහළ ගොස් තිබේ. පවුල් 4681 ක් තම පදිංචි නිවෙස්වලින් ඉවත් කර සිටින අතර, ඇතැම් පිරිස් ඥාති හිතවතුන්ගේ නිවෙස්වල තාවකාලිකව ලැගුම්ගෙන සිටිති. කඳවුරු දොළහක් තුළ පවුල් 259 ක් මේ වන විට වාසය කරති. සිංහල, දෙමළ, මුස්ලිම් සියලු පිරිස් මේ දැඩි ආපදා තත්ත්වයට ගොදුරු වී සිටිති.

හපුතලේ ආසනයේ කැලිපානාවෙල ගම්මානයේ නාය ගිය කොටස නිරීක්‍ෂණය සඳහා සමන්ත ජාතික ජන බලවේගයේ ජාතික විධායක සභික සමන්ත විද්‍යාරත්න සහෝදරයා ඇතුළු පිරිසක් සහභාගි වූ අයුරු ඡායාරූපයේ දැක්වේ. මෙම ගම්මානයේ පවුල් 80 ක් මේ වනවිට අවතැන් වී සිටීන අතර ගම්මානයේ විහාරස්ථානය ද ඒ අතර වේ. ගොවිතැන ප්‍රධාන ජීවනෝපාය කරගත් මෙම ජනතාවගේ විශාල කුඹුරු යායක සැලකිය යුතු කොටසක් නාය යෑමෙන් පසු මහා පස් කන්දකින් වැසීගොස් ඇත. මෙම වගා බිම් සඳහා ජලය ගෙන එන ප්‍රධාන ඇල මාර්ගය හා අතුරු ඇල මාර්ග ගණනාවක් සහමුලින් වැසී ගොස් ඇත. මේ නිසා දැනට වගා කළ බිම් ද විනාශ වී යනු ඇතැයි ප්‍රදේශවාසීන් එහිදී ප්‍රකාශ කර ඇත.

සමන්ත විද්‍යාරත්න සහෝදරයා හමුවූ ගම්වැසියන් හැඬූ කඳුළින් පවසා සිටියේ තම නිවාස ද සුනූ විසුනු වී උන්හිටි තැන් අහිමිව දරුවන්ගේ අධ්‍යාපන කටයුතු ද අඩාල වී සිටින මොහොතක ජීවත් වීමට ගොවිතැනක් බතක් කර ගැනීමට නොහැකි වීමෙන් හිඟමනට වැටුනූ බවය. විපතට පත් ජනතාවට සහන සැලසීමට ආණ්ඩුව පැත්තෙන් මැදිහත් වීම ද ඉතා දුර්වල තත්වයක පවතී. මීට වසර 7 , 8 කට පෙර නායගොස් නිවාස අහිමි වූ පවුල් ගණනාවකට මෙතෙක් ඉඩම් කැබැල්ලක්වත් ලබාදීමට ආණ්ඩුව අසමත්වී තිබීම කණගාටුදායක තත්ත්වයකි.

-Colombo, December 22, 2023-

අද මේ මාධ්‍ය හමුව කැඳවූයේ, රජයේ වෛද්‍ය පීඨ තුනක ඇතිවී තිබෙන අර්බුදය පිළිබඳව ජනතාව දැනුවත් කිරීමටත්, ඒ හරහා වෛද්‍ය පීඨවල ගුණාත්මක තත්වය ඉහළ නංවාගෙන රටට අවශ්‍ය වෛද්‍යවරු නිර්මාණය කර ගැනීමේ ක්‍රියාවලියට යම් බලපෑමක් ආණ්ඩුවට කිරීමේ අරමුණින්. රටට අවශ්‍ය වෛද්‍යවරු වැඩි ප්‍රමාණයක් නිර්මාණය වන්නේ රජයේ වෛද්‍ය පීඨ හරහා. 1870 කොළඹ වෛද්‍ය පීඨය ආරම්භ වූ තැන සිට වසර 150ක් තුළ වෛද්‍ය පීඨ අටක් පිහිටුවා තිබෙනවා. පසුගිය වසරේ පමණක් රුහුණු විශ්වවිද්‍යලයට අනුබද්ධ වෛද්‍ය පීඨයෙන් වෛද්‍ය උපාධිධාරීන් 300ක් ඇතුළු වෛද්‍ය උපාධිධාරීන් 2000ක් පමණ පිටවුණා. ශ්‍රී ලංකා වෛද්‍ය සභාවේ ලියාපදිංචි විදේශ විශ්වවිද්‍යාලවල උපාධි ලබාගත් අයට වෛද්‍ය සභාවෙන් පවත්වන විභාගයට මුහුණ දී අදාළ සුදුසුකම් සම්පූර්ණ කරන්න පුළුවන්. රජයේ වෛද්‍ය පීඨවලින් හෝ විදේශ විශ්වවිද්‍යාලවලින් වෛද්‍ය උපාධියක් ලබාගෙන ලංකාවට පැමිණෙන වෛද්‍යවරුන් හට තාවකාලික ලියාපදිංචියක් වෛද්‍ය සභාවෙන් ලබාදෙනවා.

ඉන්පසුව සෞඛ්‍ය අමාත්‍යාංශය විසින් සකස් කරන ලේඛනයකට අනුව පවතින පුරප්පාඩු සලකා බලා සීමාවාසික පුහුණුව සඳහා විශේෂඥ වෛද්‍යවරයෙක් යටතේ පුහුණුවීමට රෝහල්වලට යොමු කරවනවා. වසරක මේ පුහුණුවෙන් පසුව විශේෂඥ වෛද්‍යවරුන්ගෙන් ලැබෙන සහතිකය අනුව පූර්ණ ලියාපදිංචිය ලබාදෙනවා. ශ්‍රී ලංකාවේ වෛද්‍ය සභාවේ පූර්ණ ලියාපදිංචිය සහිත අංකයක් යටතේ ඕනෑම වෛද්‍යවරයෙකුට රජයේ රෝහල්වල හෝ පෞද්ගලික අංශයේ සේවය කිරීමේ පූර්ණ අයිතිය ලැබෙනවා. ඒ අතර ශ්‍රී ලංකා වෛද්‍ය සභාවේ ලියාපදිංචිය වසර පහෙන් පහට අලුත් කරන්න ඕනෑ. අපේ රටේ වෛද්‍යවරයෙක් බිහිවීමේ සාමාන්‍ය ක්‍රියාවලිය මේක. මෙරට රෝගීන්ට ප්‍රතිකාර කරන වෛද්‍යවරුන් සම්බන්ධයෙන් වගකීමක් ශ්‍රී ලංකා වෛද්‍ය සභාවට නීත්‍යානුකූලව පැවරී තිබෙනවා. වෛද්‍ය සභාව මේ දක්වා තමන්ගේ වගකීම් ඉටුකරමින් ඉන්නවා.

උපකරණ හිඟය, කාර්ය මණ්ඩල හිඟය, ඖෂධ හිඟය ඇතුළු විශාල අඩුපාඩුකම් තිබියදී මේ මට්ටමින් හෝ සෞඛ්‍ය සේවාව පවත්වාගෙන යා හැකි වී තිබෙන්නේ මේ වගකීම් සහගත ක්‍රියාවලිය නිසයි. මේ රටේ වෛද්‍ය පීඨ අටකට වෛද්‍ය සභාවේ නිර්ණායක අනුව අනුමැතිය ලබාදී තිබෙනවා. කොළඹ වෛද්‍ය පීඨය, ශ්‍රී ජයවර්ධනපුර විශ්වවිද්‍යාල වෛද්‍ය පීඨය, කැලණිය විශ්වවිද්‍යාලයට අනුබද්ධ රාගම වෛද්‍ය පීඨය, පේරාදෙණිය වෛද්‍ය පීඨය, රුහුණු විශ්වවිද්‍යාලයට අනුබද්ධ වෛද්‍ය පීඨය, යාපනය විශ්වවිද්‍යාලයට අනුබද්ධ වෛද්‍ය පීඨය, රජරට විශ්වවිද්‍යාලයට අනුබද්ධ වෛද්‍ය පීඨය සහ, නැගෙනහිර විශ්වවිද්‍යාලයට අනුබද්ධ වෛද්‍ය පීඨය කියන වෛද්‍ය පීඨවලට සිසුන් 1700ක් පමණ බඳවා ගැනීමට නියමිතයි.

පසුගිය වසර හතරක පමණ කාලය තුළදී සබරගමුව විශ්වවිද්‍යාලයට අනුබද්ධ වෛද්‍ය පීඨය, වයඹ විශ්වවිද්‍යාලයට අනුබද්ධ වෛද්‍ය පීඨය, මොරටුව විශ්වවිද්‍යාලයට අනුබද්ධ වෛද්‍ය පීඨ තුන පිළිවෙළින් එකතු වුණා. ඊට අමතරව ඌව විශ්වවිද්‍යාලයට අනුබද්ධ වෛද්‍ය පීඨය සඳහා පළමු සිසුන් කණ්ඩායම බඳවා ගැනීමට නියමිතයි. මේ අනුව වෛද්‍ය පීඨ 12ක් තිබුණත් ශ්‍රී ලංකා වෛද්‍ය සභාවේ අනුමැතිය ලබාදී තිබෙන්නේ වෛද්‍ය පීඨ අටකට පමණයි. දැනට සබරගමුව, වයඹ සහ මොරටුව විශ්වවිද්‍යාලවල පැනනැගී තිබෙන ගැටලු රැසක් පිළිබඳව මූලික අවධානය යොමු කරනවා. සවුදි රජයෙන් ණයක් හැටියට ලැබුණු ඩොලර් මිලියන 50ක් යොදාගෙන 2019දී සබරගමුව වෛද්‍ය පීඨයට අයත් මහාචාර්ය ඒකකය ඇතුළු පීඨය ගොඩනැගීම සඳහා සැලසුම් සකස් කළා. ඒ වෙනුවෙන් ඇස්තමේන්තු කර තිබුණු වියදම රුපියල් කෝටි 900යි. එයින් වැඩි කොටස සවුදි රජයේ ඉතාමත් අඩු පොලී ණය යටතේ ලබාගැනීමට නියමිතව තිබුණා. ආණ්ඩුවල දුර්වලකම් නිසා සාකච්ඡා සම්පූර්ණ නොකිරීමෙන් සිදුවුණු ප්‍රමාදයක් සහිතව 2020දී නැවත ඒ ක්‍රියාමාර්ග ඉදිරියට ගත්තා. ඒ අතර වැදගත්ම කොටස වී තිබුණු, රත්නපුර රෝහලට අනුබද්ධ මහාචාර්ය ඒකකය මේ වන විට බඳවාගෙන සිටින වෛද්‍ය සිසුන් 480ක් වෙනුවෙන් යොදාගත යුතුයි. 2017/2018 අධ්‍යයන වර්ෂය සඳහා බඳවා ගත් පළමු ශිෂ්‍ය කණ්ඩායමේ අවසන් වසර සායනික පුහුණුවට අවශ්‍ය මහාචාර්ය ඒකකයේ කටයුතු මේ වසරේ සැප්තැම්බර් මාසයේ ආරම්භ කිරීමට නියමිතය තිබුණා. නමුත් මහාචාර්ය ඒකකය ගොඩනැගීමේ කටයුතු මේ දක්වා සම්පූර්ණ කර නැහැ. මේ සිසුන්ට තවමත් ස්ථිර මහාචාර්ය ඒකකයක් සහ ඊට අයත් ස්ථිර කාර්ය මණ්ඩලයක් ලබාදී නැහැ. නියමිත ප්‍රමිතියේ මහාචාර්ය ඒකකයක් නොමැතිව මේ අයගේ වෛද්‍ය උපාධිය ශ්‍රී ලංකා වෛද්‍ය සභාවෙන් පිළිගන්නේ නැහැ. පළමු කණ්ඩායමේ සිසුන් 70දෙනෙක් මේ වන විට ඒ බරපතල ගැටලුවට මුහුණ දී සිටිනවා. වෛද්‍යවරුන් හැටියට විශ්වවිද්‍යාලයෙන් ඔවුන්ව පිටකරන්නේ කොහොමද කියන බරපතළ ප්‍රශ්නය තිබෙනවා. රත්නපුර රෝහලේ ක්ෂේත්‍ර තුනක තාවකාලික වාට්ටු ලබාදී මේ පුහුණුව සඳහා තාවකාලික පදනමින් විශේෂඥ වෛද්‍යවරු තිදෙනෙකු පත්කිරීමට කැබිනට් අනුමැතිය පසුගිය දිනෙක ලැබුණා.

මහාචාර්ය ඒකකයේ කටයුතු කරන්නේ සාමාන්‍යයෙන් උසස් අධ්‍යාපන අමාත්‍යාංශයට අනුබද්ධ නිපුණත්වයක් සහිත අය. නමුත් දැන් රත්නපුර රෝහලේ මහාචාර්ය ඒකකයට සෞඛ්‍ය අමාත්‍යාංශයේ පිරිසක් යොදවලා. ඊට අමතරව මේ වෛද්‍ය පීඨයට ප්‍රමාණවත් දේශන ශාලා තවමත් ලබාදී නැහැ. මේ ආකාරයටම වයඹ විශ්වවිද්‍යාලයේ වෛද්‍ය පීඨ මහාචාර්ය ඒකකය හැටියට කුලියාපිටිය රෝහල යොදාගෙන තිබෙනවා. ප්‍රාදේශීය දේශපාලනඥයාගේ අවශ්‍යතාවය අනුව මෙය තොරාගැනීමෙන් වයඹ වෛද්‍ය පීඨයේ ප්‍රශ්න ගණනාවක් උත්සන්න වී තිබෙනවා. මහාචාර්ය ඒකකය ඉදිකිරීම සඳහා රුපියල් කෝටි 1700ක ඇස්තමේන්තුවක් සහ කුලියාපිටිය රෝහල ශික්ෂණ රෝහලක් ලෙස සංවර්ධනය කිරීමට තවත් රුපියල් කෝටි 2000ක ඇස්තමේන්තුවක් සකස් කර තිබෙනවා. කණ්ඩායම් පහක වෛද්‍ය ශිෂ්‍යයන් 578 දෙනෙක් අධ්‍යාපනය ලැබුවත්, තවමත් තිබෙන්නේ තාවකාලික මහාචාර්ය ඒකකයක්. ඒ වගේම ශිෂ්‍ය කණ්ඩායම් තුනකට නේවාසික පහසුකම් ලබාදී නැහැ. අනෙකුත් වෛද්‍ය පීඨවලට සාපේක්ෂව ආචාර්ය මණ්ඩලයේ බරපතළ හිඟයක් තිබෙනවා. අධිකරණ වෛද්‍ය විද්‍යාල වැනි විෂයන්වලට ස්ථිර ආචාර්යවරුන් පත්කර නැහැ. මේ වෛද්‍ය පීඨයේ පළමු කණ්ඩායම ශ්‍රී ලංකා වෛද්‍ය සභාවේ ලියාපදිංචිකර ගැනීම පිළිබඳව දැනටමත් බරපතළ ප්‍රශ්න මතුවී තිබෙනවා.

අපේ රටේ එකොළොස්වැනි වෛද්‍ය පීඨය බවට පත්වුණු මොරටුව විශ්වවිද්‍යාලයේ වෛද්‍ය පීඨය ආරම්භ කිරීමට යෝජනාව 2016 සැප්තැම්බර් මාසයේ පාර්ලිමේන්තු මන්ත්‍රීවරයෙක් ලෙස සිටි මවිසින් යෝජනාවක් ඉදිරිපත් කළා. මේ වෛද්‍ය පීඨයේ ශික්ෂණ රෝහල හැටියට කළුතර නාගොඩ රෝහල යොදා ගන්නා ලෙස පෞද්ගලික මන්ත්‍රී යෝජනාවක් සම්මත කරගනු ලැබුවා. නාගොඩ රෝහලට ආසන්නයේ රජයේ ඉඩම් යොදවා ගෙන මේ වෛද්‍ය පීඨය ඉදිකරන්න කුවේට් ඩිනාර් මිලියන 10ක ණය පහසුකම් ලබාගන්නත් කටයුතු සිදුකළා. ලංකාවේ අද මුදලින් නම් රුපියල් කෝටි දහසකට ආසන්න මුදලක්. මේ ණය පහසුකම ලබාගෙන වෛද්‍ය පීඨය ගොඩනැගීමේ කටයුතු අද වන තුරුත් ඉටුකර නැහැ. මොරටුව විශ්වවිද්‍යාලයේ වෛද්‍ය පීඨයේ ශිෂ්‍ය කණ්ඩායම් තුනක සිසුන් 303ක් අද වන විට ඉගෙනීම ලබනවා. ඔවුන්ට තවමත් තිබෙන්නේ සායනික පුහුණුව පමණයි. මහාචාර්ය ඒකකයක පුහුණුව ලැබිය නොහැකි තත්වයක් තිබෙන්නේ. ඒ වගේම මොරටුව විශ්වවිද්‍යාලයේ දැනට පවතින ඉඩ පහසුකම් බෙදා හදාගෙන වෛද්‍ය පීඨයේ සිසුන්ට ඉගැන්වීම් කටයුතු කරනවා. මේ සිසුන්ට අවශ්‍ය පරීක්ෂණාගාර පහසුකම් සහ කායික ව්‍යවච්ඡේදන පහසුකම් ලබාගන්න වෙනත් විශ්වවිද්‍යාලවලට යන්න සිදුවී තිබෙනවා. ස්ථිර ආචාර්ය මණ්ඩලයේ 18ක් සහ තාවකාලික 08දෙනෙකු යොදවාගෙන අනධ්‍යයන කාර්යමණ්ඩලයේ පස්දෙනෙකු සහ තාක්ෂණික නිලධාරීන් එක් අයෙකු යොදවාගෙන කටයුතු කරගෙන යනවා. කැලණිය විශ්විවිද්‍යාලයේ වෛද්‍ය පීඨයේ අනධ්‍යයන කාර්යමණ්ඩලයේ ඉන්නේ 104දෙනයි. ජයවර්ධනපුර විශ්වවිද්‍යාලයේ 117යි. මොරටුව විශ්වවිද්‍යාලයේ අලුතින් ආරම්භ කළ වෛද්‍ය පීඨයේ ඉන්නේ 05දෙනයි.

මේ වෛද්‍ය පීඨ තුනේ 1200කට ආසන්න අපේ දරුවන් පිරිසක් වෛද්‍ය උපාධිය ලබාගැනීම සඳහා ඉගෙනුම ලබමින් ඉන්නවා. එයින් කණ්ඩායම් දෙකක්ම මහාචාර්ය ඒකකයේ පුහුණුව සඳහා අවසන් වසරට ඇවිත් ඉන්නේ. අපට ගුණාත්මක සුදුසුකම් සහිත වෛද්‍යවරුන් නිර්මාණය කර ගන්න අවශ්‍ය වැඩපිළවෙළ ආණ්ඩුව ක්‍රියාත්මක කර නැහැ. රනිල් වික්‍රමසිංහ දිස්ත්‍රික් සම්බන්ධීකරණ කමිටු රැස්වීම්වලට කුමන දිස්ත්‍රික්කයකට ගියත් විශ්වවිද්‍යාලයක් හෝ විශ්වවිද්‍යාලයක පීඨයක් ඉදිකරන බව කියනවා. කිසිදු සැලැස්මක් නැතිව මේ කතා කියන අතර වෛද්‍ය පීඨ ගඩොල් බානවා වගේ නිර්මාණය කරන්න බැහැ. කුරුණෑගල වෛද්‍ය පීඨය සම්බන්ධයෙන් බොහෝ දේවල් කළේ අකිල විරාජ් කාරියවසම්ගේ අවශ්‍යතාවයන් අනුවයි. කළුතර, නාගොඩ රෝහල ශික්ෂණ රෝහලක් බවට පත්කරන්න අපි යෝජනා කරන්නේ රෝගීන්ගේ විවිධත්වය, අවශ්‍ය යටිතල පහසුකම් දිය හැකි ඉඩකඩ සහිත වීම, ඇතුළු කරුණු ගණනාවක් සලකා බැලීමෙන්. විදේශ රජයන් සහන පොලියට ණය ලබාදුන්නත් අපේ රටේ අධ්‍යාපනයේ ගුණාත්මකභාවය වෙනුවෙන් නිසි පරිදි ප්‍රයෝජනයට නොගෙන පැවති ආණ්ඩු ක්‍රියාකිරීමේ අවසන් ගොදුර බවට පත්වී තිබෙන්නේ අපේ රටේ දරුවන්. ඉතාම තරගකාරී විභායකින් ඉහළම ලකුණු ලබාගෙන වෛද්‍ය පීඨයට ඇතුළත් වෙලා විවිධ දුෂ්කරතා දරාගනිමින් උපාධිධාරීන්වීම අවධානමකට ලක්වී තිබෙනවා. දැනට සබරගමුව, වයඹ, මොරටුව වෛද්‍ය පීඨ තුනේ උග්‍රවී තිබෙන ප්‍රශ්න කෙරෙහි මෙම වසරේ ඌව විශ්වවිද්‍යාලයේ වෛද්‍ය පීඨයට බඳවා ගන්නා සිසුන් කෙරෙහි බලපා තිබෙන ප්‍රශ්න විසඳීමට ආණ්ඩුව ඉක්මනින් මැදිහත් විය යුතු බවට අපි බලකර සිටිනවා. ශිෂ්‍යයෝ පමණක් මේ වෙනුවෙන් උද්ඝෝෂණ කිරීම ප්‍රමාණවත් වෙන්නේ නැහැ. මහජනතාවත් ඒ කෙරෙහි මැදිහත් විය යුතු තත්වයක් තිබෙන්නේ. එසේ නොකළහොත් අනාගතය තවත් භයානක වෙන්න පුළුවන්.

මාධ්‍යවේදීන් නැගූ ප්‍රශ්නවලට පිළිතුරු දෙමින්….

ප්‍රශ්නය: වැට් බදු පැනවීම සම්බන්ධයෙන් ඔබේ අදහස මොකක්ද?

පිළිතුර: වැට් එකෙන් සතුටු වෙන්නේ ජාත්‍යන්තර මූල්‍ය අරමුදලත්, රනිල් වික්‍රමසිංහත්, රනිල් ජනාධිපති කරන්න අත උස්සලා අද බොරුවට කිඹුල් කඳුළු හෙළන මහින්ද රාජපක්ෂ ප්‍රමුඛ නඩයක් විතරයි. මේ වැට් එකෙන් රටේ සියලු දෙනාම දැනටමත් පීඩාවට පත්වී සිටිනවා. මේකත් එක්ක රටට ඉස්සරහට යන්න බැහැ. ජනතාවගේ මිලදී ගැනීමේ හැකියාව අඩු වීමෙන් කර්මාන්තකරුවන්, කෘෂි නිෂ්පාදකයන්, ව්‍යවසාකයන්, නිෂ්පාදනයන් සිදුකරන්නේ කොහොමද? මිලදී ගැනීමට කෙනෙක් නැතිනම් ඒ නිෂ්පාදනය විකුණන්නේ කාටද? බදු අයකරගෙන සතුටු වෙන්න පුළුවන් මම මුලින් කී අයට විතරයි.

ප්‍රශ්නය: සෞඛ්‍ය අමාත්‍යාංශයේ ලේකම්, අත්අඩංගුවට ගත්තත් නීතිය ක්‍රියාත්මක වෙන්නේ පොඩි අයට විතරක් වගෙයි පෙන්නේ?

පිළිතුර: සෞඛ්‍ය අමාත්‍යාංශයේ ලේකම් විදිහට පරිපාලන සේවයෙන් කෙනෙක්ව වෛද්‍යවරයින්ට පත්කළ යුත්තේ කියන එක වෙනම කාරණයක්. පත්කරන ලේකම් කවුරු වුණත්, රටට ඖෂධ හිතුමනාපයේ ගෙන්වන්න බැහැ. ජාතික ඖෂධ නියාමන අධිකාරිය ඖෂධ ලියාපදිංචිය සහ සැපයුම්කරුවන් ලියාපදිංචිය සිදුකරනවා. ලෝකය පිළිගත් නිර්ණායක අනුව ඖෂධ සහ සැපයුම්කරුවන් ප්‍රමිතිගතවී සිටිනවා ද යන්න සලකා බලා සීමිත පහසුකම් සහිතව වුවත් ඖෂධ සාම්පල් පරීක්ෂාවට ලක්කරලයි ඇනවුම් කරන්නේ. ඉමියුනිග්ලොබියුලීන් ඖෂධය ගුජරාට්වල නිෂ්පාදනය කරලාද යන්න පරීක්ෂා කරන්නේ ඖෂධ නියාමන අධිකාරියෙන්. ඒ සඳහා බලය තිබෙන ඔවුන්ට වැරදීමක් සිදුවෙන්න පුළුවන්ද? අනෙක මේ ඖෂධ ගෙන්විය යුත්තේ රාජ්‍ය ඖෂධ සංස්ථාවෙන්. ඖෂධ සැපයීම් අධිකාරියට බාරදෙන්නේ මේ සංස්ථාවෙන්. ඖෂධ බෙදාහැරීම සම්බන්ධයෙන් සිටින අතිරේක ලේකම්වරයාගේ අනුමැතිය නොමැතිව බෙදාහැරීම කරන්න බැහැ. නමුත් ඩොලර් මිලියන 2.5ක් වැය කර රුපියල්වලින් කෝටි 100ක ගනුදෙනුවක් සිදුකර තිබෙනවා. නමුත් රට පිළිගත් පරීක්ෂණ ආයතන තුනකින් තහවුරු වී තිබෙන්නේ මේ එන්නත් තුළ ඉමියුනිග්ලොබියුලීන් නැති බවයි. මේ දේවල් සෞඛ්‍ය අමාත්‍යාංශයේ ඉහළ නිලධාරීන් කිහිපදෙනෙකුට පමණක් කළ හැකි බව ඔබ හිතනවාද? හිටපු සෞඛ්‍ය ඇමති කෙහෙලිය රඹුක්වැල්ලගේ ලිඛිතව නොවුණත් වාචිකව නියෝග මේ සඳහා ලැබිය යුතුමයි. මේ සම්බන්ධයෙන් ඇමතිවරයාගෙන් අනිවාර්යයෙන්ම ප්‍රශ්න කරන්න ඕනෑ. අපරාධ පරීක්ෂණ දෙපාර්තමේන්තුව ඇමතිගෙන් ප්‍රශ්න කරන්න මේ තරම් ප්‍රමාද කරන්නේ ඇයි? මේ පරීක්ෂණය හරියට සිදුකළහොත් ඒ හා බැඳුණු තවත් තොරතුරු රාශියක් හෙළිදරව් කර ගන්න පුළුවන්. කෙහෙලිය රඹුක්වැල්ල පමණක් නොවෙයි මීට කලින් සිටි ඇමතිවරුන් ගණනාවකුත් සම්බන්ධයෙන් හෙළිකර ගන්න පුළුවන් අවස්ථාවක් තමයි මේක. තිළිණි ප්‍රියමාලිගේ සිද්ධිය, මාකඳුරේ මධූෂ්ගේ සිද්ධිය සම්බන්ධයෙන් දේශපාලනඥයෙකුගෙන් ප්‍රශ්න කරනවා අපි දැක නැහැ. මේ පරීක්ෂණයටත් සිදුවිය හැකි දේ ඒකමයි.

-Colombo, December 21, 2023-

අත්තනෝමතික බදු පැනවීම් තුළින් අපේ රටේ ආර්ථිකයටත් ජනතාවටත් ඉදිරියේදී සිදුවන බලපෑම් පිළිබඳව දැනුවත් කරන්න මෙම මාධ්‍ය හමුව පවත්වනවා. වැට් බද්ද කියන්නේ පාරිභෝගිකයා මත අවසානයේ බර පැටවෙන බද්දක් නිසා යුක්තිය පැත්තෙන් ගත්තත් සමාජය අයුක්තිය වැඩිවීමට තවදුරටත් බදු වැඩිවීම විශාල හේතුවක් වෙනවා. දුප්පත්ම ජනතාවට ඉතාමත් ඉහළ ප්‍රමාණයකින් මේ බද්ද බලපානවා. ඔවුන්ගේ පරිභෝජනය අනිවාර්යයෙන්ම අඩු වෙනවා. මෙතෙක් වැට් බදුවලට යටත් නොවූ භාණ්ඩ මත බදු පැනවීම, බදු අනුපාතය ඉහළ දැමීම නිසාත් මේ වන විටත් අසීමිත පීඩනයකට පත්වී සිටින ජනතාවගේ ජීවිත මුළුමනින්ම කඩා වැටෙනවා. බොහෝ විට භාණ්ඩ මිල වැඩවීම කෙරෙහි වැට් බදු වැඩිකිරීම බලපාන බව කල්පනා කරද්දී එහි දරුණුම බලපැම සිදුවන්නේ නිෂ්පාදන කර්මාන්ත සහ ව්‍යාපාර බිඳවැටීමට හේතුවීමයි. මගේ විශේෂ අවධානය කර්මාන්තවලට සිදුවන බලපෑම ගැන යොමු කරනවා.

අද වන විටත් 50%කින් පමණ ඉල්ලුම බිඳ වැටීම නිසා ව්‍යාපාර ඉතාමත්ම අපහසුවෙන් පවත්වාගෙන යන්නේ. වැට් නිසා සමස්ත ඉල්ලුම තවදුරටත් බිඳ වැටුණාම කර්මාන්ත සහ ව්‍යාපාර වසා දැමීම දක්වා ආයෝජකයන් තල්ලු විය හැකියි. වක්‍ර බදු වැඩිවීම තුළ ඉතුරුම් අඩුවී ප්‍රාග්ධනය ලෙස යෙදවිය හැකි මුදල් තවදුරටත් සීමා වෙනවා. මෙය අපනයන කර්මාන්තකරුවන්ට සහ දේශීය කර්මාන්තකරුවන්ට සුවිශේසී බලපෑමක් සිදුකරනවා. අපේ රටට ආයෝජකයන් නොපැමිණෙන්නෙත් ප්‍රතිපත්තිමය නොවන බදු පැනවීම නිසයි. ප්‍රමුඛතා කර්මාන්ත පිළිබඳව සැලකිල්ලක් නොදක්වා බදු පැනවීම සහ වෙනස් කිරීම නිසා ආයෝජකයන්ට තීරණ ගැනීම නොහැකි වෙනවා. උදාහරණයක් ලෙස ලංකාවේ කිරි කර්මාන්තය දියුණු කිරීම ගැන කතා කරමින් මෙරට කිරි කර්මාන්තකරුවන් මත අලුතින් බදු පනවා තිබෙනවා. ඒ වගේම අයි.ටී. කර්මාන්තයටත් මේ ආකාරයටම සිදුකරනවා. දැනට සිටින ආයෝජකයන් පළා යන්නත් අලුත් ආයෝජකයන් නොපැමිණෙන්නත් බදු ප්‍රතිපත්තියක් නැතිකම හේතු වෙනවා. අයි.ටී. කර්මාන්තයට 30%ක බද්දක් පනවා එහි නියැලී සිටින පුද්ගලයින් මත ඉතා ඉහළ උපයන විට ගෙවිමේ බද්දක් පැනවූවා. මේ නිසා ඒ කර්මාන්තයට තිබුණු ප්‍රමුඛතාවය අහිමි වී අඩාලවන අතර, නව වැට් බදු සහ මේ කර්මාන්තයට අවශ්‍ය උපාංග මිල ඉහළ යාමෙන් තවදුරටත් බිඳ වැටීම් සිදුවෙනවා. වෙනත් කර්මාන්ත කඩා වැටීමෙන් රැකියා අහිමි වූ අයට ස්වයං රැකියාවක් ලෙස යෙදිය හැකිව තිබූ අයි.ටී. ක්ෂේත්‍රයත් මේ ලෙස බිඳවැටීමට මුල පුරා තිබෙනවා.

තව පැත්තකින් ලංකාවේ තේ කර්මාන්තය පොහොර ප්‍රශ්නය නිසා 23%කින් බිඳ වැටී අද වන විට තවදුරටත් ඵලදායීතාවය පහත වැටෙමින් තිබියෙදී දේශීය නිෂ්පාදනය මත වැට් බදු පනවා තිබෙනවා. ඒ වගේම තේ කර්මාන්තය සඳහා යෙදවුම් මත වැට් බදු පනවා තිබෙනවා. මේ නිසා තේ කර්මාන්තකරුවා කබලෙන් ලිපට වැටෙනවා. රබර් කර්මාන්තයට සිදුවී තිබෙන්නෙත් ඩොලර් මිලියන 900ක පමණ තිබූ අපනයන ආදායම අර්බුද ගණනාවක් නිසා, බිඳ වැටෙමින් පවතිනවා. මේ වන විටත් 25%කින් රබර් අපනයන ආදායම අඩුවී තිබෙන පසුබිමක නව ආයෝජකයන් පැමිණෙන්නේ නැහැ. වෙනත් කෘෂි අපනයන ආදායම් ඉහළ යාමක් පොදුවේ පසුගිය වසර හයක පමණ කාලය තුළ තිබුණා. නමුත් යෙදවුම් පිරිවැය ඉහළ යාමෙන් මේ සියලු ක්ෂේත්‍ර බිඳවැටීමට හේතු වෙනවා. ආණ්ඩුව මේ ගෙනයන අනුවණ ක්‍රියාවලිය ලංකාවේ මෝටර් රථ එකලස් කිරීමේ සහ අමතර කොටස් නිෂ්පාදනය කිරීමේ කර්මාන්තයට ද බලපානවා. මේ වන විට එයින් උපයා ගන්නා ඩොලර් මිලියන 200ක පමණ විදේශ විනිමය ප්‍රමාණය අහිමිවී යනවා. ලංකාවේ එකලස් කරන ට්‍රක් රථයක් රුපියල් ලක්ෂ හයකින් පමණ මිල වැඩිවෙනවා. ලංකාවේ ඉලෙක්ට්‍රෝනික් උපකරණ සඳහා තිබෙන ඉල්ලුමද අඩුවීමට නව බදු හේතු වෙනවා. මේ විදිහට ගත්තාම දේශීය කර්මාන්ත සම්පූර්ණයෙන්ම අකර්මන්‍ය කිරීමට හෝ බිඳවැටීමට හේතු වෙන බදු ක්‍රියාවලියකට ආණ්ඩුව යොමු වී සිටිනවා. දේශීය කර්මාන්ත සහ අපනයනවලට නව බදු වැඩි කිරීම් බලපාන ආකාරය සාරාංශ වශයෙන් මේ ආකාරයෙන් දැක්විය හැකියි.

“බලය පවත්වාගැනීම වෙනුවෙන් පමණක් ආණ්ඩුව ගන්නා තීරණ නිසා ජන ජීවිතයත් සුළු හා මධ්‍ය පරිමාන කර්මාන්තකරුවත් තවත් අර්බුදයට යනවා…”
-ජාතික ජන බලවේගයේ ආර්ථික කවුන්සිලයේ සාමාජික මහාචාර්ය අනිල් ජයන්ත–

නව වැට් බදු පැනවීමෙන් ආර්ථිකයට සහ සමාජයට ඇතිවන මූලික ගැටලු පිළිබඳව අප පෙන්වා දෙන්නේ බදු පැනවීමේදී රට සහ ජනතාව ඇතුළු සමස්තය ගැන කල්පනා කර, දිගුකාලීනව තීරණය කළ යුතු දෙයක් නිසයි. නමුත් දැන් කරමින් සිටින්නේ ආණ්ඩුවේ බලය පවත්වාගෙන යාම ගැන පමණක් කල්පනා කර, අනුගමනය කරන ක්‍රියාමාර්ග නිසා රටටත් මහජනතාවටත් විශාල අනර්ථකාරී බලපෑම් ඇතිවෙනවා. වැට් බද්ද පනවන්නේ භාණ්ඩ හා සේවා පරිභෝජනය මත. දැන් රුපියල් සියයකට මිලදී ගන්නා භාණ්ඩයක් මත අලුතින් පනවන 18%ක වැට් බද්ද සම්පූර්ණයෙන් ගෙවන්නේ පාරිභෝගිකයන්. භාණ්ඩ නිෂ්පාදනය සහ බෙදා හැරීම කියන ක්‍රියාවලියේදී තැනින් තැනින් වැට් බදු එකතු වීම් සිදුවෙනවා. ලෝකයේ වක්‍ර බදු ගැන සලකා බැලුවත් විශාල බදු පනවා තිබෙන දියුණුයි කියන රටවල පවා 15% ඉක්මවූ භාණ්ඩ හා සේවා මත බදු අතිශය දුෂ්කරවන බව පිළිගෙන තිබෙනවා. අපේ රටේ මෙවැනි වක්‍ර බදු කිහිපයක්ම වැට් බද්දට අමතරව පාරිභෝගිකයා මත පැටවී තිබෙනවා. ඒ වගේම ව්‍යාපාරිකයාගේ පැත්තෙන් වැට් බද්දට යටත් කෙරෙන සීමාව මුලදීම රුපියල් මිලියන 300ක වාර්ෂික පිරිවැයක් ලෙස හඳුන්වා දී තිබුණා. පසුව එය රුපියල් මිලියන 80 දක්වාද නව යෝජනා අනුව රුපියල් මිලියන 60 දක්වාද පහත දමා තිබෙනවා. මාසයකට රුපියල් ලක්ෂ 50ක පමණ වෙළඳාමක් තිබෙනවා නම්, ඒ ව්‍යාපාර පවා වැට් සීමාවට යටත් වෙනවා.

ඒ වගේම වැට් අයකරන භාණ්ඩ ලැයිස්තුව තවදුරටත් ඉහළ නංවා වැට් බදු අයකරන ව්‍යාපාරික ආදායම් සීමාව තවදුරටත් පහළ ගෙනවිත් තිබෙනවා. දැනටත් අපි ඉන්න හැකිළුණු ආදායම් අඩු, ජීවත්වීමට මිනිස්සු අරගල කරන තත්වයක් තුළ නව වැට් බදු නිසා වියදම් කළ හැකි ආදායම තවදුරටත් පහත වැටෙනවා. මේ නිසා ඉල්ලුම අඩු වෙනවා. දැනටත් යම් නිෂාපාදනය කරන කර්මාන්තකරුවන්ගේ නිෂ්පාදන වෙළඳපොලේදී විකුණාගත නොහැකි තත්වයට ඇද වැටෙනවා. මෙය දිගුකාලීන වශයෙන් ආර්ථිකය තවදුරටත් හිරවීමකට හේතු වෙනවා. මේ වන විට ඉල්ලුම අඩුවීම නිසා උද්ධමනය අඩුවීමේ තත්වයක් පැවතුනත් නව වැට් බදු නිසා භාණ්ඩ හා සේවාවල මිල තවදුරටත් ඉහළ ගොස් ඉල්ලුම තවදුරටත් පහත යාමේ තත්වය තුළ පවා උද්ධමනය වැඩිවෙනවා. වැට් බදු පනවන්නේ නිසි තාක්ෂණික ඇගයීමකින් සහ එම බදු අයකර ගැනීමේ නිසි යාන්ත්‍රණයක් සකස් කිරීමෙන් නොවෙයි. වෙළඳපොළ තුළ විකෘතියක් නිර්මාණය වී සුළු හා මධ්‍ය පරිමාණ කර්මාන්තකරුවාට පනවා තිබෙන බදු අයකර ගත නොහැකි වෙනවා. නමුත් මහා පරිමාණ කර්මාන්තකරුවාට අමතර වාසි අත්වෙනවා. සුළු හා මධ්‍ය පරිමාණ නිෂ්පාදකයන් පළවා හැරීමට හිතාමතාම මෙම ක්‍රියාවලිය අනුගමනය කරනවා දැයි සැකයකුත් මතු වෙනවා.

වැට් බදු වැඩිකළ ආකාරය අනුව බදු වංචා සහ දූෂණවලටත් විශාල ඉඩකඩක් නිර්මාණය වෙලා තිබෙනවා. 2002-2004 කාලයේ මහා බදු වංචාවේ අත්දැකීම් රටට තිබෙනවා. නඩුවක් පවා විභාග වුණා. අවුරුදු 20කට පස්සේ ඒ වරදකරුවන්ට දැන් සති කිහිපයකට පෙර දඬුවම් නියම කළා. වෙළඳපොළේ ඇති වෙන ගැටලුවලට අමතරව මේ වගේ බදු වංචා සහ දූෂණ කෙරෙහිත් විශේෂ අවධානයක් යොමු කළ යුතු වෙනවා. අධ්‍යාපන ක්ෂේත්‍රයට මේ බදු පැනවීමෙන් සිදුවෙන බලපෑම කෙටියෙන් පැහැදිලි කරන්නම්. අධ්‍යාපන සේවා සැපයීම සඳහා වැට් බදු අය නොකරන බවට නිදහස් ලැයිස්තුවේ සඳහන් වෙනවා. නමුත් අධ්‍යාපන ක්‍රියාවලිය තුළ සපුරා ගත යුතු පොත්පත් ලිපිද්‍රව්‍ය ඇතුළු බඩු භාණ්ඩ වගේම පුස්තකාල සේවා වැනි සේවාත් අවශ්‍යයි. මේ භාණ්ඩ හා සේවා මත 18%ක වැට් බදු අලුතින් අය කෙරෙනවා. විශේෂයෙන්ම විශ්වවිද්‍යාලවල සිදුකරන පර්යේෂණ කටයුතු රටක සංවර්ධනය වෙනුවෙන් අවශ්‍යයි. නමුත් ඒ මතත් 18%ක වැට් බද්ද පැනවෙනවා. මේ නිසා අධ්‍යාපනයේ ඉහළ ගුණත්වයක් නිර්මාණය කර ගැනීමට තිබෙන සේවා සහ උපකරණ මත අලුතින් බදු පැනවෙනවා. අද ජංගම දුරකථනය සංනිවේදන උපකරණයට වඩා අධ්‍යාපන සේවා උපකරණයක් හැටියට පාවිච්චි කරනවා. පාසැල් දරුවන්ට අවශ්‍ය ආහාර ද්‍රව්‍යවලට බදු වැඩිවීම නිසා ඔවුන්ට බඩගින්නේ ඉන්න සිදුවෙලා. දේශීය වශයෙන් නිෂ්පාදනය කරන කිරි පැකට් එකට පවා අලුතින් බදු පැනවෙනවා. මේ ආකාරයට මහජනතාව මත සියලු අංශවලින් නව පීඩනයක් ඇති කරන බදු කෙරෙහි ජනතාව මොන ආකාරයෙන් ප්‍රතිචාර දක්වයිද දන්නේ නැහැ. කෙක්කෙන් හරි කොක්කෙන් හරි මේ බදු අයකරගෙන මූල්‍ය අරමුදලේ ඊළඟ ණය වාරිකය ලබා ගැනීම ආණ්ඩුවේ මූලික අරමුණයි. නමුත් අයවැය ඇස්තමේන්තුවල තිබෙන බදු අයකර ගත නොහැකි බව දත්තවලින් තහවුරු වී තිබෙනවා. සියලු ව්‍යසනයන්ට වගකිව යුතු කණ්ඩායම බලයේ ඉඳිමින් තව තවත් සාමාන්‍ය ජනතාව පීඩාවට පත්කර රටේ සමස්ත නිෂ්පාදන ක්‍රියාවලිය බිඳ දැමීමේ ක්‍රියාමාර්ග අපි සියලු දෙනා මැදිහත් වී අවසන් කළ යුතු වෙනවා.

“18%ක වැට් බද්ද වෙළඳපොල විකෘතියක් හදනවා. ආණ්ඩුවේ අර්බුදය සම්පූර්ණයෙන් ජනතාව පිටින් යවනවා…”
-ජාතික ජන බලවේගයේ ජාතික විධායක සභික සුනිල් හඳුන්නෙත්ති–

නත්තලත් ඇවිත් නව අවුරුද්දක් ආරම්භ කිරීමට සූදානම් වෙන්නේ ජනතාව කබලෙනුත් ලිපට වැටිලා ගිනි ඇවිලෙමින් තිබියෙදීයි. උත්සව සමයේ භාණ්ඩ මිල ඉහළ යාමේ සාමාන්‍ය තත්වය ඉක්මවා බඩු මිල ඉහළ යමින් තිබෙනවා. ඊට හේතුව ආණ්ඩුවේ අර්බුදය ජනතාව මත පටවා තිබීමයි. 2024 අවුරුද්දේ ආණ්ඩුවේ ආදායමෙන් භාණ්ඩ හා සේවා මත පනවා තිබෙන බදුවලින් රුපියල් බිලියන 2215ක් උපයා ගැනීමට බලාපොරොත්තු වෙනවා. 2023ට වඩා බිලියන 859ක වැඩිවීමක්. වැට් බදු වැඩිවීම 105%ක්. 2023දී බලාපොරොත්තු වූ බිලියන 680ක වැට් බද්ද 2024දී බිලියන 1400ක් වෙනවා. මෙතෙක් නිදහස් කර තිබුණු වැට් බදු නිදහස් භාණ්ඩ ලැයිස්තුව තවදුරටත් පටුකර ජනවාරි මාසයේ සිට ක්‍රියාත්මක කරනවා. නමුත් මේ බදු අයකර ගන්නා ආකාරය බදු ගෙවන ජනතාව, ව්‍යාපාර හෝ බදු අයකර ගන්නා දෙපාර්තමේන්තුව වත් දන්නේ නැහැ. සමහර ව්‍යාපාරිකයන් දැනටමත් වැට් බදු අයකර ගන්න පටන්ගෙන තිබෙන නිසා භාණ්ඩ මිල වැඩිවෙලා.

ජනවාරි පළමුවෙනිදාට දවස් නවයක් තිබියදී බදු අයකර ගන්නා ක්‍රමය ගැන නිරවුල් වැඩපිළිවෙළක් තාමත් ඉදිරිපත් කර නැහැ. උදාහරණයක් ලෙස ඉන්ධනවලට අලුතින් වැට් බදු අය කළත් වරායෙන් ගොඩබාන මිලට අය කරනවාද, රේගු ගාස්තු ඇතුළු අනෙකුත් බදු අය කළ පසුව ඒ මත වැට් බද්ද අයකරනවාද, යන්න කවුරුත් දන්නේ නැහැ. උදාහරණයක් හැටියට රුපියල් 1000/-ක් වන භාණ්ඩයකට 18%ක වැට් බදු අය කරනවා නම්, මිල රුපියල් 1180/-ක් වෙනවා. නමුත් රුපියල් 1000/- මිලට 2.5%ක සමාජ ආරක්ෂණ බද්ද අයකිරීමෙන් පසුව වැට් බද්ද අයකරනවා නම්, ඒ භාණ්ඩයේ මිල රුපියල් 1209/-ක් වෙනවා. මන්ද රුපියල් 1025/-ක් මත වැට් බද්ද අය කිරීම සිදුවෙනවා. මේ නිසා ඇත්තටම වැට් බද්ද 18% වුණත් ක්‍රියාත්මක වීමේදී 18.45%ක් බවට පත්වෙනවා.

පනවන බද්ද ගැන විග්‍රහ කර නැති නිසා බදු ක්‍රියාත්මක කිරීමේ ක්‍රියාවලිය තුළ බදු ඉහළ යාමක් සිදුවෙනවා. ආණ්ඩුව උපයා ගැනීමට ඉලක්ක කර තිබෙන ආදායම් රුපියල් කෝටි එක් ලක්ෂ හතළිස් දහස දක්වා කෙසේ හෝ අයකර ගැනීමට ක්‍රියා කරාවි. නමුත් ජනතාවට මොකද වෙන්නේ? ඔවුන්ගේ ආදායම් වැඩිවී නැහැ. හමුදා පොලීසි ඇතුළු මාසික පඩි ගන්නා රජයේ සේවකයන් නන්නත්තාර වී ඉන්නේ. ලූණු කෑවාද? දැන් සැපද? කියලා ඇහුව මහින්ද රාජපක්ෂලා පාර්ලිමේන්තුවේදී අත උස්සා අයවැය සහ බදු සංශෝධන අනුමත කළා. දැන් එළියට ඇවිත් වැට් බද්දට විරුද්ධ බව ප්‍රකාශ කරනවා. ජනතාවට කියන කතාවලට වඩා පාර්ලිමේන්තුව ඇතුලේ බලය රැකගන්න ඔවුන් එකට එක්වී ක්‍රියාකරනවා. වැල් පොලිය වගේ 18%ක වැට් බද්ද වැල් බද්දක් වෙලා තිබෙනවා. මෙය ඉතා බරපතළ පීඩාකාරී දෙයක්. තමන්ට දැන් පැනවෙන බද්ද මොකක්ද කියලා වත් ජනතාව දන්නේ නැහැ. බදු ලැයිස්තුව පාර්ලිමේන්තුවට ඉදිරිපත් කර තිබෙන්නේ බරපතළ විකෘති සහගත තත්වයෙන්. 2002 සම්මත කළ වැට් බදු පනතින් නිදහස්කර තිබූ භාණ්ඩ ලැයිස්තුව තුළින් නව බදු පනවන ලැයිස්තුවක් හදාගෙන තිබෙනවා. නව බදු පනවන ලැයිස්තුව ජනතාවට පැහැදිලි වෙන සරල ආකාරයට කියන්නේ නැහැ. “වෘද්ධ සේවාවන් සහ ළමා සත්කාර සේවාවන්” වැට් බද්දෙන් නිදහස් බව සඳහන් වෙනවා. ඔවුන් අර්ථ නිරූපණය කරන සීමාවට පිටින් තිබෙන මෙයට අදාළ සියල්ලටම බදු ගහනවා. අධ්‍යාපනයේ එක කොටසක් නිදහස් කරන බව කීවත් ඊට අදාළ අනෙක් බොහෝ දේවල්වලට වැට් බදු ගහනවා. මේ නිසා ව්‍යාපාරිකයෝ සහ ඊටත් වඩා ජනතාව අර්බුදයට යනවා.
බදු ගෙවිය යුත්තේ මොනවාටද යන්න දැන ගැනීමේ ශුද්ධ වූ අයිතියක් මේ රටේ ජනතාවට තිබෙනවා. රජයක් පවත්වාගෙන යන්න බදු අවශ්‍ය වුණත් මෙතන වැල් බද්දක් පනවා තිබෙනවා. විදුලි බිලටත් මේ ආකාරයෙන්මයි. විදුලි බිලට ඒකක ගාස්තුව සහ ස්ථාවර ගාස්තුව එකතු කිරීමෙන් වැට් බද්ද අයකරනවාද යන්න පැහැදිලි නැහැ. ඉන්ධනවලටත් ඒ වගේමයි. ශල්‍ය උපකරණවලටත් ඒ වගේමයි. හිතාමතාම බදු විකෘති කර, වෙළඳපොළ, කර්මාන්ත සහ ජනතාව ව්‍යාකූල කිරීමට ආණ්ඩුව ගෙනයන මෙහෙයුමක් මේක.

උදාහරණයක් හැටියට වෙළඳ හා පාරිභෝගික ඇමති නලින් ප්‍රනාන්දු දෙසැම්බර් 14වැනිදා අමාත්‍ය මණ්ඩල පත්‍රිකාවක් ඉදිරිපත් කරමින් කීරි සම්බා මෙට්්‍රක් ටොන් පනස්දහසක් ආනයනය කිරීමට සැරසෙනවා. පෞද්ගලික අංශයේ තෝරා ගත් ආනයනකරුවන් හට මේ සහල් ආනයනය කරන්න කැබිනට් මණ්ඩල අනුමැතිය ගෙන තිබෙනවා. නමුත් කැබිනට් සංදේශයේ ඇතුළත් කර තිබෙන “එසේම සහල් සඳහා ඉන්දියාවේද අපනයන බද්දක් අයකරන බැවින් සහ සහල් සඳහා දැනටමත් පනවා ඇති විශේෂ වෙළඳ භාණ්ඩ බද්ද තවදුරටත් පනවනු ලැබුව හොත් උපරිම සිල්ලර මිලට ආනයනික සහල් නිකුත් කළ නොහැකි බවට නිරීක්ෂණය විය” යනුවෙන් සඳහන් කර තිබෙනවා. උපරිම මිල පනවා තිබුණාට වැඩක් නැති බව ඇමතිවරයාම පිළිගන්නවා. විශේෂ වෙළඳ භාණ්ඩ බද්ද නිසා උපරිම මිලට වඩා සහල් මිල වැඩිවෙන බව තහවුරු කර තිබෙනවා. මේ නිසා දැනට පනවා තිබෙන ආනයනික සහල් මත රුපියල් 65ක විශේෂ වෙළඳ භාණ්ඩ බද්ද රුපියල් එක දක්වා අඩුකරන ලෙස වැඩිදුරටත් සඳහන් කර තිබෙනවා. රුපියල් 65ක මේ බද්දෙන් ජනතාව පීඩාවට පත්වී සිටින බව ආණ්ඩුව පිළිගන්නා බව එක පැත්තකින් තහවුරු වෙනවා. අනෙක් පැත්තෙන් ඒ බද්ද රුපියල දක්වා අඩුකළාම සහල් මිල රුපියල් 65කින් අඩු වෙනවාද? ඒ සහතිකය දෙන්නේ කොහොමද?
අත්දැකීමෙන් පැහැදිලි වී තිබෙන්නේ පනවා තිබුණු බද්දක් ඉවත් කිරීම නිසා අදාළ ව්‍යාපාරිකයන්ට අමතර ලාභයක් ලබාගැනීමේ අවස්ථාව ලබාදී තිබෙන බව පමණයි. අදාළ කැබිනට් පත්‍රිකාවෙන්ම මේ සහල් ආනයනය කිරීමේ ව්‍යාපාරිකයන් පවා නම්කර තිබෙනවා. අපේ රටේ සුදු ළුෑණු, සීනි බදු වංචාවලදී සිදුවුණේ ඇමතිවරුන්ගේ හිතවත් ව්‍යාපාරිකයන්ට අමතර ලාභයක් ලබාදීමයි. උත්සව සමයේ කීරි සම්බා ගෙන්වීමේ අවශ්‍යතාවයක් තිබෙනවා නම්, ගෙන්වීම ගැටළුවක් නොවෙයි. නමුත් ආනයන බලපත්‍ර ලබාදීමට විනිවිද පෙනෙන ක්‍රමවේදයක් නැහැ. එවැනි විකෘති තත්වයක් තුළ වැට් බද්ද පනවා තිබෙනවා.

ජාතික ජන බලවේගයේ ආර්ථික කවුන්සිලය හැටියට අපි ආණ්ඩුවට බල කරන්නේ ජනතාව බිල්ලට නොදී වැට් බදු අයකරගන්නා ක්‍රමවේදය වහාම රටට හෙළිකරන ලෙසයි. අලුතින් වැට් බදු අයකරන ලැයිස්තුව රටට හෙළිකළ යුතුයි. වැට් බදු අර්ථනිරූපණය කරගැනීම නිරවුල් විය යුතුයි. එසේ නොකළ හොත් මහජනතාව සමග එකතුවී අදාළ ක්‍රියාමාර්ග නිරවුල් කර ගැනීම වෙනුවෙන් පාරට බැසීම හැර අපිට වෙන විකල්පයක් නැහැ. එයට පෙර අදාළ පැහැදිලි කිරීම් කිරීමේ වගකීම ආණ්ඩුවට තිබෙනවා.

මාධ්‍යවේදීන් නැගූ ප්‍රශ්නවලට පිළිතුරු

ප්‍රශ්නය:- මහින්ද රාජපක්ෂ මහතා වැට් බදු අඩුකරන ලෙස ආණ්ඩුවෙන් ඉල්ලා ලිපියක් නිකුත් කර තිබෙනවා නේද?

පිළිතුර:- ලිපිවලින් වැට් බදු අඩුවෙන්නේ නැහැනේ. පාර්ලිමේන්තුවේදී අත උස්සා පනත් සම්මත කර දීලා, ජනතාව ඉදිරියේ දවල් මිගෙල් රෑ දනියෙල් නාට්‍ය රඟපාන්නේ ඒගොල්ලෝ. ලිපි නිකුත් කරනවා හැර, ඒගොල්ලන්ට ජනතාව ඉදිරියට යන්න බැහැ. මේ සියලු පනත් රනිල් වික්‍රමසිංහ තනියෙන් පාර්ලිමේන්තුවේදී සම්මත කර ගත්තේ නැහැ. මහින්ද රාජපක්ෂගේ කණ්ඩායම තමයි මේ පනත්වලට පාර්ලිමේන්තුවේදී අත ඉස්සුවේ. මහින්ද රාජපක්ෂ රනිල් වික්‍රමසිංහ වෙනුවෙන් පෙනී සිටිනවාද? ජනතාව වෙනුවෙන් පෙනී ඉන්නවාද? කියන එක පැහැදිලිව ජනතාවට කියන්න ඕනෑ.

ප්‍රශ්නය:- රනිල් වික්‍රමසිංහ ඉදිරිපත් කර තිබෙන ප්‍රතිපත්ති දෙකක් තිබෙන බවත්, නිවේදනයෙන් කියා තිබෙනවා.

පිළිතුර:- එහෙම නම්, රනිල් වික්‍රමසිංහව තියාගෙන ඉන්නේ මොකටද? ප්‍රතිපත්තියේ වෙනසක් තිබෙනවා නම් අනුමත කරන්න පාර්ලිමේන්තුවේදී ඡන්දය දීලා එළියට ඇවිත් වෙන කතා කියලා වැඩක් නැහැ. ජනතාව දැන ගන්න ඕනෑ මහින්ද රාජපක්ෂ පෙනී සිටින්නේ මොන ප්‍රතිපත්තිය වෙනුවෙන් ද කියලා. ක්‍රියාමාර්ගවලින් තහවුරුවී තිබෙන්නේ මහින්ද රාජපක්ෂලා, රනිල් වික්‍රමසිංහලා එකම කණ්ඩායමක් බව.

ප්‍රශ්නය:- ජනතාව ගැන හිතන ආණ්ඩුවක් ඕන කියලා මහින්ද රාජපක්ෂ කියනවා…

පිළිතුර:- ජනතාවාදී ආණ්ඩුවක් අවශ්‍ය බව ජනතාව දැන් තීරණය කරලා තියෙන්නේ. රනිල් වික්‍රමසිංහලා මහින්ද රාජපක්ෂලා එලවලා ජනතාව ගැන හිතන ජනතාවාදී ආණ්ඩුවක් හදන්න ජනතාව දැන් පෙළගැහිලා ඉන්නේ. ඒ ගැන අපිට විශ්වාසයක් තිබෙනවා. ඒ ආණ්ඩුව හදන්න බාධාවක් වෙලා තියෙන්නේ රනිල් රාජපක්ෂලා ඡන්දයක් නොදී ඡන්දේ මගහරින නිසා.