තමන්ගේ ජීවිතයට, වැඩබිමට නව ආරම්භයක් ලබාගැනීම වෙනුවෙන් ලොව පුරා හින්දු භක්තික දෙමළ ජනතාව සමග එක්ව ලාංකේය දෙමළ ජනතාව විසින් සමරනු ලබන තෛපොංගල් දිනය අදට (15) යෙදී තිබේ.
අලුත් අවුරුද්දක ආරම්භය සංස්කෘතික ජීවිතයට සම්බන්ධ වන්නේ අලුත් බලාපොරොත්තුවක ආරම්භයක් වශයෙනි. එසේම එය එතෙක් පැවති හුරුපුරුදු, ආකල්ප තවත් යහපත් කර ගැනීම පිළිබඳවත් ජය ගැනීමට නොහැකි වූ අභියෝග ජය ගැනීම පිළිබඳවත් බලාපොරොත්තු අලුත් වන මොහොතකි. පෙර වසර 75ක ඛේදවාචකයේම තවත් දිගුවක් බවට පත් වනු නොදී, නව වසර ජයග්‍රාහී වසරක් කර ගැනීම වෙනුවෙන් කැපවීමෙන් හා ධෛර්යෙන් යුතුව ඊට බාධා කරන අභියෝග ජයගැනීමට අරගල කළ යුතු වේ.
නව වසර නව බලාපොරොත්තුද නව අවස්ථාවන්ද අප හමුවට රැගෙනවිත් ඇත. එළඹි තෛපොංගල් දිනය එම නව අවස්ථාවන් ප්‍රයෝජනයට ගන්නටත් නව මඟක ගමන්කරන්නටත් ශ්‍රී ලාංකේය හින්දු බැතිමතුන්ට ශක්තිය හා ධෛර්යය ගෙන එනු ඇතැයි අපි සුභාශිංසනය කරමු.
අනුර කුමාර දිසානායක
නායක
ජාතික ජන බලවේගය
2024.01.15
