(-ජාතික ජන බලවේගයේ හලාවත ජන රැලිය – 2024.07.28-)
පසුගිය අවුරුදු 50ක 60ක කාලය තුළ මේ රටේ ජනතාවට රනිල් වික්‍රමසිංහ, මහින්ද රාජපක්ෂලා පෙනුණේ එකිනෙකාට එරෙහිව කඩු අමෝරාගෙන සටන් කරන අය ලෙසටයි. කොළපාට, නිල් පාට දෙපසට බෙදිලා ඔවුන් බොරු කාඩ්බෝඩ් කඩු අරගෙන සටන් කළා. නමුත් ජනතාව ගමේ ඇත්තටම බෙදිලා සටන් කර ගත්තා. ආනමඩුවේ රංගේ බණ්ඩාරලා, මැරුණු මන්ත්‍රීතුමන්ලා මහපාරේ වෙඩි තියාගත්තේ නැද්ද? හැබැයි මහින්ද රාජපක්ෂ, රනිල් වික්‍රමසිංහ කඩදාසි කඩුවලින් සටන් කළා. ඒගොල්ලෝ බොරුවට රණ්ඩු කරලා දශක ගණනාවක් රට ප්‍රපාතයට අරගෙන ආවා. ඔවුන්ට තවදුරටත් සතුරන් වගේ බෙදිලා සටන් කරන්න බැහැ. ඒ නිසා ඒ අයට එක වේදිකාවට නගින්න සිදුවී තිබෙනවා. කළුතර තිබුණු රැස්වීමට එක පුටුවක රනිල් වික්‍රමසිංහ, අනිත් පුටුවේ මහින්ද රාජපක්ෂ, අනික් පුටුවේ රවි කරුණානායක, ඊළඟ පුටුවේ බැසිල් රාජපක්ෂ, ඊළඟ පුටුවේ වජිර අබේවර්ධන. ඊළඟ පුටුවේ රෝහත අබේගුණවර්ධන. ඒ වේදිකාව අලියාද, පොහොට්ටුවද? රනිල් දැක්කාම අලියා වගේ පේනවා. අනිත් පුටුවේ මහින්ද දැක්කාම පොහොට්ටුව වගේ පේනවා. ඇත්තටම දැන් ඒක අලියත් නොවෙයි, පොහොට්ටුවත් නොවෙයි, පූට්ටුවක්.
මෙතෙක් කල් රටේ බලය තිබුණේ එක්කෝ කොළ පාට ළඟ නැත්නම් නිල් පාට ළඟ. කවදාවත් ඔවුන්ට සැකයක් තිබුණේ නැහැ. නිල්පාට දූෂිතයන්ට කොළ පාට ආණ්ඩුවෙනුත්, කොළ පාට දූෂිතයන්ට නිල් පාට ආණ්ඩුවෙනුත් ආරක්ෂාව සහ රැකවරණය තිබුණා. උඩ ඉන්න අය, මහාපරිමාණ හොරකම්වලට අපරාධවලට හවුල් වුණත් කවදාවත් ඔවුන්ට විරුද්ධව පරීක්ෂණයක් කළේ නැහැ. නීතිය ක්‍රියාත්මක කළේ නැහැ. දෙපැත්තෙන්ම ආරක්ෂාව ලැබුණා. තවත් දශක ගණනාවක් මේ ගමන යන්න කල්පනා කළත් මේ වන විට පොදු ජනයාගේ නව දේශපාලන ව්‍යාපාරයක් ගොඩනැගී බලය ලබා ගැනීමට සූදානමින් සිටිනවා. නියත වශයෙන්ම සැප්තැම්බර් 21දා, ජයග්‍රහණය කරනවා. ඒ ජයග්‍රහණය වැළැක්වීම සඳහා ඔවුන්ට කළ හැකි හැමදෙයක්ම කරනවා. සීනි බදුවලින් හොරකම් කරන්න ඉඩ දීලා, බැඳුම්කර වංචාවලින් කොල්ලකෑම්, අරක්කු ෆැක්ටරි අයිතිකාරයෝ බදු නොගෙවා එකතු කිරීමෙන් ආදී වශයෙන් මහා ධනස්කන්ධයක් මේ මැතිවරණ ව්‍යාපාරයට පොම්ප කරනවා. මහජනතාවගේ සල්ලි රුපියල් කෝටි 875ක් රනිල් වික්‍රමසිංහ වෙන්කරගෙන ඡන්දය වෙනුවෙන් විවිධ බෙදාහැරීම් කරනවා. අතාරින්න එපා, බෙදන හැම එකක්ම ගන්න, හොරකම් කරලා එකතු කර ගත්ත ඒවායෙන් ටිකක් හරි මේ වගේ කාලයක ගන්න එක හොඳයි. නොබෙදා ඉතිරි කර ගන්න ටික ජාතික ජන බලවේගයේ ආණ්ඩුවක් හදලා නියත වශයෙන්ම අත්පත් කර ගන්නවා.
ඒ වගේම අසත්‍ය තොරතුරු, අවලාද විශාල වශයෙන් බෙදා හරින ඡන්ද ව්‍යාපාරයක් බවට පත්කරගෙන තිබෙනවා. අපි වෙනුවෙන් උත්තර දෙන්න මාධ්‍ය නාලිකා නැහැ. සමහර අයව තෝරාගෙන ඒ වෙනුවෙන් වැඩකරන නාලිකා තිබෙනවා. ප්‍රධාන මාධ්‍ය වගේම සමාජ මාධ්‍ය ඇතුලේ විශාල බලපෑමක් සිදුකරමින් ඉන්න, කවදාවත් අපිව හමුනොවුණු ලක්ෂ සංඛ්‍යාත ජනතාවක් ජාතික ජන බලවේගය වෙනුවෙන් පෙනී සිටිනවා. ඔවුන් රාජ්‍ය බලය උපයෝගී කර ගනිමින් ඇතැම් රාජ්‍ය නිලධාරීන් සම්බන්ධ කරගෙන මැතිවරණ කටයුතු කරනවා. ගම්වල පිහිටුවා තිබෙන ප්‍රජා ආරක්ෂක කමිටු රනිල් වික්‍රමසිංහ මහත්තයාගේ ප්‍රචාරක කටයුතු වෙනුවෙන් යොදවන්න ප්‍රදේශයේ පොලීසියේ ඕ.අයි.සී. මහත්තයාට බාර දුන්නා. වැල්ලවායේ පැවැත්වූ රැස්වීමකට ප්‍රජා ආරක්ෂක කමිටු කැඳවීමට නියෝග කර තිබුණා. කෑම සපයන්නත් ඕනෑ, පුටු අරගෙන එන්නත් ඕනෑ. මේ ආකාරයෙන් කෑගල්ල, ගාල්ල දිස්ත්‍රික්කවල රැස්වීම් ලැහැස්ති කර තිබුණත් දේශබන්දු මහතාගේ පුටුව අහිමි වුණා. රනිල් වික්‍රමසිංහට ඔච්චර කේන්ති ඒකයි. මහජනයාගේ බදු මුදල්වලින් යැපෙන මහජනයා වෙනුවෙන් කාර්යභාරයක් කරන පොලීසිය තමන්ගේ මැතිවරණ ව්‍යාපාරයේ ශාඛා බවට පත්කර ගන්න ඔහු උත්සාහ කළා. ශ්‍රේෂ්ඨාධිකරණයේ තීන්දුව පිළිගන්නේ නෑ කියන්නේ ඒකයි. ශ්‍රේෂ්ඨාධිකරණයේ තීන්දුවක් රනිල් පිළිගන්නවා කියලා සීල් එකක් ගහන්න ඕනෑද? එහෙම වෙන්නේ නැහැ. ශ්‍රේෂ්ඨාධිකරණයේ තීන්දුව දිනේෂ් ගුණවර්ධන පිළිගන්නේ නැහැ කියලා, පුළුවන් නම් එළියේ කියන්න. දේශබන්දු තවමත් පොලිස්පති කියලා හිතනවා නම්, එක අත්සනක් ගහලා පෙන්වන්නකෝ.
අපිට රාජ්‍ය බලය නෑ, මාධ්‍ය බලය නැහැ, මහා ධනස්කන්ධයක බලය නැහැ. අපට ඉන්නේ හලාවත නගරයටත් ගඟක් වගේ ගලා ඇවිත් සිටින මහා ජන බලයයි. අපිත් එක්ක මෙතෙක් වැඩ නොකරපු අය කාර්යාලයේ, බස් එකේ, මහපාරේ කතා කරමින් ජාතික ජන බලවේගය පොදු ජනයාගේ අයිතියක් බවට පත්කරගෙන තිබෙනවා. ඉදිරි මාස දෙක තුළ මෙතෙක් කරගෙන ගිය වැඩ ප්‍රමාණය තවත් හත් අට ගුණයකින් වැඩිකර ඔබේ ඡන්ද පෙට්ටියේ වැඩිම ඡන්ද ප්‍රමාණය මාලිමාවේ ඡන්දවලින් පුරවන්න. ඊට පස්සේ පාර්ලිමේන්තුව සුද්ද කරන ආණ්ඩුවක් පිහිටුවන්න ඕනෑ. ජනතාවට දරා ගන්න බැරි පීඩනයක් එල්ල කරමින් පාර්ලිමේන්තු මන්ත්‍රීවරු සහ ඇමතිවරුන්ට විශේෂ දීමනා ලබාදෙමින් කටයුතු කළ ආකාරය අපි දැක්කා. තෙල් මිල වැඩිවීමත් සමග පාර්ලිමේන්තු මන්ත්‍රිවරුන්ට ඉන්ධන දීමනාව රුපියල් ලක්ෂයකින් වැඩිකර දෙන්න තීරණයක් ගත්තා. මමත් අපේ හරිනි සහෝදරියත්,විජිත සහෝදරයාත් වැඩ කළ ලක්ෂය අපට ලබා නොදෙන ලෙස ලිඛිතව කතථානායකවරයාට දැන්වූවා. ඩොලර් විදේශයන්ට ඇදී යන නිසා වාහන ආනයනය නතර කර තිබුණත් පක්ෂ විපක්ෂ භේදයකින් තොරව ලිඛිතව වාහන පර්මිට් ලබාදෙන ලෙස කථානායකගෙන් ඉල්ලා තිබෙනවා. ඒ වගේම සමගි ජන බලවේගයේ මන්ත්‍රීවරු පිරිසකුත් ආණ්ඩුවේ මන්ත්‍රීවරුන් බාර් ලයිසන් ලබාගෙන රුපියල් කෝටි දෙකට තුනට විකුණනවා. කෑගල්ලේ රාජ්‍ය ඇමති බාර් පර්මිට් තුනක් අරගෙන කෝටි නවයකට වික්කා. සජිත් ප්‍රේමදාස බලයට ආවාම බාර් පර්මිට් අහෝසි කරන බව කීවා. එයා ළඟ ඉන්න මන්ත්‍රීවරු පිරිසක් බාර් පර්මිට් අරගෙන නැති බව කීවොත් අරගත් බව මම ඔප්පු කරනවා. පෙට්‍රල් ෂෙඩ් බෙදාගෙන විකුණනවා. සැප්තැම්බර් 21දා ජයග්‍රහණයෙන් පසුව මේ මජර පාර්ලිමේන්තුව විසුරුවා හැර හොඳ පිරිසක් පාර්ලිමේන්තුවට පත්කර ගන්න අවස්ථාව ලබාදෙනවා.
පිරිසිදු පාර්ලිමේන්තුවක් වෙනුවෙන් අවස්ථාව ලබාදී මේ රටේ ජනතාවගේ මූලික ප්‍රශ්න විසඳා ගැනීමේ දිගු කාලීන ක්‍රියාමාර්ග ජයග්‍රහණය කරන තෙක් අපි විශේෂ කාර්යභාරයක් ඉටුකරනවා. ආහාර, සෞඛ්‍යය, අධ්‍යාපනය සියලුම ජනතාවට ලබාදීමේ ක්‍රමයක් තහවුරු කරනවා. රෝහල්වලට බෙහෙත්, පරීක්ෂණ පහසුකම්, ඖෂධ ලබාදී හෙදියන් සහ වෛද්‍යවරුන් ඇතුළු අත්‍යවශ්‍ය කාර්ය මණ්ඩල වෙනුවෙන් ප්‍රමාණවත් මුදල් වෙන්කරනවා. මිනිසුන්ට ආහාර නැතිව, බෙහෙත් නැතිව ඇඳේ ඉන්න ඇරලා, 2048දී රට හදන බව රනිල් වික්‍රමසිංහ කියනවා. රට විනාශ කළ අය රට ගොඩනඟන බව ප්‍රකාශ කිරීම විහිළුවක්. ජතික ජන බලවේගය රටේ පාලනය බාර ගන්නේ රට ගොඩනැගීම වෙනුවෙන් සැලසුමක්, එයට මැදිහත් විය හැකි කණ්ඩායමක් සහ වෙහෙස වී වැඩ කළ හැකි දැක්මක් සහිත පුද්ගලයන්ගෙන් සමන්විතවයි. ලංකා ඉතිහාසයේ පළමු වතාවට රට වෙනස් කරන, දුප්පත්භාවයෙන් මුදා ගන්නා අපරාධ, කුඩු, නැති නීතියේ විධානයේ ආධිපත්‍යය තහවුරු කළ අලුත් පරිවර්තනයක් වෙනුවෙන් අපි සියලු දෙනාම එක්වෙමු. පුරවැසියන්ට නව ජීවිතයක් ලබාදෙන ජාතික පුනර්ජීවනයක යුගයක් ගොඩනඟමු. එදා එක් එක් දේශපාලන පක්ෂවල සිටි සියලුම දෙනා ප්‍රගතිය වෙනුවෙන්, අනාගතය වෙනුවෙන් එකතු වෙමු.
“ඉතිහාසයේ පළමුවැනි වතාවට ජනතාවගේ ජනාධිපතිවරයෙකු පත්කර රට දිනවමු”
-ජනතා විමුක්ති පෙරමුණේ ප්‍රධාන ලේකම් ටිල්වින් සිල්වා-
ජනාධිපතිවරණය තියයිද නැද්ද කියන අවිශ්වාසයක් පසුගිය කාලයේ ඇති කර තිබුණා. ඒ සැක සංකා සියල්ල පැත්තකට දමා අපේ රටේ ඉතිහාසය වෙනස් කරන්න පටන් ගන්නා දිනය සැප්තැම්බර් 21 දා බව දැන් අපි කවුරුත් දන්නවා. 2022 පැනනැගුණු ජනතා අරගලයෙන් පාලකයන් පලවා හැරියත් පූර්ණ ජයග්‍රහණයක් අත්කර ගන්න බැරිවී රනිල් වික්‍රමසිංහ අනුප්‍රාප්තික ජනාධිපති වී සිටිනවා. අරගලය ජයග්‍රහණය කර ගන්න බැරි වූ සියලු දෙනාට මැතිවරණයෙන් ජයග්‍රහණය ලබාගැනීමේ අවස්ථාව නිර්මාණය වී තිබෙනවා. මේ එන්නේ මෙතෙක් සිටි පාලකයන් අකමැති නමුත් ජනතාව උද්‍යෝගයෙන්, අපේක්ෂාවෙන් බලා සිටින ඡන්දයක්. රනිල් වික්‍රමසිංහ, මහින්ද රාජපක්ෂ. සජිත් පේමදාස යන සියලු දෙනා අකමැති ඡන්දය වී තිබෙන්නේ වසර 76ක අඳුරු කල්ලිවල පාලනය වෙනුවට පොදු ජනයාගේ පාලනයක් පිහිටුවා ගන්නා නිසයි. ජයග්‍රහණය සඳහා අවශ්‍ය සාධක සියල්ල පෙළගැසී තිබෙනවා. ඔබ, අපි කවුරුත් එක්වී සිටින්නේ තවත් ජනාධිපති කෙනෙක් පත්කර ගන්න නොවෙයි. අපි අපේ තේමා පාඨය කරගෙන තිබෙන්නේ “නව ජාතික පුනරුදය” යන්නයි. නැවත නැගී සිටීමක් අවශ්‍යයි. පසුගිය අවුරුද් 50 – 60 තුළ කිසිම ජයග්‍රහණයක් අත්කර නොගෙන ණයට කාලා ණය කන්දක් ගොඩගසා තිබෙනවා. රනිල් වික්‍රමසිංහ බලය ගන්නකොට සමස්ත ණය ඩොලර් බිලියන 83යි. දැන් 100ත් පැනලා.
ජනතාව මත වැට් බදු ගසා, මාසික වැටුප් ගන්න අය මත 36% දක්වා බදු ගහලා තව තවත් බර පටවා තිබෙනවා. එයා රට ගොඩගත්තේ නැහැ. වැටුණු මහින්ද රාජපක්ෂලාව ගොඩගත්තා. අපට පැවරී තිබෙන්නේ මෙන්න මේ වට්ටපු තැනින් රට ගොඩගන්නයි. අපේ රටේ වැඩියෙන්ම ඉන්නේ තමන්ගෙ දෑතින් කුමන හෝ කටයුත්තක් සිදුකරමින් ආදායම් මාර්ග උපයා ගන්නා ජනතාවක්. ඔවුන්ගේ ඒ ඒ ක්ෂේත්‍රවලට අදාළව බාධා පමුණුවා තිබෙනවා මිස, ආධාර සපයා දී නැහැ. ඒ නිසා පුත්තලම දිස්ත්‍රික්කයේ උළු, ගඩොල් කර්මාන්ත ශාලා පමණක් කීයක් වසා තිබෙනවාද? මේ වසා තිබෙන ව්‍යපාරවලට අත දී නඟා සිටුවමින් ක්‍රියාකිරීම මාලිමාවේ ප්‍රතිපත්තියයි. දේශපාලනඥයන් ව්‍යාපාරිකයන්ගෙන් කප්පම් ගන්න එක නැවැත්වීම අපේ කාර්යභාරයයි. නමුත් සමගි ජන බලවේගය ඇතුළු සතුරන්ගේ ෆේස් බුක් මඩ බලකා ප්‍රචාරය කරන්නේ මාලිමා ආණ්ඩුවකින් ව්‍යාපාර පවරා ගන්නා බවයි. අපි එන්නේ ජාතික අරමුණක් වෙනුවෙන් නිවැරදි ව්‍යවසායකයන් පෙළගස්වන්නයි.
ඒ වගේම රට ඇදදමා තිබෙන තැනින් ගොඩගන්න නම්, වංචා, දූෂණ, අනිවාර්යයෙන්ම නවත්වන්න ඕනෑ. අපරාධ කළ අය නීතිය ඉදිරියට පමුණුවා දඬුවම් ලබාදෙන්න ඕනෑ. ශානි අබේසේකර මහත්තයලා ඇවිත් ඉන්නේ ඒකට. අයිතිකාරයෙක් නැති මිනීමැරුම් ගණනාවක් තිබෙනවා. ඒවා ගැන සොයන්න ඕනෑ නැද්ද? මාධ්‍යවේදීන්ට පහර දීපු ඒවා සොයන්න ඕනෑ. පාස්කු ප්‍රහාරය එල්ල කළ අපරාධකරුවන් සොයන්න ඕනෑ. එක පුද්ගලයෙක් ජනාධිපති කර ගැනීම සඳහා පාස්කු ප්‍රහාරය එල්ල කළ බව අපි කවුරුත් දන්නවා. අපේ රටේ ජාතිවාදය ඇවිළුවේ ඒගොල්ලෝ. සිංහල දෙමළ මුස්ලිම් ජනතාව සමගියෙන් ඉන්න ඉඩ නොදුන්නේ ඒගොල්ලෝ. මුලින් දෙමළ ජනයාට එරෙහිව සිංහල ජනයා අවුස්සලා, ඡන්දය ගත්ත ඔවුන් ඊළඟට මුස්ලිම් ජනයාට එරෙහිව ප්‍රචාර යවන්න පටන් ගත්තා. සිංහලයා අනතුරේ නිසා සිංහලයා රැකගන්න කියලා ගෝඨාභය රාජපක්ෂ ගෙන ඒමේ ප්‍රචාරවලට ජනමාධ්‍ය විශාල වශයෙන් යොදා ගත්තා. මානව විරෝධී අපරාධ සම්බන්ධ වැරදිකරුවන්ට නීතිය හමුවේ දඬුවම් ලබාදෙන්න ඕනෑ. බලය සඳහා කැත, ජඩ, අශීලාචාර දේශපාලනයේ යෙදීම නවත්වන්න ඕනෑ. ජාතික පුනරුදය තුළ මුලින්ම කළ යුත්තේ සිංහල, දෙමළ, මුස්ලිම් සියලු දෙනාගේ ජාතික සමගිය ගොඩනැගීමයි.
ජාතිකත්ව වශයෙන් බෙදා සිටි යුගය අවසන් කර, ශ්‍රී ලාංකික ජාතිය ගොඩනඟන්න මූලික පියවර තබන්නේ සැප්තැම්බර් 21වනදා. ඒ දිනය අනිවාර්යයෙන්ම ඉතිහාසයේ ලියැවෙන දවසක්. අපි හදමු අලුත් ජනාධිපති කෙනෙක්. ජනාධිපති කෙනෙක් සර් කෙනෙක් නොවෙයි; ජනාධිපති සහෝදරයෙක් හදමු. “අති ගරු ජනාධිපති උතුමාණෝ” කියන අපරාධකරුවන්ගේ යුගය නිමාකර, ජනතාවත් රටත් රැකබලා ගන්නා කෙනෙක් ජනාධිපති ලෙස පත්කර ගන්න ඕනෑ. සමූහිකව වැඩ කළ හැකි, සමූහික අදහස්වලට ඉඩ තිබෙන එකම ව්‍යාපාරය ජාතික ජන බලවේගය පමණයි. අපි පසුගිය අවුරුදු දෙක පුරා මුළු රට පුරාම යමින් දැවැන්ත සංවිධාන යාන්ත්‍රණයක් ගොඩනඟා අවසන්. මේ යාන්ත්‍රණයට රට ගොඩනඟන්න පුළුවන්. රනිල් වික්‍රමසිංහ මේ ඡන්දයට එන්නේ හැංගිලා. පක්ෂය, ලකුණ අත්හැරලා, එන්නේ. මහින්ද රාජපක්ෂලා හැංගිලා ඉන්නේ. සජිත් ප්‍රේමදාස ජනතාව තුළ ප්‍රසාදයක් දිනාගෙන නැහැ. මේ නිසා ඒ ඔක්කෝම එකතු වෙලා මඩ ගහනවා. අපි ළඟදී “පුනරුදයේ සැප්තැම්බර් 21” කියලා සටන් පාඨයක් දැම්මා. ඒක කොපි කරලා සජිත්ගේ පින්තූරයක් ඔබලා ප්‍රචාරය කරනවා. රනිල්ගේ පින්තූරයත් දාලත් ගෙනියනවා. අද සජිත් ප්‍රේමදාස, රනිල් වික්‍රමසිංහ, මාලිමාවේ සටන් පාඨත් හොරකම් කරන තැනට බංකොලෙත් වෙලා ඉන්නේ. මේ නිසා ජාතික ජන බලවේගය ගැන සතුරන් හදන අවලාදවලට හසු නොවී අප ගැන අපෙන් අහන්න.
අපි එන්නේ හොඳ අරමුණකින් මිසක් කාගෙන්වත් පළිගන්න බලාගෙන නොවෙයි. වසර ගණනාවක් තිස්සේ අත්නොහළ හීනයක් හදවතේ තියාගෙන අපි ආවා. අපි හැමෝටම සතුටින් ජීවත් වෙන්න පුළුවන් රටක් හදන්න හීනයක් දරාගෙන ආවා. මහන්සි වුණා. ඡන්ද දිනුවා, පැරදුණා, ඒත් අරමුණ අත්හැරියේ නැහැ. අපිව විකිණුනේ නැහැ. ප්‍රතිපත්ති දාලා ගියේ නැහැ. කවදා හරි දවසක ජනතාව අපට ඇහුන්කම් දෙන බව විශ්වාස කරමින්, ප්‍රතිපත්තිගරුකව ආවා. දේශපාලනය පාවා නොදී, මහන්සි වී, කැපකිරීම් කරමින් මෙතෙක් දුර ආවා. ඉදිරි මාස දෙක තුළ කිසිවෙකුත් අත් නොහැර, සියලු දෙනා ළඟටම ගොස් කතාකර, කිසිවෙකුට පරාජය කළ නොහැකි රට ගොඩනඟන මහජන බලයක් ගොඩනඟමු. ඉතිහාසයේ පළමුවැනි වතාවට ජනතාවගේ ජනාධිපතිවරයෙකු පත්කර රට දිනවමු.
“නිදහස භුක්ති විඳිය හැකි ආර්ථික හැකියාවක් සැමට ගොඩනැගෙන්න ඕනෑ”
-ජාතික ජන බලවේගයේ ජාතික විධායක සභික චතුරංග අබේසිංහ-
අර්බුදයට පත්ව සිටින පාලකයන් අන්තිම වටයේදී අයි.එම්.එෆ්. එකෙන් ණය අරගෙන, විදේශ ණය ගෙවීම් කල්දාගෙන අරගලයෙන් පළවා හැරි නායකයන් නැවත ගේන්න උත්සාහ කරනවා. ඒ දූෂිතයන් ගැන අපේ රටේ තරුණ තරුණියන් ඇතුළු සියලු ජනතාවට තේරුම් ගන්න පුළුවන් කියලා මම විශ්වාස කරනවා. ඒ අතර ජාතික ජන බලවේගය හැටියට අපි භාණ්ඩ බෙදාහැරීම් නොකරන නිසා ප්‍රතිපත්තිමය පොරොන්දු කිහිපයක් දෙනවා. ආර්ථික ප්‍රතිපත්ති ඇතුළු ප්‍රතිපත්ති හඳුන්වා දෙමින් බලය ලබා ගන්න තැනට සාමූහික ක්‍රියාවලියෙන් අපි ඇවිත් තිබෙන පසුබිමක පුරවැසියන් ජයග්‍රහණය කරවීමේ රැලියේදී මේ ප්‍රතිපත්තිමය පොරොන්දු දෙනවා. අපේ දෙමාපියන්ට, අපිට අහිමි වූ ලෝකයේ ඉහළම අධ්‍යාපනය ඔබේ දරුවන්ට ලබා දෙනවා. ඒ විතරක් නොවෙයි පාසලෙන් එළියට එන විට ඔවුන්ගේ හැකියාව අනුව රාජ්‍ය හෝ පෞද්ගලික අංශයේ රැකියා කරන්න, නැත්නම් ව්‍යවසායකයෙක් ලෙස කටයුතු කරන්න සුදුසු අධ්‍යාපනයක් අලුතින් හඳුන්වා දෙනවා. ඔවුන්ගේ ඒ අධ්‍යාපනය අපේ රට තුළ පමණක් නොවෙයි, ලෝකයේ රැකියා වෙළඳපොළ වෙනුවෙන් ගෞරවාන්විතව ලබාදීම අපේ වගකීමයි. අද විදේශ රැකියා කියලා යොමු කරවන්නේ ඒ රටවල් වල පුරවැසියන් කරන්න අකමැති රැකියා සඳහා අපේ අය යොමු කරවීමයි.
ඒ වගේම අපේ දරුවන්ට සුරක්ෂිත රැකවරණයක් ලබාදෙන සැමටම නීතියේ සාධාරණත්වය ස්ථාපිත කරන බවට පොරොන්දු දෙනවා. අපේ දරුවන්ගේ ආරක්ෂාව ඒ තුළින් තහවුරු කරනවා. ඊළඟට හැමදෙනාටම නිදහස් ජීවිතයක් ලබාදෙන්න පොරොන්දු වෙනවා. මම ඒ නිදහස් ජීවිතය ගත කළා. මම රැකියාව කරන්න පටන් ගත්තේ අවුරුදු 26දි. රැකියාව කළ මුළු කාලයේදීම සවස 6.30 වෙන කොට කටයුතු අවසන් කර, මගේ දරුවන් දෙදෙනාත් එක්ක ගත කරන්න පටන් ගන්නවා. විවේකී සති අන්තයක් ගත කළා. ඒ වගේ ආර්ථික නිදහසක් සියලු පුරවැසියන්ටම තිබෙන්න ඕනෑ. සතියකට පැය 40ක් වැඩ කළාම ජීවිතයේ කොටසක් ලෙස නිදහස භුක්ති විඳින්න ආර්ථික හැකියාවක් ගොඩනැගෙන්න ඕනෑ. මේ සංස්කෘතික වෙනස ළඟා කර ගැනීමේ අවස්ථාව අවුරුදු 76කට පස්සේ රටේ මුළුමහත් ජනතාවටම උදාවී තිබෙනවා. එය යථාර්ථයක් කර ගැනීමට පුත්තලම දිස්ත්‍රික්කයේ ජනතාව මාලිමාවේ අපේක්ෂක අනුර කුමාර දිසානායක සහෝදරයා ඉහළින්ම ජයග්‍රණය කරවමු.
“පවතින දුක්ඛිත තත්වය වෙනස් කිරීමේ වගකීම මාලිමාව බාරගන්න සූදානම්”
-ජාතික ජන බලවේගයේ පුත්තලම් දිස්ත්‍රික් විධායක සභික ගයාන් ජානක-
එළඹෙන ජනාධපතිවරණය වෙනුවෙන් පුත්තලම් දිස්ත්‍රික්කයේ ජනතාව විවිධ අංශවලින් සංවිධානය කරමින් ඉතා හොඳින් සූදානම් කර තිබෙනවා. ධීවර ජනතාව, ගොවි ජනතාව, කාන්තාවන්, වැඩකරන ජනතාව වශයෙන් සංවිධානය කරමින් පැමිණි ගමනේ සාර්ථක ප්‍රතිඵල අත්කරගෙන තිබෙනවා. මේ දිස්ත්‍රික්කයේ සෑම ග්‍රාම සේවා වසමකම ජාතික ජන බලවේගයේ කොට්ඨාස සභා පිහිටුවා අවසන්. මේ මාසය තුළ මැතිවරණ සංවිධාන පිහිටුවමින් යනවා. සෑම ඡන්ද කොට්ඨාසයකටම මැතිවරණ කමිටු පිහිටුවීම ලබන 10 වැනිදා වන විට අවසන් කරනවා. අද මේ මොහොත වන විටත් පාසල් යන දරු දැරියන්ගෙන් ලක්ෂ 14කට උදේ ආහාරය නැතිව පාසල් යන්න සිදුවී තිබෙනවා. පවතින දුක්ඛිත තත්වය වෙනස් කිරීමේ වගකීම ජාතික ජන බලවේගය බාරගන්න සූදානම්. ඉදිරි කාලය තුළදී තවදුරටත් ශක්තිමත් වෙමින් මැතිවරණ ජයග්‍රහණය වෙනුවෙන් වඩාත් ශක්තියෙන් සහ ධෛර්යයෙන් පෙළගැසෙමු කියා ආරාධනා කරනවා.
“අලි – මිනිස් ගැටුමට මාලිමාවේ පාරිසරික කමිටුව යටතේ විසඳුම් සකස් කර අවසන්”
-ජාතික ජන බලවේගයේ ජාතික විධායක කමිටු සාමාජික මහාචාර්ය චන්දන අබේරත්න-
ජාතික ජන බලවේගයේ ප්‍රතිපත්ති කමිටු අතරින් ධීවර කටයුතු සම්බන්ධයෙන් සකස් කරන ප්‍රතිපත්තියේදී පුත්තලම දිස්ත්‍රික්කයේ ධීවර ජනතාව කෙරෙහි විශේෂ අවධානයක් යොමුකර තිබෙනවා. මේ දිස්ත්‍රික්කයේ ධීවර වරාය සහ තොටුපොළවල් විනාශවීමට ඉඩ හැරීම, ධීවර ආම්පන්නවල මිල ගණන් දරාගත නොහැකිවීම වගේම ඉන්ධන මිල ගණන් ඉහළ යාම සම්බන්ධයෙන් අපේ අවධානය යොමුකර තිබෙනවා. අප්‍රමාණ ගැටලු මැද්දේ නෙළාගෙන එන ධීවර අස්වැන්නට සාධාරණ මිලක් ලබාදීමේ අවස්ථාවක් මේ දක්වා ලබාදී නැහැ. ඒ සම්බන්ධයෙන් මූලික සැලසුම් සකස් කර ඇති අතර, මේ දිස්ත්‍රික්කයේ සංවර්ධනය කළ හැකි සංචාර ව්‍යාපාරයේ ශක්‍යතා අධ්‍යයනය කරමින් සිටිනවා. අද වෙන කොට සංචාරකයන්ගේ වීසා නිකුත් කිරීමෙනුත් කොල්ලකන පාලනයක් තිබෙනවා. ඊට අමතරව අපේ දිස්ත්‍රික්කයට තිබුණු සිමෙන්ති කර්මාන්ත ශාලාවත් වනසා දැමූ පාලකයන් හිටියා. ඒ වෙනුවට මේ දිස්ත්‍රික්කය තුළ සංවර්ධනය කළ හැකි කර්මාන්ත ශාලා සංවර්ධනය වෙනුවෙන් සියලු ක්ෂේත්‍රවල හැකියාවන් සොයා බලමින් සැලසුම් සකස් කර තිබෙනවා. අලි-මිනිස් ගැටුමට ගොදුරු වී තිබෙන කරුවලගස්වැව, නවගත්තේගම, ඇතුළු ප්‍රදේශවල බරපතළ ප්‍රශ්නය විසඳීමට පාරිසරික කමිටුව යටතේ විසඳුම් සකස් කර අවසන්. සැප්තැම්බර් 21දින අනුර සහෝදරයා ජනාධිපති ධුරයට පත්කරවන්නේ මේ සියලු සංවර්ධන සැලසුම් සමගින් බව අපි අවධාරණය කරනවා.
“අපි විවිධ බලවේග එකතු කළේ සියලු පුරවැසියන්ට යහපත් අනාගතයක් හදන්න”
-ජාතික ජන බලවේගයේ ජාතික විධායක සභික මවුලවි මුනීර් මුලෆ්ෆර්-
අවට ප්‍රදේශවල රනිල් ජනාධිපති කියලා පෝස්ටර් ගහලා තිබෙනවා. අපි ඒ බව පිළිගන්නවා. හැබැයි සැප්තැම්බර් 21 වන තුරු පමණයි. නියත වශයෙන්ම අනුර කුමාර දිසානායක සහෝදරයා ඡන්දයෙන් ජනාධිපති ලෙස තේරී පත්වෙන බව මතක තියාගන්න ඕනෑ. “එක්ව ජය ගමු”, කියලා සටන් පාඨ පටන් ගන්නවා. ඒ ජය කාටද? මේ රටේ ජනතාවට නොවෙයි, ඔවුන්ගේ පැළැන්තියට. ජනතාවගේ ජයග්‍රහණය තියෙන්නේ ජාතික ජන බලවේගයේ පමණක් කියන එක අවධාරණයෙන් කියන්න කැමතියි. ඔවුන්, ඔබ ළඟට ඇවිත් අවුරුදු ගණනාවක් තිස්සේ විවිධ බලවේග හැදුවේ ඔවුන්ට බලය ගන්නයි. ජාතික ජන බලවේගය රට පුරා යමින් විවිධ බලවේග එකතු කළේ ආණ්ඩුවක් හදන්න නොවෙයි; රටේ සියලුම පුරවැසියන්ට යහපත් අනාගතයක් හදන්න. පොහොට්ටුවේ ඉන්න ඔක්කොම හොරු ස.ජ.බ. වේදිකාවට ගොඩවුණු හැටියේ හොඳ වෙන්නේ කොහොමද කියලා සමාජ මාධ්‍යවල ප්‍රශ්න කර තිබුණා. ජාතික ජන බලවේගය වටා එක්වී සිටින්නේ හොරුන් සමග සිටි බලවේග නොව ජනතාව සමග සිටි බලවේග බව අවධාරණය කරන්න ඕනෑ. අදූෂිතව කටයුතු කළ හැකි එකම බලවේගය ජාතික ජන බලවේගය පමණක් බව රටම තේරුම්ගෙන තිබෙනවා.
“විඳි දුක් අවසන් කර ලස්සන රටක් හදන්න අපි හැමෝම එක්වෙන්න ඕනෑ”
-ජාතික ජන බලවේගයේ ජාතික විධායක සභික සමන්මලී ගුණසිංහ-
මේ රටේ ගැහැනුන් වන අපි ගමක් ගමක් ගානේ, ආයතනයක් ආයතනයක් ගානේ ගොස්, ගැහැනුන්ට අවදි වෙන්න කියලා ආරාධනා කළා. තම තමන්ගේ ලෝකවල් හදාගෙන තම තමන්ගේ පවුල්වලට අනාගතය නිර්මාණය කරන්න හදපු අතීතයෙන් මිදී අපේ රටේ ගැහැනුන් එළියට ඇවිත් සිටින්නෙ මේ රටේ ජනතාව, අනාගතය සහ දරුවන් ජයග්‍රහණය කරවන්නයි. මෙතෙක් කල් මේ රටේ ජනතාව සමග ගැහැනුන් විදිහට අපිත් සොයා යමින් තිබූ පාර හැමෝම පැැහැදිලි කරගෙන තිබෙනවා. සැප්තැම්බර් 21 දක්වා ඒ ගමන ධෛර්යයෙන් යන්න ඕනෑ. ඒ වගේම අපේ යහළුවන්, නෑදෑයන්, සියලු දෙනාටම ජාතික ජන බලවේගයේ පවුලත් එක්ක එකතු වෙන්න ඕනෑ කියලා ආදරයෙන්, ආරාධනා කරන්න ඕනෑ. මේ දිස්ත්‍රික්කයේ කර්මාන්ත ගණනාවකට විභවයක් තිබුණාට ආදරණීය අම්මලා වැඩිපිරිසක් ඉන්නේ මැදිපෙරදිග රැකියාවලයි. සහෝදරියන් වැඩි පිරිසක් ඉන්නේ විදේශ රැකියාවලයි. සැමියන් විශාල පිරිසක් ඉන්නේ විදේශ රටවලයි. එහෙම නැත්නම් නිදහස් වෙළඳ කලාපයේ කුකුල් පැටවුන් වගේ කාමරවලට ගාල් කර තිබෙනවා. අපි හැමෝම මේ දක්වා විඳි දුක් අවසන් කර, ලස්සන රටක් හදන්න අපි හැමෝම එක්වෙන්න ඕනෑ.
